खानिःत् 21 - लिम्बुकनानिहाॽ हारिमे़द्ये़ 1 आल्ल नेगेवओ के़युङ्बा आरादबा कनानि हाङ्ङिल्ले़ इस्राइलिहाॽ अतारिमबा लाम्मो मे़भे़न्ल मे़बत् के़लॽबा इङ्घङ् खे़प्सु, खे़ब्याङ् खुने़ॽ इस्राइलिहाॽनु थङ् चोगे़, खे़ब्याङ् खे़ङ्हाॽओबा कुभाग खुने़ॽ ते़म्सुसिआङ् पुङ्लाधाबा चोगु फे़त्तुसि॥ 2 खे़ब्याङ् इस्राइलिहाॽरे़ यहवे दाङ्बे़न्नु कन् माङ्हुप्पिन् मे़जोगुआङ् मे़मे़त्तु, “खे़ने़ॽ कन् मनाहाॽ आनिगे हुक्को के़धासुसिने़भग्र आनिगे खे़ङ्हाॽ नु खे़ङ्हाॽरे़ खुन्छिॽ ये़क्यक्हाॽ वरे़ङ्ले़ङ् खाप्पुथ्यःङ् चोगुम् पिरुम्सिम्बे़॥” 3 यहवे दाङ्बे़ल्ले़ इस्राइलिहाॽरे़ खुन्छिॽ पेलिन् खे़प्सु, हे़क्क्याङ् कनानिहाॽ खुन्छिॽ हुक्को थासुसि॥ इस्राइलिहाॽरे़ खे़ङ्हाॽ नु खुन्छिॽ ये़क्यक्हाॽआङ् वरे़ङ्ले़ङ् खाप्पुथ्यःङ् मे़जोगु॥ कल्ले़चोगुल्ले़ खे़न् ते़न्निन् होर्मा मिङ् मे़वाःत्तुरो॥ कासा असेःक् 4 खे़ङ्हाॽरे़ ए़दोम लाजेन् कप्माआङ् पेःक्मारे़ लागि होर कोःक्माओलाम् हे़ःत्ताङ्बा वरःङ्लाम्बा मे़बोःक्खे़आङ् मे़बे॥ कर लाम्दिःक्किल्ले़ चोगुल्ले़ मनाहाॽ साॽरिक् नासिमे़न्धःप्मनाबा मे़बोःक्खे़॥ 5 खे़ब्याङ् खे़ङ्हाॽ निङ्वाॽफुमाङ्ङिन् नु मोसान् खुन्छिॽ तक्ले़ङ्वाओ अक्खे लॽमा मे़हेःक्ते़, “कन् मुरे़क् खारे़क् थेआङ् के़होप्पादे़न्नो सिसे़ खे़ने़ॽ थेआङ् मिस्र लाजेॽलाम् आनिगे आग्भे़त्ते़बाबे? कॽयो खरे़ःङ् होप्, कॽयो च्वाःत्ताङ् होप्॥ कन् कुजागे़भे़म्बा कुजाःल्ले़ आनिगे निङ्सत्ले़ॽ ले़ॽरु!” 6 खे़ब्याङ् यहवे दाङ्बे़ल्ले़ खे़न् मनाहाॽरे़ खुन्छिॽ लुम्मो कुनिङ् के़आःप्पा असेःक्हाॽ पाङ्घु तासुसि, हे़क्क्याङ् मनाहाॽ मे़अगुसि, हे़क्क्याङ् यरिक् इस्राइलि मनाहाॽ मे़स्ये़॥ 7 हे़क्क्याङ् मनाहाॽ मोसाओ मे़द्ये़आङ् मे़मे़त्तु, “यहवे दाङ्बे़ल्ले़ कुदक्ले़ङ्वाओ नु खे़ने़ॽ के़दक्ले़ङ्वाओ पारिगे़आङ् आनिगे लायो चोगुम्बे़आङ् वाॽ॥ खुने़ॽ आनिगे़ओलाम् कन् असेःक्हाॽ खे़त्तुदेसुसिर फाॽआङ् यहवे दाङ्बान् पेलि फाक्ते़ आबिरे़ॽ॥” खे़ब्याङ् खे़न् मनाहाॽरे़ खुन्छिॽ लागि मोसाःल्ले़ पेलिगे़न् तुवा चोगु॥ 