खानिःत् 10 - लिम्बुयुप्पा थुत्तुरिःप्पाहाॽ 1 यहवे दाङ्बे़ल्ले़ मोसान् मे़त्तु, 2 “युप्पा थुत्तुःप्पा ने़त्छि चोगे़ॽ॥ खे़ङ्हाॽ थक्मनाआङ् चोःक्मनाबा पोङ्मा पोङ्ॽ॥ सङ्जुम्भो फुङ्मासि नु साःङ्गाहिम्हाॽओनु लाम् थामासिल्ले़ खे़न् थुत्तुरिःप्पाहाॽ मुःप्मा पोङ्ॽ॥ 3 खे़न् ने़प्मजाङ् केःम्बा इक्ला मुःप्माल्ले़ के़रे़क् सङ्जुम्भो तुम्मादे़न् साःङ्गाहिम्मोबा लाःप्मादे़न्नो खे़ने़ॽओ मे़जुम् मे़दार॥ 4 कर लत्छारक् मुःप्मे़ल्ले़ लाम्लोबाहाॽ, इग्र इस्राइलिहाॽरे़ खुन्छिॽ थाःक्लाम्लोबाहाॽ खे़ने़ॽओ मे़जुम् मे़दार॥ 5 आल्ल इङ्घङ् पिमासि ताङ्बा इक्लान् मुक्किल्ले़ नाङ्गे़न् पिसाङ् के़ने़बा साःङ्गाहिम्मोबा मनाहाॽ लाम् मे़धासिङ्ल॥ 6 आल्ल निले़ङ् इङ्घङ् पिमासि ताङ्बा इक्लान् मुक्किल्ले़ लाङ्गे़त् पिसाङ् के़ने़बा साःङ्गाहिम्मोबा मनाहाॽ लाम् मे़धाङ्सिङ्ल॥ इङ्घङ् पिमासि इक्लान् लाम् थासिङ्मारे़ लागि मिक्सेःन् पोङ्ॽ॥ 7 सङ्जुम्भो फुङ्मासि ये़म्मोआङ् केःम्बा इक्ला मुःप्मा पोङ्ॽ॥ 8 “हारुने़ल्ले़ कुस्साहाॽ, निङ्वाॽफुसाम्बाहाॽरे़ थुत्तुरिःप्पाहाॽ मे़मुःत्तुर॥ कन् खिनिॽ र खिनिॽ याङ्सिबा थाःक्हाॽरे़ लागि सदादिङ्बा थिम् पोङ्ल॥ 9 आबाङे खिनिॽ लाजेॽओ खिनिॽ सम्धाङ् युक् के़जोःक्पा निङ्मिहाॽरे़ खुन्छिॽ तक्ले़ङ्वाओ खिनिॽ ते़न्धङ् चोःक्से़ के़बेगिल्ले़ थुत्तुरिःप्पा इक्लालाम् इङ्घङ् पिरे़म्सिम्मे़ॽ॥ खे़ब्याङ् आङ्गाॽ यहवे दाङ्बा खिनिॽ निङ्वाॽफुमाङ्ङिल्ले़ आबेसाङ् खिनिॽ निङ्वाॽ इःत्निङ्ॽ, हे़क्क्याङ् खिनिॽ निङ्मिहाॽलाम् आङ्गाॽ से़ःप्निङ्ॽ॥ 10 खिनिॽ सःप्मा ये़म्मो—खिनिॽ लागि निःन्धो के़बोङ्बा तङ्नाम्हाॽ नु लादुप्पोबा तङ्नाम्हाॽओ—खिनिॽ मिधिङ्मनादेमनाबा सिदुङ्जभा नु तङ्जुम् सिधुङ्जभाहाॽ के़दोःन्दुम्मिल्ले़ खिनिॽ थुत्तुरिःप्पा मुःत्ते़म्मे़ॽ, हे़क्क्याङ् आप्फेक् खिनिॽ निङ्वाॽफुमाङ्ङिल्ले़ कुदगि खे़न् खिनिॽ लागि निङ्वाॽसोक् पोङ्ल॥ आङ्गाॽ यहवे दाङ्बा खिनिॽ निङ्वाॽफुमाङ्आरो॥” इस्राइलिहाॽरे़ साःङ्गाहिम्मिन् मे़यङु मे़देॽरु 11 निसिगेक्पा तङ्बेओबा निसिगेक्पा ला निबोङ् ये़न्नो माङ्हुप् साप्लुङ् के़याक्पा सन्दोक् के़युङ्बा सेसे साःङ्गाहिम्मिल्ले़ कुसम्धाङ् के़बप्पा खाॽमिःत्तिन् इःङ्सिङ्॥ 