खानिःत् 14 - लिम्बुइस्राइलिहाॽरे़ यहवे दाङ्बान् मे़अत्तु 1 खे़न् से़न्दिक् के़रे़क् सङ्जुम्भोःन् फिरिक् फिरिक् मे़भिःक्ते़र मे़हाबे़॥ 2 के़रे़क् इस्राइलिहाॽ मोसान् नु हारुनरे़ खुन्छिॽ तक्ले़ङ्वाओ मने़मे़धिक्ते़, हे़क्क्याङ् के़रे़क् सङ्जुम्भोरे़ खे़न्हाॽ मे़मे़त्तुसि, “मिस्र लाजेॽओए आनिगे स्ये़ॽइगे़ल्ले़ नुबा पोःक्खे़बा वये़बामे़न्, इग्र कन् मुरे़क् खारे़क् थेआङ् के़होप्पादे़न्नो स्ये़ॽइगे़साङ् नुरे़बा वये़मे़न्॥ 3 निङ्वाॽफुमाङ्ङिल्ले़ ताभेःल्ले़ आनिगे से़प्मारे़ लागि थेआङ् कन् ते़न्नो फे़त्तिगे़र पत्छिगे़बाबे? आनिगे मेःत्हाॽ नु साहाॽ नाप्मनाबा चिगक्वा हे़क्के मे़दे़म्सुसिॽ॥ आल्ल आनिॽ मिस्र लाजेॽओए नुःङ्मा पेःक्मा नुबा मे़बोङ्ने़म्बि?” 4 हे़क्क्याङ् खे़ङ्हाॽरे़ खुन्छिॽ लुम्मो अक्खे मे़बाःत्तु, “आनिॽ लत्छा लाम्लोबा सेगुम्माङ् मिस्र लाजेॽ नुःक्खिॽ॥” 5 खे़ब्याङ् मोसान् नु हारुने़न् इस्राइलबा के़रे़क् सङ्जुम्भोःल्ले़ खुन्छिॽ तगि साम्बोन् हबत् फन्ने़छिआङ् ने़ने़त्छि॥ 6 लाजेॽ थोःम्से़ के़बेःक्पाहाॽओ नुनरे़ कुस्सा यहोसुन् नु यपुन्नेरे़ कुस्सा कालेबरे़ खुन्छिॽ चाङ्हाॽ थे़ःक्खे़छु, 7 हे़क्क्याङ् इस्राइलबा के़रे़क् सङ्जुम्भोःन् खुन्छिॽ अक्खे मे़त्ते़छुसि, “आनिगे कुधोःम्से़ पेगिगे़बा लाजेन् साॽरिक् नुबा लाजेॽ चोक्॥ 8 यहवे दाङ्बान् आनिॽनु कुनिङ्वाॽ ताने़भग्र, खुने़ॽ आनिॽ खे़न् लाजेॽओ आदेॽ, हे़क्क्याङ् खे़न् पित्नु नु सक्वाघु के़गुङ्बा लाजेन् खुने़ॽ आबिरो॥ 9 कर यहवे दाङ्बे़ल्ले़ कुदक्ले़ङ्वाओरक् मे़बोगे़म्मिन्ने़ॽ॥ हे़क्क्याङ् खे़न् लाजेॽओबा मनाहाॽनु मे़गिसे़म्मिन्ने़ॽ, थेआङ्भे़ल्ले़ खे़ङ्हाॽग आनिॽ सानाःत् मे़बोङ्ॽ॥ खे़ङ्हाॽ कम्ब्राङ् के़मे़प्पान् खुन्छिॽलाम् खे़त्छिङ् पेआङ् होप्, कर यहवे दाङ्बान् आनिॽनु वाॽ॥ खिनिॽ खे़ङ्हाॽनु मे़गिसे़म्मिन्ने़ॽ॥” 10 कर के़रे़क् सङ्जुम्भोःल्ले़ खे़ङ्हाॽ लुङ्ङिल्ले़ ले़प्मासि फाॽआङ् पान् मे़हुप्तु॥ खे़न् ये़म्मो यहवे दाङ्बे़ल्ले़ कुमिमिदिङ्ङिन् तुम्मादे़न् साःङ्गाहिम्मो के़रे़क् इस्राइलिहाॽओ ओसेःन्धाङ् पोःक्खे़॥ 