खानिःत् 16 - लिम्बुकोरह, दातान नु अबिरामे़ल्ले़ मोसान् मे़अत्तु 1 थिक्यान् यिसहाररे़ कुस्सा कोरह, ले़बिःल्ले़ कुस्सा कोरहःल्ले़ कुमुॽइदाङ्सा, हे़क्क्याङ् रुबेनरे़ कुधाःक्कोबा एलिबरे़ कुस्सा दातान नु अबिरामे़न् हे़क्क्याङ् पेलेथरे़ कुस्सा ओने़न् पान् मे़ङ्घे़म्मनाबा मे़बोःक्खे़॥ 2 हे़क्क्याङ् खे़ङ्हाॽ मोसाःल्ले़ कुदक्ले़ङ्वाओ इस्राइलबा सङ्जुम्भोबा २५० लाम्लोबा मनाहाॽनु थिक्हुप् मे़बोःक्खे़॥ 3 खे़ङ्हाॽ मोसान् नु हारुने़ल्ले़ खुन्छिॽ तक्ले़ङ्वाओ के़रे़क् मे़भुङ्सिङ्ङाङ् खे़ङ्हाॽ मे़मे़त्तुसि, “खिनिॽ साॽरिक्के मे़न्वाॽमनाबा के़जोगुम्! सङ्जुम्भोबा के़रे़क् मनाहाॽ सेसेबा मे़जोक्, हे़क्क्याङ् यहवे दाङ्बे़न् खे़ङ्हाॽरे़ खुन्छिॽ लुम्मो वाॽ॥ खिनिॽ थेआङ् आप्फेक् यहवे दाङ्बे़ल्ले़ के़रे़क् कुमनाहाॽनुःल्ले़ यम्बा के़हे़न्नासिबाबे?” 4 कन् पाःन्निन् खे़प्सुनुमे़ःन्ने मोसान् साम्बोन् फन्छिङ्ङाङ् ने़सिङ्॥ 5 हे़क्क्याङ् खुने़ॽ कोरहःन् नु खुने़ॽनु के़दिम्बा के़रे़क् मनाहाॽ अक्खे मे़त्तुसि, “ताःन्दिक् तानाम् हात् खुने़ॽ कुमना, आत्तिन् सेसेबा चोक्, हे़क्क्याङ् हात् खुने़ॽ कुबेसाङ् तामा फाःक्तुॽ खे़न् पाःन्निन् यहवे दाङ्बे़ल्ले़ ओसेःन्धाङ् चोगुॽ॥ हात् खुने़ॽ सेगुॽ, खे़न् खुने़ॽ कुबेसाङ् तामा फाःक्तुॽ॥ 6 कोरहए, खे़ने़ॽ अक्खे चोगे़ॽ, खे़ने़ॽ नु खे़ने़ॽ के़दिम्बा मनाहाॽरे़ साङ्ते़रे़ःङ्हाॽ याङ्ङासिम्मे़ॽ॥ 7 ताःन्दिक् यहवे दाङ्बे़ल्ले़ कुदगि खे़न् साङ्ते़रे़ःङ्हाॽओ मि नु सुक्पा याक्ते़म्मे़ॽ॥ हात् यहवे दाङ्बे़ल्ले़ सेगुॽ, हाबा खे़न् सेसेबा पोङ्ॽ॥ ले़बिःल्ले़ कुमुॽइदाङ्सासे, खिनिॽ साॽरिक्के कुॽइगे़भे़रि!” 8 खे़ब्याङ् मोसाःल्ले़ कोरहःन् मे़त्तु, “ले़बिसे, खे़प्से़म्मे़ॽ॥ 9 इस्राइलबा निङ्वाॽफुमाङ्ङिल्ले़ खुने़ॽ कुसेसे साःङ्गाहिम्मो याःम्बक् चोःक्मा नु सङ्जुम्भो तगि याःम्बक् चोःक्मारे़ लागि खुने़ॽ के़दारिआङ् इस्राइलबा सङ्जुम्भोलाम् खुने़ॽए के़सेगिबान् थे खिनिॽ खे़न् चुक्पा के़लेःत्तुम्बि? 