8 यहवे दाङ्बे़ल्ले़ मोसान् मे़त्तु, “खे़ने़ॽ लत्छा कुनिङ् के़आःप्पा असेःक् थिक्ले़ कुजइःत् चोगे़ॽ हे़क्क्याङ् खे़न् लत्छा सित्लाङ्ङो फोःन्दे़ॽ॥ असेःक्किल्ले़ अगुसिबाहाॽरे़ खे़न् ओमे़मे़त्तुॽ हे़क्क्याङ् खे़ङ्हाॽ मे़हिङ्ॽ॥” 9 खे़म्ब्याङ् मोसाःल्ले़ लत्छा कासा असेःक् चोगुआङ् खे़न् लत्छा सित्लाङ्ङो फोःन्दु॥ असेःक्किल्ले़ अगुसिबा के़रे़क्ले़ कासा असेःक्किन् ओमे़मे़त्तुआङ् खे़ङ्हाॽ मे़हिङे़॥ मोआब पेःक्मारे़ लागि लाम्दिक् 10 इस्राइलिहाॽ लाम्दिक् मे़जोगे़आङ् ओबोतओ साःङ्गाहिम् मे़घिङ्घु॥ 11 हे़क्क्याङ् ओबोतलाम् लाम्दिक् मे़जोगे़आङ् मोआबरे़ कुबेसाङ् नाङ्गे़न् ले़प्माङ् इये-अबारिमबा मुरे़क् खारे़क् थेआङ् के़होप्पादे़न्नो खे़ङ्हाॽरे़ साःङ्गाहिम् मे़घिङ्घु॥ 12 खे़प्मोलाम् खे़ङ्हाॽ लाम्दिक् मे़जोगे़आङ् जेरेदबा ने़ने़बादे़न्नो साःङ्गाहिम् मे़घिङ्घु॥ 13 खे़प्मोलाम् खे़ङ्हाॽ लाम्दिक् मे़जोगे़आङ् एमोरिहाॽरे़ खुन्छिॽ इःन्दोओलाम् के़लःम्बा मुरे़क् खारे़क् थेआङ् के़होप्पादे़न्नो के़ने़बा अर्नोन वहःङ् नाधाःम्बि ले़प्माङ् साःङ्गाहिम् मे़घिङ्घु॥ अर्नोन वहःङ्ङिङ्ग मोआबरे़ कुइःन्दोरो, खे़न् मोआबि नु एमोरिहाॽरे़ खुन्छिॽ लुम्मो ने़ःॽ॥ 14 कल्ले़चोगुल्ले़ यहवे दाङ्बे़ल्ले़ कुदे़न्धङ् साप्पन्नो अक्खे साप्ते़आङ् पत्लो— “सुपा ते़ङ्गप्पोबा वाहेब ये़क्यक्को हे़क्क्याङ् अर्नोन वहःङ्ङोबा ने़ने़बादे़न्हाॽओ 15 खे़ब्याङ् ने़ने़बादे़न्हाॽओबा सल्ले़ःङ्ले़ःङ्बाहाॽ, खे़न् ते़न्हाॽ आर ये़क्यक् ले़प्माङ् हिसिङ्ङाङ् मोआबरे़ कुइःन्दो थारिक् पेआङ् ने़रो॥” 16 खे़प्मोलाम् खे़ङ्हाॽ बेओर मे़बे॥ यहवे दाङ्बे़ल्ले़ मोसान् “खे़ने़ॽ मनाहाॽ फुक्खे़से़ॽ, हे़क्क्याङ् आङ्गाॽ खे़ङ्हाॽ च्वाःत् पिरुङ्सिङ्ॽ” मे़त्तुबा वाबाक्किन् आम्भा कप्मो ने़रो॥ 