खानिःत् 33 - लिम्बुमिस्रलाम् मोआब थारिक्पा लाम्दिक् 1 मोसान् नु हारुनरे़ मिस्रलाम् लाम्लोसु फे़त्ते़सुसिबा इस्राइलिहाॽरे़ मिस्र लाजेन् मे़ले़रुआङ् एगाङ् खे़ङ्हाॽरे़ आत्तिन् आत्तिन् ते़न्हाॽओ साःङ्गाहिम्हाॽ मे़जोगु खे़न् ते़न्हाॽरे़ पोधक्किन् हाबा कन्लो॥ 2 लाम्दिक् मे़जोगे़बा वेॽवेॽ ते़न्हाॽओ यहवे दाङ्बे़ल्ले़ इङ्जाङ् चोगुबा कुइसिक् मोसाःल्ले़ लाम्दिक् चोःक्मा मे़हेःक्तुबा ते़न्हाॽरे़ कुमिङ् साप्तु॥ खे़ङ्हाॽरे़ लाम्दिक् मे़जोगुबा ताॽजे़ङ् पाःन्हाॽ अक्तङ्बा चोक्लो— 3 थिक्सिगेक्पा ला थिबोङ्ङाङ् ङासिगेक्पा ये़न्नो खे़ङ्हाॽ रामसेसलाम् मे़धासिङ् मे़भे़रे़॥ थिक्सिगेक्पा चोःक्युम्भोःल्ले़ कुदाःन्दिक्समा के़रे़क् मिस्रिहाॽरे़ खुन्छिॽ तगि इस्राइलिहाॽ कुदुङ्दुङ् मे़धासिङ् मे़भे़रे़॥ 4 खे़न् ये़म्मो मिस्रिहाॽरे़ चाए यहवे दाङ्बे़ल्ले़ स्ये़रुसिबा खुन्छिॽ तुम्बा साहाॽ चेलुप् खःङ्लुप् मे़प्मा मे़जोगुसिर मे़यागे़॥ थेआङ्भे़ल्ले़ यहवे दाङ्बे़ल्ले़ खे़ङ्हाॽरे़ खुन्छिॽ माङ्हाॽ खासे़न् चोगुसिआङ् मे़वये़॥ 5 इस्राइलिहाॽ रामसेसलाम् लाङ्मे़घेगे़ मे़भे़रे़ हे़क्क्याङ् सुक्कोतओ मे़गे़रे़आङ् याङ्मे़धोःक्ते़॥ 6 खे़ङ्हाॽ सुक्कोतलाम् लाङ्मे़घेगे़आङ् मुरे़क् खारे़क् थेआङ् के़होःप्पादे़न्निल्ले़ कुयाओबा एथामओ याङ्मे़धोःक्ते़॥ 7 एथामलाम् लाङ्मे़घेगे़आङ् बाल सेफोन नाङ्गे़न् ले़प्माङ्बा पि-हहिरोतओ मे़नुःक्खे़, हे़क्क्याङ् मिग्दोलनु निःत्ताङ् याङ्मे़धोःक्ते़॥ 8 खे़ङ्हाॽ पि-हहिरोतलाम् मे़लःन्दे़आङ् हे़ःत्ताङ्बा वरःङ्ङिल्ले़ कुलुम्मोलाम् मे़बोःक्खे़र मुरे़क् खारे़क् थेआङ् के़होप्पादे़न्नो मे़लासे़॥ खे़ङ्हाॽ सुम्यान्बा लाम् एथामबा मुरे़क् खारे़क् थेआङ् के़होप्पादे़न्नो लाङ्मे़घेगे़आङ् माराओ याङ्मे़धोःक्ते़॥ 9 मारालाम् लाङ्मे़घेगे़आङ् एलिमओ मे़बे, खे़प्मो थिबोङ्ङाङ् ने़त्छि च्वाःत् वाबुन्दाक्वा ने़स्से़ हे़क्क्याङ् नुबोङ् खे़बक्सिङ्हाॽ युङे़॥ खे़ङ्हाॽ आम्भा खे़प्मो याङ्मे़धोःक्ते़॥ 