11 हे़क्क्याङ् यहवे दाङ्बे़ल्ले़ मोसान् मे़त्तु, “कन् मनाहाॽरे़ आङ्गाॽ आक्ख्यारिक् इरिक् मे़नाॽआर मे़वाॽबे? कन्हाॽरे़ खुन्छिॽ लुम्मो आङ्गाॽ चोगुङ्बा मिक्सेःन्हाॽ मे़निसुआङ्साङ् कन्हाॽरे़ आक्खे़न् थारिक् आङ्गाॽ नसान् मे़न्जोःक्काआन्बाबे? 12 कन्हाॽ आङ्गाॽ मिङ्देल्ले़ मे़क्खुङ्सिङ्ॽ, कर खे़ने़ॽ लाम्बाए कन्हाॽनुःल्ले़आङ् यम्बा सुवाङ् नु मुक्साम्साबा चोगुङ्सिङ्ॽ॥” 13 मोसाःल्ले़ यहवे दाङ्बे़न् मे़त्तु, “मिस्रिहाॽरे़ कन् पाःन्निन् मे़घे़प्सुल्ले़ खे़ङ्हाॽरे़ थे मे़बाःत्तुॽ? आदाङ्बारे़ के़मुक्साम्मिन् ओःन्गे़धाक्तुसिआङ् खे़ङ्हाॽरे़ खुन्छिॽ लुम्मोलाम् आदाङ्बारे़ए कन्हाॽ के़लःत्तु के़धाक्तुसिबारो॥ 14 कन् लाजेॽओ के़युङ्बाहाॽ मिस्रिहाॽरे़ कन् पाःन्निन् मे़जे़क्तुसिॽ॥ खे़ने़ॽ यहवे दाङ्बे़न् कन्हाॽरे़ खुन्छिॽ लुम्मो के़वाॽ के़लॽबा पाःन्निन् खे़ङ्हाॽरे़ मे़घे़प्सु मे़सुरुआङ् वाॽ, खे़ने़ॽ नादुम्दुम्बाए निगे़धाबे़आङ् के़वाॽ, हे़क्क्याङ् खे़ने़ॽ के़घाॽमिःत्तिन् कन्हाॽरे़ खुन्छिॽ सम्धाङ् ये़म्सिङ् खे़ब्याङ् ले़न्दिक् खाॽमित् सित्लाङ् नु से़न्दिक् मि सित्लाङ् के़बोङ्ङाङ् खे़ने़ॽ कन्हाॽरे़ खुन्छिॽ तगि तगि के़बेःक्॥ 15 आल्ल खे़ने़ॽ कन् मनाहाॽ थिक्ले़ङ्ले़ के़से़रुसिल्ले़ग खे़ने़ॽ के़मिङ्सो के़धाःङ्सो के़घे़म्बा सुवाङ्हाॽरे़ अक्खे मे़लॽआङ् पान् मे़बाःत्तुॽ, 16 ‘यहवे दाङ्बे़ल्ले़ खे़न् मनाहाॽ लाजेॽ पिनिङ् मे़त्तुसि हे़क्क्याङ् माङ्हे़क् चोगु कर माङ्हुप् चोगुबा लाजेॽओ फे़प्मा मे़सुक्तुसिन्, कल्ले़चोगुल्ले़ खुने़ॽ खे़ङ्हाॽ मुरे़क् खारे़क् थेआङ् के़होप्पादे़न्नो स्ये़रुसि॥’ 17 “कल्ले़चोगुल्ले़ यहवे दाङ्बाए, खे़ने़ॽ के़मुक्साम्मिन् ओसेःन्धाङ् चोगे़ॽओ, खे़ने़ॽ अक्खे के़बाःत्तुआङ् वाॽ— 18 ‘यहवे दाङ्बान् हने़ कुसिक् मे़म्बोःक्मनाबा नु लुङ्माॽ आदुक्तुक्पा चोक्, फे़न्याःम्बक् नु लायो लासोत् ले़प्मि के़बिबा चोक्, कर आप्तिक्साबान् आत्तिन् परिक्ले़आङ् आप्तिक् मेःन्नेबा मे़न्जोःक्मनाबा, पाधे़बा थाःक्थे़बाहाॽरे़ खुन्छिॽ लायोल्ले़ कुले़क्वा खुन्छिॽ सुम्सि लिसि थाःक् थारिक्साङ् खुम्दिङ् के़बिबा चोक्॥’ 