खानिःत् 35 - लिम्बुले़बिहाॽरे़ खुन्छिॽ खोमा लक् 1 यरिहो कुदोःप्मा नाङ्गे़न् पिसाङ् यर्दन वहःङ्ङिल्ले़ कुयाओ मोआबबा ने़ने़बादे़न्नो यहवे दाङ्बे़ल्ले़ मोसान् मे़त्तु, 2 “खिनिॽ युक्को के़धाबा लक्लाम् ले़बिहाॽ युङ्मारे़ लागि ये़क्यक्हाॽ पिरे़म्सिम्मे़ॽ फाॽआङ् इस्राइलिहाॽ इङ्जाङ् पिरे़से़ॽ॥ हे़क्क्याङ् खे़न् ये़क्यक्हाॽरे़ कब्रिङ् पिसाङ्बा थक्सा चाराम्मादे़न्नोबा लाजेॽहाॽ ले़बिहाॽ पिरे़म्सिम्मे़ॽ॥ 3 ये़क्यक्हाॽओ चाए खे़ङ्हाॽ मे़युङ्ल॥ पित्थक्सा चाराम्मादे़न्हाॽ चाए खे़ङ्हाॽरे़ खुन्छिॽ पिप्मा पित्, मे़ल्लुक् मे़ःन्दा नु खुन्छिॽ वेॽ थक्साहाॽरे़ लागि पोङ्ल॥ 4 “ये़क्यक्हाॽओबा आत्तिन् आत्तिन् पित्थक्सा चाराम्मादे़न्हाॽ खिनिॽ ले़बिहाॽ के़बिरुम्सिम्ॽ, खे़न् ये़क्यक्हाॽओबा लुङ्धाक्हाॽलाम् १,००० हुक्सिक् माःङ्घा थारिक् फे़भे़ के़लॽबा के़बेःक्पा पोङ्मा पोङ्ॽ॥ 5 ये़क्यक्किल्ले़ लाःक्कात् ले़प्माङ् नाङ्गे़न् पिसाङ् २,००० हुक्सिक्, लाङ्गे़त् पिसाङ् २,००० हुक्सिक्, नाम्धा पिसाङ् २,००० हुक्सिक् नु थाङ्गे़त् पिसाङ् २,००० हुक्सिक्, ये़क्यक्किन् कुलुम्मो चुक्ल सिःक्ते़म्मे़ॽ॥ खे़ङ्हाॽरे़ खुन्छिॽ ये़क्यक्कोबा पित्थक्सा चाराम्मादे़न्निन् हाबा कन्लो॥ से़ःप्सिङ्मादे़न् ये़क्यक्हाॽ ( साम्यो इङ् १९:१-१३ ; यहो २०:१-९ ) 6 “खिनिॽ ले़बिहाॽ के़बिरुम्सिम्बा ये़क्यक्हाॽओ तुक्सिग से़ःप्सिङ्मा ये़क्यक् पोङ्ॽ॥ आन्जानिःल्ले़ मना के़से़प्पे़न् खे़प्मो खे़त्छिङ् पेःक्काङ् युङ्मा सुक्॥ कन्हाॽनुःल्ले़ वेॽ खिनिॽ ले़बिहाॽ लिबोङ्ङाङ् ने़त्छि ये़क्यक्हाॽ पिरे़म्सिम्मे़ॽ॥ 7 ले़बिहाॽ पिमासि के़बोङ्बा ये़क्यक् नु खे़प्मोबा पित्थक्सा चाराम्मादे़न्हाॽ के़रे़क्ले़ लिबोङ्ङाङ् ये़त्छि पोङ्मा पोङ्ॽ॥ 8 इस्राइलिहाॽओ यरिक् लक्के़घोबाहाॽलाम् यरिक् नु आजे़ःत्छिक्लक् लक्के़घोबाहाॽलाम् आजे़ःत्छिक्लक् ये़क्यक्हाॽ मे़त्तासिम्मे़ॽ॥ आत्तिन् आत्तिन्हाॽरे़ आक्ख्यारिक् ये़क्यक्हाॽ मे़गत्तुॽ, चिजे़प्ते़म्मे़ॽआङ् खे़न् कुइसिक् ये़क्यक्हाॽ ले़बिहाॽ पिरे़म्सिम्मे़ॽ॥” 9 यहवे दाङ्बे़ल्ले़ याम्मो मोसान् मे़त्तु, 10 “खे़ने़ॽ इस्राइलिहाॽ मे़त्ते़से़ॽ—‘खिनिॽ यर्दन वहःङ्ङिन् के़गाःक्तुम्मिल्ले़ कनान लाजेॽओ के़गे़रिआङ्, 11 खिनिॽ खे़प्मो कुभा से़ःप्सिङ्मा ये़क्यक्हाॽ सेगे़म्मे़ॽ, खम्भ्याङ् कुभारे़ आन्जानिःल्ले़ मना स्ये़रुने़भग्र खे़न् मना के़से़प्पे़न् खे़प्मो खे़त्छिङ् पेःक्ल॥ 