खानिःत् 24 - लिम्बु1 आल्ल इस्राइलिहाॽ हाङ्वागे़न् मुॽइसाम् पिमासि यहवे दाङ्बे़ल्ले़ कुनिङ्वाॽ वाॽ के़लॽबा बालामे़ल्ले़ निङ्वाॽ खोसु, खे़ब्याङ् खुने़ॽ वेॽ ये़म्मो हे़क्के खालोःन्छे़ मे़बेने़न्, कर खुने़ॽ कुनारान् मुरे़क् खारे़क् थेआङ् के़होःप्पादे़न् ले़प्माङ् हिसु॥ 2 आल्ल बालामे़ल्ले़ कुमिक्के़न् कारिक् मे़त्तुआङ् ओमुये़, हे़क्केःल्ले़ इस्राइलिहाॽ खुन्छिॽ आप्फेक् आप्फेक् थाःक्हाॽनु मे़युङे़बा निसुसि, खे़ब्याङ् निङ्वाॽफुमाङ्ङिल्ले़ कुयाम्साम्मिन् खुने़ॽओ ये़॥ 3 हे़क्क्याङ् खुने़ॽ कुबाःप्मा माङ्निङ्वाॽपान्निन् पाःत्तुरो— “बओररे़ कुस्सा बालामे़ल्ले़ पाःत्तुरो, खे़न् मनाःल्ले़ नुरिक्काङ् कुसिङ् निःत्तुरो कङ्ग खुने़ॽ कुइङ्घङ्लो॥ 4 निङ्वाॽफुमाङ्ङिल्ले़ कुबाःन्जाक् के़घे़म्बे़ल्ले़ अक्खे पाःत्तुरो, खुने़ॽ मुक्साम्दाङ्बान् लाम् सुफो निसुरो, खुने़ॽ साम्बोन् फन्छिङ्ङाङ् से़वा मे़त्तुरो, हे़क्क्याङ् खे़ल्ले़ कुमिक्किन् हङ् लॽरो॥ 5 “याकुबए, खे़ने़ॽ के़साःङ्गाहिम्हाॽ साॽरिक् नुबा चोक्लो, इस्राइलए, खे़ने़ॽ के़युङ्मादेन्हाॽ चाॽरिक् नुबा चोक्लो! 6 “खे़ङ्हाॽ ने़ने़बादे़न् हे़क्के फे़भे़बा मे़जोक्लो, वहःङ्ङिल्ले़ कुयाओबा फुङ्इक् हे़क्के, यहवे दाङ्बे़ल्ले़ लेःत्तुबा तोलिसिङ्मा हे़क्के, च्वाःत्तिल्ले़ कुयाओबा साम्माङ्सिङ्हाॽ हे़क्के ताबे़आङ् ने़रो॥ 7 खे़ल्ले़ कुज्वाःत् याङ्मा खप्प्याहाॽओलाम् च्वाःत्तिन् कुले़ःम् तिम्माङ् वे़त्लो, खे़ल्ले़ कुलिःम्बे़ल्ले़ पयो योरुर च्वाःत् खोसुरो॥ “खे़ङ्हाॽरे़ खुन्छिॽ हाङ्ङिन् अगागे़न्नुःल्ले़आङ् यम्बा पोङ्लो, हे़क्क्याङ् खुन्छिॽ हाङ्जुम्मिन् मिङ्सो इङ्धाङ् मे़बिरुबा पोङ्लो॥ 8 “निङ्वाॽफुमाङ्ङिल्ले़ खे़ङ्हाॽ मिस्रलाम् लःत्तु फे़त्तुसिरो॥ खुने़ॽग ताम्भुङ्ङोबा से़गम्बान् हे़क्के खुन्छिॽ लागि ते़न्धङ् चोक्लो॥ खे़ङ्हाॽरे़ खुन्छिॽ निङ्मि सुवाङ्हाॽ मे़लरु मे़देसुसिरो, हे़क्क्याङ् खे़ङ्हाॽरे़ खुन्छिॽ ये़त्हाॽ फयःप्फयःप् मे़यःप्सुरो, खुन्छिॽ तोःङ्हाॽरे़ खे़ङ्हाॽ तिःक्खु से़रुसिर॥ 9 खे़ङ्हाॽ खिरिङ्बान् हे़क्के के़ङ्ग्रोबा मे़जाआङ् मे़ने़रो, खिरिङ्मान् हे़क्के खे़ङ्हाॽ हाःत्ले़ फोङ्मा सुक्तुसिबे? “खे़ङ्हाॽ मुॽइसाम् के़बिबाहाॽ मुॽइसाबा मे़बोङ्लरो॥ खे़ङ्हाॽ माङ्गे़दे़बाहाॽ साङ्ग्रारे़ ते़त्तुसिररो॥” 10 खे़ब्याङ् बालाके़न् बालामे़न्नु साॽरिक् कुसिक् पोगे़॥ खुने़ॽ कुहुक्किल्ले़ साःप्सुआङ् बालामे़न् मे़त्तु, “आङ्गाॽ आनिङ्मिहाॽ साङ्ग्रा मे़प्मासिरे़ लागि खे़ने़ॽ उःत्ने़आङ् वये़, कर ओमे़त्ते़, खे़ने़ॽ खे़ङ्हाॽ सुम्दुःक् मुॽइसाम् के़बिरुसि॥ 11 कल्ले़चोगुल्ले़ आल्ल खे़ने़ॽ आप्फेक् के़वाॽमादे़न्नो नुःक्खे़ पेगे़ॽ॥ आङ्गाॽ खे़ने़ॽ यम्बा मिङ्सो इङ्धाङ् पिमा निङ्वाॽ चोगुङ्ङाङ् वये़, कर यहवे दाङ्बे़ल्ले़ खे़ने़ॽ मिङ्सो इङ्धाङ् खोमा लाम् के़साक्ते़॥” 12 बालामे़ल्ले़ बालाके़न् मे़त्तु, “खे़ने़ॽ आङ्गाॽओ के़बाङ्घुसिबा इङ्साबाहाॽ अक्खे मे़त्तुङ्सिङ्ङाङ् मे़वये़ने़म्बि? 13 ‘बालाके़ल्ले़ कुहाङ्हिम्मो कत्तुबा के़रे़क् साम्म्याङ् नु युप्पाहाॽ आङ्गाॽ पिआसाङ् यहवे दाङ्बे़ल्ले़ कुबाःन्जाक्किन् काःक्माआङ् आनिङ्वाॽ पाःत्पाःत् नुबा इग्र ताप्फे़ःम्बा चोःक्मा मे़सुक्कान्॥ यहवे दाङ्बे़ल्ले़ च्या मे़त्ता, आङ्गाॽ खे़न्ने पाःत्तुङ्ॽ॥’ 14 आल्ल आङ्गाॽ आप्फेक् आमनाहाॽओ पेःक्का, कर इस्राइलिहाॽरे़ खे़ने़ॽ के़मनाहाॽ ताःन्दि थे़मा मे़मे़त्तुसिॽ, आङ्गाॽ खे़न् मे़त्ने़रो॥” बालामरे़ लिसिगेक्पा कुइङ्घङ् 15 खे़ब्याङ् खुने़ॽ कुबाःप्मा माङ्निङ्वाॽपान्निन् अक्खेलॽरिक् पाःत्तुरो— “बओररे़ कुस्सा बालामे़ल्ले़ पाःत्तुरो, खे़न् मनाःल्ले़ कुमिक्के़न् हङ् लॽरो कङ्ग खुने़ॽ कुइङ्घङ्लो॥ 