खानिःत् 3 - लिम्बुहारुनरे़ कुस्साहाॽ 1 सिनै कोःक्माओ यहवे दाङ्बान् मोसाःन्नु पारे़बा ये़म्मो हारुने़न् नु मोसाःल्ले़ खुन्छिॽ थिन्दाङ् सायोबोराहाॽरे़न् साप्मुःन्धुम्मिन् हाबा कन्हाॽएरो॥ 2 हारुने़ल्ले़ कुस्सा ये़म्बित्छाहाॽरे़ खुन्छिॽ मिङ् हाबा कन्हाॽ वये़—तुम्बे़न् नादाब हे़क्क्याङ् अबिहु, एलाजार नु इतामार॥ 3 निङ्वाॽफुसाम्बा पोङ्माआङ् निङ्वाॽफुसाम्बा याःम्बक् चोःक्मारे़ लागि युक्तिङ् के़बोङ्बा माङ्थोःक्ना मे़बिरुसिबा हारुने़ल्ले़ कुस्सा ये़म्बित्छाहाॽरे़ खुन्छिॽ मिङ् कन्हाॽए वये़॥ 4 कर सिनैबा मुरे़क् खारे़क् थेआङ् के़होप्पादे़न्नो यहवे दाङ्बे़ल्ले़ इङ्जाङ् मे़बिरुसिन्बा मिःल्ले़ सिदुङ्जभा तोःन्दे़सु हे़क्क्याङ् खुने़ॽ कुदगिए खुन्छिॽ स्ये़सि, हे़क्क्याङ् खे़न् ने़प्फुरे़ खुन्छिॽ साए मे़होःप्ते़॥ खे़ल्ले़चोगुल्ले़ एलाजारे़न् नु इतामारे़न्लक् खुन्छिॽ पानुदिङ् पा हारुने़ल्ले़ कुबाःल्लाओ निङ्वाॽफुसाम्बा याःम्बक् चोगे़सिरो॥ ले़बिहाॽ युक्तिङ् मे़जोगुसि 5 यहवे दाङ्बे़ल्ले़ मोसान् मे़त्तु, 6 “ले़बिःल्ले़ कुधाःक्किन् कप्मो निःत्ताङ् तारे़से़ॽ॥ हे़क्क्याङ् खे़ङ्हाॽ निङ्वाॽफुसाम्बा हारुने़ल्ले़ कुबेसाङ् ये़प्से़से़ॽ, खे़ब्याङ् खे़ङ्हाॽ खुने़ॽ कुभाॽबाङ् मे़बोङ्ङाङ् खुने़ॽ मे़भाॽरुर॥ 7 सेसे युङ्दे़न्नो माङ्से़वा याःम्बक् मे़जोःक्किल्ले़ खे़ङ्हाॽरे़ हारुने़न् नु के़रे़क् सङ्जुम्भोःल्ले़ लागि तुम्मादे़न् साःङ्गाहिम्मो याःम्बक् मे़जोगुॽ॥ 8 तुम्मादे़न् साःङ्गाहिम्मोबा के़रे़क् सामा चिगक्वाहाॽ ओमे़प्मा याःम्बक्किन् खे़ङ्हाॽरे़ मे़जोगुॽ, हे़क्क्याङ् सेसे साःङ्गाहिम्मो याःम्बक् मे़जोगुआङ् इस्राइलिहाॽरे़ चोःक्मा के़बोङ्बा लक्पे़न्निन् कुलिङ्दो मे़गे़त्तुॽ॥ 9 हारुने़न् नु खुने़ॽ कुस्साहाॽरे़ लागि ले़बिहाॽ पिरे़से़ॽ॥ खे़ङ्हाॽ इस्राइलबा मनाहाॽरे़ खुनिॽ लुम्मोलाम् खुन्छिॽ फाॽमासिरे़ लागि के़ये़क्पा याःम्बक् मे़बिरुसिआङ् वाॽ॥ 10 खे़ने़ॽ हारुने़न् नु कुस्साहाॽ निङ्वाॽफुसाम्बा ताक्फाओ युक्तिङ् चोगे़से़ॽ॥ खे़ङ्हाॽआङ्धो सेसेदे़न्निल्ले़ कुबेसाङ् के़दाबा कुभा वेॽ मनाहाॽ से़प्मासि पोङ्ॽ॥” 11 याम्मो यहवे दाङ्बे़ल्ले़ मोसान् मे़त्तु, 12 “ओमे़त्ते़ॽ, इस्राइलिहाॽओ तुम्बा सागे़वाःन्छिङ्बा ये़म्बित्छा साहाॽरे़ खुन्छिॽ ले़क्वाओ आङ्गाॽ इस्राइलिहाॽरे़ खुन्छिॽ लुम्मोलाम् ले़बिहाॽ सेगुङ्सिङ्ङाङ् मे़वाॽ॥ कल्ले़चोगुल्ले़ ले़बिहाॽ आङ्गाॽ आमनासि, 13 थेआङ्भे़ल्ले़ तगि सागे़वाःन्छिङ्बाहाॽ के़रे़क् आङ्गाॽइन्सिरो॥ मिस्र लाजेॽओ तगि सागे़वाःन्छिङ्बाहाॽ के़रे़क् से़रुङ्सिङ्बा ये़न्नो आङ्गाॽ इस्राइलबा तगि सागे़वाःन्छिङ्बा मना नु तगि के़धाप्पा थक्सा के़रे़क् आङ्गाॽ आलागि से़न्दुङ्सिङ्ङाङ् वयाङ्॥ खे़ङ्हाॽ आङ्गाॽहाॽरो॥ आङ्गाॽ यहवे दाङ्बाआरो॥” ले़बिरे़ कुधाःक्हाॽ मे़निरुसि 14 सिनैबा मुरे़क् खारे़क् थेआङ् के़होप्पादे़न्नो यहवे दाङ्बे़ल्ले़ मोसान् मे़त्तु, 15 “ले़बिहाॽ खुन्छिॽ आप्फेक् आप्फेक् थाःक्हाॽ नु हिम्सयङ् सोसोरिक् चोगे़ॽआङ् निरे़से़ॽ॥ लाधिक् के़गे़प्पा नु खे़न्नुःल्ले़ यम्बा के़रे़क् ये़म्बित्छाहाॽ खे़ने़ॽ निरे़से़ॽ॥” 16 कम्भलॽरिक् यहवे दाङ्बे़ल्ले़ मोसान् इङ्जाङ् पिरुबा कुइसिक् खुने़ॽ कुबाःन्जाक् हे़क्के मोसाःल्ले़ खे़ङ्हाॽ निरुसिरो॥ 17 ले़बिःल्ले़ कुस्सा ये़म्बित्छाहाॽरे़ खुन्छिॽ मिङ् कन्हाॽए वये़— गेर्सोन, कहात नु मरारि॥ 18 गेर्सोनरे़ कुधाःक्हाॽरे़ खुन्छिॽ मिङ्हाॽ हाबा कन्हाॽएरो— लिब्ना नु सिमि॥ 19 कहातरे़ कुधाःक्हाॽ— अम्राम, यिसहार, हेब्रोन नु उज्जिएल॥ 20 मरारिःल्ले़ कुधाःक्हाॽ— महलि नु मुसि॥ ले़बिःल्ले़ कुधाःक्हाॽ खुन्छिॽ आप्फेक् आप्फेक् हिम्सयङ् कुइसिक् कन्हाॽए मे़वये़॥ 21 गेर्सोनलाम् लिब्नि नु सिमिहाॽरे़ खुन्छिॽ थाःक् वये़॥ गेर्सोनरे़ कुधाःक्हाॽ कन्हाॽए मे़वये़॥ 22 लाधिक् के़गे़प्पा नु खे़न्नुःल्ले़ यरिक् के़योबा ये़म्बित्छाहाॽरे़ खुन्छिॽ खानिःत् कुइसिक् खे़ङ्हाॽ ७,५०० मे़वये़॥ 23 गेर्सोनिहाॽरे़ खुन्छिॽ थाःक्हाॽरे़ खुन्छिॽ आबाङे साःङ्गाहिम्हाॽ सेसे साःङ्गाहिम् एगाङ् नाम्धा ले़प्माङ् खिङ्मा के़बोङ्बा वये़॥ 24 गेर्सोनिहाॽरे़ खुन्छिॽ हिम्सयङ्हाॽरे़ खुनिॽ लाम्लोबान् लाएलरे़ कुस्सा एल्यासापे़न् वये़॥ 25 तुम्मादे़न् साःङ्गाहिम्मो सेसे युङ्दे़न्, खिङ्मनाबा साःङ्गाहिम्, खे़ल्ले़ लागि लिङ्घाम्बु, तुम्मादे़न् साःङ्गाहिम् लाःप्मादे़न्नो के़बप्पा फोःन्दा, 26 लक्खुम्मोबा फोःन्दाहाॽ, सेसे साःङ्गाहिम् नु ले़त्ति तोःम्मादे़न् कब्रिङ् पिसाङ् लक्खुम्मो लाःप्मादे़न्निन् के़गप्पा फोःन्दाहाॽ, थाक्पाहाॽ नु कल्ले़ लागि ओगप् चोःक्मा के़बोङ्बा के़रे़क् चिगक्वा सामाहाॽ गेर्सोनिहाॽरे़ ओमे़प्मा याःम्बक् वये़॥ 