खानिःत् 31 - लिम्बुइस्राइलिहाॽरे़ मिध्यानिहाॽ मे़नाःन्दुसि 1 यहवे दाङ्बे़ल्ले़ मोसान् मे़त्तु, 2 “इस्राइलिहाॽरे़ खुन्छिॽ लागि मिध्यानिहाॽओ खे़ने़ॽ कुले़क्वा नुःक्ते़ॽ॥ खे़न् एगाङ् खे़ने़ॽ के़सिआङ् आबाङे के़सुधे़बा के़दाक्थे़बाहाॽनु सोरिक् पोङ्से़ के़बेःक्॥” 3 खे़ब्याङ् मोसाःल्ले़ मनाहाॽ अक्खे मे़त्तुसि, “मिध्यानिहाॽनु ते़न्धङ् चोःक्मारे़ लागि हे़क्क्याङ् खुन्छिॽओ यहवे दाङ्बे़ल्ले़ कुले़क्वा नुःक्मारे़ लागि खिनिॽ मनाहाॽओलाम् कुभा मनाहाॽ यारिप् चोगे़म्सिम्मे़ॽ॥ 4 इस्राइलबा थाःक्थक्मा १,००० थिक्थिक् मनाहाॽ थङ्ङो खिनिॽ पाङ्घाम्सिम्मे़ॽ॥” 5 कल्ले़चोगुल्ले़ इस्राइलि थाःक्थक्मा ते़न्धङ्ले़ लागि १,००० थिक्थिक् मनाहाॽ मे़भुक्खुसि हे़क्क्याङ् १२,००० थक्सुबाहाॽ मे़लःत्तुसि॥ 6 मोसाःल्ले़ के़रे़क् थाःक्हाॽओलाम् थाःक्थक्मा १,००० थिक्थिक् थङ्ङो पाङ्घुसि, हे़क्क्याङ् खे़ङ्हाॽनु सोरिक् निङ्वाॽफुसाम्बा एलाजारे़ल्ले़ कुस्सा पिनहासे़न् सेसेदे़न्नोबा सामापुमाहाॽ नु थङ् मिक्सेःन् मुःप्नाबा थुत्थुरिःप्पाहाॽ हुक्मे़सुप्तुआङ् मे़बाङ्घुमे़देसु॥ 7 यहवे दाङ्बे़ल्ले़ मोसान् इङ्जाङ् पिरुबा कुइसिक् खे़ङ्हाॽ मिध्यानिहाॽनु ते़न्धङ् मे़जोगे़, हे़क्क्याङ् खे़ङ्हाॽरे़ खुन्छिॽ के़रे़क् ये़म्बित्छा मनाहाॽ मे़से़रुसि॥ 8 के़सिबाहाॽओ मिध्यानबा एबि, रेकेम, सुर, हुर नु रेबा ङासि हाङ्हाॽ मे़वये़॥ खे़ङ्हाॽरे़ बओररे़ कुस्सा बालामे़न्नाङ् ताभेःल्ले़ मे़से़रु॥ 9 इस्राइलिहाॽरे़ मिध्यानि ये़म्बित्छाहाॽरे़ खुन्छिॽ मेःत्हाॽ नु मे़न्छुमा ये़म्बित्छा हिन्जाॽबित्छाॽआङ् मे़दे़म्सु मे़देॽरुसि, हे़क्क्याङ् खे़ङ्हाॽरे़ खुन्छिॽ के़रे़क् पित्हाॽ, मे़ल्लुक्हाॽ नु याङ्साकुन्धेहाॽ मे़देॽरु मे़बिरुसि॥ 10 खे़ङ्हाॽ मे़युङे़बा के़रे़क् ये़क्यक्हाॽ नु साःङ्गाहिम्हाॽआङ् मिमे़धिक्खु मे़बिरुसि॥ 11 खे़ङ्हाॽरे़ हुक्काप् मे़जोगुसिबा के़रे़क्, थक्साहाॽ नु याङ्साकुन्धे चिगक्वाहाॽग मे़देॽरुआङ् मे़बे॥ 12 हे़क्क्याङ् यरिहो कुदोःप्मा नाङ्गे़न् पिसाङ् यर्दन वहःङ्ङिल्ले़ कुयाओ मोआबबा ने़ने़बादे़न्नोबा साःङ्गाहिम्मो मोसा, निङ्वाॽफुसाम्बा एलाजारे़न् नु इस्राइलि सङ्जुम्भोःल्ले़ खुन्छिॽ तगि खे़न् मे़दे़म्सु मे़देॽरुसिबाहाॽ, थक्साहाॽ नु याङ्साकुन्धे चिगक्वाहाॽ मे़देॽरु॥ 