खानिःत् 23 - लिम्बुबालामरे़ थिक्सिगेक्पा कुइङ्घङ् 1 बालामे़ल्ले़ बालाके़न् मे़त्तु, “आङ्गाॽ आलागि नुसि ले़त्ति तोःम्मादे़न्हाॽ चोगाङ् पिराङ्ङे़ॽ, हे़क्क्याङ् नुसि से़गम्बा नु नुसि थुःम्बाहाॽ यारिप् चोगाङ् पिराङ्ङे़ॽ॥” 2 बालामे़ल्ले़ मे़त्तुबा हे़क्केए बालाकरे़ चोगु॥ बालाक नु बालामरे़ ले़त्ति तोःम्मादे़न् थक्मा लत्छा लत्छा से़गम्बा नु लत्छा लत्छा मे़ल्लुक् सिदुङ्जभा तोःन्दे़सु॥ 3 बालामे़ल्ले़ बालाके़न् मे़त्तु, “आङ्गाॽ यहवे दाङ्बे़ल्ले़ कुदुम्से़ पेःक्काल्ले़ खे़ने़ॽग के़सिदुङ्जभाःल्ले़ कुबेसाङ् ये़म्सिङ्ङे़ॽ॥ आल्ल आङ्गाॽग नाहाङ् ले़प्माङ् पेःक्का, हे़क्क्याङ् यहवे दाङ्बान् आङ्गाॽ आदुम्से़ युबिला॥ खुने़ॽ आङ्गाॽ च्याज्या ओःन्धाक्का, खे़न् आङ्गाॽ खे़ने़ॽ मे़त्ने़॥” खे़क्क्याङ् खुने़ॽ मुरे़क् खारे़क्पा कोःक्मा ले़प्माङ् पे॥ 4 निङ्वाॽफुमाङ्ङिल्ले़ बालामे़न् तुमु॥ हे़क्क्याङ् बालामे़ल्ले़ खुने़ॽ मे़त्तु, “आङ्गाॽ नुसि ले़त्ति तोःम्मादे़न् चोगुङ्ङाङ् खे़प्मो आङ्गाॽ ले़त्ति तोःम्मादे़न् थक्मा से़गम्बा थिक्थिक् नु थुःम्बा थिक्थिक् सिदुङ्जभा तोःन्दुङ्सिङ्ङाङ् मे़ने़रो॥” 5 यहवे दाङ्बे़ल्ले़ बालामे़ल्ले़ कुम्ब्राओ इङ्घङ् थिक् केःत्तु पिरुआङ् मे़त्तु, “खे़ने़ॽ नुःङ्मा पेःक्माआङ् बालाके़न् मे़प्मा के़बोङ्बा इङ्घङ्ङिन् हाबा कन्लो॥” 6 हे़क्क्याङ् बालाम्मे़न् बालाकओ नुःक्खे़आङ् पे॥ कन् ये़म्मो बालाके़न् मोआबबा के़रे़क् तुम् मनाहाॽनु सोरिक् खुने़ॽ कुसिदुङ्जभाःन्नु आल्लसाङ् ये़बे़गरे़॥ 7 खे़ब्याङ् बालामे़ल्ले़ आरामलाम् नाङ्गे़न् ले़प्माङ्बा कोःक्माहाॽओनु फे़त्ताङ्॥ हे़क्क्याङ् खुने़ॽ कम्भलॽरिक् कुमाङ्निङ्वाॽपान्निन् पाःत्तुरो— “‘त्ये़म्मे़ॽओ, आलागि याकुबे़न् माङ्देसे़म्मे़ॽओ त्ये़म्मे़ॽओ,’ मोआबबा हाङ् बालाकरे़ अक्खे मे़त्ताङ्लो ‘खे़ने़ॽ इस्राइलिहाॽ यङ्मा से़रे़से़ॽओ॥’ 8 निङ्वाॽफुमाङ्ङिल्ले़ए साङ्ग्रा मे़मे़त्तुन्छिन्बाहाॽ आङ्गाॽ आक्खेलॽरिक् माङ्देसुङ्सिङ्बे? यहवे दाङ्बे़ल्ले़ए चे़क्या इङ्दो मे़मे़त्तुन्छिन्बाहाॽ आङ्गाॽ आक्खेआङ् आप्तिक् कुःत्तुङ्सिङ्बे? 9 सियाक्पेॽ थे़याक्पेॽहाॽरे़ कुजङ्ङोनु आङ्गाॽ खे़ङ्हाॽ निसुङ्सिङ्लो, हे़क्क्याङ् कोःक्मा थे़गुहाॽओनु आङ्गाॽ खे़ङ्हाॽ ओमे़त्तुङ्सिङ्लो॥ ओमे़त्ते़म्मे़ॽ, कङ्ग एःक् के़युङ्बा सुवाङ्लो, खे़ङ्हाॽ वेॽ मे़न्छाम् सुवाङ्हाॽलाम् लाःत्लाःत् मे़से़न्छिङ्लो॥ 