खानिःत् 28 - लिम्बुचक्मे़ल्लॽए तोःम्मा के़बोङ्बा सिदुङ्जभाहाॽ ( ला २९:३८-४६ ) 1 यहवे दाङ्बे़ल्ले़ मोसान् मे़त्तु, 2 “खे़ने़ॽ इस्राइलिहाॽ अक्खे मे़त्ते़से़ॽआङ् इङ्जाङ् पिरे़से़ॽ—‘आङ्गाॽ आसिराॽ के़धाङ्बा कुनाम्गे़नुॽबा पोगुगे़न् कुजा सिदुङ्जभाहाॽ आङ्गाॽओ तोःम्मा के़बोङ्बा ये़म्मो खिनिॽ इःत्ते़म्मे़ॽआङ् निङ्वाॽ निःन्धो चोगे़म्मे़ॽ॥’ 3 खे़ने़ॽ खे़ङ्हाॽ अक्खे मे़त्ते़से़ॽ—‘यहवे दाङ्बे़ल्ले़ कुलागि तोःम्मा के़बोङ्बा पोगुगे़न् कुजा सिदुङ्जभान् हाबा कन्लो—मे़ङ्गाःम्मनाबा तङ्बे थिक् के़गे़प्पा मे़ल्लुक्साःत् ने़त्छि चक्मे़ल्लॽएबा मिधिङ्मनादेमनाबा सिदुङ्जभान् थिक्याःन्धक् तोःन्दे़म्मे़ॽ, 4 लत्छा तानाम् नु लत्छा युःन्छिक्॥ 5 पोगुगे़न् कुजा सिदुङ्जभाःल्ले़ लागि युमनाबा माना लिसि चैतुन निःङ्गेॽओ सॽमनाबा किलो थिक् चुन्जुम्बा फेॽरुम्माङ् तोःन्दे़म्मे़ॽ॥ 6 कन् चक्मे़ल्लॽए तोःम्मना मिधिङ्मनादेमनाबा सिदुङ्जभान् सिनै कोःक्माओ निःन्धो पोःक्खे़आङ् वये़बा कुइसिक् पोगुगे़न् कुजा सिदुङ्जभान् कुनाम्गे़नुॽबा कुनाम् पोङ्ल यहवे दाङ्बाओ तोःन्दे़म्मे़ॽ॥ 7 कन्नु तोःम्मनाबा वदुम्बक्वा सिदुङ्जभान् लत्छा थुःम्बाःल्ले़ लागि लितर थिक् सेजःङ्वा चाहा चोक्॥ खे़न् वदुम्बक्वा सिदुङ्जभान् सेसेदे़न्नो यहवे दाङ्बे़ल्ले़ कुलागि तोःन्दे़म्मे़ॽ॥ 8 निसिगेक्पा थुःम्बाःन् युःन्छिक् तोःन्दे़म्मे़ॽ॥ तानाम् के़दोःन्दुम्बा हे़क्के पोगुगे़न् कुजा सिदुङ्जभान् नु सेजःङ्वा सिदुङ्जभान् तोःन्दे़म्मे़ॽ॥ कन् कुजा सिदुङ्जभान् कुनाम्गे़नुॽबा कुनाम् पोङ्ल यहवे दाङ्बाओ तोःन्दे़म्मे़ॽओ॥ नाःम्सिङ्मा ये़न्नोबा हुक्वा 9 “‘सबाथ ये़न्निल्ले़ याःन्दिक् मे़ङ्गाःम्मनाबा तङ्बे के़गे़प्पा थुःम्बा ने़त्छि, चैतुन निःङ्गेॽओ सॽमनाबा फोलक् थिक् चुन्जुम्बा फेॽरुम् पोगुगे़न् कुजा सिदुङ्जभारे़ लागि हे़क्क्याङ् खे़न्नु सोरिक् तोःम्मा के़बोङ्बा सेजःङ्वा सिदुङ्जभाःन्नाङ् तोःन्दे़म्मे़ॽ॥ 10 चक्मे़ल्लॽए तोःम्मनाबा मिधिङ्मनादेमनाबा सिदुङ्जभाओ सेजःङ्वा सिदुङ्जभाःन्नु सोसोरिक् सबाथ ये़न् थक्मा तोःम्मनाबा कन् मिधिङ्मनादेमनाबा सिदुङ्जभारो॥ ला थक्मा थिक्सिगेक्पा ये़न्नो तोःम्मनाबा सिदुङ्जभा 11 “‘ला थक्मा थिक्सिगेक्पा ये़न्नो यहवे दाङ्बे़ल्ले़ कुलागि खिनिॽ मिधिङ्मनादेमनाबा सिदुङ्जभारे़ लागि कुम्बाबा पित्सात् ने़त्छि, थुःम्बा थिक् नु तङ्बे थिक् के़गे़प्पा मे़ल्लुक् नुसि तोःन्दे़म्सिम्मे़ॽ॥ कन्हाॽ के़रे़क् मे़ङ्गाःम्मनाबा मे़बोङ्ल पोङ्ॽ॥ 12 लत्छा कुम्बाबा पित्सात् थक्मा चैतुन निःङ्गेॽओ सॽमनाबा चुन्जुम्बा फोलक् थिक्काङ् कुभ्रे़ःक् फेॽरुम् पोगुगे़न् कुजा सिदुङ्जभारे़ लागि, थुःम्बाःन्नु सोसोरिक् चैतुन निःङ्गेॽओ सॽमनाबा फोलक् थिक् चुन्जुम्बा फेॽरुम् पोगुगे़न् कुजा सिदुङ्जभारे़ लागि, 13 हे़क्क्याङ् थुःम्बा थप्मे पोगुगे़न् कुजा सिदुङ्जभारे़ लागि चैतुन निःङ्गेॽओ सॽमनाबा माना लिसि चुन्जुम्बा फेॽरुम् तोःन्दे़म्मे़ॽ॥ कङ्ग मिधिङ्मनादेमनाबा सिदुङ्जभारे़ लागि कुजा सिदुङ्जभान् कुनाम्गे़नुॽबा कुनाम् पोङ्ल यहवे दाङ्बाओ तोःन्दे़म्मे़ॽ॥ 14 खे़न्नु सोरिक् तोःम्मनाबा सेजःङ्वा सिदुङ्जभा, लत्छा पित्सात्ते़न्नु सोसोरिक् चे़ल्ले़क्सेॽ सेजःङ्वा लितर ने़त्छि, हे़क्क्याङ् लत्छा थुःम्बा थप्मे लितर थिक्काङ् कुभ्रे़ःक् चे़ल्लेक् सेजःङ्वा के़दोःम्दुम्ल पोङ्ॽ॥ कुम्बाबा मे़ल्लुक्साःत् थक्मा लितर थिक् चे़ल्ले़क्सेॽ सेजःङ्वा, तङ्बेओबा के़रे़क् लाहाॽओ लादुप् थक्मा तोःम्मा के़बोङ्बा मिधिङ्मनादेमनाबा सिदुङ्जभान् हाबा कन्लो॥ 15 लायोलाम् ले़प्मि खोमा सिदुङ्जभारे़ लागि यहवे दाङ्बे़ल्ले़ कुलागि लत्छा मे़ःन्दबकान् चक्मे़ल्लॽएबा मिधिङ्मनादेमनाबा सिदुङ्जभा नु सेजःङ्वा सिदुङ्जभाःल्ले़ वेॽ तोःन्दे़म्मे़ॽओ॥ चोःक्युम्भो खोमा तङ्नाम् ( ले़बि २३:५-१४ ) 16 “‘थिक्सिगेक्पा लाःल्ले़न् थिबोङ्ङाङ् लिसि ये़न्नो यहवे दाङ्बाल्ले़न् चोःक्युम्भो तङ्नाम्मिन् तोमा पोङ्ॽ॥ 17 खे़न् लाओबा थिबोङ्ङाङ् ङासि ये़न्नो लत्छा सोसोःत् लराङ् पोङ्ल॥ खे़न् सोसोत्लराङ्ङो नुसि ये़न् थारिक् के़भङ्बा सिदाॽ मे़न्याक्मनाबा खरे़ःङ् चामा पोङ्ॽ॥ 18 थिक्सिगेक्पा ये़न्नो सेसे चुम्लुङ् पोङ्ल॥ खे़न् ये़न्नो खिनिॽ थिक्याःन्धक् चोःक्मा के़बोङ्बा याःम्बक् थे़माआङ् मे़जोगे़म्मिन्ने़ॽ॥ 19 यहवे दाङ्बे़ल्ले़ कुलागि तोःम्मनाबा पोगुगे़न् कुजा सिदुङ्जभाःल्ले़ लागि कुम्बाबा पित्सात् ने़त्छि, थुःम्बा थिक् नु तङ्बे के़गे़प्पा कुम्बाबा मे़ल्लुक्साःत् नुसि मिधिङ्मनादेमनाबा सिदुङ्जभा तोःन्दे़म्मे़ॽ॥ कन्हाॽ के़रे़क् मे़ङ्गाःम्ना मे़बोङ्ल पोङ्ॽ॥ 20 खे़न्नु सोरिक्पा पोगुगे़न् सिदुङ्जभाःल्ले़ लागि लत्छा कुम्बाबा पित्सात् नु सोसोरिक् चैतुन निःङ्गेॽओ सॽमनाबा फोलक् थिक्काङ् कुभ्रे़ःक् चुन्जुम्बा फेॽरुम्, थुःम्बाःन्नु फोलक् थिक्, 21 हे़क्क्याङ् नुसि थुःम्बाहाॽओ लत्छा थुःम्बा थप्मे माना लिसि चुन्जुम्बा फेॽरुम्॥ 