खानिःत् 25 - लिम्बुपोर मे़प्मनाबादे़न्नो इस्राइलिहाॽ 1 इस्राइलिहाॽ सित्तिमबा ने़ने़बादे़न्नो साःङ्गाहिम् मे़लेःत्तुआङ् मे़युङे़ल्ले़ कुभा ये़म्बित्छाहाॽरे़ मोआबबा ते़न्छामा मे़न्छुमाहाॽनु याम्बोःप्मा याःम्बक् मे़जोगुआङ् आसुत्थो मे़जोःक्सिङ्॥ 2 खे़ङ्हाॽरे़ खुन्छिॽ माङ्हाॽ सिदुङ्जभा मे़बिरुसिल्ले़ कन् ये़म्बित्छाहाॽ मे़उःत्तुसि, हे़क्क्याङ् कन् ये़म्बित्छाहाॽरे़ सिदुङ्जभाओबा सा नु तःक् मे़जआङ् खे़ङ्हाॽरे़ खुन्छिॽ माङ्हाॽ से़वा मे़मे़त्तुसि॥ 3 कम्भलॽरिक् इस्राइलिहाॽरे़ पोरबा बाल माङ्ङो मे़घे़ःम्सिङ्॥ हे़क्क्याङ् यहवे दाङ्बे़न् इस्राइलिहाॽनु साॽरिक् हाङ्गे़न् सिक्चा लोरे़॥ 4 यहवे दाङ्बे़ल्ले़ मोसान् मे़त्तु, “मनाहाॽरे़ खुन्छिॽ के़रे़क् लाम्लोबाहाॽ तेॽरे़से़ॽआङ् से़रे़से़ॽ हे़क्क्याङ् यहवे दाङ्बे़ल्ले़ कुदगि नाम्लाःङ्मो नाम्भे़त्ते़से़ॽ, हे़क्केलॽरिक् यहवे दाङ्बे़ल्ले़ मि हे़क्तङ्बा कसिक् पोःक्मान् इस्राइलिहाॽलाम्बा माःङ्घा पोङ्ल॥” 5 मोसाःल्ले़ इस्राइलिहाॽरे़ खुन्छिॽ युक्साबाहाॽ मे़त्तुसि, “खिनिॽ के़रे़क् पोरबा बाल माङ्ङो के़घे़ःम्मासि॥” 6 इस्राइलिहाॽ तुम्मादे़न् साःङ्गाहिम्मोबा लाम्धेःप्पो मे़हाबे़र मे़युङे़॥ खे़न् ये़म्मो लत्छा इस्राइलि थिक्ले़ मोसान् नु इस्राइलि सङ्जुम्भोःल्ले़ खुन्छिॽ तगिए खुने़ॽ कुहिम्सयङ्ङो मिध्यानि मे़न्छुमाधिक् तारु॥ 7 आल्ल एलाजाररे़ कुस्सा, हारुन निङ्वाॽफुसाम्बे़ल्ले़ कुम्मे़न्छाॽ पिनहासरे़ खे़न् निसु, खे़ब्याङ् खे़ल्ले़ सङ्जुम्भोःल्ले़ खुन्छिॽ लुम्मोलाम् मुत्थ्रिक् पोगे़ हे़क्क्याङ् कुहुक्को लाःक्थिक् याङ्सिङ्ङाङ् 8 खे़न् इस्राइलिःल्ले़ कुएगाङ् कुएगाङ् साःङ्गाहिम्मो लासे़ हे़क्क्याङ् खे़न् मे़न्छुमाःल्ले़ कुसम्धाङ् के़बप्पा खे़न् इस्राइलिन् ने़प्माङ् मे़न्छुमाःल्ले़ कुसाप्पोःक्कोलाम् फ्याक् लस्सुर थुबुसि॥ खे़न् एगाङ् इस्राइलिहाॽओलाम् खे़न् मिङ्देन् माःङ्घा पोःक्खे़॥ 9 कर खे़न् मिङ्देल्ले़ २४,००० मनाहाॽ से़रुसि॥ 10 खे़ब्याङ् यहवे दाङ्बे़ल्ले़ मोसान् मे़त्तु, 11 “आङ्गाॽ आमिङ्सो आधाःङ्सोरे़ लागि आङ्गाॽ थुक्काबा कुइसिक् इस्राइलिहाॽरे़ खुन्छिॽ लुम्मो एलाजाररे़ कुस्सा, निङ्वाॽफुसाम्बा हारुनरे़ कुम्मे़न्छाॽ पिनहासे़न् आङ्गाॽ मिङ्सो इङ्धाङ् पिमारे़ लागि थुक्तुआङ् वाॽ हे़क्क्याङ् इस्राइलिहाॽरे़ खुन्छिॽ लुम्मोलाम् आङ्गाॽ आसाक्के़न्निन् खे़त्तुदेसु॥ कल्ले़चोगुल्ले़ आङ्गाॽ आसिक् पोःक्मो खे़ङ्हाॽ आङ्गाॽ खाप्पुथ्यःङ् मे़जोगुङ्सिङ्ङिन्॥ 12 कल्ले़चोगुल्ले़ आङ्गाॽ खे़न्नु तङ्मा माङ्हुप् चोगुङ्ॽ फाॽआङ् खुने़ॽ मे़त्ते़ॽ॥ 13 खे़न् नु खे़ल्ले़ कुधाःक्हाॽआङ् सदादिङ्ले़ लागि निङ्वाॽफुसाम्बा ताक्फाओ युक्तिङ् चोगुङ्सिङ्ॽ, थेआङ्भे़ल्ले़ खे़न् खुने़ॽ कुनिङ्वाॽफुमाङ्ङिल्ले़ लागि थुक्तुआङ् वये़॥ खे़ल्ले़ इस्राइलिहाॽरे़ खुन्छिॽ लायोल्ले़ लागि ले़प्मि नाःक्मा याःम्बक् चोगु पिरुसि॥” 14 खे़न् मिध्यानबा मे़न्छुमान्नु मे़से़रुबा इस्राइलिःल्ले़ कुमिङ् जिम्रि वये़, खे़न् सिमियोनरे़ कुधाःक्कोबा लत्छा हिम्सयङ्बा लाम्लोबा सालुरे़ कुस्सा वये़॥ 15 खे़न् मे़से़रुमा मिध्यानबा मे़न्छुमाःल्ले़ कुमिङ् चाए कोजबि वये़, खे़न् मिध्यानि सःङ्बा लाम्लोबा सुररे़ कुस्सा मे़न्छुमा वये़॥ 16 याम्मो यहवे दाङ्बे़ल्ले़ मोसान् मे़त्तु, 17 “खे़ने़ॽ मिध्यानबाहाॽ तुक्खे चाःत्ते़से़आङ् से़रे़से़ॽ, 18 थेआङ्भे़ल्ले़ खे़ङ्हाॽरे़आङ् खिनिॽ तुक्खे के़म्जाःत्ति, हे़क्क्याङ् पोरओ इङ्ले़क् के़म्मे़त्तिआङ् माङ्हाॽ से़वा मे़प्मा के़म्बाङ्घि, खे़न् ये़म्मो मिध्यानि लाम्लोबाल्ले़ कुस्सा मे़न्छुमा कोजबिन् पोरबा मिङ्देॽ ये़न्नो मे़से़रुआङ् वये़रो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.