10 खुने़ॽ खे़ने़ॽनु सोरिक् के़म्भुॽ के़न्साॽ ले़बिहाॽ निःत्ताङ् तारुसिआङ् वाॽ॥ आल्ल थे खिनिॽ निङ्वाॽफुसाम्बा ताक्फाआङ् के़गोःत्तुम्बि? 11 खे़ने़ॽ के़दिम्बा के़रे़क् मनाहाॽनु यहवे दाङ्बे़ल्ले़ कुदक्ले़ङ्वाओ के़जुप्सिआङ् के़वयिबि? हारुने़न् हाःत्ताङ् खिनिॽ खुने़ॽ कुदक्ले़ङ्वाओ मने़गे़धिक्तिबे?” 12 खे़ब्याङ् मोसाःल्ले़ एलिआबरे़ कुस्सा दाताने़न् नु अबिरामे़न् उःत्छे़ पाङ्घुसि॥ कर खुन्छिॽ अक्खे पाःत्ते़छु, “आन्छिगे मे़भे़न्छिन्गे़न्॥ 13 पित्नु नु सक्वाघु के़गुङ्बा लाजेॽओलाम् मुरे़क् खारे़क् थेआङ् के़होप्पादे़न्नो सिसे़ याप्मि के़भे़त्ते़साङ् खे़ने़ॽ के़न्योरे़न्बि? याम्मो आनिगे सम्धाङ् युक् चोःक्माआङ् के़गोःत्तुबि? 14 खे़ने़ॽ आनिगे पित्नु नु सक्वाघु के़गुङ्बा लाजेॽओआङ् याप्मि के़म्भे़त्ते़न्, हे़क्क्याङ् इक्ताप् नु चे़ल्ले़क्सेॽ इक्ताप्पाहाॽ हुक्काप् चोःक्माआङ् याप्मि के़म्बे़रे़न्॥ खे़ने़ॽ थे कन् मनाहाॽरे़ खुन्छिॽ मिक्किन् ते़प्मा निङ्वाॽ के़जोगुबि? आनिगे फे़म्माए मे़भे़रिगे़न्॥” 15 खे़ब्याङ् साॽरिक् कुसिक् पोगे़आङ् यहवे दाङ्बान् मे़त्तु, “खे़ङ्हाॽरे़ मे़दोन्दुबा सिदुङ्जभान् मे़दाःक्ते़न्ने़ॽ॥ आङ्गाॽ खे़ङ्हाॽरे़ खुन्छिॽ लत्छा अदङ् थिक्काङ् मे़न्देॽए वाॽआ॥ आङ्गाॽ खे़ङ्हाॽओ आत्तिल्ले़न्नाङ् हान्ति मे़न्जोःक्के वाॽआ॥” 16 मोसाःल्ले़ कोरहःन् मे़त्तु, “खे़ने़ॽ नु खे़ने़ॽ के़दिम्बा के़रे़क् मनाहाॽ हे़क्क्याङ् हारुने़न्नाङ् ताःन्दिक् यहवे दाङ्बे़ल्ले़ कुदगि त्ये़म्मे़ॽ॥ 17 खिनिॽ के़रे़क्ले़ आप्फेक् आप्फेक् साङ्ते़रे़ःङ्हाॽ याङ्ङासिम्मे़ॽआङ् खे़ङ्हाॽओ सुक्पा केःत्ते़म्मे़ॽ, हे़क्क्याङ् के़रे़क्ले़ आप्फेक् आप्फेक् साङ्ते़रे़ःङ्हाॽ, इग्र किप् ने़त्छिआङ् ङाबोङ् साङ्ते़रे़ःङ्हाॽ यहवे दाङ्बे़ल्ले़ कुदगि तारे़म्मे़ॽ॥ हारुने़न् नु खे़ने़ॽआङ् आप्फेक् आप्फेक् साङ्ते़रे़ःङ्हाॽ तारे़से़ॽ॥” 18 कल्ले़चोगुल्ले़ खे़ङ्हाॽ के़रे़क्ले़ खुन्छिॽ आप्फेक् आप्फेक् साङ्ते़रे़ःङ्हाॽ मे़याङ्सिङ् हे़क्क्याङ् खे़प्मो मिन् मे़धे़क्तुआङ् सुक्पा मे़हाःन्दु॥ खम्भ्याङ् खे़ङ्हाॽ मोसान् हे़क्क्याङ् हारुने़न् सोरिक् तुम्मादे़न् साःङ्गाहिम्मोबा लाम्धेःप्पो मे़ये़म्सिङ्॥ 19 कोरहःल्ले़ खुने़ॽ के़दिम्बा मनाहाॽ खे़ङ्हाॽरे़ खुन्छिॽ तक्ले़ङ्वाओ तुम्मादे़न् साःङ्गाहिम्मो सुप्सुसिल्ले़ यहवे दाङ्बे़ल्ले़ कुमिमिदिङ्ङिन् खक्पे़त् सङ्जुम्भोओ ओसेःन्धाङ् पोःक्खे़॥ 20 यहवे दाङ्बे़ल्ले़ मोसान् नु हारुने़न् मे़त्तुसि, 21 “कन् सङ्जुम्भोओ नु खिनिॽ लाःत्लाःत् पोःक्खे़म्मे़ॽ, हे़क्क्याङ् आङ्गाॽ कन्हाॽ थिक्ले़ङ्ले़ खाप्पुथ्यःङ् चोगुङ्सिङ्ॽ॥” 22 खे़ब्याङ् मोसान् नु हारुने़न् साबन् फन्ने़छिआङ् ने़ने़सि हे़क्क्याङ् अक्खे मे़त्ते़सु, “निङ्वाॽफुमाङ्ङे, के़रे़क् मुन्जिङ् वयाक् के़लॽबाहाॽरे़ खुन्छिॽ सक्मा के़गेःप्पा के़बिबा निङ्वाॽफुमाङ्ङे, लत्छा मनारे़ लायो चोगुबाओ थे खे़ने़ॽ के़रे़क् सङ्जुम्भोःन्नु के़सिक् पोःक्पाबि?” 23 खे़ब्याङ् यहवे दाङ्बे़ल्ले़ मोसान् मे़त्तु, 24 “खे़ने़ॽ खे़न् सङ्जुम्भोःन् अक्खे मे़त्ते़से़ॽ, ‘कोरह, दातान नु अबिरामरे़ खुन्छिॽ साःङ्गाहिम्हाॽरे़ कुबेसाङ्लाम् खिनिॽ लाःत्लाःत् खे़त्तासिम्मे़ॽ॥’” 25 मोसान् पोगे़आङ् दातान नु अबिरामओ पे, हे़क्क्याङ् इस्राइलबा लाम्लोबाहाॽआङ् खुने़ॽ कुएगाङ् मे़धासिङ्॥ 26 खुने़ॽ सङ्जुम्भोःन् सिङ्सिङ् ये़क्ये़क् पोङ्मा पाङ्घुसि, “कन् कुॽइगे़भे़म्बा मनाहाॽरे़ खुन्छिॽ साःङ्गाहिम्हाॽओलाम् लाःत्लाःत् खे़त्तासिम्मे़ॽ, हे़क्क्याङ् कन्हाॽरे़ खुन्छिॽ थे़माआङ् मे़सुसे़म्मिन्ने़ॽ, मेःन्ने़भग्र कन्हाॽरे़ खुन्छिॽ के़रे़क् लायोल्ले़ चोगुल्ले़ खिनिॽआङ् युम्रे़क् के़मे़गिॽ॥” 