खानिःत् 15 - लिम्बुसिदुङ्जभा चोःक्मा थिम्हाॽ 1 यहवे दाङ्बे़ल्ले़ मोसान् मे़त्तु, 2 “खे़ने़ॽ इस्राइलिहाॽ अक्खे मे़त्ते़से़ॽ—‘आल्ल आङ्गाॽ खिनिॽ युङ्मारे़ लागि पिनिङ्ल पत्ताबा लाजेॽओ खिनिॽ के़गे़रिॽ, 3 यहवे दाङ्बे़ल्ले़ कुसिराॽ के़धाङ्बा कुनाम्गे़नुॽबा पोगुगे़न् कुजा सिदुङ्जभा कुइसिक् तोःन्दे़म्मे़ॽ॥ कन् सिदुङ्जभाहाॽओ मिधिङ्मनादेमनाबा सिदुङ्जभा, माङ्हुप् के़प्मा सिदुङ्जभा इग्र आबाङे निङ्वाॽरे़ तोःम्मनाबा सिदुङ्जभा, तङ्बेओबा तङ्नाम्हाॽओ तोःम्मा के़बोङ्बा सिदुङ्जभा तोःन्दे़म्मे़ॽ, हे़क्क्याङ् खिनिॽ पित्थक्सा इग्र मे़ल्लुक् मे़ःन्दाक्हाॽलाम् सिदुङ्जभाहाॽ तोःम्मा के़सुक्तुम्ॽ॥ 4 हे़क्केःल्ले़ सिदुङ्जभा के़दोःन्दुम्मिल्ले़ लितर थिक् चैतुन निःङ्गेॽओ सॽमनाबा माना लिसि चुन्जुम्बा फेॽरुम्मिल्ले़न् पोगुगे़न् कुजा सिदुङ्जभा यहवे दाङ्बाओ तोःन्दे़म्मे़ॽ॥ 5 के़रे़क् सिदुङ्जभा इग्र मिधिङ्मनादेमनाबा सिदुङ्जभा मे़ल्लुक्साःत्ते़न्नु सोसोरिक् वदुम्बक्वा सिदुङ्जभाःल्ले़ लागि माना लिसि चे़ल्ले़क्सेॽ सेॽजःङ्वाआङ् खिनिॽ यारिप् चोगे़म्मे़ॽ॥ 6 “‘थुःम्बाःन्नु सोरिक् चाहि पोगुगे़न् कुजा सिदुङ्जभाःल्ले़ लागि लितर थिक्काङ् कुभ्रे़ःङ् चैतुन निःङ्गेॽओ सॽमनाबा फोलक् थिक् चुन्जुम्बा फेॽरुम्, 7 हे़क्क्याङ् वदुम्बक्वा सिदुङ्जभाःल्ले़ लागि लितर थिक्काङ् कुभ्रे़ःङ् चे़ल्ले़क्सेॽ सेजःङ्वा यारिप् चोगे़म्मे़ॽ॥ यहवे दाङ्बे़ल्ले़ कुलागि खे़न् कुनाम्गे़नुॽबा सिदुङ्जभा हे़क्तङ्बा तोःन्दे़म्मे़ॽ॥ 8 “‘मिधिङ्मनादेमनाबा सिदुङ्जभा कुइसिक् इग्र माङ्हुप्पिन् के़प्मारे़ लागि सिदुङ्जभा के़दोःन्दुल्ले़ किग्र यहवे दाङ्बाओ खे़ने़ॽ तङ्जुम् वायागे़न् सिदुङ्जभा कुइसिक् कुम्बाबा पित्सात्ते़न् के़दोःन्दुल्ले़, 9 खे़न् पित्सात्ते़न्नु सोरिक् लितर ने़त्छि निःङ्गेॽओ सॽमनाबा फोलक् थिक्काङ् कुभ्रे़ःक् चुन्जुम्बा फेॽरुम् पोगुगे़न् कुजा सिदुङ्जभा हे़क्तङ्बाआङ् तोःन्दे़ॽ॥ 10 हे़क्क्याङ् वदुम्बक्वा सिदुङ्जभाःल्ले़ लागि लितर ने़त्छि चे़ल्ले़क्सेॽ सेजःङ्वा तारे़म्मे़ॽ॥ खे़न्निन् यहवे दाङ्बे़ल्ले़ कुलागि कुसिराॽ के़धाङ्बा कुनाम्गे़नुॽबा पोगुगे़न् कुजा सिदुङ्जभा पोङ्ॽ॥ 11 के़रे़क् से़गम्बा इग्र थुःम्बा किग्र मे़ल्लुक्साःत् किग्र मे़ःन्दसाःत्ले़ लागि खिनिॽ अक्खेए चोगे़म्मे़ॽ॥ 