19 आङ्गाॽ खे़ने़ॽ पेलि फाक्ने़, खे़ने़ॽ साॽरिक् लुङ्माॽ आदुक्तुक्पा के़जोःक्पा कुइसिक्, हे़क्क्याङ् मिस्र लाजेॽलाम् आल्लो थारिक् ले़प्मि के़बिरुसिर के़वाॽबा हे़क्के कन् मनाहाॽरे़ खुन्छिॽ लायोन् ले़प्मि पिरे़से़ॽओ॥” 20 खे़ब्याङ् यहवे दाङ्बे़ल्ले़ पाःत्तु, “खे़ने़ॽ के़बाःत्तुबा कुसिङ्ङे आङ्गाॽ कन्हाॽ ले़प्मि पिरुङ्सिङ्ङाङ् वाॽ॥ 21 हे़क्केसाङ्, आङ्गाॽ से़क्खाए कुहिङ्वे़त् वाॽआबा कुइसिक् हे़क्क्याङ् आङ्गाॽ आमिमिदिङ्ङिन् इक्सादिङ् खाम्बेःक्मो खाराक् वाॽबा कुइसिक्, 22 मिस्र नु मुरे़क् खारे़क् थेआङ् के़होप्पादे़न्नो आङ्गाॽ आमिमिदिङ्ङिन् नु आङ्गाॽ चोगुङ्बा निङ्वाॽ के़माबा याःम्बक्हाॽ मे़निसुआङ्साङ् इङ्जाङ् मे़न्इःप्मना मे़न्नाःप्मनाबा के़बोङ्बाआङ् थिबोङ्ले़ङ् थारिक् आङ्गाॽ आनिङ्वाॽ के़साॽबा कन् के़रे़क् मनाहाॽरे़— 23 खुन्छिॽ थाःक्थे़बाहाॽ माङ्हुप् चोगुङ्ङाङ् पिनिङ्ॽ लॽरिक् माङ्हे़क्सिङाङ्बा लाजेन् खे़ङ्हाॽओ लत्छारे़आङ् निमा मे़ङ्घोसुन्ॽ॥ आङ्गाॽ के़नाॽबाहाॽरे़ खे़न् लाजेन् आप्फाल्ले़आङ् निमा मे़ङ्घोसुन्ॽ॥ 24 कर आङ्गाॽ आसे़वारोबा काले़बरे़ओ वेॽसमा याम्साम् याक्, हे़क्क्याङ् खे़ल्ले़ के़रे़क् परिक्ले़ आङ्गाॽ आजोःङ् इःत्तुआङ् वाॽ॥ कल्ले़ चोगुल्ले़ए खुने़ॽ के़रे़आङ् फे़रे़बा लाजेॽओ आङ्गाॽ खुने़ॽ तेॽरुङ्ॽ हे़क्क्याङ् खुने़ॽ कुमुॽइदाङ्साहाॽरे़ खे़न् लाजेॽओ युक् मे़जोगुॽ॥ 25 अमाले़किहाॽ नु कनानिहाॽ ने़ने़बादे़न्हाॽओ मे़युङ्बाल्ले़ चोगुल्ले़ ताःन्दिक्सा खिनिॽ नुःक्खे़म्मे़ॽ हे़क्क्याङ् हे़ःत्ताङ्बा वरःङ्ङो लाम्बा पोःक्खे़म्मे़ॽआङ् मुरे़क् खारे़क् थेआङ् के़होःप्पादे़न् ले़प्माङ् पेगे़म्मे़ॽ॥” 26 यहवे दाङ्बे़ल्ले़ मोसान् नु हारुने़न् मे़त्तुसि, 27 “आङ्गाॽ आदक्ले़ङ्वाओ कन् कुॽइगे़भे़म्बा सङ्जुम्भोःन् आफाल्धारिक् मने़मे़धिक्पाबे? खे़ङ्हाॽ आङ्गाॽ आदक्ले़ङ्वाओ मने़मे़धिक्ते़बे़न् आङ्गाॽ खे़प्सुङ्ङाङ् वाॽ॥ 