खानिःत् 20 - लिम्बुसियाक्पेॽ थे़याक्पेॽओलाम् च्वाःत् ( ला १७:१-७ ) 1 इस्राइलिहाॽरे़ खुन्छिॽ के़रे़क् सङ्जुम्भोःन् थिक्सिगेक्पा लाओ जिनबा मुरे़क् खारे़क् थेआङ् के़होप्पादे़न्नो मे़गे़रे़, हे़क्क्याङ् कादेसओ याङ्मे़धोःक्ते़॥ खम्भ्याङ् मिरियम्मिन् आम्भा खे़प्मो मासिङ्, हे़क्क्याङ् खे़ङ्हाॽरे़ खुने़ॽ आम्भा खे़प्मो मे़लुप्तु॥ 2 सङ्जुम्भोःल्ले़ खुन्छिॽ लागि खे़प्मो थुङ्मा च्वाःत् होःप्ते़, हे़क्क्याङ् मनाहाॽ मोसान् नु हारुनरे़ खुन्छिॽ तक्ले़ङ्वाओ मे़जुप्से़॥ 3 खे़ङ्हाॽ मोसाःन्नु खे़माॽ मे़जोगे़आङ् अक्खे मे़मे़त्तु, “आनिगे फुॽनुसाॽहाॽ यहवे दाङ्बे़ल्ले़ कुबेसाङ् मे़स्ये़ःल्ले़ आनिगे़आङ् स्ये़ॽइगे़ल्ले़ नुरे़बामे़न्॥ 4 थेआङ्भे़ल्ले़ आल्ल आनिगे पित्थक्साहाॽनु सोसोरिक् आनिगे़आङ् स्ये़ॽइगे़॥ थेआङ् यहवे दाङ्बे़ल्ले़ कुसङ्जुम्भोन् खे़ने़ॽ कन् मुरे़क् खारे़क् थेआङ् के़होप्पादे़न्नो के़भे़त्तुसिबाबे? 5 मिस्रलाम् थेआङ् कन् ताप्फे़ःम्बा ते़न्नो आनिगे याप्मि के़भे़त्ते़बाबे? कन् ते़न्नो कुजा, इग्र पःत्छेॽ किग्र चे़ल्ले़क्सेॽ फुॽले़सेॽहाॽ थे़माआङ् होप्॥ कॽयो थुङ्मा च्वाःत्ताङ् होप्!” 6 खे़ब्याङ् मोसान् नु हारुने़न् सङ्जुम्भोःल्ले़ खुन्छिॽ तगिलाम् तुम्मादे़न् साःङ्गाहिम्मोबा लाम्धेःत्तो पेसिआङ् साम्बोन् हबत् फन्ने़सिआङ् ने़ने़सि, हे़क्क्याङ् यहवे दाङ्बाल्ले़ कुमिमिदिङ्ङिन् खे़ङ्हाॽरे़ खुन्छिॽ लुम्मो ओसेःन्धाङ् पोःक्खे़॥ 7 यहवे दाङ्बे़ल्ले़ मोसान् मे़त्तु, 8 “माङ्हुप् सन्दोःक्के़ल्ले़ कुदगि के़ने़बा कन् तक्काःत्तिन् तेॽरे़आङ् खे़ने़ॽ नु खे़ने़ॽ के़म्भुॽ हारुने़न् पेसे़ॽ हे़क्क्याङ् सङ्जुम्भोःन् फुक्खे़से़ॽ॥ खे़ङ्हाॽरे़ खुन्छिॽ मिक्ले़ तगिए कन् याक्पेन् इङ्जाङ् पिरे़ॽ हे़क्क्याङ् कन् याक्पेॽओलाम् च्वाःत् लाक्तु लःन्नाङ् खे़ने़ॽ सङ्जुम्भोःन् नु खे़ङ्हाॽरे़ खुन्छिॽ पित्थक्साहाॽ याक्पेॽओलाम् च्वाःत् के़बिरुसिॽ॥” 9 खे़ब्याङ् यहवे दाङ्बे़ल्ले़ इङ्जाङ् चोगुबा हे़क्के मोसाःल्ले़ तक्काःत्तिन् याङ्सिङ्ङाङ् खुने़ॽ कुदगिलाम् पे, 10 हे़क्क्याङ् मोसान् नु हारुनरे़ याक्पेःल्ले़ कुदगि सङ्जुम्भोःन् फुक्खे़सुसि॥ खे़ब्याङ् मोसाःल्ले़ खे़ङ्हाॽ मे़त्तुसि, “खे़प्से़म्मे़ॽ, पिफ्युङ् के़जोःक्पासे! थे आन्छिगे हाबा कन् याक्पेॽओलाम् खिनिॽ च्वाःत् लःत्छु पिआसिगे़बि?” 