12 खिनिॽ आक्ख्यारिक् के़दोःम्दुम्सिम्ॽ, खे़ङ्हाॽ के़रे़क् हे़क्केए चोगे़म्सिम्मे़ॽ॥ 13 “‘लाजेॽसाबाहाॽरे़ यहवे दाङ्बाल्ले़ कुलागि कुनाम्गे़नुॽबा कुनाम् के़लःम्बा पोगुगे़न् कुजा सिदुङ्जभान् मे़दोन्दुल्ले़ के़रे़क्ले़ हाबा कन् परिक्ले़ मे़जोगुर॥ 14 खिनिॽनु सोरिक् के़युङ्बा वेॽ लाजेॽबा इग्र के़दाबा थाःक्को खिनिॽनु सोरिक् के़युङ्बा कुभा मनाःल्ले़ यहवे दाङ्बे़ल्ले़ कुलागि कुनाम्गे़नुॽबा कुनाम् के़लःम्बा पोगुगे़न् कुजा सिदुङ्जभाॽ तोःन्दुल्ले़ खिनिॽ के़जोगुम्बा हे़क्केए खे़ल्ले़ चोगुर॥ 15 खिनिॽ सङ्जुम्भोरे़ लागि हे़क्क्याङ् खिनिॽनु सोरिक् के़युङ्बा वेॽ लाजेॽबाहाॽरे़ लागि लत्छा परिक्पा थिम् पोङ्ल॥ कन् खिनिॽ ताःन्दि के़दाबा थाःक्थाःक्को थारिक् आभे़ल्ले़साङ् के़वाॽबा थिम् पोङ्ल॥ वेॽ लाजेॽबान्नाङ् यहवे दाङ्बाल्ले़ कुदगि खिनिॽ हे़क्तङ्बाए पोङ्ल॥ 16 खिनिॽ हे़क्क्याङ् खिनिॽनु सोरिक् के़युङ्बा वेॽ लाजेॽबाल्ले़ लागि लत्छा परिक्पा थिम् नु साक्थिम् पोङ्ल॥’” 17 यहवे दाङ्बे़ल्ले़ मोसान् मे़त्तु, 18 “खे़ने़ॽ इस्राइलिहाॽ मे़त्ते़से़ॽ—‘आल्ल आङ्गाॽ खिनिॽ तेॽनिङ्बा लाजेॽओ के़गे़रिॽ, 19 खे़ब्याङ् खिनिॽ खे़न् लाजेॽओबा पोगुगे़न् कुजान् के़जाम्मिल्ले़ यहवे दाङ्बाओ सिदुङ्जभा कुइसिक् कुजा लक् से़न्दे़म्मे़ॽ॥ 20 खिनिॽ खरे़ःङ् के़ले़ःङ्सुम्मिल्ले़ तगि के़दुम्बा कुजालाम्बाबा खरे़ःङ्ङिन् सिदुङ्जभा कुइसिक् यहवे दाङ्बाओ तोःन्दे़म्मे़ॽ॥ खिनिॽ चा थाम्मादे़न्नो के़से़न्दुम्बा कुजालाम्बा सिदुङ्जभा के़दोःन्दुम्बा हे़क्केए खे़न् खरे़ःङ्ङिन् के़दोःन्दुम्ल पोङ्ॽ॥ 21 खिनिॽ ताःन्दि के़दाबा थाःक्थाःक्को थारिक् खिनिॽ थिक्सिगेक्पा फेॽरुम्लाम् यहवे दाङ्बाल्ले़ कुलागि सिदुङ्जभा तोःन्दे़म्मे़ॽ॥ मे़न्नि मे़न्धा के़बोङ्बा लायोहाॽरे़ लागि सिदुङ्जभाहाॽ 22 “‘आल्ल खिनिॽ याःम्बक् के़भेःन्दुम्माङ् यहवे दाङ्बाल्ले़ मोसान् पिरुबा कन् इङ्जाङ्हाॽओबा लत्छाआङ् के़न्इःत्तुम्मिन् के़न्नाःत्तुम्मिन्ने़भग्र, 23 खिनिॽ के़रे़क् थाःक्थाःक्को थारिक् थिक्सिगेक्पा ये़न्नाङ्धो आल्लो थारिक् यहवे दाङ्बे़ल्ले़ मोसाःन्लाम् के़बिरिबा इङ्जाङ्हाॽओबा आत्तिन् इङ्जाङ्ङिन्नाङ् के़न्इःत्तुम्मिन् के़न्नाःत्तुम्मिन्ने़भग्र, 