खानिःत् 18 - लिम्बुनिङ्वाॽफुसाम्बा नु ले़बिहाॽरे़ खुन्छिॽ याःम्बक्हाॽ 1 खे़ब्याङ् यहवे दाङ्बे़ल्ले़ हारुने़न् मे़त्तु, “खे़ने़ॽ, के़स्सा के़म्मे़त्छाॽहाॽ नु ले़बिरे़ कुधाःक्लाम्बाबा खे़ने़ॽ के़म्बारे़ कुहिम्सयङ्हाॽरे़ सेसेदे़न्निल्ले़ कुदक्ले़ङ्वाओ मे़जोगुबा फे़न्याःम्बक्किल्ले़ आप्तिक्किन् खिनिॽ के़गुयुम्ल पोङ्ॽ, कर खे़ने़ॽ नु के़स्सा ये़म्बित्छाहाॽरे़रक् निङ्वाॽफुसाम्बा ताक्फाःल्ले़ कुयाःम्बेओबा फे़न्याःम्बक्किल्ले़ कुले़क्वा मे़दुमुम्ॽ॥ 2 खे़ने़ॽ नु खे़ने़ॽ के़स्साहाॽरे़ माङ्हुप् साप्लुङ् के़याक्पा निङ्वाॽफुमाङ् सन्दोक् के़युङ्बा साःङ्गाहिम्मिल्ले़ कुदगाङ् माङ्से़वा के़जोगुम्मिल्ले़ खे़ने़ॽ के़धाःक्थे़बा ले़बि थाःक्कोबा खे़ने़ॽ के़म्भुॽके़न्साॽहाॽआङ् खे़ने़ॽनु सोरिक् तारे़से़ॽआङ् त्ये़ॽ, हे़क्क्याङ् खे़ङ्हाॽ खे़ने़ॽनु मे़दङ्सिङ्ङाङ् के़म्भाॽर॥ 3 खे़ङ्हाॽ खे़ने़ॽ के़सम्धाङ् लक्पे़न्साबा मे़बोङ्ल, हे़क्क्याङ् सेसे साःङ्गाहिम्मोबा के़रे़क् याःम्बक्हाॽ खे़ङ्हाॽरे़ मे़जोगुर पोङ्ॽ॥ खे़ङ्हाॽ सेसेदे़न्नोबा सामाहाॽ नु ले़त्ति तोःम्मादे़न्निल्ले़ कुबेसाङ्लक् मे़न्दाने़न्ल, मेःन्ने़भग्र खिनिॽआङ् खे़ङ्हाॽनुए सोरिक् के़स्ये़ॽइ॥ 4 खे़ङ्हाॽरे़ खिनिॽनु सोरिक् मे़बोङ्ङाङ् साःङ्गाहिम्मोबा के़रे़क् याःम्बक्हाॽ तुम्मादे़न् साःङ्गाहिम्मोबा याःम्बक्हाॽ ओमे़मे़त्तुर॥ वेॽ मना आत्तिन्नाङ् खिनिॽ निःत्ताङ् तामा मे़घोने़न्ल॥ 5 “खे़ने़ॽए सेसेदे़न्निन् नु ले़त्ति तोःम्मादे़न्नोबा याःम्बक्हाॽ ओमे़त्ते़ चोगे़ॽ, खे़ल्ले़चोगुल्ले़ इस्राइलिहाॽरे़ खुन्छिॽ सम्धाङ् याम्मो निङ्वाॽफुमाङ्ङिल्ले़ कुसाक्के़न्निन् मे़धाने़न्ल॥ 6 आङ्गाॽए इस्राइलिहाॽरे़ खुन्छिॽ लुम्मोलाम् खे़ने़ॽ के़म्भुॽ के़न्साॽ ले़बिहाॽ सेगुङ्सिङ्ङाङ् वाॽ॥ खे़ङ्हाॽ सेसे साःङ्गाहिम्मो याःम्बक् चोःक्मारे़ लागि यहवे दाङ्बाओ तोःम्मनासिबा खे़ने़ॽ के़लागि हुक्वासिरो॥ 7 कर खे़ने़ॽ नु के़स्सा ये़म्बित्छाहाॽरे़रक् ले़त्ति तोःम्मादे़न्निन् नु फोःन्दा सिगाङ्बा के़रे़क् पाःन्हाॽरे़ कुयाःम्बेओ निङ्वाॽफुसाम्बा ताक्फाःल्ले़ याःम्बक्किन् लक्पे़न् ताःक्ते़ॽआङ् याःम्बक् चोगे़ॽओ॥ कन् निङ्वाॽफुसाम्बा ताक्फाःन् आङ्गाॽ खिनिॽ हुक्वा कुइसिक् पिनिङ्ल पत्ता॥ कुभा वेॽ मना कॽयो ताने़भग्र खे़न् स्ये़प्मा पोङ्लो॥” निङ्वाॽफुसाम्बाहाॽरे़ खुन्छिॽ खोमा लक्हाॽ 8 याम्मो यहवे दाङ्बे़ल्ले़ हारुने़न् मे़त्तु, “इस्राइलिहाॽरे़ आङ्गाॽओ मे़दोन्दुबा के़रे़क् सेसेबा सिदुङ्जभाहाॽ आङ्गाॽ खे़ने़ॽ ओमे़प्मा याःम्बक् पिने़आङ् वाॽ॥ आङ्गाॽ खे़ने़ॽ के़गत्तुबा निङ्वाॽफुसाम्बा ताक्फाःल्ले़ चोगुल्ले़ खे़न् लक्हाॽ खे़ने़ॽ नु खे़ने़ॽ के़स्सा ये़म्बित्छाहाॽ आभे़ल्ले़साङ् के़घोसुम्बा लक् कुसिङ् से़न्दुङ् पिनिङ्ङाङ् वाॽ॥ 9 मिलाम्बा से़म्मनाबा ने़मनाबा साॽरिक् सुत्थो सिदुङ्जभाहाॽओबा लक्किन् खे़ने़ॽ के़लक् पोङ्ल॥ मनाहाॽरे़ आङ्गाॽओ मे़दोन्दुबा खे़न् साॽरिक् सेसेबा पोगुगे़न् कुजा सिदुङ्जभा, लायोलाम् ले़प्मि खोमा सिदुङ्जभा नु आप्तिक्लाम् ले़प्मि खोमा सिदुङ्जभाहाॽओबा लक्हाॽ खे़ने़ॽ नु खे़ने़ॽ के़स्साहाॽरे़ लागि खोमा लक् पोङ्ॽ॥ 10 खे़ने़ॽ खे़न् साॽरिक् सेसेबा लेःत्ते़आङ् च्ये़ॽ॥ के़रे़क् ये़म्बित्छाहाॽरे़ खे़न् मे़जर॥ कन् खे़ने़ॽ सुत्थोबा लेःप्मा पोङ्ॽ॥ 11 “खे़न्नाङ् खे़ने़ॽइन्ने पोङ्ल—इस्राइलिहाॽरे़ खुन्छिॽ थाःङ् पङ्मनाबा सिदुङ्जभारे़ लागि से़म्मनाबा के़रे़क् हुक्वासुङ्हाॽ आङ्गाॽ खे़ने़ॽ नु खे़ने़ॽ के़स्साहाॽरे़ लागि आभे़ल्ले़साङ् खोमा के़बोङ्बा लक् कुसिङ् पिनिङ्ङाङ् वाॽ॥ खे़ने़ॽ के़हिम्मो सुत्थो के़बोङ्बा के़रे़क्ले़ खे़न् चामा मे़सुक्तुॽ॥ 12 “खे़ङ्हाॽरे़ यहवे दाङ्बान् मे़बिरुबा नुबा चैतुन निःङ्गेॽ, कुबोक् चे़ल्ले़क्सेॽ सेजःङ्वा, पोगुगे़न् कुजान् तगि के़दुम्बा कुजा हे़क्के आङ्गाॽ खे़ने़ॽए पिने़आङ् वाॽ॥ 13 खे़ङ्हाॽरे़ यहवे दाङ्बाओ तोःन्छे़ मे़दारुबा खुन्छिॽ तगि के़दुम्बा कुजाहाॽ खे़ने़ॽइन्ने पोङ्ल॥ खे़ने़ॽ के़हिम्मो सुत्थो के़बोङ्बा के़रे़क्ले़ खे़न् चामा मे़सुक्तुॽ॥ 14 “आङ्गाॽओ सरक् मे़दोन्दुबा इस्राइलबा के़रे़क् पाःन्हाॽ खिनिॽइन्नेरो॥ 15 मना इग्र थक्साहाॽलाम् यहवे दाङ्बाओ मे़दोन्दुसिबा तगि के़धाप्पा नु सागे़वाःन्छिङ्बा के़रे़क् थक्साज्याक् नु अङे़ःक्वाहाॽ खे़ने़ॽइन्ने मे़बोङ्ल॥ अक्खे पोङ्साङ् तगि सागे़वाःन्छिङ्बा मना नु के़धाप्पा थक्सान् खे़ने़ॽ कुमे़न् के़हुङुआङ् के़धे़ॽरुर पोङ्ॽ॥ 