27 कल्ले़चोगुल्ले़ कोरह, दातान नु अबिरामरे़ खुन्छिॽ साःङ्गाहिम्हाॽओलाम् खे़ङ्हाॽ मे़लःन्दे़ मे़बे॥ दातान नु अबिरामे़न् खुन्छिॽ मे़ःत्साहाॽनु सोरिक् खुन्छिॽ आप्फेक् आप्फेक् साःङ्गाहिम्मोलाम् लाःत्लाःत् मे़ये़म्सिङ्॥ 28 खे़ब्याङ् मोसाःल्ले़ मे़त्तुसि, “कन् के़रे़क् याःम्बक्हाॽ चोःक्मारे़ लागि आङ्गाॽ यहवे दाङ्बे़ल्ले़ पाङ्घाङ्बा हे़क्क्याङ् आङ्गाॽ आबाङे आनिङ्वाःल्ले़ चोगुङ्बा मेःन् फाॽआङ् कन् लाम्बा खिनिॽ निङ्वाॽ के़घोसुम्ॽ॥ 29 कन् मनाहाॽआङ् वेॽ के़रे़क् मनाहाॽ कुसिङ् आप्फेक् खुन्छिॽ थाःक् पुन्नाङ् मे़सिने़भग्र, यहवे दाङ्बे़ल्ले़ आङ्गाॽ पाङ्घाङ्बा मेःन्॥ 30 कर यहवे दाङ्बे़ल्ले़ निङ्वाॽ के़माबा याःम्बक् चोगुॽ हे़क्क्याङ् खाम्बाङ्ङिन् पक्क्रे़ॽ पःङ्ङाङ् कन्हाॽरे़ खुन्छिॽ के़रे़क् चिगक्वा सामाहाॽनु सोरिक् कन्हाॽ कुहिङ्वे़त्ते खे़मा यङ्सङ्ङो मे़बेःक्ल याःन्दुसिने़भग्र, कन् मनाहाॽरे़ यहवे दाङ्बे़न् कुनामे़न्छाॽए मे़मे़त्तुरे़छ के़लॽबा खिनिॽ निङ्वाॽ के़घोसुम्ॽ॥” 31 खुने़ॽ कन् के़रे़क् पाःन्हाॽ पाःप्मा सुरुआङ्लक् थे पत्छे़, खे़ङ्हाॽरे़ खुन्छिॽ सिगाङ्बा खाम्बाङ्ङिन् हर्गे़ॽ पःक्खे़॥ 32 हे़क्क्याङ् खाम्बाङ्ङिन् मुरान् हा मे़प्मनाबा कुसिङ् पःक्खे़आङ् खे़ङ्हाॽ नु खुन्छिॽ हिम्सयङ्हाॽ, कोरहरे़ के़रे़क् कुमनाहाॽ नु खे़ङ्हाॽरे़ खुन्छिॽ के़रे़क् चिगक्वाहाॽआङ् खाङ्बाङ्ङिल्ले़ लरुदेसुसि॥ 33 खुन्छिॽ मे़गत्तुबा के़रे़क् चिगक्वाहाॽनु सोरिक् कुहिङ्वे़त्ते खे़ङ्हाॽ खे़मा यङ्सङ्ङो मे़बे॥ खाम्बाङ्ङिन् खे़ङ्हाॽरे़ खुन्छिॽ सम्धाङ् चिजुप् चुबे़आङ् लरुदेसुसि, खे़ब्याङ् इस्राइलबा सङ्जुम्भोःल्ले़ खुन्छिॽ लुम्मोलाम् खे़ङ्हाॽ मे़मे़गे़॥ 34 खे़ङ्हाॽ मे़भिःक्ते़बा इक्लान् कब्रिङ् पिसाङ्बा इस्राइलिहाॽरे़ मे़घे़प्सु खे़ल्ले़चोगुल्ले़ मे़घे़त्छिङ्ल अक्खे लॽमा मे़हेःक्ते़, “आनिॽआङ् आल्ल खाम्बाङ्ङिल्ले़ आलत् आदेबिला!” 