24 हे़क्क्याङ् सङ्जुम्भोःल्ले़ निङ्वाॽ मे़ङ्घोए खे़न् याःम्बक्किन् आन्जानिओ मे़जोगुबाने़भग्र, के़रे़क् सङ्जुम्भोःल्ले़ यहवे दाङ्बे़ल्ले़ कुसिराॽ के़धाङ्बा कुनाम्गे़नुॽबा मिधिङ्मनादेमनाबा सिदुङ्जभा हे़क्तङ्बारे़ लागि कुम्बाबा पित्सात् थिक्, खे़ल्ले़न् पोगुगे़न् कुजा सिदुङ्जभा नु वदुम्बक्वा सिदुङ्जभाःन्नु सोरिक् थिम् कुइसिक् तोःन्दे़म्मे़ॽ, हे़क्क्याङ् लायोलाम् ले़प्मि खोमा सिदुङ्जभारे़ लागि कुम्बाबा मे़ःन्दा थिक्काङ् तोःन्दे़म्मे़ॽ॥ 25 निङ्वाॽफुसाम्बाल्ले़ इस्राइलिहाॽरे़ खुन्छिॽ के़रे़क् सङ्जुम्भोःल्ले़ लागि लायोल्ले़ लागि ले़प्मि नाःक्मा याःम्बक् चोगुर, हे़क्क्याङ् खे़ङ्हाॽरे़ खुनिॽ लायोन् ले़प्मि पोङ्ॽ, थेआङ्भे़ल्ले़ खे़न् निङ्वाॽ मे़ङ्घोए मे़जोगुआङ् वये़, हे़क्क्याङ् खे़ङ्हाॽरे़ खुन्छिॽ फे़न्याःम्बक्किल्ले़ लागि यहवे दाङ्बाओ मे़दोन्दुबा पोगुगे़न् कुजा सिदुङ्जभान् नु सुत्थो पोङ्मा वयागे़न् सिदुङ्जभान् यहवे दाङ्बे़ल्ले़ कुदगि मे़दारुआङ् वाॽ॥ 26 कम्भलॽरिक् इस्राइलिहाॽरे़ के़रे़क् खुन्छिॽ सङ्जुम्भोःन् नु खे़ङ्हाॽरे़ खुन्छिॽ लुम्मो के़युङ्बा वेॽ लाजेॽबाहाॽरे़ खुनिॽ लायोन् नाङ् ले़प्मि पोङ्ॽ, थेआङ्भे़ल्ले़ के़रे़क् मनाहाॽ निङ्वाॽ मे़ङ्घोए कन् फे़न्याःम्बक्को मे़ध्ये़आङ् मे़वये़॥ 27 “‘कर कुभा लत्छा मनाःल्ले़ निङ्वाॽ मे़ङ्घोए लायो चोगुने़भग्र, खे़ल्ले़ तङ्बे थिक् के़गे़प्मा कुम्मामा मे़ःन्दसाःत् थिक् लायोलाम् ले़प्मि खोमा सिदुङ्जभा हे़क्के तोःन्दुर॥ 28 निङ्वाॽ मे़ङ्घोए लायो के़जोःक्पा खे़न् मनान् निङ्वाॽफुसाम्बे़ल्ले़ यहवे दाङ्बाल्ले़ कुदगि लायोल्ले़ लागि ले़प्मि नाःक्मा याःम्बक् चोगु पिरुर, हे़क्क्याङ् लायोल्ले़ लागि ले़प्मि नाःक्मा याःम्बक् पोङ्ङिल्ले़ खे़ल्ले़ ले़प्मि खोसुरो॥ 29 निङ्वाॽ मे़ङ्घोए लायो के़जोःक्पा इस्राइलि यक्युङ्बा हे़क्क्याङ् खिनिॽनु सोरिक् के़युङ्बा वेॽ लाजेॽबा मनाःल्ले़ कुलागि लत्छा थिम् पोङ्ल॥ 30 “‘कर आप्फेक् लाजेॽसाबा इग्र वेॽ लाजेॽबा कुभा मनाःल्ले़ निनिबा लायो चोगुने़भग्र, यहवे दाङ्बे़न् इङ्दो मे़त्तुबा आप्तिक्किन् खे़ल्ले़ कुसम्धाङ् थारो, हे़क्क्याङ् खे़न् मनान् खुने़ॽ कुमनाहाॽरे़ खुन्छिॽ लुम्मोलाम् मे़लःत्तु मे़देसुॽ॥ 