नहेम्याह 8 - लिम्बुए़ज्रा नु साम्योथिम् इङ्जाङ् 1 नुसि ला तोॽरुल्ले़ इस्राइलिहाॽ आबाङे खुनिॽ ये़क्यक्हाॽओ युङ्मा मे़हेःक्ते़आङ् वये़॥ खे़ङ्हाॽ के़रे़क् यरुसले़ःम्मो च्वाःत् लाम्धेःप्पाल्ले़ सिगाङ् ले़प्माङ्बा लक्खुम्मो थिक्हुप् मे़बोःक्खे़आङ् मे़जुप्से़॥ यहवे दाङ्बे़ल्ले़ मोसाःल्ले़ कुहुक्लाम्बा इस्राइलिहाॽ पिरुसिबा साम्योथिम् इङ्जाङ्ङिल्ले़ साप्पन्निन् साम्योथिम्साम्बा ए़ज्रान् खे़ङ्हाॽरे़ ताःप्मा मे़बाङ्घु॥ 2 कल्ले़चोगुल्ले़ नुसिगेक्पा लाःल्ले़ थिक्सिगेक्पा ये़न्नो के़जुम्बा मनाहाॽरे़ खुनिॽ तगि हे़क्क्याङ् खे़प्मो के़वाॽबा मे़न्छुमा ये़म्बित्छाॽ नु खे़न् कुसिङ् निःप्मा के़सुक्पा हिन्जाॽबित्छाॽ के़रे़क्ले़ खुन्छिॽ तगि निङ्वाॽफुसाम्बा ए़ज्राःल्ले़ साम्योथिम् इङ्जाङ् साप्पन्निन् तारु॥ 3 खे़प्मो लक्खुम्मोबा च्वाःत् लाम्धेःप् पेसाङ् तानाम् नाम् के़रे़आङ्धो ले़न्जो थारिक् मे़न्छुमा ये़म्बित्छा नु खे़न् कुसिङ् निःप्मा के़सुक्पाहाॽ ए़ज्राःल्ले़ साम्योथिम् इङ्जाङ्ङिन् निरुपिरुसि हे़क्क्याङ् मनाहाॽरे़ साॽरिक् निङ्वाॽ मे़बिरुआङ् मे़घे़प्सु॥ 4 खे़ल्ले़ लागि खे़प्मो लत्छा सिङ्ङिल्ले़न् उवा चोःक्मादे़न्धिक् मे़जोगुआङ् ने़स्से़ हे़क्क्याङ् ए़ज्रान् खे़न् सिङ्ङिल्ले़न् उवा चोःक्मादे़न् सम्धाङ् ये़म्सिङ्॥ खुने़ॽ कुजुप्साङ् ले़प्माङ् मत्तित्याह, सेमा, अनायाह, उरियाह, हिल्कियाह, मासेयाह नु कुभे़न्छाङ् ले़प्माङ् पदायाह, मिसाएल, मल्कियाह, हासुम, हसबदाना, जकरिया नु मसुल्लामसि मे़ये़बे़॥ 5 ए़ज्रान् उवा चोःक्मादे़न्नो ये़बे़ल्ले़ मनाहाॽरे़ खुने़ॽ अदक्तक् लॽरिक् ओमे़मे़त्तुआङ् मे़बत्छे़ थेआङ्भे़ल्ले़ खुने़ॽ चाङ्जाङ्बादे़न्नो ये़बे़॥ खुने़ॽ साम्योथिम् इङ्जाङ् साप्पःन्ने़न् हन्दुनुमे़ःन्ने मनाहाॽ मे़बोगे़आङ् मे़ये़म्सिङ्॥ 6 ए़ज्राःल्ले़ यहवे दाङ्बा पयम् यम्बा निङ्वाॽफुमाङ्ङिल्ले़ कुनारा फोसु, हे़क्केःल्ले़ के़रे़क् मनाहाॽरे़ खुनिॽ हुक्किन् थाःङ् मे़भोक्खुआङ् “आमिन् आमिन्” मे़बाःत्तु॥ खे़ङ्हाॽ खाम्बाङ्ङो थारिक् अःक्खुम् मे़भन्छिङ्ङाङ् साम्बोन् हबत् मे़भन्छिङ् हे़क्क्याङ् खे़ङ्हाॽरे़ निङ्वाॽफुमाङ्ङिन् से़वा मे़मे़त्तु॥ 7 येसुआ, बानि, सरेबियाह, यामिन, अक्कुब, सब्बतै, होदियाह, मासेयाह, कलिता, अजर्याह, योजाबाद, हानान हे़क्क्याङ् पलयाह मिङ् के़वाःप्पा ले़बिहाॽरे़ खे़ङ्हाॽ साम्योथिम् इङ्जाङ्ङिल्ले़ कुबेन् मे़हन्दु मे़बिरुसि॥ 8 खे़ङ्हाॽरे़ निङ्वाॽफुमाङ्ङिल्ले़ कुसाम्योथिम् इङ्जाङ्ङिन् नुरिक् मे़निरुआङ् मनाहाॽरे़ कुसिङ् मे़निःत्तुर कुबे मे़हन्दु मे़बिरुसि॥ 9 हे़क्क्याङ् हाङ्युक्पा नहेम्याह, साम्योथिम्साम्बा निङ्वाॽफुसाम्बा ए़ज्रा नु निसाम् के़हुॽबार के़बप्पा ले़बिहाॽरे़ खे़ङ्हाॽ के़रे़क् मे़मे़त्तुसि, “आइन्बा ये़न्निन् आनिॽ यहवे दाङ्बा निङ्वाॽफुमाङ्ङिल्ले़ कुलागि सेसे चोक्॥ आइन् खिनिॽ हाःप्मा फिःक्मा मे़नुॽने़न्॥” थेआङ्भे़ल्ले़ साम्योथिम् इङ्जाङ्ङोबा पाःन्जाःक्किन् मे़घे़प्सुआङ् खे़ङ्हाॽ के़रे़क् मे़हाबे़र मे़ये़बे़॥ 10 खे़ब्याङ् नहेम्याहःल्ले़ खे़ङ्हाॽ मे़त्तुसि, “आल्ल खिनिॽ पेगे़म्मे़ॽ हे़क्क्याङ् साभःङ्जा से़से़म्मे़ॽआङ् कुजा के़नुॽबा कुजा चे़म्मे़ थुङे़म्मे़ॽ॥ कुजा मे़ङ्गप्मनाबाहाॽ खुन्छिॽ तःक् लक् हाक्ताम्सिम्मे़ॽ॥ थेआङ्भे़ल्ले़ आनिॽ यहवे दाङ्बे़ल्ले़ कुलागि आइन्बा ये़न्निन् सेसेबा चोक्॥ खे़ल्ले़चोगुल्ले़ मे़रिङ् मे़धक्ते़म्मिन्ने़ॽ थेआङ्भे़ल्ले़ यहवे दाङ्बे़ल्ले़ के़सःत्तिर के़याःन्दिबा पाःन्निल्ले़ खिनिॽ के़धुम्बा के़बोक्खिरो॥” 11 ले़बिहाॽरे़ खे़ङ्हाॽ चिजि ये़म्ये़म् मे़जोगुसिआङ् मे़मे़त्तुसि, “स्वाःत् युङे़म्मे़ॽ, थेआङ्भे़ल्ले़ आइन्बा ये़न्निन् सेसे चोक्॥ खिनिॽ मे़हाबे़म्मिन्ने़ॽ॥” 12 हे़क्क्याङ् के़रे़क् मनाहाॽ चासे़ थुङ्से़, वेॽहाॽ कुजा लक् हाक्से़, हे़क्क्याङ् यम्बा सोसोत्लराङ् चोःक्से़ मे़बे, थेआङ्भे़ल्ले़ साम्योथिम् इङ्जाङ्ङिन् मे़निरुआङ् खे़म्मे़बाङ्घुसिबा पाःन्हाॽ खे़ङ्हाॽरे़ कुसिङ् मे़निःत्तु॥ 