नहेम्याह 9 - लिम्बुइस्राइलिहाॽ लायोलाम् मे़नुःङ् 1 हाबा खे़न् लाःल्ले़ निबोङ्ङाङ् लिसिगेक्पा ये़न्नो इस्राइलिहाॽ निङ्वाॽ तुक्खे चामो मे़ध्ये़आङ् सागि तेत् मे़जाक्सिङ् हे़क्क्याङ् आबाङे खुन्छिॽ थे़गेःक्पो खाम्हिःक् मे़जुःत्छिङ्ल चाने़त्तो युङ्मा फाॽआङ् मे़जुप्से़॥ 2 इस्राइलि सुवाङ्हाॽ के़रे़क् थिम्मे़न्दङ् सुवाङ्हाॽलाम्बा एःक् मे़से़न्छिङ्ल मे़वये़॥ हे़क्क्याङ् खे़ङ्हाॽ मे़ये़म्सिङ्ङाङ् आबाङे मे़जोगुबा नु खुनिॽ पाधे़बाहाॽरे़ मे़जोगुबा लायोलाम् मे़हिन्दे़॥ 3 खे़ङ्हाॽ आबाङे मे़ये़बे़बादे़न्नो मे़ये़म्सिङ् हे़क्क्याङ् कुमुक् सुम्सि थारिक् खुनिॽ यहवे दाङ्बा निङ्वाॽफुमाङ्ङिल्ले़ कुसाम्योथिम् इङ्जाङ् साप्पनिन् मे़निरु॥ खे़ब्याङ् खे़ङ्हाॽरे़ वेॽ कुमुक् सुम्सि थारिक् आबाङे खुनिॽ लायोलाम् मे़हिन्दे़र खुनिॽ यहवे दाङ्बा निङ्वाॽफुमाङ्ङिन् चक्मे़ल्लॽए साबन् मे़भन्छिङ्ङाङ् से़वा मे़मे़त्तुआङ् मे़बत्छे़॥ 4 उवा चोःक्मादे़न् नाहाङ्सेःक्को के़ये़प्पा ले़बिहाॽ—येसुआ, बानि, कादमिएल, सबन्याह, बुन्नि, सरेबियाह, बानि नु कनानिहाॽ मे़ये़म्सिङ्ङाङ् यम्बा इक्लाओ खे़ङ्हाॽरे़ खुनिॽ यहवे दाङ्बा निङ्वाॽफुमाङ्ङिन् पेलि मे़भाक्तु॥ 5 येसुअ, कादमिएल, बानि, हसबन्याह, सरेबियाह, होदियाह, सबन्याह हे़क्क्याङ् पतहियाह ले़बिहाॽरे़ मनाहाॽ मे़मे़त्तुसिरो— “ये़बे़म्मे़ॽआङ् खिनिॽ यहवे दाङ्बा निङ्वाॽफुमाङ्ङिन् कुनारा फोसे़म्मे़ॽओ! सदादिङ्ले़ लागि खुने़ॽ कुनारा फोसे़म्मे़ॽ! मनाहाॽरे़ मे़जोगुबा नाराफोमा याःम्बक्किल्ले़ खुने़ॽ पयम् यम्बा चोःक्पान् लाॽरु खे़म्दुबाग मेःन्लो, हे़क्केसाङ् के़रे़क्ले़ खुने़ॽ कुमिमिदिङ् इस्सेःङ्बा कुमिङ्ङिन् इङ्धाङ् पिरे़म्मे़ॽओ॥” लायोलाम् निङ्वाॽलोमा पेलि 6 हे़क्क्याङ् इस्राइलिहाॽरे़ अक्खेलॽरिक् पेलिगे़न् तुवा मे़जोगुरो— “निङ्वाॽफुमाङ्ङे, खे़ने़ॽरक् यहवे दाङ्बा के़वाॽरो, खे़ने़ॽ खेसे-खेःम्सिक्पाहाॽ, ताङ्साक्पा नु साङ्ग्राम्पेदाङ्ङिन् के़जोगुरो॥ खे़ने़ॽ इक्सादिङ् खाम्बेःक्मान्, वरःङ्हाॽ नु खे़प्मो के़याक्पा के़रे़क् के़जोगुसिरो, खे़ङ्हाॽ के़रे़क् खे़ने़ॽ हिङ्मन् के़बिरुसिरो॥ साङ्ग्राम्पेदाङ्बा मुक्साम्हाॽ अःक्खुम् मे़बत्ताङ् खे़ने़ॽ से़वा के़म्मे़त्लो॥ 7 खे़ने़ॽ यहवे दाङ्बा निङ्वाॽफुमाङ्ने़रो! खे़ने़ॽ अब्राम्मिन् के़सेगुआङ् कल्दिहाॽरे़ खुनिॽ उर लाजेॽलाम्बा के़लःत्तुआङ् के़भे़त्तुरो, हे़क्क्याङ् कुमिङ्ङिन् के़ले़क्सुआङ् खुने़ॽ अब्राहाम मिङ् के़वाःत्तुरो॥ 8 खुने़ॽ खे़ने़ॽनु आबाङे नसाःन्साबा पोःक्खे़बा के़घोसुरो, हे़क्क्याङ् खे़ने़ॽ खुने़ॽनु लत्छा माङ्हुप् थिक् के़जोगुरो॥ खुने़ॽ कुमुॽइदाङ्साहाॽरे़ मे़युक्तुर फाॽआङ् खे़ने़ॽ कनानि, हित्ति, एमोरि, परिज्जि, यबुसि नु गिर्गासिहाॽ मे़युङे़बा लाजेन् पिमा माङ्हुप् के़जोगुरो, खे़ने़ॽ के़माङ्हुप्पिन् के़रे़क् के़गे़त्तुरो थेआङ्भे़ल्ले़ खे़ने़ॽ साम्योबा के़जोःक्लो॥ 9 “आनिगे थाःक्थे़बाहाॽरे़ मिस्र लाजेॽओ आक्तङ्बा तुक्खेन् मे़दुमुआङ् मे़वये़, खे़ने़ॽ खे़न् के़निसुआङ् के़वये़रो, हे़क्क्याङ् हे़ःत्ताङ्बा वारःङ्ङो खे़ङ्हाॽरे़ आभाॽरे़ॽ फाॽआङ् मे़जोगुबा पेलिगे़न् तुवान् खे़ने़ॽ के़घे़प्सुरो॥ 10 मिस्र लाजेॽबा फारो हाङ्ङिन् नु कुसुहाङ्युक्पाहाॽरे़, हे़क्क्याङ् कुलाजेॽबा के़रे़क् मनाहाॽरे़ खुनिॽ तक्ले़ङ्वाओ खे़ने़ॽ मिक्सेन् नु निङ्वाॽ के़माबा याःम्बक्हाॽ के़जोगुरो थेआङ्भे़ल्ले़ मिस्रिहाॽ आङ्दिङ् मे़लॽरे़र के़मनाहाॽ मे़घुम्सुसिआङ् मे़वये़रो, खे़ने़ॽ खे़न् के़निसुआङ् के़वये़रो॥ हे़क्केलॽरिक् खे़ने़ॽ आबाङे मिङ्सो इङ्धाङ् के़घोसुरो, खे़न् आइन् थारिक् आम्भा वाॽरो॥ 11 खे़ने़ॽ वरःङ्ङिन् कुलुम्मो खुन्छिॽ तगि हर्गे़ॽ के़भःक्खुरो हे़क्क्याङ् के़मनाहाॽ से़ङ्से़ङ्बा खाम्बाङ्ङोलाम् नाधाःम्बि के़देॽरुसिरो॥ के़मनाहाॽ के़नाःप्पा के़भे़प्पाहाॽ ग खे़ने़ॽ कुदिम्बे केःम्बा च्वाःत्तो के़निःप्सु के़हुम्सुसिरो, के़गुङ्बा च्वाःत्तो लुङ्ङिन् हुम्लाःप्पा कुइसिक्, के़दिम्बा च्वाःत्तो खे़ङ्हाॽ मे़निबे़आङ् मे़स्ये़रो॥ 12 खे़ने़ॽ खे़ङ्हाॽ ले़न्दिक् खाॽमिःप्पा सित्लाङ्ङिल्ले़ हे़क्क्याङ् से़न्दिक् मि सित्लाङ्ङिल्ले़ लाम् ओसेःन्गे़धाक्तुसिआङ् लाम्गे़लोसुसिरो॥ 13 “सिनै कोःक्माओ खे़ने़ॽ साङ्ग्राम्पेदाङ्लाम्बा के़धासिङ् के़ये़रो, खे़ने़ॽ आबाङे के़मनाहाॽनु ताॽगे़जे़क्खे़रो हे़क्क्याङ् खे़ङ्हाॽ नुबा साम्योथिम् इङ्जाङ् नु के़लाॽबा निसाम् के़बिरुसिरो॥ 