खानिःत् 11 - लिम्बुइस्राइलिहाॽ मने़मे़धिक्ते़ 1 कन् ये़म्मो यहवे दाङ्बे़ल्ले़ खे़प्सुर थारिक् खे़न् मनाहाॽ खुन्छिॽ तुक्खेःल्ले़ कुयाःम्बेओ मने़धिक्मा मे़हेःक्ते़॥ आल्ल यहवे दाङ्बे़ल्ले़ कन् खे़प्सु, खे़ब्याङ् खुने़ॽ कुसाक्के़न्निल्ले़ मि पोःक्खे़, हे़क्क्याङ् यहवे दाङ्बालाम् के़लःम्बा मिन् हाॽरुआङ् साःङ्गाहिम्हाॽरे़ कुया कुदिङ्हाॽ खाप्पुथ्यःङ् पोःक्खे़॥ 2 हे़क्क्याङ् मनाहाॽ मोसाओ मे़द्ये़आङ् मे़रिङ् मे़धक्ते़॥ खे़ब्याङ् मोसाःल्ले़ यहवे दाङ्बान् पेलि फाक्तु, हे़क्क्याङ् मिन् स्ये़॥ 3 कल्ले़चोगुल्ले़ खे़न् ते़न्निल्ले़ कुमिङ् तबेरा मे़मे़त्तु, थेआङ्भे़ल्ले़ यहवे दाङ्बाओलाम् के़लःम्बा मिन् खे़ङ्हाॽरे़ खुन्छिॽ लुम्मो तिरे़आङ् वये़॥ 4 हे़क्क्याङ् खे़ङ्हाॽनु के़वाॽबा खे़जे़क् के़जोःक्पा मनासुम्हाॽ साॽरिक् कुजाघ्या मे़बोःक्खे़, खे़ब्याङ् इस्राइलिहाॽ याम्मो मे़हाबे़आङ् अक्खे लॽमा मे़हेःक्ते़, “आनिगे सा चामा खोसुम्बे़ल्ले़ नुबा पोःक्खे़बामे़न्! 5 मिस्रओ आनिगे हाबा चामा खोसुम्बे़बा ङासान्—हे़क्क्याङ् खाम्पइत्, कक्पा, छे़ःप्पि नु माक्खोॽ कुजःक्हाॽ निङ्वाॽसुम् लॽरिगे़॥ 6 कर कन् मन्नःन्नुःल्ले़ वेॽ थेआङ् कुजा निमे़दे़त्ने़न्॥ आल्लग आनिगे चामाआङ् मे़जाम्बे़न्॥” 7 मन्न मे़प्मनाबे़न् सःप्फाःल्ले़ कुसेॽ हे़क्तङ्बा चोगे़, हे़क्क्याङ् ओमे़प्मे़ल्ले़ आःङ्घिक्वा कुइसिक् निदे़त्ते़॥ 8 मनाहाॽ मे़बेआङ् खे़न् मे़भुक्खु, लुङ्सुम्मो मे़युःत्तुआङ् इग्र सुम्बाङ्ङो मे़हागु, हे़क्क्याङ् खप्प्याओ मे़धोःक्तुआङ् हाःक्वा मे़जोगु॥ खे़न् चैतुन निःङ्गेॽओ थोःक्मनाबा कुजा हे़क्के कुजानुरे़॥ 9 साःङ्गाहिम्हाॽओ से़न्दिक् सेःक्वा थ्ये़ःल्ले़ मन्नःन्नाङ् सोरिक् थासु॥ 10 खुन्छिॽ आप्फेक् आप्फेक् साःङ्गाहिम्मोबा लाम्धेःप्पो मे़ये़म्सिङ्ङाङ् के़रे़क् हिम्सयङ्बा मनाहाॽ मे़हाबे़बा मोसाःल्ले़ खे़प्सु॥ यहवे दाङ्बान् साॽरिक् कुसिक् पोगे़, हे़क्क्याङ् मोसान् निङ्वाॽ तुक्मो थ्ये़॥ 