12 सिनैबा मुरे़क् खारे़क् थेआङ् के़होःप्पादे़न्नोलाम् इस्राइलिहाॽ मे़धासिङ्ङाङ् वेॽ वेॽ ते़न्हाॽओ मे़बे, हे़क्क्याङ् पारानबा मुरे़क् खारे़क्पा थेआङ् के़होप्पादे़न्नो खाॽमिःत्ते़न् फन्छिङ्॥ 13 के़रे़क्नुःल्ले़ तगि मोसाःन्लाम् यहवे दाङ्बे़ल्ले़ खे़ङ्हाॽ पिरुसिबा इङ्जाङ् कुइसिक् खे़ङ्हाॽरे़ लाम्दिक् चोःक्मा मे़हेःक्तु॥ 14 थिक्सिगेःक्पो यहुदारे़ कुसाःङ्गाहिम्हाॽओबा मनासुम्हाॽ खुन्छिॽ आप्फेक् आप्फेक् निसान मे़भोक्खुआङ् तगि मे़धासिङ्॥ अम्मिनादाबरे़ कुस्सा नहसोने़न् मनासुम्हाॽ लाम्गे़लोबा वये़॥ 15 सुआररे़ कुस्सा नतनेले़न् इस्साखार थाःक्हाॽ लाम्गे़लोबा वये़॥ 16 हेलोनरे़ कुस्सा एलिआबे़न् जबलुन थाःक्हाॽ लाम्गे़लोबा वये़॥ 17 खे़ब्याङ् सेसेदे़न्निन् मे़यङु, हे़क्क्याङ् खे़न् मे़बक्खुआङ् गेर्सोनिहाॽ नु मरारिहाॽ तगाङ् मे़धासिङ्॥ 18 खे़न् एगाङ् रूबे़नरे़ कुसाःङ्गाहिम्हाॽओबा मनासुम्हाॽ खुन्छिॽ आप्फेक् आप्फेक् निसान मे़बक्खुआङ् तगाङ् मे़धासिङ्॥ सदेउररे़ कुस्सा एलिसुरे़न् मनासुम्हाॽ लाम्गे़बा वये़॥ 19 सुरिसद्दैरे़ कुस्सा सलुमिएले़न् सिमियोनरे़ कुधाःक्हाॽ लाम्गे़लोबा वये़, 20 हे़क्क्याङ् दुएलरे़ कुस्सा एल्यासापे़न् गादरे़ कुधाःक्हाॽ लाम्गे़लोबा वये़॥ 21 खे़ब्याङ् कहातिहाॽ सेसेबा पाःन्हाॽ मे़बक्खुआङ् तगाङ् मे़धासिङ्॥ खे़ङ्हाॽ के़प्मा तामानुःल्ले़ तगिए सेसे साःङ्गाहिम्मे़न् फोङ्मा सुःप्मा के़बोङ्बा वये़॥ 22 खे़न् एगाङ् एफ्राइमरे़ कुसाःङ्गाहिम्हाॽओबा मनासुम्हाॽ खुन्छिॽ आप्फेक् निसान मे़भोक्खुआङ् तगि मे़धासिङ्॥ अम्मिहुदरे़ कुस्सा एलिसामाःन् मनासुम्हाॽ लाम्गे़लोबा वये़॥ 23 पदासुररे़ कुस्सा गमलिएले़न् मनस्सेरे़ कुधाःक्हाॽ लाम्गे़लोबा वये़, 24 हे़क्क्याङ् गिदेओनिरे़ कुस्सा अबिदाने़न् बेन्यामिनरे़ कुधाःक्हाॽ लाम्गे़लोबा वये़॥ 25 खे़न् एगाङ् के़रे़क्नुःल्ले़ एगाङ् के़बप्पा दानरे़ कुसाःङ्गाहिम्हाॽओबा मनासुम्हाॽरे़ खुन्छिॽ आप्फेक् निसान मे़भोःक्खु हे़क्क्याङ् के़रे़क् मनासुम्हाॽ कम्ब्राङ् मे़मे़त्तुसिर तगाङ् मे़धासिङ्॥ अम्मिसद्दैरे़ कुस्सा अहिएजेरे़न् मनासुम्हाॽ लाम्गे़लोबा वये़॥ 