14 खे़ने़ॽ के़से़वारोबा मोसालाम्बा खे़ङ्हाॽ नाःम्सिङ्मा ये़न्निन् सेसे कप्मा के़हुॽरुसिरो, हे़क्क्याङ् के़मनाहाॽ के़साम्योथिम् इङ्जाङ् नु निसाम्हाॽ के़बिरुसिरो॥ 15 खे़ङ्हाॽरे़ खुनिॽ से़त्लाःक्ते़ल्ले़ साङ्ग्राम्पेदाङ्लाम्बा खरे़ःङ् चामा के़बिरुसिरो, खे़ङ्हाॽरे़ खुनिॽ वामिःक्ते़ल्ले़ पयम् यम्बा लुङ्ङोनु च्वाःत् थुङ्मा के़बिरुसिरो॥ आत्तिन् लाजेन् खे़ङ्हाॽ पिमासि माङ्हुप् के़जोगुआङ् वये़, खे़न् लाजेन् युक्मा इङ्जाङ् खे़ने़ॽ के़बिरुसिरो॥ 16 “कर आनिगे थाःक्थे़बाहाॽ आङ्गाॽएःक् के़लॽबा नु पान् मे़ङ्घे़म्मनाबा मे़बोःक्खे़रो, हे़क्क्याङ् के़इङ्जाङ्ङिन् इःप्मा नाःप्मा मे़नाॽरुरो॥ 17 खे़ङ्हाॽरे़ के़इङ्जाङ्ङिन् इःप्मा नाःप्मा मे़न्दे़न्दे़न्लो, हे़क्क्याङ् खुन्छिॽ मे़निसुर के़जोगुबा के़रे़क् के़याःम्बक्हाॽ नु निङ्वाॽ के़माबा के़याःम्बक्हाॽ खे़ङ्हाॽरे़ निङ्वाॽ मे़भेःत्छुरो॥ खे़ङ्हाॽ आबाङे आङ्दिङ् मे़लॽरे़आङ् याम्मो मिस्र लाजेॽओ योक् पोङ्से़ नुःङ्मा पेःक्मा फाॽआङ् खे़ङ्हाॽरे़ लाम्लोबाधिक् मे़सेगुरो॥ कर खे़ने़ॽ ले़प्मि के़बिबा निङ्वाॽफुमाङ्ने़रो, लुङ्माॽ आदुक्तुक्पा नु नुरिक् आमे़प्मे़प्पा हे़क्क्याङ् हारा कुसिक् मे़म्बोःक्मनाबा निङ्वाॽफुमाङ्ने़रो, खे़ने़ॽ साॽरिक् लुङ्माॽ आदुक्तुक्पा के़जोःक्लो, खे़ङ्हाॽ के़न्नाॽरुन्सिन्लो॥ 18 खे़ङ्हाॽरे़ लत्छा पित्सात् नावाइत्लाधिक् मे़धगुरो हे़क्क्याङ् मिस्र लाजेॽलाम् खिनिॽ के़लःप्पा के़भे़प्पा माङ्ङिन् हाबा कन्लो मे़मे़त्तुसिआङ् खे़न्निन् से़वा मे़मे़त्तुरो॥ यहवे दाङ्बाए, खे़ङ्हाॽरे़ खे़ने़ॽ आक्खे़न् साॽरिक् के़जाःत्थि मे़देसु! 19 “हे़क्केसाङ् खे़ने़ॽ साॽरिक् लुङ्माॽ आदुक्तुक्पा के़जोःक्पाल्ले़ चोगुल्ले़ खे़ङ्हाॽ मुरे़क् खारे़क् थेआङ् के़होप्पा ये़ःङ्घादे़न्नोसा लाप्के़म्भुसुन्सिन्लो, खे़ङ्हाॽ लाम् ओसेःन्गे़धाक्पा ले़न्दिक् खाॽमिःप्पा सित्लाङ्ङिन् नु से़न्दिक् के़ओःप्पा मिःल्ले़ सित्लाङ्ङिन् खे़ने़ॽ के़ङ्घे़त्तुन् के़न्देसुल्लो॥ 