11 मोसाःल्ले़ यहवे दाङ्बान् मे़त्तु, “आदाङ्बारे़ थेआङ् के़से़वारोबान् कम्भलॽरिक् तुक्खे के़जाःत्तुबाबे? हे़क्क्याङ् खे़ने़ॽ थेआङ् आङ्गाॽनु के़निङ्वाॽ मे़दाने़म्बाबे? खे़ब्याङ् आदाङ्बारे़ थेआङ् कन् मनाहाॽरे़ खुन्छिॽ कक्किन् के़गुःत्ताबाबे? 12 थे आङ्गाॽ कन् मनाहाॽ आसाप्पोःक्को कुयुङ्सिङ्ङाङ् सावाःन्दुङ्सिङ्बाबि? नुयाम्मोबा अङे़ःक्वान् नुगे़धुक्माल्ले़ पक्खुबा हे़क्के कन्हाॽ पङ्मासिआङ् तेॽमासि के़याःन्नाबाबि? 13 कन् के़रे़क् मनाहाॽरे़ खुन्छिॽ चामा सान् आङ्गाॽ आत्तिनु खोसुङ्ङाङ् तारुङ्बे? खे़ङ्हाॽ आङ्गाॽओ मे़दाआङ् अक्खेलॽरिक् मे़हाःप्, ‘आनिगे सा चामा आबिरे़ॽ॥’ 14 आङ्गाॽ एःक् कन् मनाहाॽरे़ खुन्छिॽ कक्किन् कुमा मे़सुक्कान्, थेआङ्भे़ल्ले़ कन् कक्किन् आङ्गाॽ आलागि साॽरिक् के़लिःप्पा चोक्॥ 15 आदाङ्बारे़ आङ्गाॽ अक्खेए के़मे़त्ता, हे़क्क्याङ् खे़ने़ॽ आङ्गाॽ लुङ्माॽ के़दुक्काने़भग्र, आङ्गाॽ पेलि फाक्ने़, परुमाल्ले़ आङ्गाॽ से़राङ्ङे़ॽ, खे़ब्याङ् आङ्गाॽ आमे़क्मान् आङ्गाॽ आबाङे ओमे़प्मा मे़बोङ्ने़न्ल॥” 16 खे़ब्याङ् यहवे दाङ्बे़ल्ले़ मोसान् मे़त्तु, “इस्राइलिहाॽओ नुबोङ् लाम्लोबाहाॽ फुक्खे़से़ॽ, खे़ङ्हाॽ मनाहाॽओ लाम्लोबा नु युक्साबा मे़वाॽ के़लॽबा खे़ने़ॽ के़निसुॽ, हे़क्क्याङ् खे़ङ्हाॽ तुम्मादे़न् साःङ्गाहिम्मो आङ्गाॽओ तारे़से़ॽ, खे़ब्याङ् खे़ङ्हाॽ खे़प्मो खे़ने़ॽनु सोरिक् मे़ये़प्ल॥ 17 आङ्गाॽ यो युआआङ् खे़ने़ॽनु ताॽजे़ङ्ङा॥ खे़ने़ॽ के़सम्धाङ् के़वाॽबा याम्साम्लाम् कुभा याम्साम् याङ्सिङ्ङाआङ् खे़ङ्हाॽओ थे़क्तुङ् पिरुङ्सिङ्ॽ॥ खे़ङ्हाॽरे़ खे़ने़ॽनु सोसोरिक् खे़न् मनाहाॽरे़ खुन्छिॽ कक्किन् मे़गुयुॽ, हे़क्क्याङ् खे़ने़ॽरक् एःक् कुमा मे़बोङ्ने़न्ल॥ 18 “खे़ने़ॽ मनाहाॽ मे़त्ते़से़ॽ—‘खिनिॽ सुत्थो चोःक्कासिम्मे़ॽ थेआङ्भे़ल्ले़ ताःन्दिक् सा चामा के़घोसुम्ॽ॥ खिनिॽ यहवे दाङ्बे़ल्ले़ कुने़क्खोॽओ अक्खे के़लॽरिआङ् के़हाबिआङ् के़वयिॽ, “आनिगे सा तम्मा खोसुम्बे़ल्ले़गमे़न् नुरे़बा वये़! आनिगे लागि मिस्र लाजेःन्ने नुबा चोगे़॥” आल्ल यहवे दाङ्बे़ल्ले़ खिनिॽ सा के़बिरिॽ, हे़क्क्याङ् खिनिॽ खे़न् के़जाम्ॽ॥ 