खानिःत् 13 - लिम्बुथोःम्जिबाहाॽ ( साम्यो इङ् १:१९-३३ ) 1 यहवे दाङ्बे़ल्ले़ मोसान् मे़त्तु, 2 “खे़ने़ॽ कनान लाजेॽओ थोःम्जिबाहाॽ पाङ्घे़से़ॽ॥ आङ्गाॽ खे़न् लाजेन् इस्राइलिहाॽ पिरुङ्सिङ्ॽ॥ आप्फेक् आप्फेक् खुन्छिॽ थाःक्कोलाम् लाम्लोबा थिक्थिक् पाङ्घे़से़ॽ॥” 3 कल्ले़चोगुल्ले़ यहवे दाङ्बे़ल्ले़ कुइङ्जाङ् कुइसिक् पारानबा मुरे़क् खारे़क् थेआङ् के़होःप्पादे़न्नोलाम् मोसाःल्ले़ खे़ङ्हाॽ पाङ्घुदेसुसि॥ खे़ङ्हाॽ के़रे़क् इस्राइलिहाॽरे़ खुन्छिॽ लाम्लोबा मे़वये़॥ 4 खे़ङ्हाॽरे़ खुन्छिॽ मि ङ् हाबा कन्हाॽए वये़— रूबे़नरे़ कुधाःक्लाम् जक्कुररे़ कुस्सा सम्मुअ, 5 सिमियोनरे़ कुधाःक्लाम् होरिरे़ कुस्सा साफात, 6 यहुदारे़ कुधाःक्कोलाम् यपुन्नेरे़ कुस्सा कालेब, 7 इस्साखाररे़ कुधाःक्लाम् युसुफरे़ कुस्सा यिगाल, 8 इफ्राइमरे़ कुधाःक्लाम् नुनरे़ कुस्सा होसिया, 9 बेन्यामिनरे़ कुधाःक्कोलाम् रफुरे़ कुस्सा पलति, 10 जबलुनरे़ कुधाःक्कोलाम् सोदिरे़ कुस्सा गद्दिएल, 11 युसुफरे़ कुधाःक्कोलाम् इग्र मनस्सेरे़ कुधाःक्कोलाम् सुसिरे़ कुस्सा गेद्दि, 12 दानरे़ कुधाःक्कोलाम् गमल्लिरे़ कुस्सा अम्मिएल, 13 आसेररे़ कुधाःक्कोलाम् मिखाएलरे़ कुस्सा सतुर, 14 नप्तालिरे़ कुधाःक्कोलाम् वोफ्सिरे़ कुस्सा नहबि, 15 गादरे़ कुधाःक्लाम् माकिरे़ कुस्सा गुएल॥ 16 लाजेॽओबा सिबिॽ पाःन्हाॽ कुसिङ् निःप्मारे़ लागि मोसाःल्ले़ पाङ्घुसिबा मनाहाॽरे़ खुन्छिॽ मिङ् आम्भा कन्हाॽएरो॥ (मोसाःल्ले़ नुनरे़ कुस्सा होसियान् यहोसु मिङ् वाःत्तु॥) 17 मोसाःल्ले़ खे़ङ्हाॽ कनान लाजेन् थोःम्मारे़ लागि पाङ्घुसिआङ् खुने़ॽ खे़ङ्हाॽ अक्खे मे़त्तुसि, “खिनिॽ कप्मोलाम् थाआसिम्मे़ॽआङ् नेगेव मे़प्मनाबा लाङ्गे़त् ले़प्माङ्बा ते़ङ्गप्पोलाम् कोःक्मा पिसाङ् पेगे़म्मे़ॽ, 18 हे़क्क्याङ् लाजेन् आक्तङ्बा चोक्, खे़प्मो के़युङ्बा मनाहाॽ आक्ख्यारिक् के़धुम्बा मे़जोःक्पि इ मे़म्धुम्मनाबा मे़जोःक्पि, यरिक् मे़वाॽबि इ सुःल्लिक् मे़वाॽबि खे़न् पाःन्निन् निङ्वाॽ खोसे़म्मे़ॽ॥ 