10 खे़ङ्हाॽ एलिमलाम् लाङ्मे़घेगे़आङ् हे़ःत्ताङ्बा वरःङ्ङिल्ले़ कुबेसाङ् याङ्मे़धोःक्ते़॥ 11 खे़ङ्हाॽ हे़ःत्ताङ्बा वरःङ्ङोनु लाङ्मे़घेगे़आङ् सिनबा मुरे़क् खारे़क् थेआङ् के़होप्पादे़न्नो याङ्मे़धोःक्ते़॥ 12 खे़ङ्हाॽ सिनबा मुरे़क् खारे़क् थेआङ् के़होःप्पादे़न्नोलाम् लाङ्मे़घेगे़आङ् दोफकाओ याङ्मे़धोःक्ते़॥ 13 खे़ङ्हाॽ दोफकालाम् लाङ्मे़घेगे़आङ् आलुसओ याङ्मे़धोःक्ते़॥ 14 आलुसलाम् लाङ्मे़घेगे़आङ् रपिदिमओ याङ्मे़धोःक्ते़, खे़प्मो मनाहाॽरे़ लागि थुङ्मा च्वाःत् मे़ने़स्से़न्॥ 15 खे़ङ्हाॽ रपिदिमलाम् लाङ्मे़घेगे़आङ् सिनैबा मुरे़क् खारे़क् थेआङ् के़होप्पादे़न्नो याङ्मे़धोःक्ते़॥ 16 खे़ङ्हाॽ सिनैबा मुरे़क् खारे़क् थेआङ् के़होःप्पादे़न्नोलाम् लाङ्मे़घेगे़आङ् किब्रोथ-हत्तावाओ याङ्मे़धोःक्ते़॥ 17 खे़ङ्हाॽ किब्रोथ-हत्तावालाम् लाङ्मे़घेगे़आङ् हसेरोतओ याङ्मे़धोःक्ते़॥ 18 खे़ङ्हाॽ हसेरोतलाम् लाङ्मे़घेगे़आङ् रित्नाओ याङ्मे़धोःक्ते़॥ 19 खे़ङ्हाॽ रित्नालाम् लाङ्मे़घेगे़आङ् रिम्मोन-फारेसओ याङ्मे़धोःक्ते़॥ 20 खे़ङ्हाॽ रिम्मोन-फारेसलाम् लाङ्मे़घेगे़आङ् लिब्नाओ याङ्मे़धोःक्ते़॥ 21 खे़ङ्हाॽ लिब्नालाम् लाङ्मे़घेगे़आङ् रिस्साओ याङ्मे़धोःक्ते़॥ 22 खे़ङ्हाॽ रिस्सालाम् लाङ्मे़घेगे़आङ् केहेलाताओ याङ्मे़धोःक्ते़॥ 23 खे़ङ्हाॽ केहेलातालाम् लाङ्मे़घेगे़आङ् सेपेर कोःक्माओ याङ्मे़धोःक्ते़॥ 24 खे़ङ्हाॽ सेपेर कोःक्माओनु लाङ्मे़घेगे़आङ् हरादाहओ याङ्मे़धोःक्ते़॥ 25 खे़ङ्हाॽ हरादालाम् लाङ्मे़घेगे़आङ् मखेलोतओ याङ्मे़धोःक्ते़॥ 26 मखेलोतलाम् लाङ्मे़घेगे़आङ् तहतओ याङ्मे़धोःक्ते़॥ 27 खे़ङ्हाॽ तहतलाम् लाङ्मे़घेगे़आङ् तेरहओ याङ्मे़धोःक्ते़॥ 28 खे़ङ्हाॽ तेरहलाम् लाङ्मे़घेगे़आङ् मित्काओ याङ्मे़धोःक्ते़॥ 29 खे़ङ्हाॽ मित्कालाम् लाङ्मे़घेगे़आङ् हसमोनाओ याङ्मे़धोःक्ते़॥ 30 खे़ङ्हाॽ हसमोनालाम् लाङ्मे़घेगे़आङ् मसेरोतओ याङ्मे़धोःक्ते़॥ 31 खे़ङ्हाॽ मसेरोतलाम् लाङ्मे़घेगे़आङ् बनेयाकानओ याङ्मे़धोःक्ते़॥ 