19 थिक्यान् नियाःन्, लियान् ङासि ये़न्, थिबोङ् इग्र निबोङ् ये़न्लक् मेःन्, 20 कर ने़बोओलाम्बा लःन्नाङ् निङ्सत्ले़ॽ ले़ॽरुर थारिक् लाधिक् खाराक् खिनिॽ खे़न् के़जाम्ॽ॥ थेआङ्भे़ल्ले़ खिनिॽ आप्फेक् लुम्मो के़वाॽबा यहवे दाङ्बान् के़नाॽरुम्माङ् खुने़ॽए कुदगि अक्खेलॽरिक् के़हाबिआङ् के़वयिॽ, “आनिगे थेआङ् मिस्र लाजेन् ले़रुम्बे़आङ् फे़रिगे़बाबे?”’” 21 मोसाःल्ले़ यहवे दाङ्बे़न् मे़त्तु, “आङ्गाॽ कॽयो ६,००,००० मनाहाॽ तिःक्तुङ्सिङ्ङाङ् लाङ्घेःक्कार पत्ता हे़क्क्याङ् ‘खे़ङ्हाॽ लाधिक् थारिक् के़योबा सा पिरुङ्सिङ् फाॽआङ् खे़ने़ॽ के़बाःत्तुॽ॥’ 22 थे कन् के़रे़क् मे़ल्लुक् मे़ःन्दाक् लुप्हाॽ नु पित्थक्साहाॽ से़प्मासिल्ले़ कम्भ्यारिक् मनाहाॽ योरुसिबि? इग्र वरःङ्ङो के़याक्याक्पा के़रे़क् ङाहाॽ ते़म्मासिसाङ् खे़ङ्हाॽ ते़क्तुसिबि?” 23 यहवे दाङ्बे़ल्ले़ मोसान् मे़त्तु, “थे आङ्गाॽ यहवे दाङ्बे़ल्ले़ आमुक्साम्मिन् सुःल्लिक् पोःक्खे़आङ् वाॽबि? आल्ल आङ्गाॽ खे़ने़ॽ मे़त्ने़बा पाःन्निन् के़त्ति मे़गे़त्ने़म्बि खे़न् खे़ने़ॽ के़निसुॽ॥” 24 कल्ले़चोगुल्ले़ मोसान् लाःक्कात् पेआङ् यहवे दाङ्बे़ल्ले़ पाःत्तुबा पाःन्निन् मनाहाॽ मे़त्तुसि॥ खुने़ॽ लाम्लोबाहाॽलाम् नुबोङ् मनाहाॽ सेसे साःङ्गाहिम् कब्रिङ् पिसाङ् ये़प्सुसि॥ 25 खे़ब्याङ् यहवे दाङ्बान् खाॽमिःत्तो यो ये़आङ् खुने़ॽनु ताॽजे़क्खे़, हे़क्क्याङ् खुने़ॽनु के़वाॽबा याम्साम्मोलाम् कुभा याङ्सिङ्ङाङ् खे़न् नुबोङ् लाम्लोबाहाॽओ याक्तु पिरुसि॥ हे़क्क्याङ् खे़ङ्हाॽओ याम्साम्मिन् ये़आङ् खे़ङ्हाॽ माङ्निङ्वाॽपान् मे़बारे़॥ कर ताःन्दि ताःन्दिग खे़ङ्हाॽ हे़क्के पाःप्मा मे़नाॽरे़॥ 26 खे़न् साःङ्गाहिम्हाॽओ एल्दाद नु मेदाद मिङ् के़वाःप्पा ने़न्छि मना वये़त्छि॥ खे़न् ने़प्फुरे़ खुन्छिॽ मिङ्ङाङ् मे़साप्तुआङ् पत्छे़, कर खे़न् ने़प्फु मनाहाॽ सेसे साःङ्गाहिम्मो मे़म्बेःक्के वये़त्छि॥ कर याम्साम्मिन् खुन्छिॽ सम्धाङ्ङाङ् ये़, हे़क्क्याङ् साःङ्गाहिम्हाॽओए खुन्छिॽ माङ्निङ्वाॽपान् पाःत्ते़छु॥ 27 खे़ब्याङ् लत्छा थाङ्बे़न् थिक् लोःक्ते़ पेआङ् मोसान् मे़त्तु, “एल्दाद नु मेदादरे़ साःङ्गाहिम्हाॽओ माङ्निङ्वाॽपान् पाःत्छुर याक्सि॥” 