16 निङ्वाॽफुमाङ्ङिल्ले़ कुबाःन्जाक् के़घे़म्बे़ल्ले़ के़रे़क्नुःल्ले़ यम्बा निङ्वाॽफुमाङ्लाम् सिक्कुम्दिङ् निङ्वाॽ खोसुरो, खुने़ॽ मुक्साम्दाङ्बालाम् सुफो निसुरो खुने़ॽ साम्बोन् फन्छिङ्ङाङ् से़वा मे़त्तुरो, हे़क्क्याङ् खे़ल्ले़ कुमिक्किन् हङ् लॽ लॽरिक् पाःत्तुरो॥ 17 “आङ्गाॽ खुने़ॽ निसुङ्ॽ, कर आल्लोग मेःन्लो॥ आङ्गाॽ खुने़ॽ ओमे़त्तुङ्ॽ, कर निःत्ताङ् लाम्बाग मेःन्लो॥ याकुबलाम् लत्छा खेःम्सिक्पा लिङ्लो, हे़क्क्याङ् इस्राइललाम् हाङ्तक्कात् थिक् पोःक्लो॥ खुने़ॽ मोआबरे़ कुलाम्लोबाहाॽ यःप्सुसिरो, हे़क्क्याङ् सेथरे़ कुमुॽइदाङ्सान् मे़क्खुरो॥ 18 एदोमे़न् हारि तारो, हे़क्क्याङ् कुनिङ्मि सेइरे़न्नाङ् हारि तारो, कर इस्राइले़ङ्ग के़धुम्बा पोङ्लो॥ 19 याकुबलाम् लत्छा युक्साबा थिक् लःन्लो, खम्भ्याङ् ये़क्यक्को के़हिङ्बाहाॽ मे़क्खुसिरो॥” बालामरे़ ङासिगेक्पा कुइङ्घङ् 20 खे़ब्याङ् खुने़ॽ अमाले़किहाॽ ओमे़त्तुसिआङ् कुबाःप्मा माङ्निङ्वाॽपान्निन् पाःत्तुरो— “के़रे़क् सुवाङ्हाॽओ अमाले़किन् साॽरिक् मुक्के़गुबा वये़रो, कर मे़क्मा सिमे़न्ने खे़ल्ले़ कुनुप्मा पोङ्लो॥” बालामरे़ तुक्सिगेक्पा कुइङ्घङ् 21 हे़क्क्याङ् केनिहाॽ ओमे़त्तुसिआङ् कुबाःप्मा माङ्निङ्वाॽपान्निन् पाःत्तुरो— “खिनिॽ युङ्मादे़न्निन् ताप्थेक् याम्धेक्पा चोक्लो, खिनिॽ खे़न् युक्नान् याक्पेॽओबा पुहाप् हे़क्तङ्बा चोक्लो॥ 22 कर अस्सुररे़ खिनिॽ के़दे़म्सि के़देॽरिरो हे़क्केःल्ले़ खिनिॽ केनिहाॽ खाप्पुथ्यःङ् के़बोखिरो॥” बालामरे़ नुसिगेक्पा कुइङ्घङ् 23 खे़ब्याङ् खुने़ॽ याम्मो माङ्निङ्वाॽपान् पाःत्तुरो— “चिःत्ते़स्ये़रो! निङ्वाॽफुमाङ्ङिल्ले़ अक्खे चोगुल्ले़ हात् हिङ्मा सुक्पे? 24 कित्तिमरे़ कुयाओनु वालाधाहाॽ मे़भे़न्लो, हे़क्क्याङ् खे़ङ्हाॽरे़ अस्सुर नु एबेरे़न् मे़नाःन्दुसिरो कर खे़ङ्हाॽ आप्फेक्काङ् सदादिङ्ले़ लागि मे़मे़क्लो॥” 25 खे़न् एगाङ् बालामे़न् पोगे़आङ् कुहिम्मो नुःक्खे़, हे़क्क्याङ् बालाके़न्नाङ् कुलाम्मो थासिङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.