12 माक्खिल्ले़ कुले़क्वा नुःक्मा के़गोःप्पालाम् खे़त्छिङ्मारे़ लागि खे़न् ये़क्यक्हाॽ से़ःप्सिङ्मादे़न् पोङ्ॽ, हे़क्क्याङ् खे़न् मना के़से़प्पे़न् खासे़न्ले़ लागि सङ्जुम्भोःल्ले़ खुन्छिॽ तगि मे़न्ये़म्मे़ थे़म्बा मे़न्छे़रुन्ल॥ 13 खिनिॽ के़बिरुम्सिम्बा से़ःप्सिङ्मादे़न् ये़क्यक्हाॽ तुक्सि यारिक् ने़र॥ 14 यर्दन कत्नाहाङ्दाङ् नाङ्गे़न् पिसाङ् सुम्सि, कनान लाजेॽओ सुम्सि से़ःप्सिङ्मा ये़क्यक्हाॽ से़न्दाम्मे़ॽ॥ 15 इस्राइलिहाॽ, वे़प्मिबाहाॽ नु खे़ङ्हाॽरे़ खुन्छिॽ लुम्मो के़युङ्बा वेॽ मनाहाॽरे़ लागि खे़न् ये़क्यक्हाॽओ तुक्सि चाए से़ःप्सिङ्मा ये़क्यक्हाॽ पोङ्ॽ॥ कम्भलॽरिक् आन्जानिःल्ले़ कुभा मना के़से़प्पा मनान् खे़प्मो खे़त्छिङ्मा पेःक्मा सुक्॥ 16 “‘कुभा मनाःल्ले़ फे़न्जेॽइल्ले़ कुभा मना हिप्तु स्ये़रुने़भग्र खे़ङ्ग मना के़से़प्पाएरो॥ खे़न् मनान् सिमे़ल्ले़ खुम्दिङ् पिमाए पोङ्ॽ॥ 17 कुभा मनाःल्ले़ कुभा लुङ्ङिल्ले़ ले़प्तुआङ् खे़न् स्ये़ने़भग्र खे़न् मना के़से़प्पाएरो॥ खे़न् मना के़से़प्पे़न् सिमे़ल्ले़ खुम्दिङ् पिमाए पोङ्ॽ॥ 18 इग्र कुभा मनाःल्ले़ सिङ् खजुम् खयान् याङ्सिङ्ङाङ् कुभा हिप्तुआङ् खे़न् स्ये़ने़भग्र खे़न् मना के़से़प्पाए पोङ्ॽ॥ खे़न् मना के़से़प्पे़न् सिमे़ल्ले़ खुम्दिङ् पिमाए पोङ्ॽ॥ 19 माक्खिल्ले़ कुले़क्वा माक्खिॽए नुःक्मा निङ्वाॽ के़जोःक्पा मनाःल्ले़ खे़न् मना के़से़प्पे़न् स्ये़रुर॥ खे़न् तुमुनुमे़ःन्ने खुने़ॽ खे़न् मना के़से़प्पे़न् स्ये़रुर॥ 20 कुभा मनाःल्ले़ चिःत्तुआङ् कुभा चन्दु स्ये़रु इग्र सिङ्आःत्तिल्ले़ ले़प्तु स्ये़रुॽ, 21 किग्र हुक्किल्ले़ हिप्तुआङ् कुभा स्ये़रुने़भग्र, के़हिप्पा मनान् से़प्माए पोङ्ॽ॥ खे़ङ्ग मना के़से़प्पारो॥ माक्खिल्ले़ कुले़क्वा माक्खिॽए कुले़क्वा नुःक्मा निङ्वा के़जोःक्पा मनाःल्ले़ खे़न् आत्ति तुमुॽ खे़प्मोए स्ये़रुर॥ 22 “‘कर कुभा मनाःल्ले़ कुभा आन्जानिःल्ले़ चन्दु स्ये़रुॽ, इग्र कुभा लुङ्सिङ् लाप्फुसुदेसुल्ले़ याङ्घुआङ् खे़न् स्ये़, 23 किग्र निङ्मि होःप्ते़बा नु खाःम्मा निङ्वाॽ मे़न्जोःक्मनाबा मनाःल्ले़ लाप्पुङ्देसुबा लुङ्ङिल्ले़ याङ्घुआङ् कुभा मना स्ये़ने़भग्र, 24 सङ्जुम्भोःल्ले़ मना के़से़प्पे़न् नु माक्खिॽ कुले़क्वा नुःक्मा निङ्वाॽ के़जोःक्पाल्ले़ खुन्छिॽ लुम्मो कन् थिम्हाॽ कुइसिक् खासे़न् चोःक्मासि पोङ्ॽ॥ 