11 हे़क्क्याङ् मोसाःल्ले़ कुहुक्किन् फोःक्खुआङ् निरे़ङ् कुदक्काःत्तिल्ले़ याक्पेन् हिप्तु॥ खे़ब्याङ् खे़प्मोलाम् फजङ्जङ् लॽरिक् वे़त्ते़सरे़ च्वाःत् फक्ते़लःन्दे़, हे़क्क्याङ् सङ्जुम्भो नु पित् थक्साहाॽरे़ मे़धुङु॥ 12 कर यहवे दाङ्बे़ल्ले़ मोसान् नु हारुने़न् मे़त्तुसि, “आङ्गाॽ सेसे चोगाङ्बा पाःन्नो मिङ्सो इङ्धाङ् पिमारे़ लागि इस्राइलिहाॽरे़ खुन्छिॽ तगि नुरिक्काङ् खे़न्छिॽ आङ्गाॽ नसान् याप्मि के़न्जोगे़सिन्बाल्ले़ चोगुल्ले़ आङ्गाॽ खे़ङ्हाॽ पिमा इःत्तुङ्सिङ्बा लाजेॽओ खे़न्छिॽ खे़ङ्हाॽ के़प्मा के़ङ्घोसुन्॥” 13 मेरिबाओबा च्वाःत् हाबा कन् मे़मे़त्तुॽ॥ हाबा कॽयो इस्राइलिहाॽ यहवे दाङ्बान्नु खे़माॽ मे़जोगे़, हे़क्क्याङ् खे़ङ्हाॽरे़ खुन्छिॽ लुम्मो खुने़ॽ सेसे लॽरिक् ओःन्धाक्सिङ्लो॥ एदोमबा हाङ्ङिल्ले़ इस्राइलिहाॽ नाॽरुसि 14 मोसाःल्ले़ कादेसलाम् इङ्साबाहाॽ अक्खे मे़त्तुसिआङ् एदोमबा हाङ्ङिन् इङ्घङ् हाक्तुरो, “खे़ने़ॽ के़गाॽइ इस्राइलबा मनाहाॽरे़ अक्खे मे़बाःत्तुॽ, आनिगे तुमुम्बे़बा तुक्खे़ःन् खे़ने़ॽ के़निसुआङ् वाॽ॥ 15 आनिगे थाःक्थे़बाहाॽ मिस्र लाजेॽओ मे़बेआङ् मे़वये़, हे़क्क्याङ् आनिगे यरिक् तङ्बे थारिक् मिस्र लाजेॽओ वयिगे़, खम्भ्याङ् मिस्रबा मनाहाॽरे़ आनिगे नु आनिगे थाःक्थे़बाहाॽ साॽरिक् ताप्फे़ःल्लिक् मे़मे़त्तिगे़॥ 16 कर यहवे दाङ्बान् आनिगे पेलि फाक्तुम्बे़, खे़ब्याङ् खुने़ॽ आनिगे पेलिन् खे़प्सु, खम्भ्याङ् खुने़ॽ माङ्लाइङ्बा थिक् पाङ्घुआङ् मिस्रलाम् आनिगे लःत्ति फे़त्तिगे़॥ “आनिगे आल्लो खे़ने़ॽ के़लाजेॽ इःन्दोओ के़ने़बा कादेस ये़क्यक्को वयिगे़॥ 17 चुङ्जिगे़न् पेलि फाक्कासिगे़, आनिगे खे़ने़ॽ के़लाजेॽओलाम् पोङ्माआङ् पेःक्मा आभाःक्ते़ॽ॥ इक्ताप् इग्र चे़ल्ले़क्सेॽ इक्ताप्लाम् आनिगे पोःक्खिगे़आङ् मे़बेगिगे़न्ॽ॥ खे़ने़ॽ के़ज्वाःत् थुङ्मा के़वाबाक्को आनिगे च्वाःत् मे़धुङुम्बे़न्ॽ॥ हाङ् माराम्लाम् आनिगे पोःक्खिगे़आङ् पेगिगे़॥ खे़ने़ॽ के़इःन्दोन् मे़ङ्गाःक्के थारिक् आनिगे चुक्वा फे़ङ्वा मे़लॽरिगे़न्ॽ॥” 18 कर एदोमबा हाङ्ङिल्ले़ खे़ङ्हाॽ मे़त्तुसि, “कन् लाजेॽलाम् पोङ्माआङ् खिनिॽ पेःक्मा के़ङ्घोसिन्ॽ, मेःन्ने़भग्र ताभेःन्नु फत्तासिगे़॥” 