27 कहातलाम् अम्रामि, यिसहारि, हे़ब्रोनि नु उज्जिएलिहाॽरे़ खुन्छिॽ थाःक् मे़बोःक्खे़॥ कहातरे़ कुधाःक्हाॽ कन्हाॽएरो॥ 28 लाधिक् के़गे़प्पा नु खे़न्नुःल्ले़ यरिक् के़गे़प्पा ये़म्बित्छाहाॽरे़ खुन्छिॽ खानिःत् कुइसिक् खे़ङ्हाॽ ८,६०० मे़वये़॥ कहातिहाॽरे़ सेसेदे़न्निन् ओमे़प्मा के़बोङ्बा वये़॥ 29 कहातरे़ कुधाःक्हाॽरे़ सेसे साःङ्गाहिम्मोबा लाङ्गे़त् ले़प्माङ् साःङ्गाहिम्हाॽ खिङ्मा के़बोङ्बा वये़॥ 30 उज्जिएलरे़ कुस्सा एलिसापाने़न् कहातरे़ कुधाःक्हाॽरे़ खुन्छिॽ लाम्लोबा वये़॥ 31 माङ्हुप् सन्दोक्, चप्ते़न्, सेमियुङ्दे़न्, ले़त्ति तोःम्मादे़न्हाॽ हे़क्क्याङ् खे़ङ्हाॽरे़ माङ्से़वा याःम्बक् मे़जोगुल्ले़ सेसेदे़न्नो चाहा के़जोःक्पा चिगक्वा सामाहाॽ, साॽरिक् सेसेबादे़न् के़धेःक्पा फोःन्दा नु कन्हाॽ याङ्मा के़रे़क् सामा पुमाहाॽ ओमे़प्मा के़बोङ्बा खे़ङ्हाॽरे़ खुन्छिॽ याःम्बक् वये़॥ 32 निङ्वाॽफुसाम्बा हारुने़ल्ले़ कुस्सा एलाजारे़ङ्ग ले़बि थाःक्कोबा तुम् लाम्लोबा वये़॥ सेसेदे़न्नोबा पाःन्हाॽ कम्ब्राङ् के़मे़प्पा के़रे़क् मनाहाॽ मुरा मे़प्मासिरे़ लागि खुने़ॽ युक्तिङ् मे़जोगु॥ 33 मरारिलाम् महलि नु मुसिहाॽरे़ खुन्छिॽ थाःक्हाॽ मे़बोःक्खे़॥ मरारिरे़ कुधाःक्हाॽ हाबा कन्हाॽरो॥ 34 लाधिक् के़गे़प्पा नु खे़न्नुःल्ले़ यरिक् के़योबा ये़म्बित्छाहाॽरे़ खुन्छिॽ खानिःत् कुइसिक् खे़ङ्हाॽ ६,२०० मे़वये़॥ 35 मरारिहाॽरे़ खुन्छिॽ थाःक्हाॽरे़ खुनिॽ लाम्लोबान् अबिहेलरे़ कुस्सा सुरिएले़न् वये़॥ खे़ङ्हाॽरे़ सेसे साःङ्गाहिम् थोःन्दाङ् ले़प्माङ् साःङ्गाहिम्हाॽ खिङ्मा के़बोङ्बा वये़॥ 36 सेसे साःङ्गाहिम्मोबा सिङ्भे़ल्ले़क्हाॽ, पे़रे़म् कुसाक्माहाॽ, सित्लाङ्हाॽ, कुयुक्नाहाॽ नु खे़ल्ले़ लागि के़रे़क् चिगक्वा सामाहाॽ हे़क्क्याङ् कन्हाॽ ओगप् चोःक्मा के़रे़क् सामाहाॽ, 37 के़रे़क् पिसाङ्बा लक्खुम्मोबा सित्लाङ्हाॽ, खे़ल्ले़ कुयुक्नाहाॽ, लक्चुहाॽ नु थाक्पाहाॽ मरारिहाॽरे़ ओमे़प्मा के़बोङ्बा याःम्बक् वये़॥ 38 सेसे साःङ्गाहिम् नाङ्गे़न् ले़प्माङ्, तुम्मादे़न् साःङ्गाहिम् तगि नाम् के़गे़प्पा ले़प्माङ् मोसा, हारुन नु खुने़ॽ कुस्साहाॽरे़ साःङ्गाहिम्हाॽ खिङ्मा के़बोङ्बा वये़॥ इस्राइलिहाॽरे़ खुन्छिॽ लागि खे़ङ्हाॽरे़ सेसेदे़न्निन् ओमे़प्मा के़बोङ्बा याःम्बक् वये़॥ खे़ल्ले़ कुबेसाङ् के़दाबा वेॽ आत्तिन् मनाःन्छाङ् से़प्मा पोङ्ॽ॥ 