35 हे़क्क्याङ् यहवे दाङ्बाओलाम् मिधुङ् मिराःक् लःन्दे़आङ् सुक्पा के़हाःम्बा २५० मनाहाॽ खाप्पुथ्यःङ् चोगुसि॥ 36 यहवे दाङ्बे़ल्ले़ मोसान् मे़त्तु, 37 “निङ्वाॽफुसाम्बा हारुने़ल्ले़ कुस्सा एलाजारे़न् के़दिःप्पाआङ् के़युङ्बा मिधुङ् मिराःक्कोलाम् साङ्ते़रे़ःङ्हाॽ लःप्मा नु मिसाङ्हाॽ माङ्भा माःङ्घा तेॽमाआङ् से़मारे़ लागि मुरा मे़त्ते़ॽ॥ थेआङ्भे़ल्ले़ खे़न् साङ्ते़रे़ःङ्हाॽ सेसेबा चोक्— 38 खे़ङ्हाॽग खुन्छिॽ आबाङे याम्साम्मिन् हान्ति चोगुर थारिक् लायो के़जोःक्पाहाॽरे़ खुनिॽ साङ्ते़रे़ःङ्सिरो॥ खे़न् साङ्ते़रे़ःङ्हाॽलाम् ले़त्ति तोःम्मादे़न्निन् पम्मारे़ लागि ले़प्पे़प्पा फे़ःत्छे़म्मे़ॽआङ् चोगे़म्मे़ॽ, थेआङ्भे़ल्ले़ खे़ङ्हाॽ यहवे दाङ्बे़ल्ले़ कुदगि मे़दोन्दुबाल्ले़ चोगुल्ले़ सेसेबा चोक्॥ इस्राइलिहाॽरे़ खुन्छिॽ लागि खे़न् मिक्सेन् पोङ्ल॥” 39 खे़ब्याङ् एलाजार निङ्वाॽफुसाम्बे़ल्ले़ खे़न् खाप्पुथ्यःङ् के़बोङ्बाहाॽरे़ मे़दोन्दुबा कासा साङ्ते़रे़ःङ्हाॽ याङ्सिङ्, हे़क्क्याङ् खे़ङ्हाॽ थगु फे़ःत्छुआङ् ले़त्ति तोःम्मादे़न्निल्ले़ कुगिप्मा पाॽपाःम्बा कुले़ःप्ला चोगु, 40 यहवे दाङ्बे़ल्ले़ मोसाःन्लाम् एलाजारे़न् मे़त्तुआङ् वये़बा हे़क्केए खे़ल्ले़ चोगु॥ हारुनरे़ कुमुॽइदाङ्साहाॽनुःल्ले़ वेॽ आत्तिन् मनाःन्नाङ् सुक्पा हाःन्छे़ निःत्ताङ् मे़दाने़न्ल फाॽआङ् सिङ्सिङ् ये़क्ये़क् लॽमारे़ लागि इस्राइलिहाॽरे़ खुन्छिॽ लागि कन् के़रे़क् पाःन्हाॽ पोःक्खे़आङ् वये़, मेःन्ने़भग्र खे़न्नाङ् कोरहःन् नु खुने़ॽ के़दिम्बा मनाहाॽ हे़क्के खाप्पुथ्यःङ् मे़बोङ्ॽ॥ 41 कुदाःन्दिक्मा इस्राइलबा के़रे़क् सङ्जुम्भोःन् मोसान् नु हारुने़न् खुन्छिॽ तक्ले़ङ्वाओ अक्खे मे़लॽरे़आङ् मने़मे़धिक्ते़, “खे़न्छिॽए यहवे दाङ्बे़ल्ले़ कुमनाहाॽ के़से़रुसिआङ् वाॽ॥” 