13 कुदाःन्दिक्समा थाःक्थाःक्कोबा तुम्भाक्पाहाॽ, निङ्वाॽफुसाम्बाहाॽ नु ले़बिहाॽ साम्योथिम् इङ्जाङ्ङोबा निसाम् निःप्मारे़ लागि साम्योथिम्साम्बा ए़ज्राओ मे़बे॥ 14 यहवे दाङ्बे़ल्ले़ मोसालाम्बा साम्योथिम् इङ्जाङ् पिरुसिबा पाःन्निन् खे़ङ्हाॽरे़ मे़निसु, नुसिगेक्पा लाओ के़दाबा तङ्नाम्मो कुभा ये़न्ले़ लागि इस्राइलिहाॽ साःङ्गाहिम् युङ्मा के़बोङ्बा वये़॥ 15 हे़क्क्याङ् खे़ङ्हाॽरे़ आबाङे खुनिॽ ये़क्यक्हाॽओ नु यरुसले़ःम्मो कन् पाःन्निन् उवा चोःक्मा पोङ् लॽरिक् साप्ते़आङ् के़बप्पा पाःन्हाॽआङ् खे़ङ्हाॽरे़ कुसिङ् मे़निःत्तु—“कोःक्मा फाङ्जङ् थे़गुओ पेगे़म्मे़ॽ हे़क्क्याङ् पे़ःङ्वालिःत्छेॽ नु ताम्भुङ् पे़ःङ्वालिःत्छेल्ले़ कुबोराक्हाॽ, चाःम्मासिङ् खे़ब्याङ् खे़बक्सिङ्ङिल्ले़ कुबोराक्हाॽ नु वेॽ सिङ्बोराःक्हाॽ साःङ्गाहिम् चोःक्मारे़ लागि तारे़म्मे़ॽ॥” 16 हे़क्केःल्ले़ मनाहाॽ मे़बेआङ् सिङ्बोराःक्हाॽ मे़दारु, हे़क्क्याङ् के़रे़क्ले़ आबाङे हिम्मोबा लिङ्घाम्बु नु लक्खुम्मो, हे़क्क्याङ् निङ्वाॽफुमाङ्ङिल्ले़ कुहिम्मोबा लक्खुम्हाॽओ, खे़ब्याङ् च्वाःत् लाम्धेत् कुबेसाङ्बा लक्खुम्मो नु एफ्राइम लाम्धेःत्तिल्ले़ कुबेसाङ्बा लक्खुम्हाॽओ खे़ङ्हाॽरे़ आबाङे लागि साःङ्गाहिम् मे़जोगु॥ 17 मे़दे़म्सु मे़देॽरुसिआङ् के़नुःङ्बा के़भे़म्बा के़रे़क् मनाहाॽरे़ साःङ्गाहिम् मे़जोगुआङ् मे़युङे़॥ नुनरे़ कुस्सा यहोसुःल्ले़ कुये़म्माङ्धो खे़न् ये़न् थारिक् इस्राइलिहाॽरे़ कन् तङ्नाम्मिन् अक्खेलॽरिक् मे़न्दोए मे़वये़॥ हे़क्क्याङ् खे़ङ्हाॽ साॽरिक् खुनिॽ सिक्समे़आङ् मे़सःत्ते़आङ् मे़वये़॥ 18 थिक्सिगेक्पा ये़न्नाङ्धो कुनुप्मा ये़न् थारिक् थिक्याःन्धक् ए़ज्राःल्ले़ निङ्वाॽफुमाङ्ङिल्ले़ कुसाम्योथिम् इङ्जाङ्ङिन् निरु॥ नुसि ये़न् थारिक् खे़ङ्हाॽरे़ अक्खेलॽरिक् ससाङ्स्रोत् मे़जोगु॥ हे़क्क्याङ् ये़त्छिगेक्पा ये़न्नो साम्योथिम् कुइसिक् खे़ङ्हाॽरे़ कुनुप्मा चुम्लुङ् मे़जोगुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.