32 खे़ङ्हाॽ बने-याकानलाम् लाङ्मे़घेगे़आङ् होर-हगिदगादओ याङ्मे़धोःक्ते़॥ 33 खे़ङ्हाॽ होर-हगिदगादलाम् लाङ्मे़घेगे़आङ् योतबाताओ याङ्मे़धोःक्ते़॥ 34 खे़ङ्हाॽ योतबातालाम् लाङ्मे़घेगे़आङ् अब्रोनाओ याङ्मे़धोःक्ते़॥ 35 खे़ङ्हाॽ अब्रोनालाम् लाङ्मे़घेगे़आङ् एस्योन-गेबेरओ याङ्मे़धोःक्ते़॥ 36 खे़ङ्हाॽ एस्योन-गेबेरलाम् लाङ्मे़घेगे़आङ् जिनबा मुरे़क् खारे़क् थेआङ् के़होप्पादे़न्नो के़ने़बा कादेसओ याङ्मे़धोःक्ते़॥ 37 खे़ङ्हाॽ कादेसलाम् लाङ्मे़घेगे़आङ् ए़दोम लाजेॽओबा इःन्दोओ के़युङ्बा होर थे़गुओ याङ्मे़धोःक्ते़॥ 38 खे़प्मो निङ्वाॽफुसाम्बा हारुने़ल्ले़ यहवे दाङ्बाल्ले़ कुइङ्जाङ्ङिन् खे़प्सुआङ् होर थे़गुःत्थाःङ् थोःक्सिङ् पे, हे़क्क्याङ् इस्राइलिहाॽ मिस्र लाजेॽलाम् मे़लःन्दे़ मे़भे़रे़बा लिबोङ् तङ्बे एगाङ् ङासिगेक्पा ला के़रे़बा थिक्सिगेक्पा ये़न्नो खुने़ॽ मासिङ्॥ 39 होर कोःक्माओ हारुने़न् मासिङ्ङे़ल्ले़ खुने़ॽ १२३ तङ्बे के़रे़आङ् वये़॥ 40 कनानबा नेगेव मे़प्मनाबा लाजेॽओ के़युङ्बा आरादबा कनानि हाङ्ङिल्ले़ इस्राइलिहाॽ मे़भे़न्ल मे़बत् के़लॽबा इङ्घङ् खे़प्सु॥ 41 खे़ङ्हाॽ होर कोःक्मा फाङ्जङ्लाम् लाङ्मे़घेगे़आङ् सलमोनाओ याङ्मे़धोःक्ते़॥ 42 खे़ङ्हाॽ सलमोनालाम् लाङ्मे़घेगे़आङ् पुनोनओ याङ्मे़धोःक्ते़॥ 43 खे़ङ्हाॽ पुनोनलाम् लाङ्मे़घेगे़आङ् ओबोतओ याङ्मे़धोःक्ते़॥ 44 खे़ङ्हाॽ ओबोतलाम् लाङ्मे़घेगे़आङ् मोआबबा इःन्दोओ के़ने़बा इये-अबारिमओ याङ्मे़धोःक्ते़॥ 45 खे़ङ्हाॽ इये-अबारिमलाम् लाङ्मे़घेगे़आङ् दिबोन-गादओ याङ्मे़धोःक्ते़॥ 46 खे़ङ्हाॽ दिबोन-गादलाम् लाङ्मे़घेगे़आङ् अल्मोन-दिब्लातैमओ याङ्मे़धोःक्ते़॥ 47 खे़ङ्हाॽ अल्मोन-दिब्लातैमलाम् लाङ्मे़घेगे़आङ् नेबो कोःक्माल्ले़ कुबेसाङ् अबारिमबा कोःक्माहाॽओ याङ्मे़धोःक्ते़॥ 48 खे़ङ्हाॽ अबारिमबा कोःक्माहाॽओलाम् लाङ्मे़घेगे़आङ् यर्दन वहःङ्ङिल्ले़ कुयाओ यरिहो कुदोःप्मा नाङ्गे़न् पिसाङ् यर्दन वहःङ्ङिल्ले़ कुयाओ मोआबबा ने़ने़बादे़न्नो याङ्मे़धोःक्ते़॥ 