28 खिन्छिॽ खे़ङ्हाॽ मे़त्ते़से़से़ॽ, ‘आङ्गाॽ से़क्खाए कुहिङ्वे़त् वाॽआबा कुइसिक्, यहवे दाङ्बाल्ले़ उवा चोगुॽ, आङ्गाॽ खे़प्सुङ्ल खिनिॽ थे़मा थे़मा के़बाःत्तुम्माङ् वये़, आङ्गाॽ हाबा खे़न्ने चोगुङ्ॽ॥ 29 खिनिॽ चे थक्हाॽ आम्भा कन् मुरे़क् खारे़क् थेआङ् के़होप्पादे़न्नो ने़याःक्, खिनिॽ आङ्गाॽ आदक्ले़ङ्वाओ मने़गे़धिक्तिआङ् के़वयिॽ॥ खे़ल्ले़चोगुल्ले़ खिनिॽओ निबोङ् तङ्बेनुःल्ले़ यरिक् के़योबा आत्तिन्हाॽआङ् खे़न् लाजेॽओ लाःप्मा के़ङ्घोसिन्ॽ॥ 30 हे़क्क्याङ् यपुन्नेरे़ कुस्सा कालेबे़न् नु नुनरे़ कुस्सा यहोसुन् नुःल्ले़ वेॽ आत्तिन्नाङ् आङ्गाॽ पिनिङ् फाॽआङ् माङ्हुप् चोगुङ्ङाङ् माङ्हे़क्सिङाङ्बा लाजेॽओ लाःप्माआङ् युङ्मा के़ङ्घोसिन्ॽ॥ 31 नाप्मनासिबा चिगक्वा हे़क्के मे़दे़म्सुसि फाॽआङ् खिनिॽ के़बाःत्तुम्बा खिनिॽ साएहाॽग आङ्गाॽ खे़प्मो के़त्तुङ्सिङ्ॽ, खम्भ्याङ् खिनिॽ निनि खे़म्घे़म् के़ल्लाप्तुम्मिन्बा ते़न्निन् खे़ङ्हाॽरे़ मे़घोसुॽ॥ 32 कर खिनिॽ चे थक्हाॽग आम्भा कन् मुरे़क् खारे़क् थेआङ् के़होप्पादे़न्नो ने़याःक्॥ 33 खिनिॽ थिन्दाङ् सायोबोराहाॽ कन् मुरे़क् खारे़क् थेआङ् के़होप्पादे़न्नो लिबोङ् तङ्बे थारिक् ताक्मे़गन्नाङ् मे़वाॽ हे़क्क्याङ् खिनिॽ नसान् के़न्जोगुम्मिन्बाल्ले़ चोगुल्ले़ मुरे़क् खारे़क् थेआङ् के़होप्पादे़न्नो खिनिॽ के़रे़क् मे़न्छिए थारिक् खे़ङ्हाॽरे़ तुक्खे लाक्खे मे़दुमुॽ॥ 34 खिनिॽ खे़न् लाजेन् थोःम्मारे़ लागि लिबोङ् ये़न् के़देसुम्माङ् के़वयि, कल्ले़चोगुल्ले़ थिक्यान् कुदङ्बा तङ्बे थिक्, लिबोङ् तङ्बे थारिक् खिनिॽ फे़न्याःम्बक्किल्ले़ कुले़क्वा तुक्खे च्ये़म्मे़ॽ, हे़क्क्याङ् आङ्गाॽ खिनिॽ निङ्मि पोङ्ङाल्ले़ थे पोङ्ॽ खे़न् खिनिॽ निङ्वाॽ के़घोसुम्ॽ॥’ 35 कन् के़बाःप्पे़न् आङ्गाॽ यहवे दाङ्बाआ, हे़क्क्याङ् आङ्गाॽ आदक्ले़ङ्वाओ के़जुम्बा कन् कुॽइगे़भे़म्बा सङ्जुम्भोःन् आङ्गाॽ अक्खेए मे़त्तुङ्ॽ॥ आम्भा कन् मुरे़क् खारे़क् थेआङ् के़होप्पादे़न्नो मे़सिआङ् मे़माःत्॥” 