10 ये़ःङ्घा यारिक् यरिक् याकुबरे़ कुमुॽइदाङ्साहाॽ हाःत्ले़ निःप्मा सुक्तुसिबे? इग्र इस्राइलबा कुलक् लिसिओ कुलक् थिक्हाॽआङ् हाःत्ले़ निःप्मा सुक्तुसिबे? आसिमे़न् साम्योबा हे़क्तङ्बा पोङ्लरो, हे़क्क्याङ् आनुप्मे़न् खे़ङ्हाॽरे़न् हे़क्तङ्बा पोङ्लरो॥” 11 खे़ब्याङ् बालाके़ल्ले़ बालामे़न् मे़त्तु, “खे़ने़ॽ आङ्गाॽ थे़मा के़मे़त्ताबाबे? आनिङ्मिहाॽ साङ्ग्रा मे़प्मासिरे़ लागि आङ्गाॽ खे़ने़ॽ फे़त्ने़, कर खे़ने़ॽग खे़ङ्हाॽ ताङ्ग्रात्चि मुॽइसाम्ने के़बिरुसि!” 12 खुने़ॽ बालाके़न् मे़त्तु, “यहवे दाङ्बे़ल्ले़ मे़त्ताङ्बा पाःन्जाःक्किन्ने आङ्गाॽ पाःप्मा मे़बोङ्ने़म्बि?” बालामरे़ निसिगेक्पा कुइङ्घङ् 13 खे़ब्याङ् बालाकरे़ खुने़ॽ मे़त्तु, “चिसासाजि वेॽसमादे़न्नो आङ्गाॽओ फे़रे़ॽ॥ खे़प्मोलाम् खे़ने़ॽ खे़ङ्हाॽ के़निसुसिॽ॥ खे़ने़ॽ खे़ङ्हाॽरे़ खुन्छिॽ साःङ्गाहिम्हाॽरे़ कुया कुदिङ्हाॽरक् के़निसु, कर खे़ङ्हाॽ के़रे़क् के़न्निसुसिन्ॽ॥ हाबा खे़प्मोलाम् खे़ङ्हाॽ आङ्गाॽ आलागि माङ्दे साङ्ग्रा मे़त्ते़से़ॽ॥” 14 खे़ब्याङ् बालाकरे़ खुने़ॽ पिसगाबा कोःक्माल्ले़ कुजङ्ङो के़ने़बा सोफिमबा इक्ताप्पो तेॽरु, हे़क्क्याङ् नुसि ले़त्ति तोःम्मादे़न् चोगुआङ् ले़त्ति तोःम्मादे़न् थक्मा लत्छा लत्छा से़गम्बा नु लत्छा लत्छा थुःम्बा सिदुङ्जभा तोःन्दुसि॥ 15 बालामे़ल्ले़ बालाके़न् मे़त्तु, “आङ्गाॽ यहवे दाङ्बे़ल्ले़ कुदुम्से़ पेःक्काल्ले़ खे़ने़ॽग कन् के़सिदुङ्जभाःल्ले़ कुबेसाङ् हाबा ये़बे़ॽ॥” 16 यहवे दाङ्बे़ल्ले़ बालामे़न् तुमु, हे़क्क्याङ् खुने़ॽ कुम्ब्राओ पाःन्जाक् केःत्तु पिरु, खम्भ्याङ् खुने़ॽ मे़त्तु, “खे़ने़ॽ नुःङ्मा पेःक्माआङ् बालाके़न् मे़प्मा के़बोङ्बा पाःन्जाःक्किन् आम्भा कन्लो॥” 17 खे़ब्याङ् बालाम्मे़न् बालाकरे़ओ पे॥ बालाक्के़न् हे़क्क्याङ् खुने़ॽनु के़वाॽबा मोआबबा तुम् मनाहाॽ खे़ने़ॽ कुसिदुङ्जभाःल्ले़ कुबेसाङ् आल्लसाङ् ये़बे़गरे़॥ बालाके़ल्ले़ खुने़ॽ सेःन्दोसु, “यहवे दाङ्बे़ल्ले़ थे़मा के़मे़त्ते़बे?” 18 खे़ब्याङ् बालामे़ल्ले़ खुने़ॽ कुमाङ्निङ्वाॽपान्निन् पाःत्तुरो— बालाकए, खे़ने़ॽ पोगे़ॽआङ् खे़प्से़ॽओ, सिप्पोराःल्ले़ कुस्साए, आङ्गाॽ आबाःन्नो निङ्वाॽ पिरे़ॽओ॥ 19 निङ्वाॽफुमाङ्ङिल्ले़ इङ्आल्ले़क्ने़न्लो, थेआङ्भे़ल्ले़ खुने़ॽ मे़न्छाम् याप्मि मेःल्लो, खुने़ॽ कुनिङ्वाॽ मे़ले़क्खुन्लो, हे़नाङ्भे़ल्ले़ खुने़ॽ मे़न्छाम् याप्मि मुॽइदाङ्सा मेःन्लो॥ थे खुने़ॽ पाःत्तुआङ् खे़न् मे़जोगुन्बि? इग्र थे खुने़ॽ माङ्हुप् चोगुआङ् खे़न् मे़गे़त्तुम्बि? 