49 यर्दन वहःङ्ङिल्ले़ कुयाओबा मोआबबा ने़ने़बादे़न्नो बेथ-यसिमोतलाम् हाबिल-सित्तिम थारिक्के खे़ङ्हाॽ याङ्मे़धोःक्ते़रो॥ कनानिहाॽ लःप्मादेमासि इङ्जाङ् 50 खे़ब्याङ् यरिहो कुदोःप्मा नाङ्गे़न् पिसाङ् यर्दन वहःङ्ङिल्ले़ कुयाओ मोआबबा ने़ने़बादे़न्नो यहवे दाङ्बे़ल्ले़ मोसान् मे़त्तु, 51 “खे़ने़ॽ इस्राइलिहाॽ अक्खे मे़त्ते़से़ॽ—‘आल्ल खिनिॽ यर्दन वहःङ्ङिन् के़गाःक्तुम्माङ् कनान लाजेॽओ के़गे़रिॽ, 52 खे़ब्याङ् खिनिॽ खे़न् लाजेॽओबा यक्युङ्बाहाॽ के़रे़क् खे़प्मोलाम् नाःत्ते़म्देसे़म्सिम्मे़ॽ, हे़क्क्याङ् खे़ङ्हाॽरे़ खुन्छिॽ खोःम्मना लक्मनाबा चइःत्हाॽ नु योःम्मनाबा नावाइत्लाहाॽ के़रे़क् खाप्पुथ्यःङ् चोगे़म् पिरे़म्सिम्मे़ॽ॥ खे़ङ्हाॽरे़ खुन्छिॽ कोःक्माओबा माङ्धाःन्हाॽ लुःन्दे़म् पिरे़म्सिम्मे़ॽ॥ 53 खे़न् लाजेन् हुक्को थासे़म्मे़ॽआङ् खिनिॽ खे़प्मो युङे़म्मे़ॽ, थेआङ्भे़ल्ले़ खे़न् लाजेन् युक् चोःक्मारे़ लागि आङ्गाॽ खिनिॽ पिनिङ्ङाङ् ने़रो॥ 54 खिनिॽ आप्फेक् आप्फेक् थाःक् कुइसिक् खे़न् लाजेॽओ तॽयाःन्सोन् के़से़म्मे़ॽआङ् खिनिॽ लक्हाॽ फःक्खे़म्मे़ॽ॥ यरिक् हिम्सयङ् के़वाॽबा थाःक्हाॽ यम्बा युक् पिरे़म्सिम्मे़ॽ, हे़क्क्याङ् सुःल्लिक् हिम्सयङ् के़वाॽबा थाःक्हाॽ चुक्पा युक् पिरे़म्सिम्मे़ॽ॥ हाःत्ले़ कुदॽयाःन्सोःन्निन् आत्ति थाःॽ खे़न् खुने़ॽइन्ने पोङ्ल॥ खिनिॽ पाधे़बाहाॽरे़ खुन्छिॽ थाःक् कुइसिक् खिनिॽ खोमा लक्हाॽ हासे़म्मे़ॽ॥ 55 “‘कर खिनिॽ खे़न् लाजेॽओबा यक्युङ्बाहाॽ के़न्नाःत्तुम् के़न्देसुम्सिम्मे़न्ने़भग्र, खे़प्मो युङ्मा के़भाःक्तुम्सिम्बाहाॽग खिनिॽ मिक्को के़लाःप्पा साक्चिॽ नु थक्किन् के़धुप्पा तिङ् हे़क्तङ्बा मे़बोङ्ॽ, खम्भ्याङ् खिनिॽ आत्ति के़युङिसाङ् खे़ङ्हाॽरे़ तुक्खे के़म्जाःत्तिॽ॥ 56 हे़क्क्याङ् आङ्गाॽ खे़ङ्हाॽ थे़मा मे़त्तुङ्सिङ्ॽ फाॽआङ् इःत्तुङ्ङाङ् वये़, खे़न् आङ्गाॽ खिनिॽ मे़त्निङ्लो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.