42 कर आल्ल सङ्जुम्भोःल्ले़ मोसान् नु हारुनरे़ खुन्छिॽ तक्ले़ङ्वाओ मे़जुप्से़आङ् तुम्मादे़न् साःङ्गाहिम्मिन् ओमे़मे़त्तु, खे़ब्याङ् चघप् खाॽमिःत्ते़ल्ले़ खे़न् चिबन् पन्छु, हे़क्क्याङ् यहवे दाङ्बे़ल्ले़ कुमिमिदिङ्ङिन् ओसेःन्धाङ् पोःक्खे़॥ 43 मोसान् नु हारुने़न् तुम्मादे़न् साःङ्गाहिम् तगि पेसि, 44 हे़क्क्याङ् यहवे दाङ्बे़ल्ले़ मोसान् मे़त्तु, 45 “खिनिॽग कन् सङ्जुम्भोओलाम् लाःत्लाःत् खे़त्तासिम्मे़ॽ, खम्भ्याङ् आङ्गाॽ कन् मनाहाॽ मिक्चिराप्पा थिक्ले़सा खाप्पुथ्यःङ् चोगुङ्सिङ्ॽ॥” खे़ब्याङ् खे़ङ्हाॽ साम्बोन् हबत् मे़भन्छिङ्ङाङ् मे़ने़सिङ्॥ 46 हे़क्क्याङ् मोसाःल्ले़ हारुने़न् मे़त्तु, “खे़ने़ॽ के़साङ्ते़रे़ःङ्ङिन् याङ्सिङ्ङे़ॽ, खे़ब्याङ् खे़प्मो ले़त्ति तोःम्मादे़न्नोलाम् मिन् केःत्ते़आङ् सुक्पा याक्ते़ॽ, हे़क्क्याङ् खिमो खे़न् सङ्जुम्भोओ तेॽरे़आङ् खे़ङ्हाॽ खुन्छिॽ आप्तिक्लाम् सुत्थो चोःक्मासि हे़क्क्याङ् खे़ङ्हाॽ यहवे दाङ्बे़न्नु नादङ् चोःक्मासि याःम्बक् चोगे़ पिरे़से़ॽ, थेआङ्भे़ल्ले़ यहवे दाङ्बे़ल्ले़ मि हे़क्तङ्बा कुसाक्के़न्निन् पोगे़ चुरे़आङ् वाॽ—मिङ्देॽ पोगे़ चुरे़आङ् वाॽ॥” 47 खे़ब्याङ् मोसाःल्ले़ मे़त्तुबा कुसिङ् हारुनरे़ साङ्ते़रे़ःङ्ङिन् याङ्सिङ्ङाङ् सङ्जुम्भोःल्ले़ खुन्छिॽ लुम्मो लोःक्ते़आङ् पे॥ मिङ्देन् मनाहाॽरे़ खुन्छिॽ लुम्मो पोङ्मा हेःक्ते़ चुरे़आङ् वये़, कर खुने़ॽ सुक्पा हाःन्दुआङ् मनाहाॽ खुन्छिॽ आप्तिक्लाम् सुत्थो चोःक्मासि याःम्बक् चोगु पिरुसि॥ 48 खुने़ॽ के़सिबा नु कुहिङ्वे़त्हाॽरे़ खुन्छिॽ लुम्मो ये़म्सिङ्, हे़क्क्याङ् मिङ्देॽ पोःक्मे़न् चक् लॽरे़॥ 49 कोरहरे़ कुहिन्दोक्को के़सिबाहाॽनुःल्ले़ वेॽ खे़न् ये़म्मो मिङ्देल्ले़ के़सिबाहाॽ १ ४,७०० मे़वये़॥ 50 मिङ्देन् चक्लॽरे़आङ् एगाङ् हारुने़न् तुम्मादे़न् सेसे साःङ्गाहिम्मो मोसारोओ नुःक्खे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.