28 नालिगे़न् थाङ्बे़न् वये़आङ्धोबा मोसारे़ कुभाॽबाङ्, नुनरे़ कुस्सा यहोसुःल्ले़ मोसान् मे़त्तु, “आदाङ्बे, खे़ङ्हाॽ माङ्निङ्वाॽपान् पाःप्मा मे़भाःक्ते़से़न्ने़ॽ॥” 29 कर मोसाःल्ले़ खे़न् मे़त्तु, “थे आङ्गाॽ आलागि खे़ने़ॽ नाहे़म्ब्रिःक्पा के़बोःक्खे़बि? यहवे दाङ्बे़ल्ले़ खुने़ॽ कुयाम्साम्मिन् आप्फेक् आप्फेक् कुमनाहाॽओ केःत्तु पिरुसिआङ् खे़ङ्हाॽ के़रे़क् माङ्निङ्वाॽपान् के़बाःप्पा मे़बोङ्ङिल्ले़ग साॽरिक् नुबा पोङ्बा वये़मे़न्!” 30 खे़ब्याङ् मोसान् नु इस्राइलबा साम्योसिक्साम्बाहाॽ साःङ्गाहिम्मो मे़नुःक्खे़रो॥ इस्राइलिहाॽरे़ मुःत्लुङ्गेॽ पुहाॽ मे़जसि 31 आल्ल यहवे दाङ्बे़ल्ले़ फोःक्खु फे़न्छुबा सुरित् केजङ्ङिल्ले़ वरःङ्ङोलाम् मुःत्लुङ्गेॽ पुहाॽ फे़सु तारुसि, हे़क्क्याङ् साःङ्गाहिम् कब्रिङ् पिसाङ् थिक्यान् थारिक्पा लाम् कुले़ःम् खाम्बाङ्ङो हुक्सिक् ने़त्छि यारिक् कुसे़त् कुसे़त् खे़ङ्हाॽ मे़युङ्सिङ्॥ 32 मनाहाॽरे़ खे़ल्ले़ याःन्दिक् नाम्धाधा, से़न्दिक् नाम्दाःत्तात् नु कुदाःन्दिक्मा नाम्धाधाआङ् खे़ङ्हाॽ मे़दे़म्सुसि॥ साॽरिक् आजे़ःत्छिक्लक् के़दे़म्बाहाॽरे़आङ् १,६०० किलोनुःल्ले़ सुःल्लिक् मे़न्दे़म्सुसिन्॥ खे़ङ्हाॽरे़ खुन्छिॽ आप्फेक् लागि साःङ्गाहिम् कब्रिङ् पिसाङ् खे़ङ्हाॽ मे़घेः क्खुसि॥ 33 कर सान् खे़ङ्हाॽरे़ खुन्छिॽ हाबोॽबो पत्छे़र हे़क्क्याङ् खे़न् सान् खाम्माए मे़ङ्घोए यहवे दाङ्बे़ल्ले़ कुसाक्के़न्निन् खे़न् मनाहाॽओ चुक्ते़, खे़ब्याङ् खुने़ॽ खे़न् मनाहाॽ साॽरिक् यम्बा मिङ्देॽओ मे़ध्ये़र याःन्दुसि॥ 34 कल्ले़चोगुल्ले़ खे़न् ते़न्निल्ले़ कुमिङ् किब्रोथ-हत्तावा मे़वाःत्तु, थेआङ्भे़ल्ले़ वेॽ यरिक् साःल्ले़ लागि कुजाघ्या के़बोङ्बा मनाहाॽ हाबा खे़प्मोए खे़ङ्हाॽरे़ मे़लुप्तु मे़धसि॥ 35 किब्रोथ-हत्तावालाम् मनाहाॽ लाङ्मे़घेगे़आङ् हसेरोत ले़प्माङ् मे़धासिङ्, हे़क्क्याङ् खे़ङ्हाॽ खे़प्मो कुभा ये़म् याङ्मे़धोःक्ते़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.