25 सङ्जुम्भोःल्ले़ खे़न् मना के़से़प्पे़न् माक्खिल्ले़ कुले़क्वा माक्खिॽ नुःक्मा निङ्वाॽ के़जोःक्पाल्ले़ कुहुक्कोलाम् मे़से़न्दुर, हे़क्क्याङ् खे़न् खे़त्छिङ्ङाङ् पेबा से़ःप्सिङ्मादे़न्नोए खे़न् मे़बाङ्घु मे़देसुर॥ खे़ब्याङ् सेसेबा निःङ्गेल्ले़ माङ्थोःक्मा के़बोङ्बा तुम् निङ्वाॽफुसाम्बान् मे़सिने़न्ल थारिक् खे़न् मनान् हाबा खे़प्मोए वाॽर॥ 26 “‘कर खे़न् मना के़से़प्पे़न् कुभा ये़म्मो खुने़ॽ खे़त्छिङ्ङाङ् पेबा से़ःप्सिङ्मादे़न् ये़क्यक्कोलाम् लाःक्कात् पे, 27 हे़क्क्याङ् माक्खिल्ले़ कुले़क्वा माक्खिॽ नुःक्मा के़गोःप्पे़ल्ले़ कम्भलॽरिक् खे़न् लाःक्कात् तुमुआङ् मना के़से़प्पे़न् स्ये़रुने़भग्र, खुने़ॽ माक्खिॽ के़से़बा आप्तिक्साबा मे़बोङ्ने़न्॥ 28 थेआङ्भे़ल्ले़ तुम् निङ्वाॽफुसाम्बान् मे़न्छिए थारिक् खुने़ॽ ये़क्यक्कोए से़ःप्सिङ्मारे़ लागि युङ्मा के़बोङ्बा वये़॥ तुम् निङ्वाॽफुसाम्बे़न् सिआङ्लक् खे़न् मनान् खुने़ॽ कुलक्खोमा लक् लाजेॽओ नुःङ्बेःक्ल॥ 29 “‘खिनिॽ आत्ति के़युङिसाङ् खिनिॽ नु खिनिॽ मनाहाॽरे़ खुन्छिॽ याङ्सिबा के़दाबा थाःक्हाॽओ कन् थिम्बे साक्थिम्मिन् कुइसिःक्सिःक् वाॽ॥ 30 “‘कुभा मनाःल्ले़ कुभा स्ये़रुने़भग्र खे़न् मना के़से़प्पे़न् ने़त्छि तोःन्दि के़बिबाहाॽरे़ पाःत्छुबा पर्माङ्गि कुइसिःक्लक् खुने़ॽ सिमे़ल्ले़ खुम्दिङ् खोसुर॥ कर लत्छा तोःन्दिरे़ पाःत्तुबा पर्माङ्गि पाःन्नोरक् हाःत्ताङ् सिमे़ल्ले़ खुम्दिङ् मे़बिरे़म्मिन्ने़ॽ॥ 31 “‘सिमे़ल्ले़ खुम्दिङ् खोमा के़लाॽबा मना के़से़प्पान् से़ःप्मारे़ लागि खिनिॽ कुधे़ॽमा याङ् मे़दाःक्ताम्मिन्ने़ॽ॥ खे़ल्ले़ सिमे़ल्ले़ खुम्दिङ् खोमाए पोङ्ॽ॥ 32 “‘से़ःप्सिङ्मा ये़क्यक्को के़घे़त्छिङ् के़बेःक्पोलाम् कुधे़ॽमा याङ् खिनिॽ मे़दाःक्ताम्मिन्ने़ॽ, खे़ब्याङ् तुम् निङ्वाॽफुसाम्बे़न् मे़न्छिए थारिक् खे़न् आबाङे कुबाङ्भेॽओ नुःङ्माबेःक्मा मे़घोने़न्ल॥ 33 “‘खिनिॽ आप्फेक् लाजेॽहाॽ आसुत्थो मे़जोगे़म्मिन्ने़ॽ॥ थेआङ्भे़ल्ले़ माक्खिल्ले़ लाजेन् आसुत्थो चोगुॽ, माक्खिॽ कसे़बे़ल्ले़ कुमाक्खिन्नुःल्ले़ वेॽ आत्तिन् माक्खिल्ले़आङ् खे़न् माक्खिॽ के़से़बा लाजेःल्ले़ लागि लायोल्ले़ लागि ले़प्मि नाःक्मा सुक्मे़दे़त्ने़न्॥ 34 खिनिॽ आप्फेक् के़युङिबा लाजेन् आसुत्थो मे़जोगे़म्मिन्ने़ॽ, खे़प्मो आङ्गाॽआङ् वाॽआ, थेआङ्भे़ल्ले़ आङ्गाॽ यहवे दाङ्बे़न् इस्राइलिहाॽरे़ खुन्छिॽ लुम्मो वाॽआरो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.