17 खे़ब्याङ् इस्राइलिहाॽरे़ कन् नाराफोमा साम्लोन् साम्मे़मे़त्तुरो, “वाबाक्के, फक्ते़ लःन्दे़ॽओ, खे़ल्ले़ कुसाम्लोन् साम्मे़त्ते़म्मे़ॽओ 18 खे़न् वाबाक्किङ्ग हाङ्सामाहाॽरे़ मे़दयुआङ् ने़स्से़रो, मनाहाॽरे़ खुन्छिॽ सुहाङ्गे़म्बाहाॽरे़ खुन्छिॽ हाङ्तक्कात् नु तक्काःत्तिल्ले़ मे़दयुआङ् ने़स्से़रो॥” खे़ब्याङ् इस्राइलिहाॽ मुरे़क् खारे़क् थेआङ् के़होःप्पादे़न्नोलाम् मे़लःन्दे़आङ् मत्तानाओ लाम्दिक् मे़जोगे़, 19 हे़क्क्याङ् मत्तानालाम् नहलिएलओ, नहलिएललाम् बमोतओ, 20 खे़ब्याङ् बमोतलाम् मोआबबा ते़ल्लक् के़ने़बा ने़ने़बादे़न्नो थारिक् लाम्दिक् मे़जोगे़ खे़प्मोनु पिसगाबा थो चन्जम्बादे़न्नोबा मुरे़क् खारे़क् थेआङ् के़होःप्पादे़न्निन् निधाःप्लो॥ सिहोननु ओग हाङ्हाॽ हारिमे़द्ये़ ( साम्यो इङ् २:२६–३:११ ) 21 इस्राइलिहाॽरे़ अक्खे मे़मे़त्तुसिआङ् एमोरिहाॽरे़ खुन्छिॽ हाङ् सिहोनओ इङ्साबाहाॽ मे़बाङ्घुसि, 22 “खे़ने़ॽ के़लाॽजेओलाम् पोङ्माआङ् पेःक्मा आनिगे आभाःक्ते़ॽ॥ इक्ताप् ले़प्माङ् इग्र चे़ल्ले़क्सेॽ इक्ताप् ले़प्माङ् आनिगे मे़लासिगे़न्ॽ॥ आनिगे खे़ने़ॽ आत्तिन् के़वाबाक्कोआङ् च्वाःत् मे़धुङुम्बे़न्ॽ॥ खे़ने़ॽ के़इःन्दोन् मे़ङ्गाःक्के थारिक् आनिगे हाङ् माराम्मे माराम्लाम्लक् पोःक्खिगे़आङ् पेगिगे़॥” 23 कर सिहोनरे़ इस्राइलिहाॽ खुने़ॽ कुइःन्दोन् काःक्माआङ् पेःक्मा मे़भाःक्तुसिन्॥ खुने़ॽ कुधक्सुबाहाॽ फुक्खुसि, हे़क्क्याङ् मुरे़क् खारे़क् थेआङ् के़होःप्पादे़न् यहसा थारिक् फे़रे़आङ् इस्राइलिहाॽनु थङ् चोगे़॥ 24 कर इस्राइलिहाॽरे़ खुने़ॽ ताभेःल्ले़ मे़ज्ये़प्तु मे़से़रु, हे़क्क्याङ् अर्नोन हःङ्गुआङ्धो यब्बोक वहःङ् थारिक् खुने़ॽ कुलाजेन् हुक्काप् मे़जोगु॥ कर अम्मोनिहाॽरे़ खुन्छिॽ इःन्दोओ थारिक्लक् खे़ङ्हाॽरे़ हुक्काप् मे़जोगु, थेआङ्भे़ल्ले़ अम्मोनिहाॽरे़ खुन्छिॽ इःन्दोन् नाःम्मा सुक्मे़न्दे़प्मनाबा चोगे़॥ 25 इस्राइलिहाॽरे़ कन् के़रे़क् ये़क्यक्हाॽ हुक्को मे़धासु, खम्भ्याङ् खे़ङ्हाॽरे़ एमोरिहाॽरे़ खुन्छिॽ खक्पे़त् ये़क्यक्हाॽओ, हेस्बोन नु खे़न् कब्रिङ् पिसाङ्बा के़रे़क् पाङ्भेॽहाॽओआङ् मे़युङ्सिङ्॥ 26 हेस्बोने़न् एमोरिहाॽरे़ खुन्छिॽ हाङ् सिहोनरे़ कुहाङ्पाङ् ने़स्से़॥ मोआबबा थिक्सिगेक्पा हाङ्ङिन्नु सिहोने़न् थङ् थक्ते़आङ् वये़ हे़क्क्याङ् खे़ल्ले़ कुलाजेन् अर्नोन हःङ्गु थारिक्के कुयुक्कोलाम् नाप्तुआङ् ने़स्से़॥ 