39 यहवे दाङ्बे़ल्ले़ कुइङ्जाङ् कुइसिक् मोसान् नु हारुने़ल्ले़ निरे़सुसिबा लाधिक् के़गे़प्पा नु खे़न्नुःल्ले़ यरिक् के़योबा ले़बिहाॽ खुन्छिॽ के़रे़क् खानिःत्ते़न् २२,००० मे़वये़रो॥ तुम्बा साहाॽरे़ खुन्छिॽ ताक्फाःन् ले़बिहाॽ मे़मे़त्छिङ् 40 खे़ब्याङ् यहवे दाङ्बे़ल्ले़ मोसान् मे़त्तु, “लाधिक् के़गे़प्पा नु खे़न्नुःल्ले़ यरिक् के़योबा इस्राइलिहाॽरे़ खुन्छिॽ तुम्बा ये़म्बित्छासाहाॽ निरे़से़ॽआङ् खुन्छिॽ मिङ्हाॽ साप्ते़ॽ॥ 41 इस्राइलिहाॽरे़ खुन्छिॽ तुम्बा साहाॽरे़ खुन्छिॽ ले़क्वाओ खे़ने़ॽ ले़बिहाॽ तारे़से़ॽ॥ कम्भलॽरिक्के इस्राइलिहाॽरे़ खुन्छिॽ तगि के़धाप्पा थक्साहाॽरे़ कुले़क्वाओ ले़बिहाॽरे़ खुन्छिॽ थक्साहाॽ तारे़से़ॽ॥ आङ्गाॽ यहवे दाङ्बाआ॥” 42 कल्ले़चोगुल्ले़ यहवे दाङ्बे़ल्ले़ मोसान् इङ्जाङ् पिरुबा कुइसिक् खुने़ॽ इस्राइलिहाॽरे़ खुन्छिॽ तुम्बा साहाॽ निरुसि॥ 43 लाधिक् के़गे़प्पा नु खे़न्नुःल्ले़ यरिक् के़योबा तुम्बा साहाॽरे़ खुन्छिॽ मिङ् कुइसिक् खे़ङ्हाॽरे़ खुन्छिॽ के़रे़क् खानिःत् २२,२७३ वये़॥ 44 खे़ब्याङ् यहवे दाङ्बे़ल्ले़ मोसान् मे़त्तु, 45 “इस्राइलिहाॽरे़ खुन्छिॽ तुम्बा साहाॽरे़ खुनिॽ ले़क्वाओ ले़बिहाॽ नु खे़ङ्हाॽरे़ खुन्छिॽ पित् थक्साहाॽरे़ ले़क्वाओ ले़बिहाॽरे़ खुन्छिॽ पित्थक्साहाॽ तेॽरे़से़ॽ॥ ले़बिहाॽ आङ्गाॽइन् मे़बोङ्ॽ॥ आङ्गाॽ यहवे दाङ्बाआ॥ 46 हे़क्क्याङ् इस्राइलिहाॽरे़ खुन्छिॽ तुम्बा साहाॽ ले़बिहाॽनुःल्ले़ २७३ यरिक् मे़यो॥ कन् के़नम्बा तुम्बा साहाॽ थे़ॽमासिरे़ लागि, 47 सेसेदे़न्नोबा सेकेल कुइसिक् थिक्थिक् के़रे़क्ले़ लागि सेकेल ङासि ङासि युप्पा फुक्खेॽ॥ निबोङ् गेरारे़ सेकेल थिक् पोङ्ॽ॥ 48 हे़क्क्याङ् याम्मो कुयोॽबा तुम्बा सागे़वाःन्छिङ्बा इस्राइलिहाॽरे़ खुन्छिॽ तुम्बा साहाॽ थे़ॽमासिरे़ लागि याङ्ङिन् हारुने़न् नु कुस्साहाॽ पिरे़से़ॽ॥” 49 कम्भलॽरिक् ले़बिहाॽलाम् चोःक्युम्भो मे़बिरुसिबा के़नम्बा मनाहाॽलाम्बा मोसाःल्ले़ थे़ॽमासि याङ्ङिन् फुक्खु॥ 50 खुने़ॽ इस्राइलिहाॽरे़ खुन्छिॽ तुम्बा साहाॽरे़ खुनिॽ युप्पा खे़ःक्हाॽ फुक्खु, खे़न् युप्पा खे़ल्ले़क्हाॽ सेसेदे़न्नोबा सेकेल कुइसिक् १,३६५ सेकेल योरे़॥ 51 यहवे दाङ्बे़ल्ले़ मोसान् इङ्जाङ् पिरुबा कुसिङ् खे़न् मना थे़ॽमा याङ्ङिन् खुने़ॽ हारुने़न् नु कुस्साहाॽ पिरुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.