खानिःत् 27 - लिम्बुसलोफादरे़ कुस्सा मे़न्छुमाहाॽ 1 योसेफरे़ कुस्सा मनस्सेरे़ कुधाःक्को के़वाॽबा मनस्सेरे़ कुबे़म्मे़न्छाॽ, माकिररे़ कुजक्मे़न्छाॽ, गिलादरे़ कुम्मे़न्छाॽ, हेपेररे़ कुस्सा सलोफादरे़ कुस्सा मे़न्छुमाहाॽ महला, नोआह, होग्ला, मिल्का नु तिर्सा मे़वये़॥ 2 खे़ङ्हाॽ तुम्मादे़न् साःङ्गाहिम्मोबा लाम्धेःत्तो मोसा, निङ्वाॽफुसाम्बा एलाजार, लाम्लोबाहाॽ नु के़रे़क् सङ्जुम्भोःल्ले़ खुन्छिॽ तगि मे़ये़म्सिङ्ङाङ् पेलि फाक्मा मे़हेःक्ते़, 3 “आनिगे पानुदिङ् पान् मुरे़क् खारे़क् थेआङ् के़होप्पादे़न्नो मासिङ्, कर यहवे दाङ्बे़ल्ले़ कुदक्ले़ङ्वाओ के़बोःक्पा कोरहरे़ कुमना सुम्मो खुने़ॽ होःप्ते़, कर खुने़ॽ आप्फेक् कुलायोल्ले़ मासिङ्॥ खुने़ॽ कुस्सा ये़म्बित्छाआङ् मे़होःप्ते़॥ 4 थे कुस्सा ये़म्बित्छा मे़होःप्ते़ फाॽआङ् आनिगे पाःल्ले़ कुमिङ्ङे़न् माबाबि? आनिगे पाःल्ले़ कुम्भुॽकुन्साॽहाॽओ आनिगे़आङ् याङ्साकुन्धे आबिरे़म्मे़ॽ॥” 5 मोसाःल्ले़ खे़ङ्हाॽरे़ खुन्छिॽ लुङ्हान् पाःन्निन् यहवे दाङ्बाओ तारु॥ 6 हे़क्क्याङ् यहवे दाङ्बे़ल्ले़ मोसान् मे़त्तु, 7 “सलोफादरे़ कुस्सा मे़न्छुमाहाॽरे़ के़वाॽबाए पान् मे़बाःत्तु॥ खे़ने़ॽ खे़ङ्हाॽरे़ खुन्छिॽ पाःल्ले़ कुम्भुॽ कुन्साॽहाॽनु खुन्छिॽ खोमा लक् पिरे़से़ॽ॥ खे़ने़ॽ खे़ङ्हाॽ खुन्छिॽ पाःल्ले़ कुलक् के़घोमा चोगे़से़ॽ॥ 8 “खे़ने़ॽ इस्राइलिहाॽ मे़त्ते़से़ॽ, ‘कुभा मनान् कुस्सा ये़म्बित्छा मे़न्वाॽए मासिङ्ने़भग्र कुस्सा मे़न्छुमान्ने लक् के़घोमा चोगे़ॽ॥ 9 खे़ल्ले़ कुस्सा मे़न्छुमाआङ् मे़होःप्ने़भग्र खे़ल्ले़ कुघोमा लक्किन् खुने़ॽ कुम्भुॽकुन्साॽहाॽरे़ मे़घोसुर॥ 10 खुने़ॽ कुम्भुॽ कुन्साॽआङ् मे़होःप्ने़भग्र खुने़ॽ कुम्बारे़ कुन्भुॽकुन्साॽहाॽरे़ मे़घोसुर॥ 11 खे़ल्ले़ कुम्बारे़ कुम्भुॽकुन्साॽहाॽ हाःत्ताङ् मे़होःप्ने़भग्र हिम्सयङ्ङोबा के़रे़क्नुःल्ले़ निःत्ताङ्बा थाःक्कोबा फुॽनुसाॽ के़धाप्पान् खे़न् मनाःल्ले़ कुलक् के़घोबा चोगे़ॽ, हे़क्क्याङ् खे़ल्ले़ खे़न् खुने़ॽ कुयुक्को ताःक्तुर॥ यहवे दाङ्बे़ल्ले़ मोसान् पिरुबा इङ्जाङ् कुइसिक् इस्राइलिहाॽरे़ खुन्छिॽ लागि कन् साम्योसाक्थिम् पोङ्लरो॥’” मोसान् मासिङ्ङाङ् यहोसुन् लाम्लोबा पोःक्खे़ ( साम्यो इङ् ३१:१-८ ) 12 खे़ब्याङ् यहवे दाङ्बे़ल्ले़ मोसान् मे़त्तु, “खे़ने़ॽ कन् अबारिम कोःक्माओ थाःङ् थोःक्सिङ्ङे़ॽ, हे़क्क्याङ् आङ्गाॽ इस्राइलिहाॽ पिरुङ्सिङ्बा लाजेन् ओमे़त्ते़ॽ॥ 