खानिःत् 19 - लिम्बुसुत्थो पोङ्मा थिम्हाॽ 1 यहवे दाङ्बे़ल्ले़ मोसान् नु हारुने़न् मे़त्तुसि, 2 “यहवे दाङ्बे़ल्ले़ के़बिरिबा साम्योथिम् इङ्जाङ्ङोबा लत्छा थिम् हाबा कन्लो—कुदुक्मा कुयॽमा के़होःप्मा वरुप्लुप्मा, आप्फाल्ले़आङ् खे़ःप्सिङ् मे़ङ्गुःत्ते़मा हे़ःत्ताङ्मा कुम्मामा पित्सात् थिक् खे़ङ्हाॽओ तारे़म्मे़ॽ फाॽआङ् इस्राइलिहाॽ मे़त्ते़से़ॽ॥ 3 खिनिॽ खे़न् कुम्मामा पित्सात्तिन् निङ्वाॽफुसाम्बा एलाजारे़न् पिरे़म्मे़ॽ, हे़क्क्याङ् साःङ्गाहिम्हाॽलाम् लाःक्कात् खुने़ॽ खे़न् लःत्तुर, खे़ब्याङ् खुने़ॽ कुबेसाङ् खे़न् मे़से़रुर॥ 4 खे़न् एगाङ् निङ्वाॽफुसाम्बा एलाजारे़ल्ले़ कुहुक्चोओलाम् खे़न् सामाक्खिन् कुभा याङ्सिङ्ल हे़क्क्याङ् तुम्मादे़न् साःङ्गाहिम् तगि नुसिले़ङ् साक्खुर॥ 5 खुने़ॽ निसुरए खे़न् कुम्मामा पित्सात्तिन्, कुहोरिक्, कुने़क्सा, कुमाक्खिॽ नु पिॽहिःन् सोसोरिक् मिमे़धिक्खु मे़देसुर॥ 6 खे़ब्याङ् निङ्वाॽफुसाम्बे़ल्ले़ साम्माङ्सिङ्, हिसप याःन्, हे़ःत्ताङ्बा से़मुरिक्किन् याङ्सिङ्ङाङ् मिमे़धिक्खुआङ् के़ने़बा कुम्मामा पित्साःत्तो लाप्फुसु केःत्तुर॥ 7 खे़न् एगाङ् निङ्वाॽफुसाम्बे़ल्ले़ खुने़ॽ कुजाङ्ङिन् वाहप्तुर, हे़क्क्याङ् च्वाःत्तिल्ले़ वारुःम्सिङ्ङाङ् साःङ्गाहिम्हाॽओ नुःङ्ल॥ कर खे़न् निङ्वाॽफुसाम्बे़न् युःन्छिक् थारिक् आसुत्थो पोङ्ल॥ 8 खे़न् मिगे़धिङ्बे़ल्ले़आङ् कुजाङ्ङिन् वाहप्तुर, हे़क्क्याङ् च्वाःत्तिल्ले़ वारुःम्सिङ्ल॥ खुने़ॽआङ् युःन्छिक् थे़म्बाए आसुत्थो पोङ्ल॥ 9 “कुभा लत्छा सुत्थो मनाःल्ले़ खे़न् कुम्मामा पित्सात् खाप्पुःन् फुक्खुर हे़क्क्याङ् साःङ्गाहिम्हाॽलाम् लाःक्कात् कुभा सुत्थोबा ते़न्नो खे़न् युक्खुर॥ खे़ङ्ग ओगप् चोःक्मारे़ लागि लायोलाम् सुत्थो पोङ्मा फाॽआङ् सुत्थो चोःक्सिङ्मा च्वाःत्तो इस्राइलि सङ्जुम्भोःल्ले़ मे़युक्खुर पोङ्ॽ॥ कङ्ग लायोलाम् सुत्थो पोङ्मारे़ लागिरो॥ 10 कुम्मामा पित्सात् खाप्पु के़भुङ्बाल्ले़ कुजाङ्ङिन् वाहप्तुर, हे़क्क्याङ् युःन्छिक् थारिक्के खुने़ॽआङ् आसुत्थो पोङ्ॽ॥ इस्राइलिहाॽ नु खे़ङ्हाॽरे़ खुन्छिॽ लुम्मो के़युङ्बा वेॽ लाजेॽबा मनाहाॽरे़ लागि कन् सदादिङ्बा थिम् पोङ्लरो॥ चेःन् सुमाआङ् सुत्थो चोःक्सिङ्मा थिम् 11 “चे के़सुबा मनान् नुसि ये़न् थारिक् आसुत्थो पोङ्ॽ॥ 12 खुने़ॽ खे़न् च्वाःत्तिल्ले़ सुम्सिगेक्पा नु नुसिगेक्पा ये़न्नो सुत्थो चोःक्सिङ्ल, हे़क्क्याङ् खुने़ॽ सुत्थो पोङ्ॽ॥ कर खे़ल्ले़ सुम्सिगेक्पा नु नुसिगेक्पा ये़न्नो खुने़ॽ सुत्थो मे़जोःक्सिङ्ने़न्ने़भग्र खे़न् सुत्थो मे़बोङ्ने़न्॥ 13 आत्तिल्ले़ चेःन् सुसुआङ् खुने़ॽ सुत्थो मे़जोःक्सिङ्ङिन्, खे़ल्ले़ यहवे दाङ्बे़ल्ले़ कुसेसे युङ्दे़न्निन् आसुत्थो चोगुॽ॥ खे़न् मनान् इस्राइलिहाॽलाम् मे़लःत्तु मे़देसुर॥ सुत्थो चोःक्सिङ्मा च्वाःत्तिन् खे़ल्ले़ कुसम्धाङ् मे़न्छाक्खुन्, कल्ले़चोगुल्ले़ खे़न् आसुत्थोए चोक्॥ खे़ल्ले़ कुआसुत्थोन् खुने़ॽ कुसम्धाङ्ङे हाबा वाॽर॥ 14 “कुभा मनाःन् साःङ्गाहिम्मो सिने़भग्र खे़ल्ले़ लागि थिम् हाबा कन्लो—खे़न् साःङ्गाहिम्मो के़दाबा नु साःङ्गाहिम् सिगाङ् के़वाॽबा के़रे़क् मनाहाॽ नुसि ये़न् थारिक् आसुत्थो मे़बोङ्ॽ॥ 15 कुसुःप्मा मेःन्ने हङ् लॽरिक् के़युङ्बा के़रे़क् खप्प्याहाॽ आसुत्थो पोङ्ॽ॥ 16 “लाःक्कात् ले़प्माङ् ताभेःल्ले़ मे़से़रुसिबा इग्र आप्फेक् के़सिबा चे किग्र मनाःल्ले़ कुये़त् इग्र इपुङ्ङिन् हाःत्ले़ सुसुॽ, खे़न् नुसि ये़न् थारिक् आसुत्थो पोङ्ॽ॥ 17 “खे़न् आसुत्थो मनाःल्ले़ कुलागि थिम् कुइसिक् सुत्थो पोङ्मा सिदुङ्जभा मिधिङ्मनादेमनाबा पिप्मा खाप्पुःन् याङ्सिङाङ् खप्प्याओ केःत्तुर हे़क्क्याङ् सेसेबा च्वाःत्तिल्ले़ खे़न् ले़ःक्तुर पोङ्ॽ॥ 18 खे़ब्याङ् कुभा सुत्थो मनाःल्ले़ हिसप याःन्ने़न् याङ्सिङ्ङाङ् खे़न् च्वाःत्तो हुम्सुर हे़क्क्याङ् साःङ्गाहिम्मो नु खे़प्मो के़युङ्बा खप्प्या सामाहाॽओ खम्भ्याङ् खे़प्मो के़वाॽबा मनाहाॽ सम्धाङ् साक्खुर॥ हे़क्क्याङ् आत्तिन्हाॽरे़ लुङ्सि ये़त्, मे़से़रुबा इग्र आबाङे के़सिबा चेहाॽ, इग्र इपुङ्हाॽ मे़सुसुॽ खे़ङ्हाॽरे़ खुन्छिॽ सम्धाङ्ङाङ् साक्खुर॥ 19 सुत्थो मनाःल्ले़ आसुत्थो के़बोङ्बा मनाहाॽरे़ खुन्छिॽ सम्धाङ् सुम्सिगेक्पा नु नुसिगेक्पा ये़न्नो खे़न् च्वाःत्तिन् साक्खुर॥ सुत्थो मनाःल्ले़ नुसिगेक्पा ये़न्नोग खुने़ॽ खे़ङ्हाॽ सुत्थो चोगुसिर, हे़क्क्याङ् खे़ङ्हाॽरे़ खुन्छिॽ चाङ्हाॽ वामे़हप्तुआङ् वामे़रुःम्सिङ्ल, खे़ब्याङ् खे़ङ्हाॽ युःन्छिक् थारिक् आसुत्थो मे़बोङ्ॽ॥ 20 कर आसुत्थो के़बोङ्बा मनाहाॽ आप्फेक् सुत्थो मे़न्जोःक्सिङ्ङिन्ने़भग्र खे़न् मनाहाॽ सङ्जुम्भोलाम् मे़लःत्तु मे़देसुसिर, थेआङ्भे़ल्ले़ खे़ङ्हाॽरे़ यहवे दाङ्बे़ल्ले़ कुसेसेदे़न्निन् आसुत्थो मे़जोगु॥ सुत्थो पोङ्मा च्वाःत्तिन् खे़ङ्हाॽ सम्धाङ् मे़न्छाङ्ङे वाॽबे़ल्ले़ चोगुल्ले़ए खे़ङ्हाॽ आसुत्थो मे़जोक्॥ 21 खे़ङ्हाॽरे़ खुन्छिॽ लागि खे़न् सदादिङ्ले़ लागि थिम् पोङ्ल॥ “सुत्थो चोःक्सिङ्मा च्वाःत् के़साङ्बे़ल्ले़आङ् कुजाङ्ङिन् वाहप्तुर॥ खे़न् सुत्थो चोःक्सिङ्मा च्वाःत् के़सुबे़न्नाङ् युःन्छिक् थारिक् आसुत्थो पोङ्ॽ॥ 22 आसुत्थो मनाःल्ले़ सुसुबा थे़माःन्छाङ् आसुत्थो पोङ्ॽ, हे़क्क्याङ् खे़न् सुसुबा पाःन्हाॽ के़सुबे़न्नाङ् युःन्छिक् थारिक् आसुत्थो पोङ्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.