36 मोसाःल्ले़ लाजेन् थोःम्मारे़ लागि पाङ्घुसिल्ले़ मे़नुःक्खे़ मे़भे़रे़ल्ले़ ताप्फे़ःम्बा इङ्घङ् मे़भे़त्तु हे़क्क्याङ् के़रे़क् सङ्जुम्भोःन् मोसाःल्ले़ कुदक्ले़ङ्वाओ मे़बारे़र मे़याःन्दुसिआङ् वये़, 37 खे़न् ताप्फे़ःम्बा इङ्घङ् के़भे़प्पा मनाहाॽ यहवे दाङ्बे़ल्ले़ कुदगि माङ्दुक्मे़ल्ले़ मे़स्ये़॥ 38 लाजेॽ थोःम्से़ के़बेःक्पा मनाहाॽओ नुनरे़ कुस्सा यहोसुन् नु यपुन्नेरे़ कुस्सा काले़बे़न्लक् कुहिङ्वे़त् याःक्ते़सि॥ 39 आल्ल मोसाःल्ले़ के़रे़क् इस्राइलिहाॽ कन् पाःन्निन् चे़क्तुसिल्ले़ मनाहाॽ साॽरिक् मे़रिङ् मे़धक्ते़आङ् हाःप्मा मे़हेःक्ते़॥ 40 खे़ङ्हाॽ आन्देन् तानाम्सा मे़बोगे़आङ् अक्खे मे़लॽरे़र कोःक्मा फाङ्जङ्बा ते़ङ्गप् ले़प्माङ् थोःक्सिङ्मा मे़हेःक्ते़, “ओमे़त्ते़म्मे़ॽ, आनिॽ कप्मोलाम् आल्ल यहवे दाङ्बे़ल्ले़ माङ्हुप् चोगुबादे़न्नो थोःक्कासिआङ् पेगि, थेआङ्भे़ल्ले़ आनिॽग लायो आजोगुम्माङ् आवाॽ॥” 41 कर मोसाःल्ले़ मे़त्तुसि, “खिनिॽ थेआङ् यहवे दाङ्बे़ल्ले़ कुइङ्जाङ्ङिन् के़भेःन्दुम्बाबे? कन् कुलिङ्दो मे़गे़त्ने़न्॥ 42 खिनिॽ थो मे़धोःक्कासिम्मिन्ने़ॽ, मेःन्ने़भग्र निङ्मिहाॽरे़ खिनिॽ के़म्नाःन्दिॽ, थेआङ्भे़ल्ले़ यहवे दाङ्बान् खिनिॽ लुम्मो होप्॥ 43 खे़प्मो अमाले़किहाॽ नु कनानिहाॽ खिनिॽनु मे़धक्, हे़क्क्याङ् खिनिॽ खे़ङ्हाॽलाम् हारि के़द्ये़ॽइॽ॥ यहवे दाङ्बान् खिनिॽ तिम्मा नाःप्मा के़ले़रुम्॥ कल्ले़चोगुल्ले़ यहवे दाङ्बे़न् खिनिॽनु होप्, कर ताभेलाम् खिनिॽ के़स्ये़ॽइरो॥” 44 हे़क्केसाङ् पाःन्ने मे़ङ्घे़म्मे खे़ङ्हाॽ कोःक्मा फाङ्जङ् ते़ङ्गप् ले़प्माङ् तगि मे़धोःक्सिङ्॥ कर यहवे दाङ्बे़ल्ले़ कुमाङ्हुप् सन्दोक्किन् नु मोसान् साःङ्गाहिम्हाॽओलाम् मे़लःन्दे़न्॥ 45 खे़ब्याङ् खे़न् कोःक्माओ के़युङ्बा अमाले़किहाॽ नु कनानिहाॽ यो मे़धासिङ् मे़ये़आङ् खे़ङ्हाॽ होर्मा थारिक्के मे़धगुसिर हे़क्क्याङ् मे़नाःत्तुसिर मे़भे़त्तुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.