16 लाधिक् योःल्ले़ सेसेदे़न्नोबा सेकेल कुइसिक् खे़ने़ॽ कुमे़ल्लुङ् हे़न्दे़आङ् सेकेल ङासि कुमे़ल्लुङ् हुङे़ॽआङ् खे़न् के़धे़ॽरुर पोङ्ॽ॥ निबोङ् गेरारे़ सेकेल थिक् पोङ्ॽ॥ 17 “कर तगि के़धाप्पा पित्, मे़ल्लुक् इग्र मे़ःन्दाःन् से़म्मा मे़बोङ्ने़न्॥ खे़न् सुत्थो चोक्॥ खे़ङ्हाॽरे़ खुन्छिॽ माक्खिन् खे़ने़ॽ ले़त्ति तोःम्मादे़न्नो साक्खे़ॽ, हे़क्क्याङ् यहवे दाङ्बाल्ले़ कुसिराॽ के़धाङ्बा कुनाम्गे़नुॽबा कुनाम् पोङ्मारे़ लागि तोःम्मनाबा पोगुगे़न् कुजा सिदुङ्जभा कुसिङ् खे़ङ्हाॽरे़ खुन्छिॽ सोःत्ते़न् मिधिक्खे़ॽ॥ 18 कर थाःङ् पङ्मनाबा सिदुङ्जभाःल्ले़ कुसङ्बप्मे़न् हे़क्के नु कुजुक्वा कुलाङ्भे़ल्ले़क्मे़न् हे़क्के खे़न् तगि के़धाप्पा पित्, मे़ल्लुक् नु मे़ःन्दा साःन्नाङ् खे़ने़ॽइन्ने पोङ्ल॥ 19 इस्राइलिहाॽरे़ यहवे दाङ्बाओ मे़दोन्दुबा सेसेबा सिदुङ्जभालाम् लाःत्लाःत् से़म्मनाबा के़रे़क् लक्हाॽ आभे़ल्ले़साङ् के़घोसुम्बा लक् कुइसिक् आङ्गाॽ खे़ने़ॽ नु के़स्साहाॽ पिनिङ्ङाङ् वाॽ॥ यहवे दाङ्बे़ल्ले़ कुदगि खे़ने़ॽ नु खे़ने़ॽ के़स्सा ये़म्बित्छा मे़न्छुमाहाॽरे़ लागि सदादिङ् आप्फाल्ले़आङ् मे़म्बेःम्मनाबा माङ्हुप् पोङ्ॽ॥” 20 यहवे दाङ्बे़ल्ले़ हारुने़न् मे़त्तु, “खे़ङ्हाॽरे़ खुन्छिॽ लाजेॽओबा लाजेॽ सिङ्बुङ्हाॽओ खिनिॽ लाजेॽ लक्खोमा युक् होप्॥ खे़ङ्हाॽनु सोसोरिक् खे़ने़ॽ थे़माआङ् लक् के़ङ्घोसुन्ॽ॥ इस्राइलिहाॽरे़ खुन्छिॽ लुम्मो खे़ने़ॽ के़घोमा लक् नु के़लक्खोःन् आङ्गाॽआएरो॥” ले़बिहाॽरे़ खुन्छिॽ खोमा लक् 21 यहवे दाङ्बे़ल्ले़ पाःत्तु, “ले़बिःल्ले़ कुमुॽदाङ्साहाॽरे़ खुन्छिॽ लागिग तुम्मादे़न् साःङ्गाहिम्मो माङ्से़वा चोःक्मारे़ लागि आङ्गाॽ इस्राइलिहाॽरे़ खुन्छिॽ के़रे़क् थिबोङ् लक्हाॽ खे़ङ्हाॽरे़ खुन्छिॽ खोमा लक् कुइसिक् पिरुङ्सिङ्ङाङ् वाॽ॥ 22 आल्लआङ्धो तुम्मादे़न् साःङ्गाहिम् निःत्ताङ् इस्राइलिहाॽ मे़न्दाने़न्ल, मेःन्ने़भग्र खुन्छिॽ लायोल्ले़ चोगुल्ले़ खे़ङ्हाॽ मे़सिरो॥ 23 कर तुम्मादे़न् साःङ्गाहिम्मो माङ्से़वा चोःक्मा याःम्बक्किन् ले़बिहाॽरे़ मे़जोगुर, हे़क्क्याङ् खे़ल्ले़ कुदक्ले़ङ्वाओ के़बोङ्बा फे़न्याःम्बक्किन् खे़ङ्हाॽरे़ खुन्छिॽ थे़गेःक्पो थारो॥ खे़न् खिनिॽ थाःक्थाःक्को थारिक् आभे़ल्ले़साङ् के़वाॽबा थिम् पोङ्ल॥ इस्राइलिहाॽरे़ खुन्छिॽ लुम्मोग कन्हाॽरे़ खुन्छिॽ थे़माआङ् लक्खोमा युक् होप्॥ 24 थेआङ्भे़ल्ले़ इस्राइलिहाॽरे़ सिदुङ्जभारे़ लागि यहवे दाङ्बाओ मे़दोन्दुबा थिबोङ् लक्किन्ने आङ्गाॽ ले़बिहाॽ खुन्छिॽ खोमा के़बोङ्बा लक् हे़क्के पिरुङ्सिङ्ङाङ् वाॽ॥ आङ्गाॽ कन्हाॽरे़ खुन्छिॽ याःम्बेओ अक्खे नाःत्तुङ्ङाङ् वाॽ, ‘इस्राइलिहाॽओ कन्हाॽरे़ थे़माआङ् लक्खोमा युक् मे़ङ्गत्तुन्लो॥’” ले़बिहाॽरे़ तोःम्मा के़बोङ् थिबोङ्लक् 25 हे़क्क्याङ् यहवे दाङ्बे़ल्ले़ मोसान् मे़त्तु, 26 “खे़ने़ॽ ले़बिहाॽ मे़त्ते़से़ॽ, ‘खिनिॽ खोमा के़बोङ्बा लाजेॽसिङ्बुङ् लक्ले़ लागि आङ्गाॽ पिनिङ्बा इस्राइलिहाॽरे़ खुन्छिॽ थिबोङ् लक्हाॽ के़दाःक्तुम्मिल्ले़ खे़न् लाम्बाआङ् यहवे दाङ्बाओ खिनिॽ थिबोङ्लक् से़न्दाम्मे़ॽआङ् सिदुङ्जभा तोःन्दे़म्मे़ॽ॥ 27 खिनिॽ सिदुङ्जभान् चाधाम्मादे़न्नोबा पोगुगे़न् कुजा नु चे़ल्ले़क्सेॽ एःम्मादे़न्नोलाम् के़लःम्बा चे़ल्ले़क्सेॽ सेजःङ्वा कुसिङ्बा पोङ्ॽ॥ 28 कम्भलॽरिक् इस्राइलिहाॽलाम् के़घोसुम्बा के़रे़क् थिबोङ्लक्लाम् खिनिॽआङ् यहवे दाङ्बाओ सिदुङ्जभा तोःम्मा याःम्बक् चोगे़म्मे़ॽ, हे़क्क्याङ् खे़न् लाम्बा यहवे दाङ्बाओ के़दोःन्दुम्बा सिदुङ्जभान् निङ्वाॽफुसाम्बा हारुने़न् पिरे़म्मे़ॽ॥ 29 खिनिॽ के़घोसुम्बालाम् के़रे़क्नुःल्ले़ नुबा नु सुत्थो लक्किन् चाए सिदुङ्जभा हे़क्के यहवे दाङ्बाओ तोःन्दे़म्मे़ॽ॥’ 30 “खे़ने़ॽ ले़बिहाॽ मे़त्ते़से़ॽ, ‘आल्ल खिनिॽ के़रे़क्नुःल्ले़ नुबा लक्किन् के़दोःन्दुम्मिल्ले़ खे़न् खिनिॽ लागि चाधाम्मादे़न्नोबा कुजा नु चे़ल्ले़क्सेॽ एःम्मादे़न्नोबा चे़ल्ले़क्सेॽ सेजःङ्वा कुसिङ्बा पोङ्ॽ॥ 31 हे़क्क्याङ् खिनिॽ नु खिनिॽ हिम्सयङ्हाॽरे़ खे़न् आत्तिन् ते़न्नोसाङ् चामा के़सुक्तुम्ॽ, थेआङ्भे़ल्ले़ तुम्मादे़न् साःङ्गाहिम्मो खिनिॽ के़जोगुम्बा याःम्बक्किल्ले़ कुले़क्वा खिनिॽ खोमा नाम्याःक्लो॥ 32 खिनिॽ साॽरिक् नुबा लक्किन् के़दोःन्दुम्बाल्ले़ चोगुल्ले़ खिनिॽ आप्तिक्को के़न्ध्ये़ॽइन्, खे़ब्याङ् इस्राइलिहाॽरे़ खुन्छिॽ सेसेबा सिदुङ्जभाहाॽ खिनिॽ आसुत्थो के़न्जोगुम्मिन्ॽ, खम्भ्याङ् खिनिॽ के़न्छे़ॽइन्नाङ्लो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.