खानिःत् 22 - लिम्बुमोआब हाङ् बालाकरे़ बालामे़न् उःत्तु 1 खे़ब्याङ् इस्राइलिहाॽ लाम्दिक् मे़जोगे़र मोआबबा ने़ने़बादे़न्नो मे़बे हे़क्क्याङ् यरिहो कुदोःप्मा नाङ्गे़न् पिसाङ् यर्दन वहःङ्ङिल्ले़ कुयाओ साःङ्गाहिम्हाॽ मे़घिङ्घु॥ 2 इस्राइलिहाॽरे़ एमोरिहाॽ थे़मा थे़मा मे़मे़त्तुसिआङ् वये़, सिप्पोरारे़ कुस्सा बालाकरे़ खे़न् निसुआङ् वये़, 3 हे़क्क्याङ् मोआबे़न् इस्राइलिहाॽनु साॽरिक् किसे़, थेआङ्भे़ल्ले़ खे़ङ्हाॽ यरिक् मे़वये़॥ इस्राइलिहाॽरे़ मे़जोगुल्ले़ खे़ङ्हाॽ खुन्छिॽ साम्मिक्ले़ ले़रुसि॥ 4 मोआबिहाॽरे़ मिद्यानबा काप्पो तुम्साहाॽ मे़मे़त्तुसि, “आल्ल आनिॽ के़रे़क् पिसाङ्बा ते़न्निन् आधोःङ्धोःङ्बा पित्ते़ल्ले़ ते़ल्लक् इक्ताप्हाॽ लाःक्तु फे़त्तुआङ् याःन्हाॽ युम्रे़क् मे़क्खुबा हे़क्के कन् मनालुप्लिहाॽरे़ के़रे़क् पाःन्हाॽ युम्रे़क् मे़मे़क्खुबा पोःक्खे़॥” खे़न् ये़म्मो सिप्पोरारे़ कुस्सा बालाके़न् मोआबबा हाङ् वये़॥ 5 खुने़ॽ युफ्रेतिस कुबेसाङ् के़युङ्बा, खुने़ॽ आप्फेक् कुसुवाङ्बा कुन्साॽरे़ कुबाङ्भेॽ पतोरओ बओररे़ कुस्सा बालामे़न् अक्खे मे़त्तुआङ् इङ्घङ् हाक्तुरो, “मिस्रलाम् लत्छा सुवाङ्बा मनाहाॽ मे़भे़रे़आङ् लाजेःन्ने सधे़क् मे़धिम्सु मे़सुरु॥ खे़ङ्हाॽ आङ्गाॽए आइःन्दोओ मे़भे़रे़आङ् मे़युङ्सिङ्ङाङ् मे़युङ्॥ 6 आल्ल फे़रे़ॽआङ् आङ्गाॽ आलागि कन् सुवाङ्हाॽ माङ्दे साङ्ग्रा मे़त्ते़से़ॽ, थेआङ्भे़ल्ले़ खे़ङ्हाॽ आङ्गाॽनुःल्ले़ साॽरिक् मुक्साम्साबा मे़जोक्॥ हे़क्के के़जोगुने़भग्र आङ्गाॽ खे़ङ्हाॽ नाःन्दुङ्सिङ्ङाङ् लाजेॽलाम् नाःप्मादेमा सुक्तुङ्बि हाग॥ थेआङ्भे़ल्ले़ खे़ने़ॽ आत्तिन् मनान् हाङ्वागे़न् मुॽइसाम् के़बिरुॽ खुने़ॽओ मुॽइसाम् थाःॽ, हे़क्क्याङ् आत्तिन् माङ्दे साङ्ग्रा के़मे़त्तुॽ खे़न् साङ्ग्रारे़ ते़त्तुॽ, खे़न् आङ्गाॽ निसुङ्ङाङ् वाॽ॥” 7 मोआब नु मिद्यानबा काप्पो तुम्साहाॽरे़ थुम्म्या इमा कुजे़न् याङ्ङिन् मे़दाःक्तु, हे़क्क्याङ् बालामओ मे़द्ये़आङ् बालाकरे़ कुइङ्घङ्ङिन् मे़मे़त्तु॥ 