19 खे़ङ्हाॽ मे़युङ्बा लाजेन् नुबा चोःक्पि इ ताप्फे़ःम्बा चोःक्पि, आक्तङ्बा चोक्, हे़क्क्याङ् खे़ङ्हाॽ साःङ्गाहिम्हाॽओ मे़युङ्बि इ यक्को मे़युङ्बि, आक्तङ्बा ये़क्यक्को मे़युङ्ॽ? 20 लाजेॽ सिङ्बुङ्ङिन् आक्तङ्बा चोक्, चा के़नुॽबा चोःक्पि मे़न्नुॽमनाबा चोःक्पि, खे़प्मो ताम्भुङ् ने़बि मे़ने़ने़म्बि खे़न् ओमे़त्ते़म्मे़ॽ॥ हाङ्हाङ् लॽरे़म्मे़ॽ, हे़क्क्याङ् खे़प्मोबा कुभा सिङ्सेॽहाॽ फे़त्ते़म्मे़ॽ॥” खे़न् ये़म्मो के़रे़क्नुःल्ले़ तगि चे़ल्ले़क्सेॽ तुम्मा याक्वा वये़॥ 21 कल्ले़चोगुल्ले़ खे़ङ्हाॽ थाम्माङ् थो मे़धोःक्सिङ् मे़बे हे़क्क्याङ् जिनबा मुरे़क् खारे़क् थेआङ् के़होःप्पादे़न्नोलाम् ले़बो-हमात ले़प्माङ्बा रहोब थारिक् खे़न् लाजेन् मे़धोःप्सु॥ 22 खे़ङ्हाॽ नेगेबलाम् मे़धोःक्सिङ्ङाङ् हे़ब्रानओ मे़गे़रे़, खे़प्मो अनाकरे़ कुमुॽइदाङ्सा अहिमन, सेसै नु तल्मैन् मे़युङे़॥ हे़ब्रोने़ङ्ग मिस्रबा सोअन ये़क्यक्के़न्नुःल्ले़ तङ्बे नुसि तगि चुक्ते़चुरे़आङ् ने़स्से़॥ 23 खे़न् एगाङ् खे़ङ्हाॽ एस्कोलबा ने़ने़बादे़न्नो मे़बे, हे़क्क्याङ् खे़प्मोलाम् चे़ल्ले़क्सेल्ले़ कुबोराक्कोबा लत्छा कुबजाधिक् मे़ज्ये़प्तुआङ् लत्छा सिङ्लःङ्साओ मे़दिःक्खु खे़ब्याङ् ने़प्फु मनारे़ पक्खे़छुआङ् फे़त्ते़छु॥ खे़ङ्हाॽरे़ फुॽले़ॽसेॽ नु पःत्छेॽआङ् मे़भे़त्तु॥ 24 इस्राइलिहाॽरे़ खे़प्मोलाम् खे़न् चे़ल्ले़क्सेॽइल्ले़ कुबजान् मे़ज्ये़प्तुबाल्ले़ चोगुल्ले़ खे़न् ते़न्निल्ले़ कुमिङ्ङिन् एस्कलोन ने़ने़बादे़न् मे़मे़त्तुबारो॥ 25 लिबोङ् ये़न् के़रे़बा कुनुप्मो खे़न् लाजेन् मे़धोःप्सु मे़सुरुआङ् खे़ङ्हाॽ मे़नुःक्खे़॥ थोःम्जिबा पाःन्हाॽ मे़जे़क्खु 26 खे़ङ्हाॽ मे़नुःक्खे़आङ् पारानबा मुरे़क् खारे़क् थेआङ् के़होःप्पादे़न् कादेसओ मोसा, हारुन नु इस्राइलबा के़रे़क् सङ्जुम्भोओ मे़द्ये़, हे़क्क्याङ् काक् सङ्जुम्भोःन् के़रे़क् पाःन्हाॽ मे़जे़क्तुसि, खे़ब्याङ् खे़न् लाजेॽओबा सिङ्सेॽहाॽ खे़ङ्हाॽ ओःन्मे़धाक्तुसि॥ 