20 सदादिङ्बा नुबा के़याम्साम्लाम् खे़ङ्हाॽ निसाम् के़बिरुसिरो, चामारे़ लागि मन्न नु थुङ्मारे़लागि च्वाःत् के़बिरुसिरो॥ 21 लिबोङ् तङ्बे थारिक् मुरे़क् खारे़क् थेआङ् के़होप्पा ये़ःङ्घादे़न्नो कम्ब्राङ् के़मे़त्तुसिरो, खे़ङ्हाॽ चाहाब् मे़जोगे़बा पाःन्हाॽ चक्मे़न्लॽए के़बिरुसिआङ् के़बत्छे़रो खे़ङ्हाॽरे़ खुनिॽ चाङ्देःत्हाॽ आभे़ल्ले़आङ् मे़दे़ःक्खे़न्लो, हे़क्क्याङ् खे़ङ्हाॽरे़ खुनिॽ लाङ्हाॽ मे़हमे़ल्लो॥ 22 “खे़ने़ॽ खे़ङ्हाॽ एयाङ्बा मे़न्छाम् सुवाङ्हाॽरे़ खुनिॽ, हाङ्जुम्हाॽ नु खे़ङ्हाॽरे़ खुनिॽ इःन्दोहाॽरे़ कुबेसाङ्बा लाजेॽहाॽआङ्, खे़ङ्हाॽरे़ खुनिॽ युक्को के़बिरुसिरो॥ सिहोन हाङ्ङिल्ले़ कुलाजेॽ हेस्बोने़न् हे़क्क्याङ् ओग हाङ्ङिल्ले़ कुलाजेॽ बासाने़न् खे़ङ्हाॽरे़ मे़नाःन्दुरो॥ 23 खे़ने़ॽ खे़ङ्हाॽ ताङ्साक्पोबा खेसेबाहाॽ कुइसिःक्के निःत्मे़न्दे़त् मुॽइदाङ्सा के़बिरुसिरो, खे़ङ्हाॽरे़ खुनिॽ पाधे़बाहाॽ पिनिङ् फाॽआङ् माङ्हुप् के़जोगुबा लाजेन् खे़ङ्हाॽरे़ मे़नाःन्दुआङ् खे़प्मो मे़युङे़रो॥ 24 खे़ङ्हाॽरे़ खुनिॽ थिन्दाङ् सायोबोराहाॽ खे़प्मो मे़लासे़आङ् कनान लाजेन् मे़नाःन्दुरो, खे़ने़ॽ के़मनाहाॽरे़ खे़प्मोबा मनाहाॽ थङ् मे़नाःन्दुसिर के़याःन्दुसिरो॥ खे़ने़ॽ के़मना इस्राइलिहाॽरे़ खुन्छिॽ आबाङे निङ्वाॽ कुइसिक् चोःक्मारे़ लागि, कनानबा हाङ्ङिन् नु कुमनाहाॽ, के़मनाहाॽ हुक्के़सुप्तुसिरो॥ 25 के़मनाहाॽरे़ लुङ्धाक्किल्ले़ कब्रिङ् कबुबा ये़क्यक्हाॽ, चा के़नुॽबा खाम्बेःक्मान् नु याङ्साकुन्धेरे़ सधे़क् के़दिम्बा हिम्हाॽ, मे़दयुआङ् के़ने़बा वबाक्, पे़ःङ्वालिःत्छेॽ नु वेॽ सिङ्सेॽ पुङ्हाॽरे़ कुले़ःम् के़दिम्बा सिङ्सेॽ इक्ताप्हाॽ, हे़क्क्याङ् चे़ल्ले़क्सेॽ इक्ताप्हाॽ खुनिॽ हुक्को मे़धासुरो॥ खाघा मे़जआङ् खे़ङ्हाॽ मे़मे़ॽरे़रो, खे़ने़ॽ के़रे़क् पाःन्नो के़नुॽबा के़जोःक्पाल्ले़ चोगुल्ले़ खे़ङ्हाॽ ये़ये़ मे़लॽरे़रो॥ 26 “कर के़मनाहाॽरे़ पिफ्युङ् मे़जोगुरो हे़क्क्याङ् खे़ङ्हाॽ इङ्जाङ् मे़न्इःप्मना मे़न्नाःप्मना मे़बोःक्खे़रो, खे़ने़ॽ के़साम्योथिम् इङ्जाङ्लाम्बा खे़ङ्हाॽरे़ खुनिॽ नारान् मे़हिसुरो॥ खे़ने़ॽ ले़प्माङ् नुःङ्मा फाॽआङ् पान् के़मे़प्पा माङ्निङ्वाॽपान् के़बाःप्पाहाॽ खे़ङ्हाॽरे़ मे़से़रुसिरो, ये़त्ले़ङ् खे़ङ्हाॽरे़ खे़ने़ॽ के़जाःत्थि मे़देसुरो॥ 27 खे़ल्ले़चोगुल्ले़ खे़ङ्हाॽ खुनिॽ निङ्मिहाॽरे़ मे़नाःन्दुसिर के़याःन्दुसिरो, हे़क्क्याङ् खुन्छिॽ निङ्मिहाॽरे़ खे़ङ्हाॽ तुक्खे मे़जाःत्तुसिर के़जोगुरो॥ खे़ङ्हाॽ ये़त्तुक्खे मे़ज्ये़बा ये़न्नो खे़ङ्हाॽरे़ खे़ने़ॽ पेलिगे़न् तुवा के़म्जोगे़रो, साङ्ग्राम्पेदाङ्लाम्बा खे़ने़ॽ नुगप् के़बिरुसिरो॥ थेआङ्भे़ल्ले़ खे़ने़ॽ साॽरिक् लुङ्माॽ आदुक्तुक्पा के़जोःक्लो खे़ङ्हाॽ निङ्मिहाॽलाम्बा ताङ्से़ःप्मासिरे़ लागि खे़ने़ॽ ताङ्आसे़ःप्से़ःप्पा लाम्लोबाहाॽ के़बाङ्घुसिरो॥ 28 “सनारुङ् पोःक्खे़आङ् खे़ङ्हाॽरे़ खे़ने़ॽ के़निमो लायो मे़जोगुरो हे़क्क्याङ् याम्मो खे़ङ्हाॽ खुनिॽ निङ्मिहाॽरे़ मे़नाःन्दुसिआङ् युक्को मे़गत्तुसिर के़जोगुरो॥ कर खे़ङ्हाॽ याम्मो लायो चोःक्मा मे़हिन्दे़रो, हे़क्क्याङ् खे़ङ्हाॽ मे़हाबे़ मे़भिःक्ते़बान् साङ्ग्राम्पेदाङ्ङो खे़ने़ॽ के़घे़प्सुरो हे़क्क्याङ् खे़ने़ॽ साॽरिक् याप्मि लुङ्माॽ आदुक्तुक्पा के़जोःक्पाल्ले़ चोगुल्ले़ खे़ङ्हाॽ ये़त्ले़ङ् ये़त्ले़ङ् ताङ्गे़से़ःप्तुसिरो॥ 29 खे़ने़ॽ के़निसाम्मिन् इःत्ते़म्मे़ॽ नाःत्ते़म्मे़ॽ फाॽआङ् खे़ङ्हाॽ साम्दिङ् के़बिरुसिरो, कर आङ्दिङ् मे़लॽरे़आङ् खे़ङ्हाॽरे़ के़साम्योथिम् इङ्जाङ्हाॽ लाप्मे़भुसुरो॥ खे़ने़ॽ के़घासे़न्हाॽ इःप्मा नाःप्मान्ने हिङ्मन्ले़ लाम् खोमारो॥ कर खे़ङ्हाॽ आधिङ्गानि नु पान् मे़ङ्घे़म्मनाबा मे़बोःक्खे़आङ् खे़न् इःप्मा नाःप्मा मे़न्दे़न्दे़ल्लो॥ 30 यरिक् तङ्बे थारिक् खे़ने़ॽ खे़ङ्हाॽ नासि के़धःत्तुसिआङ् साम्दिङ् के़बिरुसिरो, माङ्निङ्वाॽपान् के़बाःप्पाहाॽलाम् के़याम्साम्मिल्ले़ खे़ङ्हाॽ साम्दिङ् के़बिरुसिरो, कर के़मनाहाॽ आबाङे नाधे़क्क्रे़ङ् मे़जोक्सिङ्लो, खे़ल्ले़चोगुल्ले़ वेॽ थिम्मे़न्दङ् सुवाङ्हाॽरे़ खे़ङ्हाॽ मे़नाःन्दुसिर के़याःन्दुसिरो॥ 31 खे़ने़ॽ साॽरिक् लुङ्माॽ आदुक्तुक्पा के़जोःक्पाल्ले़ चोगुल्ले़ खे़ने़ॽ खे़ङ्हाॽ के़न्नाॽरुन्सिन्, के़म्मे़क्खुन्सिल्लो॥ थेआङ्भे़ल्ले़ खे़ने़ॽ याप्मि लुङ्माॽ आदुक्तुक्पा नु के़नुॽबा निङ्वाॽफुमाङ्ने़रो! 