13 खे़ने़ॽ खे़न् के़निसुआङ् एगाङ् खे़ने़ॽआङ् के़म्भुॽ हारुने़न् हे़क्के के़सुधे़बा के़दाक्थे़बाहाॽनु तङ्सिङ्से़ के़बेःक्॥ 14 थेआङ्भे़ल्ले़ जिनबा मुरे़क् खारे़क् थेआङ् के़होप्पादे़न्नो के़ने़बा च्वाःत्हाॽओ सङ्जुम्भोःन् आङ्गाॽ आदक्ले़ङ्वाओ मे़बोगे़ल्ले़, खे़न्छिॽ ने़प्माङ्ले़ खे़ङ्हाॽरे़ खुन्छिॽ तगि आङ्गाॽ सेसेबा चोःक्काबा पाःन्निन् इङ्धाङ् मे़म्बिए आङ्गाॽ आइङ्जाङ्ङिन् के़भेःन्दुसिआङ् के़वये़सि॥” (कन् हिन्दोक्किन् सिनबा मुरे़क् खारे़क् थेआङ् के़होप्पादे़न्नो के़ने़बा मेरिबा-कादेसबा च्वाःत्हाॽओ पोःक्खे़आङ् वये़॥) 15 मोसाःल्ले़ यहवे दाङ्बान् मे़त्तु, 16 “के़रे़क् मुन्जिङ् वयाक् के़लॽबाहाॽरे़ खुन्छिॽ सक्मा के़गेःप्पा के़बिबा यहवे दाङ्बा निङ्वाॽफुमाङ्लाम्बाए कन् सङ्जुम्भोओ लत्छा मना युक्तिङ् पोङ्ल, 17 खुने़ॽ खे़ङ्हाॽरे़ खुन्छिॽ तगि तगि लाःक्कात् के़बेःक्पा नु सिगाङ् के़दाबा पोङ्ल, खे़ल्ले़ खे़ङ्हाॽ लाम्लोसु तेॽरुसिर, हे़क्क्याङ् खे़ङ्हाॽ सिगाङ् तारुसिॽ॥ कम्भलॽरिक् यहवे दाङ्बे़ल्ले़ कुजुम्भोन् खुन्छिॽ कप्पाङ् के़होप्पा मे़ल्लुक् हे़क्तङ्बा मे़म्बोङ्ने़न्ल॥” 18 यहवे दाङ्बे़ल्ले़ मोसान् मे़त्तु, “लाम्लोबा याःम्बक् चोःक्मा याम्साम्मिन् के़वाॽबा नुनरे़ कुस्सा यहोसुन् तेॽरे़आङ् खे़ने़ॽ खे़ल्ले़ कुधे़गेःक्पो खे़ने़ॽ के़हुक्किन् ने़स्से़ॽ, 19 हे़क्क्याङ् खुने़ॽ निङ्वाॽफुसाम्बा एलाजारे़न् नु के़रे़क् सङ्जुम्भोःल्ले़ खुन्छिॽ तगि ये़प्से़ॽ॥ खे़ङ्हाॽरे़ मे़निसुरए खे़ने़ॽ कन् लक्पे़न्निन् खुने़ॽ हुक्सुप्ते़ॽ॥ 20 खे़ने़ॽ के़युक्कोलाम् खुने़ॽ कुभा युक् पिरे़ॽ, हे़क्केलॽरिक् खक्पे़त् इस्राइलि सङ्जुम्भोःल्ले़ खुने़ॽ कुइङ्जाङ्ङिन् मे़इःत्तु मे़नाःत्तुर॥ 21 खुने़ॽ खे़न् निङ्वाॽफुसाम्बा एलाजारओ तार हे़क्क्याङ् एलाजाररे़ग यहवे दाङ्बे़ल्ले़ कुदगि ‘उरिम’ नु ‘तुम्मिम’ लाम् निःन्धो पान् फुॽरुआङ् खे़न् ताॽजे़क्तुर॥ यहोसुरे़ए कुइङ्जाङ् कुइसिक् के़रे़क् इस्राइलिहाॽरे़ तामा नु पेःक्मा याःम्बक् मे़जोगुर॥” 22 खे़ब्याङ् यहवे दाङ्बे़ल्ले़ खे़न् इङ्जाङ् पिरुबा हे़क्के मोसाःल्ले़ चोगु॥ खुने़ॽ यहोसुन् तेॽरुआङ् निङ्वाॽफुसाम्बा एलाजारे़न् नु के़रे़क् सङ्जुम्भोःल्ले़ खुन्छिॽ तगि ये़प्सु॥ 23 यहवे दाङ्बे़ल्ले़ मोसान् इङ्जाङ् पिरुबा हे़क्केए खुने़ॽ कुहुक्किन् खे़ल्ले़ कुधे़गेःक्पो ने़स्सु हे़क्क्याङ् खे़ल्ले़ चोःक्मा के़बोङ्बा याःम्बक्किन् खुने़ॽ हुक्सुप्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.