26 ओक्रानरे़ कुस्सा पगिएले़न् आसेररे़ कुधाःक्हाॽ लाम्गे़लोबा वये़, 27 हे़क्क्याङ् एलानरे़ कुस्सा अहिरे़न् नप्तालिरे़ कुधाःक्हाॽ लाम्गे़लोबा वये़॥ 28 खुन्छिॽ आप्फेक् आप्फेक् मनासुम्हाॽ कुइसिक् इस्राइलिहाॽ मे़धासिङ्ङिल्ले़ कम्भलॽरिक् लाङ्घेःक्मा के़बोङ्बा वये़॥ 29 हे़क्क्याङ् मोसाःल्ले़ कुन्नुःप्पा मिध्यानबा रुएलरे़ कुस्सा होबाबे़न् मे़त्तु, “यहवे दाङ्बे़ल्ले़ पिनिङ् मे़त्तिगे़बा ते़न्नो आनिगे पेगिगे़र पत्छिगे़॥ खे़ने़ॽआङ् आनिगे़नुए पेगे़ॽ, आनिगे खे़ने़ॽ नुरिक्के मे़त्तासिगे़, थेआङ्भे़ल्ले़ यहवे दाङ्बे़ल्ले़ इस्राइलिहाॽरे़ लागि नुॽमा तामा माङ्हुप् चोगुआङ् वाॽ॥” 30 कर खे़ल्ले़ मे़त्तु, “आङ्गाॽ मे़बेःक्कान्॥ आङ्गाॽ आप्फेक् आलाजेॽओ नु आप्फेक् आमनाहाॽओ नुःङ्ङा पेःक्का॥” 31 कर मोसाःल्ले़ मे़त्तु, “आङ्गाॽ पेलि फाक्ने़, आनिगे एःक् आल्ले़रे़न्ने़ॽ॥ मुरे़क् खारे़क् थेआङ् के़होप्पादे़न्नो आनिगे आत्ति आत्ति साःङ्गाहिम् चोःक्मा पोङ्ॽ खे़न् खे़ने़ॽ के़निसुॽ हे़क्क्याङ् खे़ने़ॽ आनिगे लागि लाम् ओःन्गे़धाक्पा पोङ्मा के़सुक्॥ 32 खे़ने़ॽ आनिगे़नु सोरिक् के़बेःक्ने़भग्र यहवे दाङ्बे़ल्ले़ आनिगे पिरिगे़बा नुॽमा तामान् खे़ने़ॽआङ् फःङ्ङा पिआसिगे़रो॥” इस्राइलिहाॽरे़ लाम्दिक् चोःक्मा मे़हेःक्तु 33 हे़क्क्याङ् यहवे दाङ्बे़ल्ले़ कुगोःक्माओलाम् खे़ङ्हाॽ सुम्यान् लाम्दिक् मे़जोगे़॥ यहवे दाङ्बे़ल्ले़ कुमाङ्हुप् सन्दोक् के़बङ्बाहाॽ खे़ङ्हाॽरे़ खुन्छिॽ लागि याङ्धोःक्मादे़न् कोःत्छे़ आभे़ल्ले़साङ् तगि तगि मे़बे॥ 34 खे़ङ्हाॽ साःङ्गाहिम्हाॽओलाम् मे़धासिङ्ङे़ल्ले़ यहवे दाङ्बे़ल्ले़ कुघाॽमिःत्ते़न् ले़न्दिक् खे़ङ्हाॽरे़ खुन्छिॽ सम्धाङ् पत्छे़॥ 35 आभे़ल्ले़साङ् माङ्हुप् सन्दोक्किन् तगि मे़देॽरुल्ले़, मोसाःल्ले़ अक्खे पाःत्तुरो, “यहवे दाङ्बाए, पोगे़ॽओ! खे़ने़ॽ के़निङ्मिहाॽ फुत्छिङ्ज्याङ् मे़बोङ्लरो! खे़ने़ॽ के़जिःप्पाहाॽ के़दगि के़दगि मे़घे़त्छिङ्लरो॥” 36 हे़क्क्याङ् माङ्हुप् सन्दोक्किन् मे़नाःप्सुल्ले़ खुने़ॽ अक्खे पाःत्तुरो, “यहवे दाङ्बाए, इस्राइलबा हे़न्छिङ् हे़न्छिङ् हिम्सयङ्हाॽओ खे़ने़ॽ नुःक्खे़ त्ये़ॽओ!” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.