8 बालामे़ल्ले़ खे़ङ्हाॽ मे़त्तुसि, “आइन् से़न्दिक् आम्भा कम्मोए याःक्ते़म्मे़ॽ, हे़क्क्याङ् यहवे दाङ्बे़ल्ले़ आङ्गाॽ थे़मा मे़त्ताआ, आङ्गाॽ हाबा खे़न् पाःन्निन् चे़क्निङ्ॽ॥” कल्ले़चोगुल्ले़ मोआबबा लाम्लोबाहाॽ बालामरो याङ्मे़धोःक्ते़॥ 9 निङ्वाॽफुमाङ्ङिन् बालामरो ये़आङ् मे़त्तु, “खे़ने़ॽओ के़याःक्पा मनाहाॽ हाःत्छिबे?” 10 बालामरे़ निङ्वाॽफुमाङ्ङिन् मे़त्तु, “मोआबबा हाङ् सिप्पोराःल्ले़ कुस्सा बालाकरे़ आङ्गाॽ अक्तङ्बा इङ्घङ् हाक्ताङ्ङाङ् वाॽ, 11 ‘मिस्रलाम् के़लःम्बा के़भे़म्बा लत्छा सुवाङ्समा मनाहाॽरे़ लाजेन् के़रे़क् सधे़क् मे़धिम्सुआङ् ने़ःॽ॥ आल्ल खे़ने़ॽ फे़रे़ॽआङ् आङ्गाॽ ले़प्माङ्लाम् खे़ङ्हाॽ माङ्देसे़से़ॽ॥ हे़क्के के़जोगुने़भग्र आङ्गाॽ खे़ङ्हाॽ नाःन्दुङ्सिङ्ङाङ् लाजेॽलाम् नाःप्मादेमा सुक्तुङ्बि हाग॥’” 12 कर निङ्वाॽफुमाङ्ङिल्ले़ बालामे़न् अक्खे मे़त्तु, “खे़ने़ॽ कन्हाॽनु मे़बेगे़न्ने़ॽ॥ खे़ने़ॽ कन् सुवाङ्हाॽ माङ्दे साङ्ग्रा मे़प्मासि मे़नुॽने़न्, थेआङ्भे़ल्ले़ खे़ङ्हाॽ मुॽइसाबा मे़जोक्॥” 13 खे़ब्याङ् बालामे़न् तानाम् आन्देन् पोगे़, हे़क्क्याङ् बालाकरे़ कुलाम्लोबा मनाहाॽ मे़त्तुसि, “खिनिॽ आप्फेक् लाजेॽओ पेगाम्मे़ॽ, थेआङ्भे़ल्ले़ यहवे दाङ्बे़ल्ले़ आङ्गाॽ खिनिॽनु सोरिक् पेःक्मा मे़भाःक्ताङ्ङिन्॥” 14 हे़क्क्याङ् मोआबबा लाम्लोबाहाॽ बालाकओ मे़बेआङ् मे़मे़त्तु, “बालामे़न् आनिगे़नु फे़म्मा मे़दे़न्दे़न्॥” 15 खे़ब्याङ् बालाके़ल्ले़ तगि पाङ्घुसिबानुःल्ले़आङ् यरिक् के़दम्बा लाम्लोबाहाॽ नु थोधोक्पा यम्बा सुहाङ्युक्पाहाॽ पाङ्घुसि॥ 16 खे़ङ्हाॽ बालामरो मे़द्ये़आङ् खुने़ॽ मे़मे़त्तु, “सिप्पोराःल्ले़ कुस्सा बालाकरे़ अक्खे पाःत्तुरो— “खे़ने़ॽ आङ्गाॽ आभाॽसे़ फे़म्मारे़लागि थे़मा पाःन्निल्ले़आङ् के़न्छाक्ने़ल्ल॥ 17 आङ्गाॽ खे़ने़ॽ यम्बा नाजम् पिने़आङ् मिङ्सो इङ्धाङ्साबा चोःक्ने़॥ खे़ने़ॽ थे के़बाःत्तुॽ आङ्गाॽ हाबा खे़न् चोगुङ्ॽ॥ कल्ले़चोगुल्ले़ चिसाजि फे़रे़ॽ, हे़क्क्याङ् कन् सुवाङ्बा मनाहाॽ माङ्देसे़से़ॽ॥” 18 कर बालामे़ल्ले़ बालाकरे़ कुइङ्साबाहाॽ अक्खे मे़त्तुसिआङ् नोगप् पिरुसि, “बालाकरे़ कुहाङ् कुहिम्मो कत्तुबा के़रे़क् साम्म्याङ् नु युप्पाहाॽ पिआसाङ् यहवे दाङ्बा आङ्गाॽ आनिङ्वाॽफुमाङ्ङिल्ले़ कुबाःन्निन् चुक्पा इग्र यम्बा पाःन्नो फेःम्मा मे़सुक्कान्॥ 19 आल्ल वेॽहाॽरे़ मे़जोगुबा हे़क्केए खिनिॽआङ् आइन् से़न्दिक् हाबा कॽयो याःक्ते़म्मे़ॽ, हे़क्क्याङ् यहवे दाङ्बे़ल्ले़ आल्लसाङ् वेॽ थे़मा पाःत्तुॽ, आङ्गाॽ निङ्वाॽ खोसुङ्ॽ॥” 20 निङ्वाॽफुमाङ्ङिन् खे़न् से़न्दिक् बालामरे़ओ ये़आङ् खुने़ॽ मे़त्तु, “कन् मनाहाॽ खे़ने़ॽ के़उःत्छे़ मे़द्ये़बारो॥ कल्ले़चोगुल्ले़ खे़ने़ॽ कन्हाॽनु सोरिक् पेगे़ॽ, कर आङ्गाॽ खे़ने़ॽ थे़मा थे़मा मे़त्ने़, खे़न्लक् चोगे़ॽ॥” बालामरे़ कुअदङ्ङिन् 21 बालामे़न् तानाम्सा पोगे़, हे़क्क्याङ् कुअदङ्ङो कारेःल्लिन् इघेःक्खुआङ् मोआबबा लाम्लोबाहाॽनु सोरिक् पेरो॥ 22 कर बालामे़न् पेबाल्ले़ चोगुल्ले़ यहवे दाङ्बान् कुसिक् पोगे़, हे़क्क्याङ् दाङ्बे़ल्ले़ कुमाङ्लाइङ्बान् ये़आङ् कुलाम्मिन् थेःक्तु पिरु॥ खुने़ॽ आप्फेक् कुअदङ्ङिन् युक्तुआङ् पेर पत्छे़॥ बालाम्मे़ल्ले़ खुने़ॽ कुअदङ्ङिन् युक्तुआङ् वये़ हे़क्क्याङ् खुने़ॽनुए सोरिक् कुसे़वारोबा ने़त्छिआङ् वये़त्छि॥ 23 यहवे दाङ्बे़ल्ले़ कुमाङ्लाइङ्बान् कुहुक्को ताभेन् याङ्सिङ्ङाङ् लाम्मो ये़बे़गरे़बा खे़न् अदङ्ङिल्ले़ निसु, हे़क्क्याङ् अदङ्ङिन् लाम्मोनु हिल्लिक् हिसिङ्ङाङ् इक्ताप् ले़प्माङ् थासिङ्॥ लाम्मो हिमारे़ लागि बालामे़ल्ले़ अदङ्ङिन् हिप्तु॥ 24 नाहाङ् कत्नाहाङ् लुङ्धाक् से़प्मनाबाआङ् के़ये़प्पा चे़ल्ले़क्सेॽ इक्ताप् ने़त्छिरे़ कुलुम्मोबा चिहुॽहुॽबादे़न्नो यहवे दाङ्बे़ल्ले़ कुमाङ्लाइङ्बान् ये़म्सिङ्॥ 