खानिःत् 12 - लिम्बुमिरियम नु हारुनरे़ मोसान् अत्ते़सु 1 कुस लाजेॽ के़युङ्मा मोसाःल्ले़ कुमेत् कुसिःल्ले़ चोगुल्ले़ मिरियम नु हारुने़न् मोसाःल्ले़ कुदक्ले़ङ्वाओ पाःप्मा हेःक्ते़सि, थेआङ्भे़ल्ले़ मोसाःल्ले़ कुस लाजेॽबा मे़न्छुमा थिक् मेःत् तारुआङ् वये़॥ 2 खे़न् ने़प्माङ्ले़ पाःत्ते़छु, “थे यहवे दाङ्बान् मोसाःन्लाम्बारक् पारे़आङ् वाॽबि? थे खुने़ॽ आन्छिॽलाम्माङ् मे़बारे़न्नाङ् मे़वाॽने़म्बि?” हे़क्क्याङ् यहवे दाङ्बे़ल्ले़ कन् पाःन्निन् खे़प्सु॥ 3 मोसान् इक्सादिङ् खाम्बेःक्मो के़रे़क्नुःल्ले़ नःम्नःम्बा मना वये़॥ 4 यहवे दाङ्बे़ल्ले़ खिमो मोसाःन्, हारुने़न् नु मिरियम्मिन् मे़त्तुसि, “खिनिॽ सुम्ब्राङ् तुम्मादे़न् साःङ्गाहिम्मो त्ये़म्मे़ॽ॥” हे़क्क्याङ् खे़ङ्हाॽ सुम्ब्राङ् मे़द्ये़॥ 5 खे़ब्याङ् यहवे दाङ्बान् खाॽमिःप्पा सित्लाङ्ङो ये़ हे़क्क्याङ् तुम्मादे़न् साःङ्गाहिम् लाःप्मादे़न्नो फन्छिङ्ङाङ् हारुने़न् नु मिरियम्मिन् उःत्तुसि॥ आल्ल खे़न् ने़प्माङ् तगि त्ये़सि, 6 खे़ब्याङ् खुने़ॽ मे़त्तुसि, “आङ्गाॽ आबाःन्निन् खे़न्छिॽ खे़प्से़त्छे़ॽओ— “खिनिॽ लुम्मो माङ्निङ्वाॽपान् के़बाःप्पे़न् वाॽइल्ले़, खे़न् मनाःन्नु आङ्गाॽ यहवे दाङ्बे़न् सुफोओ ओःन्धाक्सिङ्ङारो, से़प्माङ्मो आङ्गाॽ खे़न्नु पाःत्तारो॥ 7 कर आङ्गाॽ आसे़वारोबा मोसाःन्नुग आङ्गाॽ हे़क्के मे़जोःक्कान्लो॥ खुने़ॽग के़रे़क् आहिम्सयङ्ङो नसाःन्साबा चोक्लो॥ 8 आङ्गाॽ खे़न्नु स्वाःत्ताङ् ताॽदिओ मेःन्लो, कर नारा तुम्दुम्बा नुरिक्काङ् ताॽजे़ङ्ङारो, हे़क्क्याङ् खे़ल्ले़ आङ्गाॽ आनारान् ओमे़त्तुरो॥ कल्ले़चोगुल्ले़ आङ्गाॽ आसे़वारोबा मोसान् चे़क्या इङ्दो मे़प्मा थेआङ् के़ङ्गिसे़त्छिन्बाबे?” 9 हे़क्क्याङ् खे़ङ्हाॽरे़ खुन्छिॽ तक्ले़ङ्वाओ यहवे दाङ्बे़ल्ले़ साॽरिक् कुसिक् पोगे़, खम्भ्याङ् खुने़ॽ खे़प्मोनु ह्याप् थासिङ्ङाङ् पेघे़रे़॥ 10 सेसे साःङ्गाहिम्मिल्ले़ कुसम्धाङ्लाम् खाॽमिःत्ते़न् इःङ्सिङ्ङे़ल्ले़ मिरियम्मिन् आलिःक्लिःक्पा होरिक्पा तुक्मे़ल्ले़ तरुआङ् नाःङ् हे़क्के फुत्त्रिःङ्ग्याःप्मा पोःक्खे़चुरे़आङ् वये़॥ हारुनरे़ मिरियम्मिन् ओमे़त्तुल्ले़ खे़न् होरिक्पा तुक्मे़ल्ले़ तरुबा निसु॥ 11 हारुनरे़ मोसान् मे़त्तु, “आदाङ्बे, आङ्गाॽ पेलि फाक्ने़, आन्छिगे अदङ् याःम्बक् चोगे़त्छुगे़ हे़क्क्याङ् लायो चोगे़त्छुगे़आङ् वाॽ, कर खे़न्लाम्बाबा खुम्दिङ्ङिन् आन्छिगे तुम्मा मे़बोङ्ने़न्ल॥ 12 कुम्मारे़ कुसाप्पोःक्कोलाम् लःन्दे़ल्ले़सा खे़न् कुभ्रे़ःङ् किरे़आङ् स्ये़बा हे़क्तङ्बा पोङ्ल मे़याःन्दे़न्ने़ॽ॥” 13 खे़ब्याङ् मोसाःल्ले़ अक्खे पाःत्तुआङ् यहवे दाङ्बान् पेलि फाक्तु, “यहवे दाङ्बाए, आङ्गाॽ चुङ्जिगे़न् नःम्नःम्माङ् पेलि फाक्ने़! खे़न् वेःन्देॽओ॥” 14 खे़ब्याङ् यहवे दाङ्बे़ल्ले़ मोसान् मे़त्तु, “खे़न् खुने़ॽ कुम्बारे़ कुनाराओ थ्याःत् थोःक्तुबा हे़क्केःल्ले़, थे खे़न् ये़त्नाम् थारिक् कुना मे़ध्ये़ने़म्बाबि? खे़न् ये़त्नाम् थारिक् साःङ्गाहिम्हाॽलाम् लाःक्कात् साक्ते़ युक्खे़ॽ, खे़न् एगाङ्लक् खुने़ॽ सिगाङ् तारे़ॽ॥” 15 खे़ब्याङ् मिरियम्मिन् ये़त्नाम् थे़म्बा साःङ्गाहिम्हाॽलाम् लाःक्कात् मे़साक्तु मे़युक्खु, हे़क्क्याङ् मिरियम्मिन् सिगाङ् मे़न्धे़क्के थारिक् मनाहाॽआङ् तगि मे़म्बेने़न्॥ 16 खे़न् एगाङ् हसेरोतलाम् तगि मे़बेआङ् पारानबा मुरे़क् खारे़क् थेआङ् के़होप्पादे़न्नो खे़ङ्हाॽरे़ साःङ्गाहिम्हाॽ मे़घिङ्घुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.