19 इस्राइलिहाॽरे़ नोगप् मे़बिरुसि, “माराम् लाम्बाए आनिगे पोःक्खिगे़आङ् पेगिगे़ॽ॥ आनिगे नु आनिगे पित् थक्साहाॽरे़ खे़ने़ॽ के़ज्वाःत्ते़न् थुङुम्बे़ने़भग्र खे़ल्ले़ कुमे़ल्लुङ् आनिगे हुङुम्बे़॥ आनिगे खे़ने़ॽ के़लाजेॽओलाम्बारक् पोङ्माआङ् पेःक्मा आभाःक्ते़ॽ॥” 20 याम्मो एदोमबा हाङ्ङिल्ले़ मे़त्तुसि, “आनिगे खिनिॽ पेःक्मा मे़भाःक्कासिगे़न्ॽ!” खे़ब्याङ् एदोमबा हाङ्ङिल्ले़ खे़ङ्हाॽरे़ खुन्छिॽ तक्ले़ङ्वाओ मुक्के़गुबा यरिक् थक्सुबा फे़त्तुसिआङ् फे़रे़॥ 21 कम्भलॽरिक् इस्राइलिहाॽरे़ खुने़ॽ कुइन्दोःन् काःक्माआङ् पेःक्मा खुने़ॽ मे़दे़न्दे़न्॥ कल्ले़चोगुल्ले़ इस्राइलिहाॽ खे़प्मोलाम् मे़नुःक्खे़ मे़भे़रे़रो॥ हारुने़न् मासिङ् 22 के़रे़क् सङ्जुम्भोःन् कादेसलाम् लाम्दिक् मे़जोगे़आङ् होर कोःक्माओ मे़गे़रे़ मे़भे़रे़॥ 23 ए़दोम लाजेॽबा इःन्दो पेसाङ्बा होर कोःक्माओ यहवे दाङ्बे़ल्ले़ मोसान् नु हारुने़न् अक्खे मे़त्तुसि, 24 “हारुने़न् खुने़ॽ कुसुधे़बा कुदाक्थे़बाहाॽओ पेःक्काङ् तङ्सिङ्॥ मेरिबाओबा च्वाःत्तो खे़न्छिॽ ने़प्मजाङ् आङ्गाॽ आइङ्जाङ्ङिल्ले़ कुदक्ले़ङ्वाओ के़बोगे़सिबाल्ले़ चोगुल्ले़, आङ्गाॽ इस्राइलिहाॽ पिमा इःत्तुङ्सिङ्बा लाजेॽओ खे़न् लाःप्मा मे़घोने़न्॥ 25 हारुने़न् नु खुने़ॽ कुस्सा एलाजारे़न् खे़ने़ॽ थो होर कोःक्माओ तेॽरे़से़ॽआङ् पेगे़ॽ॥ 26 हारुनरे़ कुजाङ्ङिन् फे़न्दे़ॽआङ् खुने़ॽ कुस्सा एलाजारे़न् चाक्ते़ॽ॥ खे़न् एगाङ् हारुने़न् खुने़ॽ कुधाःक्हाॽओ पेःक्काङ् तङ्सिङ्ॽ खे़ब्याङ् खे़प्मोए सिरो॥” 27 यहवे दाङ्बे़ल्ले़ इङ्जाङ् चोगुबा हे़क्केए मोसोःल्ले़ चोगु, हे़क्क्याङ् के़रे़क् सङ्जुम्भोःल्ले़ खुन्छिॽ मिक्ले़ तगि खे़ङ्हाॽ होर कोःक्माओ मे़धोःक्सिङ् मे़बे॥ 28 मोसाःल्ले़ हारुनरे़ कुजाङ्ङिन् फे़न्दुआङ् कुस्सा एलाजारे़न् चाक्तु, हे़क्क्याङ् आम्भा खे़न् कोःक्माल्ले़ कुजङ्ङो हारुने़न् मासिङ्॥ खे़ब्याङ् मोसान् नु एलाजारे़न् कोःक्माओलाम् यो थाने़सि॥ 29 के़रे़क् सङ्जुम्भोःल्ले़ हारुने़न् मासिङ्बा निङ्वाॽ मे़घोसु, खे़ब्याङ् के़रे़क् इस्राइलिहाॽरे़ सुम्बोङ् ये़न् थारिक् मे़रिङ् मे़धक्ते़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.