खानिःत् 30 - लिम्बुमाङ्हुप् चोःक्मा थिम्हाॽ 1 मोसाःल्ले़ इस्राइलिहाॽरे़ खुन्छिॽ थाःक्लाम्लोबाहाॽ अक्खे मे़त्तुसि, “यहवे दाङ्बे़ल्ले़ इङ्जाङ् चोगुबा पाःन्हाॽ हाबा कन्हाॽरो— 2 कुभा मनाःल्ले़ यहवे दाङ्बे़ल्ले़ कुलागि माङ्हुप् चोगुॽ इग्र माङ्हे़क्सिङ्ङाङ् चोगुबा माङ्हुप्पिन् के़प्मा पान् पाःत्तुने़भग्र, खुने़ॽ माङ्हुप् चोगुबा पाःन्निन् मे़ङ्गे़प्मा मे़नुॽने़न्॥ खुने़ॽ कुम्ब्राःल्ले़ थे़मा पान् पाःत्तुआङ् वये़, खुने़ॽ खे़न् के़प्माए पोङ्ॽ॥ 3 “कुभा सिसागे़न् मे़न्छ्यान् कुम्बारे़ कुहिम्मो वाॽआङ् यहवे दाङ्बे़ल्ले़ कुलागि माङ्हुप् चोगुॽ इग्र माङ्हे़क्सिङ्ङाङ् माङ्हुप्पिन् के़प्मा पान् पाःत्तुॽ, 4 हे़क्क्याङ् कुम्बारे़ खे़न् माङ्हुप्पिन् इग्र माङ्हे़क्किन् खे़प्सुआङ्साङ् खुने़ॽ स्वाःत् वाॽने़भग्र, खे़न् माङ्हुप्पिन् इग्र माङ्हे़क्किन् के़प्मा पोङ्ॽ॥ 5 कर कुम्बारे़ खे़न् खे़प्सुबा ये़न्निल्ले़ याःन्दिक् खे़न् अत्तुने़भग्र, खे़न् सिसागे़न् मे़न्छ्याःल्ले़ चोगुबा माङ्हुप्पिन् इग्र माङ्हे़क्किन् थेनाधेबा पोङ्ॽ॥ खुने़ॽ कुम्बारे़ए अत्तुबाल्ले़ चोगुल्ले़ यहवे दाङ्बे़ल्ले़ खे़न् मे़न्छ्यान् ले़रुदेसुॽ॥ 6 “खुने़ॽ माङ्हुप् चोगु सुरुआङ्, इग्र नुरिक् निङ्वाॽ मे़न्इःत्छिङ्ङे माङ्हे़क्सिङ्ॽ हे़क्क्याङ् खुने़ॽ कुमेःक्खिम् पोःक्खे़, 7 खे़ब्याङ् खुने़ॽ कुये़म्बाःल्ले़ खे़न् पाःन्निन् निङ्वाॽ खोसुबा ये़न्नो स्वाःत् मे़म्बाःत्ते युङे़ने़भग्र खे़न् माङ्हुप्पिन् इग्र माङ्हे़क्किन् के़प्मा पोङ्ॽ॥ 8 कर खुने़ॽ कुये़म्बाःल्ले़ निङ्वाॽ खोसुबा ये़न्निल्ले़ याःन्दिक् खे़न् पाःन्निन् खुने़ॽ अत्तुने़भग्र, खे़न् मे़न्छुमाःल्ले़ चोगुबा माङ्हुप्पिन् इग्र माङ्हे़क्किन् थेनाधेबा पोङ्ॽ, हे़क्क्याङ् यहवे दाङ्बे़ल्ले़ खे़न् मे़न्छुमान् ले़रुदेसुॽ॥ 9 “कुये़म्बा के़सिमा मेमेदुमा नु कुये़म्बाःल्ले़ नाॽरुमा मे़न्छुमाःल्ले़ चोगुबा माङ्हुप्पिन् इग्र माङ्हे़क्किन् के़प्मा पोङ्ॽ॥ 10 “कुभा मे़न्छुमान् कुये़म्बाःल्ले़ कुहिम्मो ताजुःत्ताङ् कुभा माङ्हुप् चोगुॽ इग्र माङ्हुप् के़प्मारे़ लागि माङ्हे़क्सिङ्ॽ, 11 हे़क्क्याङ् खे़न् माङ्हुप्पिन् इग्र माङ्हे़क्किन् खे़प्सुआङ्साङ् खुने़ॽ कुये़म्बाःन् स्वाःत् वाॽआङ् मे़अत्तुन्ने़भग्र, खे़न् माङ्हुप्पिन् इग्र माङ्हे़क्किन् के़प्मा पोङ्ॽ॥ 12 कर खुने़ॽ कुये़म्बाःल्ले़ खे़न् पाःन्निन् खे़प्सुबा ये़न्निल्ले़ याःन्दिक् खे़ल्ले़ कुमाङ्हुप्पिन् इग्र कुमाङ्हे़क्किन् थेनाधेबा चोगुने़भग्र, खे़न् मे़न्छुमाःल्ले़ कुम्ब्राओलाम् के़लःम्बा पाःन्निन् हने़बा पोङ्ॽ॥ यहवे दाङ्बे़ल्ले़ खे़न् मे़न्छुमान् ले़रुदेसुॽ थेआङ्भे़ल्ले़ खुने़ॽ कुये़म्बाले़ए खे़न् कुमाङ्हुप्पो के़प्मालाम् थेःक्तु॥ 13 खे़ल्ले़ चोगुबा माङ्हे़क्किन् इग्र माङ्हुप्पिन् के़प्मा नु मे़ङ्गे़प्मा खुने़ॽ कुये़म्बाःल्ले़ चोःक्मा युक् कत्तुॽ॥ 14 कर खुने़ॽ कुये़म्बाःल्ले़ कुमेःत्तिल्ले़ चोगुबा माङ्हुप्पिन् इग्र माङ्हे़क्किल्ले़ कुयाःम्बेओ थिक्याःन्धक्मा स्वाःत् मे़म्बाःत्ते वाॽने़भग्र, खुने़ॽ खे़न् निःन्धो चोगुबा पोङ्ॽ॥ खुने़ॽ खे़न् खे़प्सुआङ्साङ् स्वाःत् मे़म्बाःत्ते वाॽबाल्ले़ चोगुल्ले़ कुमेःत्तिन् हे़क्के चोःक्मा फाःक्तुबा कुदङ्बा पोङ्ॽ॥ 15 कर खुने़ॽ खे़प्सुबा कुभा ये़म् एगाङ् खे़न् पाःन्निन् थेनाधेबा चोगुने़भग्र, खे़न् मे़न्छुमाःल्ले़ कुआप्तिक्के़न् खुने़ॽओए थारो॥” 16 ये़म्बा, मेःत् नु कुम्बा कुम्मारे़ खुन्छिॽ हिम्मो के़वाॽमा मे़न्छ्या साःल्ले़ कुयाःम्बेओ यहवे दाङ्बे़ल्ले़ मोसान् पिरुबा थिम्हाॽ हाबा कन्हाॽएरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.