25 यहवे दाङ्बे़ल्ले़ कुमाङ्ला इङ्बे़न् निसुआङ् अदङ्ङिन् लुङ्धाक्को चिघे़ःम् खे़ःम्सिङ् हे़क्क्याङ् बालामरे़ कुलाङ्ङिन् लुङ्धाक्को चिभिःत् फिःत्तु॥ खुने़ॽ अदङ्ङिन् याम्मो हिप्तु॥ 26 याम्मो यहवे दाङ्बे़ल्ले़ कुमाङ्लाइङ्बे़न् आल्लसाङ् नानाक् पेआङ् चुक्वा फे़ङ्वा आत्तिआङ् हिसिङ्मा सुक्मे़न्दे़प्मनाबा चिहुॽहुॽबादे़न्नो ये़म्सिङ्॥ 27 अदङ्ङिल्ले़ यहवे दाङ्बे़ल्ले़ कुमाङ्लाइङ्बान् निसुआङ् हर्गुप् ने़सिङ्॥ खे़ब्याङ् बालामे़न् कुसिक् पोगे़, हे़क्क्याङ् कुदक्काःत्तिल्ले़ अदङ्ङिन् लःम्मा हेःक्तु॥ 28 खे़ब्याङ् यहवे दाङ्बे़ल्ले़ अदङ्ङिन् पारे़र याःन्दु, हे़क्क्याङ् खे़ल्ले़ बालामे़न् मे़त्तु, “आङ्गाॽ खे़ने़ॽ थे मे़त्ने़आङ् वाॽआङ् आङ्गाॽ सुम्दुःक् के़हिप्ताङ्बे?” 29 बालामे़ल्ले़ अदङ्ङिन् मे़त्तु, “खे़ने़ॽ आङ्गाॽ सधःक्पा के़जोगाङ्॥ आङ्गाॽ आहुक्को ताभेन् वये़बा हे़क्केःल्ले़ आल्लोसा खे़ने़ॽ से़त्ने़बा वये़मे़न्!” 30 अदङ्ङिल्ले़ बालामे़न् मे़त्तु, “खे़ने़ॽ के़हिङ्हिङ् थे़म्बा आइन्बा ये़न् थारिक् खे़ने़ॽ के़युक्तुबा अदङ्ङिन् थे आङ्गाॽए मे़ःन्नाबि? आङ्गाॽ आप्फाल्ले़ खे़ने़ॽनु अक्तङ्बा चोगुङ्ङाङ् वये़बे?” हे़क्क्याङ् बालामे़ल्ले़ मे़त्तु, “मेःन्, मे़न्जोःक्के के़वाॽ॥” 31 खे़ब्याङ् यहवे दाङ्बे़ल्ले़ बालामे़न् मिक् निसे़र याःन्दु, हे़क्क्याङ् ताभे के़भिःङ्बाआङ् हुक्को के़याङ्सिङ्बा लाम्मो के़ये़प्पा के़जाबा यहवे दाङ्बे़ल्ले़ कुमाङ्लाइङ्बान् खुने़ॽ निसु॥ हे़क्क्याङ् अःक्खुम् मे़ःत्छिङ्ङाङ् साम्बोन् फन्छिङ्॥ 32 खे़ब्याङ् यहवे दाङ्बे़ल्ले़ कुमाङ्लाइङ्बाल्ले़ खुने़ॽ मे़त्तु, “खे़ने़ॽ थेआङ् के़अदङ्ङिन् सुम्दुःक् के़हिप्तुबा? ओमे़त्ते़ॽ, आङ्गाॽ खे़ने़ॽ के़लाम् थेःक्से़ याङ्ङाङ् वाॽआ, थेआङ्भे़ल्ले़ आङ्गाॽ आदगि खे़ने़ॽ आप्फेक् के़निङ्वाॽ पाःप्पाःत् लाङ्गे़घेःक्ल के़बत्॥ 33 खे़न् अदङ्ङिल्ले़ आङ्गाॽ निसाङ्ङाङ् आल्लो थारिक्ले़ सुम्दुःक् आङ्गाॽ आदगिलाम् खे़त्छिङ्॥ आङ्गाॽलाम् खे़न् मे़घे़त्छिङ्ङे़न्बा हे़क्केःल्ले़ आल्लो थारिक्ले़ आङ्गाॽ खे़ने़ॽ आन्देन् से़त्ने़मे़न्, कर खे़ङ्ग कुहिङ्वे़त् ले़रुङ्मे़न्॥” 34 बालामे़ल्ले़ यहवे दाङ्बे़ल्ले़ कुमाङ्लाइङ्बे़न् मे़त्तु, “आङ्गाॽ लायो चोगुङ्ङाङ् वाॽ॥ आङ्गाॽ आलाम्मिन् के़धेःक्तुआङ् खे़ने़ॽ के़ये़बे़बा आङ्गाॽ मे़न्निबा॥ कल्ले़चोगुल्ले़ खे़ने़ॽ के़मिक्साओ कन् नुबा मे़जोक्ने़न्ने़भग्र आङ्गाॽ याम्मो नुःङ्ङा पेःक्का॥” 35 यहवे दाङ्बे़ल्ले़ कुमाङ्लाइङ्बे़ल्ले़ बालामे़न् मे़त्तु, “कन् मनाहाॽनु सोरिक् पेगे़ॽ॥ कर आङ्गाॽ थे़मा थे़मा मे़त्ने़, हाबा खे़न्लक् खे़ने़ॽ पाःत्ते़ॽ॥ कल्ले़चोगुल्ले़ बालामे़न् बालाकरे़ कुलाम्लोबाहाॽनु सोरिक् पेरो॥” बालाकरे़ बालामे़न् लाङ्दाःक् मे़त्तु 36 बालाकरे़ बालामे़न् फे़रे़बा खे़प्सुआङ् खुने़ॽ कुलाजेॽओबा कुया कुदिङ्हाॽरे़ कुबेसाङ्बा अर्नोन इःन्दोओ के़ने़बा मोआबि ये़क्यक् थारिक्के खुन्छिॽ तुम्से़ पे॥ 37 बालाकरे़ बालामे़न् मे़त्तु, “आङ्गाॽ खे़ने़ॽ के़उःत्छे़ मनाहाॽ पाङ्घुङ्सिङ्, कर खे़ने़ॽ आङ्गाॽओ थेआङ् के़म्भे़रे़न्? थे आङ्गाॽ खे़ने़ॽ यम्बा नाजम् पिमा मे़सुक्ने़म्बा वये़बि?” 38 खे़ब्याङ् बालामरे़ बालाके़न् मे़त्तु, “ओमे़त्ते़ॽ, आल्ल आङ्गाॽ खे़ने़ॽओ फे़राङ्ङाङ् वाॽआ॥ थे़मा पान् पाःप्पाआङ् आङ्गाॽ मुक्साम् मे़गत्तान्॥ निङ्वाॽफुमाङ्ङिल्ले़ आङ्गाॽ थे़मा इङ्जाङ् पिआ आम्भा खे़न्लक् आङ्गाॽ पाःप्मा पोङ्ॽ॥” 39 खे़ब्याङ् बालामे़न् बालाके़न्नु सोरिक् पे, हे़क्क्याङ् खे़ङ्हाॽ किर्यत-हुसोतओ मे़भे़रे़॥ 40 बालाके़ल्ले़ पित्हाॽ नु मे़ल्लुक्हाॽ सिदुङ्सभा तोःन्दुसिआङ् बालामे़न् हे़क्क्याङ् खुने़ॽनु के़भे़म्बा लाम्लोबाहाॽ पिरुसिरो॥ 41 कुदाःन्दिक्मा तानाम् बालाकरे़ बालामे़न् तेॽरुआङ् बमोत-बालओ थोःक्ने़सि पेसि॥ खे़प्मोलाम् बालामरे़ इस्राइलिहाॽरे़ खुन्छिॽ साःङ्गाहिम्हाॽरे़ कुभा कुया कुदिङ्हाॽ निसुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.