22 खे़न्नु सोसोरिक् खिनिॽ लायोल्ले़ लागि ले़प्मि नाःक्मा याःम्बक् चोःक्मारे़ लागि लायोलाम् ले़प्मि खोमा सिदुङ्जभारे़ लागि मे़ःन्दबका थिक्काङ् तोःन्दे़म्मे़ॽ॥ 23 कन् तानाम् थक्मा तोःम्मनाबा मिधिङ्मनादेमनाबा सिदुङ्जभाःन्नुःल्ले़ वेॽ तोःन्दे़म्मे़ॽ॥ 24 हाबा कन् परिक्ले़ नुसि ये़न् थारिक्के यहवे दाङ्बाल्ले़ कुलागि कुनाम्गे़नुॽबा कुनाम् पोङ्ल फाॽआङ् पोगुगे़न् कुजा सिदुङ्जभान् थिक्याःन्धक् तोःन्दे़म्मे़ॽ॥ कन् चक्मे़न्लॽएबा मिधिङ्मनादेमनाबा सिदुङ्जभा नु खे़न्नु सोरिक्पा सेजःङ्वा सिदुङ्जभाःन्नुःल्ले़ वेॽ तोःन्दे़म्मे़ॽ॥ 25 नुसिगेक्पा ये़न्नो खिनिॽ लत्छा सेसे चुम्लुङ् चोःक्मा पोङ्ॽ, हे़क्क्याङ् खिनिॽ खे़ल्ले़ याःन्दिक् थिक्याःन्धक् के़जोगुम्बा थे़मा याःम्बक्काङ् मे़जोगे़म्मिन्ने़ॽओ॥ ये़त्नाम्हाॽओबा तङ्नाम् ( ले़बि २३:१५-२२ ) 26 “‘तगि के़दुम्बा कुजा ये़न्नो यहवे दाङ्बे़ल्ले़ कुलागि खिनिॽ ये़त्नाम्हाॽओबा तङ्नाम्मो खारक् के़दुम्बा पोगुगे़न् कुजा सिदुङ्जभा के़दोःन्दुम्मिल्ले़ खिनिॽ लत्छा सेसे चुम्लुङ् पोङ्ल॥ खिनिॽ खे़ल्ले़ याःन्दिक् थिक्याःन्धक् के़जोगुम्बा थे़मा याःम्बक्काङ् मे़जोगे़म्मिन्ने़ॽ॥ 27 यहवे दाङ्बे़ल्ले़ कुलागि कुनाम्गे़नुॽबा कुनाम् पोङ्ल फाॽआङ् चक्मे़ल्लॽए मिधिङ्मनादेमनाबा सिदुङ्जभारे़ लागि कुम्बाबा पित्सात् ने़त्छि, थुःम्बा थिक् नु तङ्बे थिक् के़गे़प्पा मे़ल्लुक् नुसि 28 खे़न्नु सोरिक्पा पोगुगे़न् कुजा सिदुङ्जभारे़ लागि लत्छा कुम्बाबा पित्सात् थक्मे चैतुन निःङ्गेॽओ सॽमनाबा चुन्जुम्बा फोलक् थिक्काङ् कुभ्रे़ःक् फेॽरुम्, थुःम्बाःन् नु फोलक् थिक्, 29 हे़क्क्याङ् नुसि कुम्बाबा मे़ल्लुक्साःत्हाॽओ लत्छा कुम्बाबा मे़ल्लुक्साःत् थप्मे माना लिसि चुन्जुम्बा फेॽरुम् तोःन्दे़म्मे़ॽ॥ 30 खे़न्नु सोसोरिक् खिनिॽ लायोल्ले़ लागि ले़प्मि नाःक्मा याःम्बक् चोःक्मारे़ लागि मे़ःन्दबका थिक्काङ् तोःन्दे़म्मे़ॽ॥ 31 चक्मे़ल्लॽएबा मिधिङ्मनादेमनाबा सिदुङ्जभा नु खे़न्नु सोरिक्पा पोगुगे़न् कुजा सिदुङ्भाःन्नुःल्ले़ वेॽ खे़न्नु सोरिक् सेजःङ्वा सिदुङ्जभा तोःन्दे़म्मे़ॽ॥ खे़ङ्हाॽ के़रे़क् मे़ङ्गाःम्मनाबा मे़बोङ्ल पोङ्लो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.