27 खे़ङ्हाॽरे़ मोसान् अक्खे मे़मे़त्तु, “खे़ने़ॽ याप्मि के़बाङ्घे़बादे़न्नो आनिगे के़रिगे़॥ से़क्खाए खे़न् लाजेॽओ पित्नु नु सक्वाघु कुङ्लत्छ, हे़क्क्याङ् खे़प्मो के़धोःक्पा सिङ्सेॽहाॽ हाबा कन्लो॥ 28 कर खे़प्मो के़युङ्बा मनाहाॽ साॽरिक् के़धुम्बा मे़जोःक्लत्छ खम्भ्याङ् ये़क्यक्हाॽ लुङ्धाक्किल्ले़ कब्रिङ् मे़भाक्तुबा नु चाॽरिक् यम्बयम्बा नेरत्छ॥ खे़न्नुःल्ले़ वेॽ आनिगे खे़प्मो अनाकरे़ कुस्साहाॽआङ् निसुम्सिम्बे़॥ 29 नेगेब मे़प्मनाबा लाङ्गे़त् पिसाङ्बा ते़ङ्गप्पो अमाले़किहाॽ, हे़क्क्याङ् कोःक्मा फाङ्जङ्बा ते़ङ्गप्पो हित्ति, यबुसि नु एमोरिहाॽ खे़ब्याङ् वरःङ्ङिल्ले़ कुबेसाङ् नु यर्दन वहःङ्ङिल्ले़ कुयाओ कनानिहाॽ मे़युङ्लत्छ॥” 30 खे़ब्याङ् कालेबरे़ मोसाःल्ले़ कुदगि मनाहाॽ स्वाःत् मे़युङे़र याःन्दुसिआङ् मे़त्तुसि, “आनिॽ खिमो खे़प्मो पेगिआङ् खे़न् लाजेन् हुक्काप् चोगुम्ॽ, थेआङ्भे़ल्ले़ आनिॽ खे़न् से़क्खासाङ् नाःम्मा आसुक्तुम्ॽ॥” 31 कर खुने़ॽनु के़बेःक्पा मनाहाॽरे़ मे़बाःत्तु, “खे़न् मनाहाॽनु थक्से़ पेःक्मा आनिॽ आन्छुक्तुम्मिन्, थेआङ्भे़ल्ले़ खे़ङ्हाॽ आनिॽनुःल्ले़ पधुम् के़धुम्बा मे़जोक्॥” 32 लाजेॽ थोःम्से़ के़बेःक्पाहाॽरे़ ताप्फे़ःम्बा इङ्घङ् मे़जे़क्तुसिआङ् खे़ङ्हाॽरे़ इस्राइलिहाॽ मे़मे़त्तुसि, “आनिगे लाजेॽ थोःम्से़ पेगिगे़आङ् नुःक्खिगे़बा लाजेःल्ले़ग खे़प्मो के़युङ्बा आप्फेक् कुमनाहाॽ लरुदेसुसिबारत्छ, हे़क्क्याङ् आनिगे खे़प्मो निसुम्सिम्बे़बा मनाहाॽग आजाजाबा होरु हे़क्तङ्बा मे़जोःक्ले़त्छ॥ 33 खे़प्मो आनिगे नेफिलिम होरुहाॽ निसुम्सिम्बे़, खे़ङ्हाॽग अनाकरे़ कुधिन्दाङ् सायोबोरासिरे़त्छ॥ खे़ङ्हाॽरे़ खुन्छिॽ पेसाङ् आनिगे आप्फेक्क प्याःत् हे़क्तङ्बा निआसिगे़॥ खे़ङ्हाॽरे़ आनिगे मे़निसिगे़ल्ले़ हे़क्तङ्बाए निधाबिगे़रो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.