13 मोसा, निङ्वाॽफुसाम्बा एलाजार नु सङ्जुम्भोओबा के़रे़क् लाम्लोबाहाॽ खे़ङ्हाॽरे़ खुन्छिॽ तुम्से़ साःङ्गाहिम् लाःक्कात् मे़लःन्दे़॥ 14 थङ्ङोलाम् के़नुःङ्बा थक्सुबाहाॽरे़ खुन्छिॽ हे़न्छिङ् नु किप् थिक्काङ् थोबा थक्पेबा हे़क्क्याङ् थक्मोबाहाॽनु मोसान् कुयाःक्ले़ॽरे़॥ 15 मोसाःल्ले़ खे़ङ्हाॽ मे़त्तुसि, “थे के़रे़क् मे़न्छुमाहाॽ खिनिॽ कुहिङ्वे़त् के़ले़रुम्सिम्बि? 16 ओमे़त्ते़म्मे़ॽ, बालामे़ल्ले़ मुरा मे़त्तुसिआङ् पोरओ हाबा कन्हाॽरे़ए इस्राइलिहाॽ यहवे दाङ्बे़ल्ले़ कुदक्ले़ङ्वाओ फे़न्याःम्बक् चोःक्मा मे़बाङ्घुसिआङ् वये़॥ कल्ले़चोगुल्ले़ यहवे दाङ्बे़ल्ले़ कुसङ्जुम्भोओ मिङ्देॽआङ् पोगे़आङ् वये़॥ 17 कल्ले़चोगुल्ले़ के़रे़क् हिन्जाॽबित्छाॽहाॽओ ये़म्बित्छा अङे़ःक्वाहाॽ नु ये़म्बित्छानु सोरिक् के़ने़मा के़सुःप्मा मे़न्छुमाहाॽ से़रे़म्सिम्मे़ॽ॥ 18 कर कुमेःक्खिम् मे़म्बोङ्ङे के़वाॽमा मे़न्छ्याहाॽ चाए खिनिॽ आप्फेक् लागि कुहिङ्वे़त् कत्ते़म्सिम्मे़ॽ॥ 19 “खिनिॽओ आत्तिन्हाॽरे़ कुभा मना के़से़रुम्सिम्माङ् वाॽ इग्र चे के़सुसुम्माङ् वाॽ, खे़ङ्हाॽ के़रे़क् साःङ्गाहिम्लाम् लाःक्कात् नुसि ये़न् थारिक् युङ्मा पोङ्ॽ॥ सुम्सिगेक्पा नु नुसिगेक्पा ये़न्नो खिनिॽ आप्फेक् नु के़दे़म्सुम् के़दारुम्सिम्बाहाॽआङ् सुत्थो चोगे़म्सिम्मे़ॽ॥ 20 के़रे़क् चाङ्हाॽ नु सिहोॽबाहाॽ, मे़ःन्दा मुरिक् नु सिङ्ङिल्ले़न् के़रे़क् चिगक्वा सामाहाॽ खिनिॽ सुत्थो चोःक्मासि पोङ्ॽ॥” 21 खे़ब्याङ् निङ्वाॽफुसाम्बा एलाजारे़ल्ले़ थङ्ङो के़बेःक्पा के़रे़क् थक्सुबाहाॽ मे़त्तुसि, “यहवे दाङ्बे़ल्ले़ अक्खेलॽरिक् मोसान् साम्योथिम् इङ्जाङ् पिरुआङ् वाॽ— 22 साम्म्याङ्, युप्पा, कासा, फे़न्जेॽ, तिन् नु लियोलिप्, 23 हे़क्क्याङ् मिःल्ले़ खाप्पुथ्यःङ् मे़म्बोङ्मनाबा के़रे़क् सामाहाॽ मिओ केःत्ते़म्मे़ॽआङ् सुत्थो चोगे़म्सिम्मे़ॽ॥ खे़न्नुःल्ले़ वेॽ खे़ङ्हाॽ के़रे़क् सेसेसाङ्साङ् चोःक्मा च्वाःत्तो केःप्मासिआङ् सुत्थो चोःक्मासि पोङ्ॽ॥ खे़ब्याङ् मिःल्ले़ खाप्पुथ्यःङ् के़बोङ्बा चिगक्वाहाॽ चाए आम्भा खे़न् च्वाःत्तो केःप्मासिआङ् सुत्थो चोःक्मासि पोङ्ॽ॥ 