20 ओमे़त्ते़म्मे़ॽ, मुॽइसाम् थामारे़ लागि आङ्गाॽग इङ्जाङ् खोसुङ्ङाङ् वाॽरो खुने़ॽ मुॽइसाम् थासुआङ् वाॽरो, आङ्गाॽ खे़न् ले़ङ्मा मे़सुक्कान्लो॥ 21 “याकुबओ तॽयान् फे़म्मा निमे़न्दे़त्ते वाॽरो॥ इस्राइलओ तुक्खे लाक्खे निमे़न्धाःप्पे वाॽरो॥ यहवे दाङ्बा, खुन्छिॽ निङ्वाॽफुमाङ्ङिन् खुन्छिॽनुए वाॽरो, हे़क्क्याङ् खुने़ॽए खुन्छिॽ हाङ् फाॽआङ् खे़ङ्हाॽरे़ उवा मे़जोगुरो॥ 22 निङ्वाॽफुमाङ्ङिल्ले़ मिस्रलाम् खे़ङ्हाॽ लःत्तु फे़त्तुसिआङ् मे़वाॽरो॥ खुने़ॽग ताम्भुङ्ङोबा से़गम्बान् हे़क्के खुन्छिॽ लागि ते़न्धङ् चोक्लो॥ 23 से़क्खासाङ् याकुबे़न् के़याङ्बा कित्चाक् होप्लो, इस्राइलरे़ कुदक्ले़ङ्वाओ थे़मा थुम्म्याआङ् होप्लो॥ याकुब नु इस्राइलरे़ खुन्छिॽ याःम्बेओ अक्खे मे़बाःत्तुरो, ‘निङ्वाॽफुमाङ्ङिल्ले़ चाॽरिक् निङ्वाॽ के़माबा चोगुआङ् वाॽरो!’ 24 ओमे़त्ते़म्मे़ॽ, खे़न् सुवाङ्हाॽ खिरिङ्मान् हे़क्के मे़बोक्लो, याप्मि फप्मा के़जोःक्पा खिरिङ्बान् हे़क्के खे़न् तक्पे़त् मुत्थ्रिक् पोःक्लो॥ खे़ल्ले़ सानाःत्तिन् मे़न्जाए थारिक् हे़क्क्याङ् कुमाक्खिन् मे़न्धुङ्ङे थारिक् खे़न् मे़नाःम्सिङ्ङिन्लो॥” 25 खे़ब्याङ् बालाके़ल्ले़ बालामे़न् मे़त्तु, “खे़ङ्हाॽ माङ्दे साङ्ग्राआङ् मे़मे़त्ते़से़न्ने़ॽ, हे़क्क्याङ् मुॽइसाम्माङ् मे़बिरे़से़न्ने़ॽ!” 26 कर बालामे़ल्ले़ बालाके़न् मे़त्तु, “यहवे दाङ्बाल्ले़ च्या पाःत्तुॽ खे़न् आङ्गाॽ से़क्खा चोःक्माए पोङ् फाॽआङ् खे़ने़ॽ तगिए मे़मे़त्ने़न्नाङ् मे़वये़न्बि?” बालामरे़ सुम्सिगेक्पा कुइङ्घङ् 27 खे़ब्याङ् बालाकरे़ बालामे़न् मे़त्तु, “फे़रे़ॽ, आल्ल आङ्गाॽ खे़ने़ॽ वेॽसमादे़न्नो तेॽने़॥ पोङ्मा सुक्, खे़प्मोलाम् आङ्गाॽ आलागि खे़ने़ॽ खे़ङ्हाॽ साङ्ग्रा मे़प्मासि निङ्वाॽफुमाङ्ङिल्ले़ कुनिङ्वाॽ वाॽबि॥” 28 हे़क्क्याङ् बालाके़ल्ले़ बालामे़न् पोरबा चन्जम्बादे़न्नो तेॽरु, खे़प्मोलाम् मुरे़क् खारे़क् थेआङ् के़होःप्पादे़न्निन् निधाबे़॥ 29 खे़ब्याङ् बालामे़ल्ले़ बालाके़न् मे़त्तु, “आङ्गाॽ आलागि कॽयो नुसि ले़त्ति तोःम्मादे़न्हाॽ चोगे़ॽआङ् नुसि से़गम्बा नु नुसि थुःम्बाहाॽ यारिप् चोगाङ् पिराङ्ङे़ॽ॥” 30 बालामे़ल्ले़ मे़त्तुबा कुसिङ्ङे बालाके़ल्ले़ चोगु, हे़क्क्याङ् ले़त्ति तोःम्मादे़न् थप्मे लत्छा लत्छा से़गम्बा नु लत्छा लत्छा थुःम्बाहाॽ खुने़ॽ तोःन्दुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.