32 “खे़ने़ॽ आनिगे निङ्वाॽफुमाङ्ने़रो! खे़ने़ॽग पयम् यम्बा, किप्मा के़घुबा नु मुक्के़गुबा निङ्वाॽफुमाङ्ने़रो! खे़ने़ॽ माङ्हुप् के़जोगुबान् आबाङे के़गे़त्तुरो, अस्सुरबा हाङ्हाॽरे़ आनिगे याप्मि खुम्मा मे़हेःक्तिगे़बा ये़म्माङ्धो आल्लो थारिक् आनिगे साॽरिक् तुक्खे च्ये़ॽइगे़आङ् वाॽरो! आनिगे हाङ्हाॽ, लाम्लोबाहाॽ, निङ्वाॽफुसाम्बाहाॽ, माङ्निङ्वाॽपान् के़बाःप्पाहाॽ, पाधे़बाहाॽ नु आनिगे के़रे़क् के़मनाहाॽरे़ तुक्खे तुमुम्बे़आङ् वाॽरो, आनिगे साॽरिक् तुक्खे चामनाआङ् वाॽ, खे़ने़ॽ निङ्वाॽ इःत्ते़ॽओ! 33 खे़ने़ॽ आनिगे याप्मि खुम्दिङ् के़बिरे़आङ् के़वाॽबा पान् के़जोगुरो, आनिगे लायो चोगुम्बे़साङ् खे़ने़ॽ नसाःन्साबाए के़बोक्खे़आङ् के़वाॽरो॥ 34 आनिगे हाङ्, लाम्लोबा निङ्वाॽफुसाम्बा, हे़क्क्याङ् पाधे़बाहाॽरे़आङ् के़साम्योथिम् इङ्जाङ्हाॽ मे़न्इःत्तुन् मे़न्नाःत्तुल्लो, खे़ङ्हाॽरे़ खे़ने़ॽ के़इङ्जाङ्ङिन् हे़क्क्याङ् के़साम्दिङ्हाॽ मे़ङ्घे़प्सुन्लो॥ 35 खे़ङ्हाॽ खुनिॽ हाङ्जुम्मो मे़वये़ल्ले़ खे़ने़ॽ साॽरिक् के़नुॽबा के़जोःक्पाल्ले़ चोगुल्ले़ खे़ङ्हाॽ के़बिरुसिबा फे़भे़बा, चागे़नुॽबा लाजेॽओ खे़ङ्हाॽ मे़युङे़रो, कर लायो चोःक्मा मे़ल्ले़रुन् हे़क्क्याङ् खे़ने़ॽ के़से़वा मे़न्जोगुल्लो॥ 36 “ओमे़त्ते़ॽओ आल्लो, आनिगे योक् पोःक्खिगे़आङ् वयिगे़रो, खे़ने़ॽ आनिगे थाःक्थे़बाहाॽ के़बिरुसिबा लाजेॽ, आनिगे कुजा के़बिबा कन् चागे़नुॽबा नुबा खाम्मो आनिगे योक् पोःक्खिगे़आङ् वयिगे़रो॥ 37 आनिगे लायो चोगुम्बे़ल्ले़ आनिगे सम्धाङ् युक् चोःक्मा के़बाङ्घुसिबा हाङ्हाॽओ, आनिगे लाजेॽओ के़धोःक्पा के़रे़क् कुजाहाॽ पेःक्लो॥ खे़ङ्हाॽरे़ आबाङे खुनिॽ निङ्वाॽ हे़क्के आनिगे नु आनिगे थक्साहाॽओ खुनिॽ निङ्वाॽ थाप्थाप् मे़जोगुरो हे़क्क्याङ् यम्बा ये़त्तुक्खेओ आनिगे थ्ये़ॽइगे़आङ् यागिगे़रो!” 38 “कन् के़रे़क् पोःक्खे़बाल्ले़ चोगुल्ले़ आनिगे इस्राइलिहाॽरे़ साॽरिक् निङ्वाॽ इःत्छिङ्मनाआङ् कन् साप्लान् साप्मना हे़क्क्याङ् आनिगे लाम्लोबा, ले़बि नु निङ्वाॽफुसाम्बाहाॽरे़ कप्मो एःप्साप् मे़युक्तुरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.