24 नुसिगेक्पा ये़न्नो खिनिॽ चाङ्हाॽ वाहप्ते़म्मे़ॽ, हे़क्क्याङ् खिनिॽ सुत्थो के़बोःक्खिॽ॥ खे़न् एगाङ् खिनिॽ साःङ्गाहिम्मो के़द्ये़ॽइल्ले़ पोङ्लो॥” थङ्ङो मे़नाप्तुसिबा चिगक्वा सामाहाॽ मे़भःक्खु 25 यहवे दाङ्बे़ल्ले़ मोसान् मे़त्तु, 26 “मे़दे़म्सु मे़दारुसिबा मनाहाॽ नु थक्साहाॽ खे़ने़ॽ नु निङ्वाॽफुसाम्बा एलाजार हे़क्क्याङ् सङ्जुम्भोबा लाम्लोबाहाॽरे़ निरे़म्सिम्से़ॽ॥ 27 थङ्ङो के़बेःक्पा थक्सुबाहाॽरे़ खुन्छिॽ लुम्मो नु वेॽ के़रे़क् सङ्जुम्भोःल्ले़ खुन्छिॽ लुम्मो खे़न् चिगक्वा सामाहाॽ कुलक् ने़त्छि चोगे़म्मे़ॽआङ् फःक्खे़म्मे़ॽ॥ 28 थङ्ङो के़बेःक्पा थक्सुबाहाॽलाम् मनाहाॽ, कुम्मामा कुम्बाबा पित्हाॽ, अदङ्, मे़ल्लुक् मे़ःन्दाहाॽओलाम् किप् ङासि थक्मा लत्छा यहवे दाङ्बे़ल्ले़ कुलागि एःङ् हुङे़म्मे़ॽ॥ 29 खे़ङ्हाॽरे़ खुन्छिॽ कुभ्रे़ःङ् लक्कोलाम् कम्भ्यारिक् याङ्ङासिम्मे़ॽआङ् यहवे दाङ्बे़ल्ले़ कुलागि हुक्वा कुसिङ् निङ्वाॽफुसाम्बा एलाजारे़न् पिरे़म्मे़ॽ॥ 30 इस्राइलिहाॽरे़ खुन्छिॽ कुभ्रे़ःङ् लक्कोलाम् मनाहाॽ, कुम्मामा कुम्बाबा पित्हाॽ, अदङ्, मे़ल्लुक् मे़ःन्दाहाॽ इग्र वेॽ थक्साहाॽलाम् ङाबोङ् थक्मा लत्छा याङ्ङासिम्मे़ॽआङ् यहवे दाङ्बे़ल्ले़ कुसेसेदे़न्निन् ओमे़प्मा याःम्बक् के़जोःक्पा ले़बिहाॽ पिरे़म्सिम्मे़ॽ॥” 31 हे़क्क्याङ् यहवे दाङ्बे़ल्ले़ मोसान् इङ्जाङ् पिरुबा हे़क्के मोसान् नु निङ्वाॽफुसाम्बा एलाजाररे़ चोगे़छु॥ 32 थङ्गे़धक्पा थक्सुबाहाॽरे़ हुक्को मे़धासुबा के़नम्बा याङ्साकुन्धेहाॽ हाबा कन्हाॽ वये़रो—मे़ल्लुक् नु मे़ःन्दा ६,७५,००० 33 कुम्मामा नु कुम्बाबा पित् ७२,००० 34 अदङ् ६१,००० 35 हे़क्क्याङ् ये़म्बित्छानु सोरिक् मे़न्इम्मे के़वाॽमा मे़न्छुमाहाॽ के़रे़क्ले़ ३२,०००॥ 36 खे़न्लाम् थङ्ङो के़बेःक्पा थक्सुबाहाॽरे़ खुन्छिॽ लक्को के़धाबा कुभ्रे़ःङ् लक्किन् हाबा कन् वये़रो— ३,३७,५०० मे़ल्लुक्, 37 खे़ङ्हाॽलाम् यहवे दाङ्बे़ल्ले़ कुलागि एःङ् ६७५ मे़ल्लुक् मे़वये़, 38 ३६,००० कुम्मामा नु कुम्बाबा पित्, खे़ङ्हाॽलाम् यहवे दाङ्बे़ल्ले़ कुलागि एःङ् ७२ मे़वये़, 39 ३०,५०० अदङ्हाॽ, खे़ङ्हाॽलाम् यहवे दाङ्बे़ल्ले़ कुलागि एःङ् ६१ मे़वये़, 40 १६,००० मे़न्छुमाहाॽ, खे़ङ्हाॽलाम् यहवे दाङ्बे़ल्ले़ कुलागि एःङ् ३२ मे़वये़॥ 