27 कल्ले़ चोगुल्ले़ए साम्मिल्लासाम्बाहाॽरे़ अक्खे मे़बाःत्तुआङ् साम्मे़मे़त्तुआङ् वाॽरो, “हेस्बोनओ खिनिॽ त्ये़म्मे़ॽओ हे़क्क्याङ् खे़न् याम्मो चोगे़म्मे़ॽओ॥ सिहोनरे़ कुये़क्यक्किन् याम्मो चोःक्लरो॥ 28 “हेस्बोनलाम् मिधुङ् मिराःक् लःन्दे़रो, सिहोनबा ये़क्यक्कोलाम् मिधुङ् मिराःक् पोगे़रो हे़क्क्याङ् मोआबबा आर ये़क्यक्किन् नु अर्नोन चन्जम्बादे़न्नोबा मनाहाॽ खाप्पुथ्यःङ् मे़बोःक्खे़आङ् मे़वये़रो॥ 29 मोआबे, खे़ने़ॽग के़जिःत्ते़ के़स्ये़रो! कमोसरे़ कुमनाए, खे़ने़ॽ के़मे़गे़रो! खे़ल्ले़ कुस्सा ये़म्बित्छाहाॽ के़घे़त्छिङ्बा हे़क्के हे़क्क्याङ् कुस्सा मे़न्छिन्साहाॽ पुङ्लाधाबा हे़क्के एमोरिहाॽरे़ खुन्छिॽ हाङ् सिहोने़न् पिरुदेसुसिआङ् वाॽरो॥ 30 “कर आनिगे खे़ङ्हाॽ नाःन्दुम्सिम्बे़आङ् वाॽरो॥ हेस्बोने़ङ्ग दिबोन थारिक्के मे़गे़रो, हे़क्क्याङ् मेदबा थारिक् के़गे़प्पा नोपान् आनिगे मे़क्खुम्बे़आङ् वाॽरो॥” 31 कम्भलॽरिक् इस्राइलिहाॽ एमोरिहाॽरे़ खुन्छिॽ लाजेॽओ युङ्मा मे़हेःक्ते़॥ 32 मोसाःल्ले़ याजेरे़न् थोःम्मारे़ लागि मनाहाॽ पाङ्घुसि हे़क्क्याङ् खे़न् एगाङ् इस्राइलिहाॽरे़ खे़न् कब्रिङ् पिसाङ्बा पाङ्भेॽहाॽ हुक्काप् मे़जोगुआङ् खे़प्मोबा एमोरिहाॽ मे़नाःत्तुमे़देसुसि॥ 33 खे़न् एगाङ् खे़ङ्हाॽ मे़इरे़र बासानबा लाम् मे़बोःक्खे़आङ् मे़धोःक्सिङ्॥ बासानबा हाङ् ओग नु खुने़ॽ कुमनाहाॽ खे़ङ्हाॽनु थक्मारे़ लागि एद्रइ मे़प्मनादे़न्नो मे़लःन्दे़ मे़द्ये़॥ 34 यहवे दाङ्बे़ल्ले़ मोसान् मे़त्तु, “खे़न्नु खे़ने़ॽ मे़गिसे़न्ने़ॽ, थेआङ्भे़ल्ले़ खे़न्, खे़ल्ले़ के़रे़क् कुमनाहाॽ नु खे़ल्ले़ कुलाजेःन्नाङ् खे़ने़ॽ हुक्सुप्ने़आङ् वाॽ॥ खे़ने़ॽ हेस्बोनओ हाङ्युक् के़जोःक्पा एमोरिहाॽरे़ खुन्छिॽ हाङ् सिहोने़न् के़मे़त्तुबा हे़क्के कन्नाङ् मे़त्ते़ॽ॥” 35 कल्ले़चोगुल्ले़ इस्राइलिहाॽरे़ खुने़ॽ, खुने़ॽ कुस्साहाॽ हे़क्क्याङ् खुने़ॽ के़रे़क् कुधक्सुबाहाॽ आत्तिन्नाङ् मे़ल्ले़त् मे़न्धाए के़रे़क् मे़स्ये़रुसिआङ् खुने़ॽ कुलाजेन् हुक्काप् मे़जोगुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.