31 थेआङ्भे़ल्ले़ खे़ल्ले़ यहवे दाङ्बे़ल्ले़ कुबाःन्जाक्किन् कुनामे़न्छाॽ मे़त्तुआङ् वाॽ, खे़ब्याङ् खुने़ॽ कुइङ्जाङ्ङिन् फेःन्दुआङ् वाॽ॥ खे़न् मनान् कुमनाहाॽलाम् मे़लःत्तु मे़देसुर॥ खे़ल्ले़ चोगुबा फे़न्याःम्बक्किल्ले़ कुले़क्वा तुमुररो॥’” नाःम्सिङ्मा ये़न् के़भेःम्बा मना 32 इस्राइलिहाॽ मुरे़क् खारे़क् थेआङ् के़होप्पादे़न्नो मे़वये़ल्ले़ खे़ङ्हाॽरे़ खुन्छिॽ मनाधिक् नाःम्सिङ्मा ये़न्नो सिङ् सुम्नु यागे़बा मे़निसु॥ 33 सिङ् के़सुम्बा मनान् खे़ङ्हाॽरे़ मोसा, हारुन हे़क्क्याङ् के़रे़क् इस्राइलि सङ्जुम्भोओ मे़दारु॥ 34 खे़न् खुम्दिङ् पिमा के़बोङ्बा थिम्मिन् खे़ङ्हाॽरे़ निङ्वाॽ मे़ङ्गत्तुम्बाल्ले़ चोगुल्ले़ खे़ङ्हाॽरे़ खे़न् मनान् मे़साक्तु मे़युक्खु॥ 35 खे़ब्याङ् यहवे दाङ्बे़ल्ले़ मोसान् मे़त्तु, “खे़न् मनान् से़प्माए पोङ्ॽ॥ के़रे़क् सङ्जुम्भोःल्ले़ खे़न् मनान् साःङ्गाहिम्हाॽ लाःक्कात् लुङ्ङिल्ले़ मे़ले़प्तु मे़से़रुर॥” 36 हे़क्क्याङ् यहवे दाङ्बे़ल्ले़ मोसान् इङ्जाङ् पिरुबा हे़क्केए के़रे़क् सङ्जुम्भोःल्ले़ खे़न् साःङ्गाहिम्हाॽ लाःक्कात् मे़देॽरु, खे़ब्याङ् खे़न् लुङ्ङे़ल्ले़ मे़ले़प्तु मे़से़रुरो॥ चाङ् पोराःक्वा थिम्हाॽ 37 याम्मो यहवे दाङ्बे़ल्ले़ मोसान् अक्खे मे़त्तु, 38 “खे़ने़ॽ इस्राइलिहाॽ अक्खे मे़त्ते़से़ॽ—‘खिनिॽ के़रे़क् थाःक्थाःक्को थारिक् खिनिॽ चाङ्हाॽरे़ कुयाओ कुबोराक्हाॽ फत्छे़म्मे़ॽ हे़क्क्याङ् खे़प्मो लत्छा हिःक्कोःम्कोःम्बा खि थे़क्ते़म्मे़ॽ॥ 39 खे़न् कुबोराक्किन् ओगे़मे़त्तुम्मिल्ले़ खिनिॽ खे़न् इङ्जाङ्हाॽ इःत्ते़म् नाःत्ते़म्मे़ॽ, हे़क्क्याङ् खिनिॽ आप्फेक् मिक्ले़ निसुबा पाःन्निन् नु निङ्वाॽरे़ इःत्तुबा पाःन्निन् खोसुम्बे़गो मे़लॽरे़म्मिन्ने़ॽ के़लॽबा यहवे दाङ्बे़ल्ले़ कुइङ्जाङ्ङिन् निङ्वाॽसुम् लॽर॥ 40 खे़ब्याङ् आङ्गाॽ के़रे़क् आइङ्जाङ्हाॽ खिनिॽ इःप्मा नाःप्मा निङ्वाॽ याक्काङ् खिनिॽ निङ्वाॽफुमाङ्ङिल्ले़ कुलागि सेसेबा के़बोःक्खिॽ॥ 41 खिनिॽ निङ्वाॽफुमाङ् पोङ्मारे़ लागि मिस्रलाम् खिनिॽ के़लःप्पा के़धाक्पा यहवे दाङ्बा खिनिॽ निङ्वाॽफुमाङ्आ॥ यहवे दाङ्बा खिनिॽ निङ्वाॽफुमाङ्ङिन् आङ्गाॽएरो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.