41 यहवे दाङ्बे़ल्ले़ मोसान् मे़त्तुबा हे़क्के यहवे दाङ्बे़ल्ले़ कुलागि हुक्वा एःङ्ङिन् मोसाःल्ले़ निङ्वाॽफुसाम्बा एलाजारे़न् पिरु॥ 42 थङ्ङो के़बेःक्पा मनाहाॽलाम् मोसाःल्ले़ फःक्खुबा इस्राइलिहाॽरे़ खुन्छिॽ कुभ्रे़ःङ् सङ्जुम्भो लक्किन् कन् वये़— 43 ३,३७,५०० मे़ल्लुक्, 44 ३६,००० कुम्मामा नु कुम्बाबा पित्, 45 ३०,५००० अदङ्, 46 १६,००० सिसागे़न् मे़न्छ्याहाॽ॥ 47 इस्राइलिहाॽरे़ खुन्छिॽ कुभ्रे़ःङ् लक्कोलाम् मोसाःल्ले़ यहवे दाङ्बे़ल्ले़ कुइङ्जाङ् कुइसिक् मनाहाॽ नु थक्साहाॽलाम् ङाबोङ् थक्मा लत्छा याङ्सिङ्ङाङ् यहवे दाङ्बे़ल्ले़ कुसेसे युङ्दे़न् ओमे़प्मा याःम्बक् के़जोःक्पा ले़बिहाॽ पिरुसि॥ 48 खे़ब्याङ् थक्सुबाहाॽरे़ खुन्छिॽ हे़न्छिङ् नु किप् थिक्काङ् थोबा थक्पेबा नु थक्मोबाहाॽ हे़क्क्याङ् किप् थिक्पा थक्पेबाहाॽ मोसाओ मे़द्ये़॥ 49 हे़क्क्याङ् खे़ङ्हाॽरे़ मोसान् मे़मे़त्तु, “आनिगे युक्को के़वाॽबा थक्सुबाहाॽ आनिगे निरुम्सिम्बे़आङ् वाॽ॥ आनिगे लत्छा मनाआङ् मे़न्छुःन्ने़न्॥ 50 कल्ले़चोगुल्ले़ आनिगे के़रे़क्ले़ खोसुम्बे़बा साम्म्याङ् लाङ्बाःङ्गि, हुक्पाःङ्गि, स्वागेप्, कुन्दुल्लो नु सिक्क्रिहाॽ यहवे दाङ्बाओ तोःम्माआङ् आनिगे लायोल्ले़ लागि ले़प्मि नाःक्मा याःम्बक् चोःक्मारे़ लागि खे़ङ्हाॽ आनिगे तारुम्बे़आङ् वाॽ॥” 51 मोसान् नु निङ्वाॽफुसाम्बा एलाजाररे़ खे़न् मनाहाॽलाम् खे़न् के़रे़क् साम्म्याङ् सामाहाॽ ताःक्ते़सु॥ 52 हे़न्छिङ् थक्सुबाहाॽरे़ खुन्छिॽ थक्मोबा नु किप् थिक् थक्सुबाहाॽरे़ खुन्छिॽ थक्पेबाहाॽलाम् मोसान् नु निङ्वाॽफुसाम्बा एलाजाररे़ ताःक्ते़सुआङ् यहवे दाङ्बाओ हुक्वा हे़क्के तोःन्दे़सुबा साम्म्याङ्ङिन् १६,७५० सेकेल योरे़॥ 53 थङ्ङो के़बेःक्पा मनाहाॽ के़रे़क्ले़ थङ्ङो मे़नाप्तुसिबा याङ्साकुन्धेहाॽ आप्फेक् आप्फेक्के मे़देॽरुआङ् वये़॥ 54 खे़ब्याङ् मोसान् नु निङ्वाॽफुसाम्बा एलाजाररे़ हे़न्छिङ् नु किप् थिक् थक्सुबाहाॽरे़ खुन्छिॽ थक्मोबाहाॽ हे़क्क्याङ् थक्पेबाहाॽरे़ मे़दारुबा साम्म्याङ्हाॽ याङ्ने़छिआङ् यहवे दाङ्बे़ल्ले़ कुदगि इस्राइलिहाॽरे़ खुनिॽ लागि निङ्वाॽसोक् पोङ्ल फाॽआङ् तुम्मादे़न् साःङ्गाहिम्मो तारे़छुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.