नहेम्याह 6 - लिम्बुनहेम्याहन् चे़ॽया इङ्दो मे़मे़त्तु 1 लुङ्धाक्किन् आनिगे याम्मो से़त्तुम्बे़ सुरुम्बे़ हे़क्क्याङ् के़रे़क् कुहङ्हाॽ हुॽरुम्बे़ सुरुम्बे़ के़लॽबा इङ्घङ्ङिन् सन्बलत, तोबिया, अरबि गेसेम नु आनिगे वेॽ निङ्मिहाॽरे़ खुनिॽ ने़क्खोॽओ के़रे़॥ आल्ल लाम्धेःप्पाहाॽओ कुसुप्माहाॽरक् मे़म्भन्ने वये़॥ 2 सन्बलत नु गेसेमरे़ ओनो मे़प्मनाबा सेःङ्घा ने़ने़बादे़न्नो लत्छा पाङ्भेॽओ खुन्छिॽनु तुम्मारे़ लागि आङ्गाॽ इङ्घङ् मे़हाक्ताङ्॥ कर खुन्छिॽ आङ्गाॽ के़साक्पो थामा लत्छा लाम् ओमे़त्ते़सुआङ् वये़सि॥ 3 खे़ल्ले़चोगुल्ले़ आङ्गाॽ अक्तङ्बा नुगप् पिरुङ्सिङ्ङाङ् इङ्घङ् हाक्तुङ्सिङ्, “आल्लो आङ्गाॽ मे़न्जोःक्के मे़म्बोङ्मनाबा याःम्बक् कत्तुङ् खे़न् याःम्बक्किन् ले़प्माआङ् आङ्गाॽ खे़प्मो युमा मे़सुक्कान्॥ खिन्छिॽ तुम्से़ युमारे़ लागि आङ्गाॽ कप्मोबा आयाःम्बक्किन् थेआङ् ले़रुङ्बाबे?” 4 लिसिले़ङ् थारिक् खुन्छिॽ आङ्गाॽ अक्तङ्बा इङ्घङ् मे़हाक्ताङ्, हे़क्क्याङ् लिसिले़ङ् थारिक्के आङ्गाॽ खे़ङ्हाॽ हे़क्तङ्बाए नुगप् पिरुङ्सिङ्॥ 5 हे़क्क्याङ् सन्बलतरे़ आङ्गाॽ लत्छा से़वारोबालाम् ङासिगेक्पा इङ्घङ् हाक्ताङ्॥ कन् इङ्घङ्ङिन् लत्छा मे़म्भाक्केबा सक्इङ्घङ् वये़॥ 6 खे़प्मो अक्तङ्बा साप्ते़आङ् पत्छे़— “गेसेमरे़ आङ्गाॽ मे़त्ताङ्ङाङ् वाॽ, खे़ने़ॽ पिफ्युङ् चोःक्मा के़इःत्तुआङ् के़वाॽ के़लॽबा हयङ् किल्लिङ्ङिन् हिम्बेसाङ्बा लाजेॽ के़रे़क् से़रे़आङ् वाॽ खे़ल्ले़चोगुल्ले़ खिनिॽ यहुदिहाॽरे़ लुङ्धाक्किन् याम्मो कुसङ् के़जोगुम्माङ् के़से़त्तुम्ल के़यागिमु॥ खे़ने़ॽ आबाङे हाङ् पोङ्मा निङ्वाॽ के़जोगुआङ् के़वाॽमु॥ 7 हे़क्क्याङ् खे़ने़ॽ के़याःम्बेओ माङ्निङ्वाॽपान् के़बाःप्पाहाॽ यरुसले़ःम्मो के़युक्खुसिआङ् वाॽ, ‘यहुदाओ हाङ्धिक् वाॽ॥’ पयम् हाङ्ङिल्ले़ कन् पाःन्निन् से़क्खाए खे़प्सु॥ खे़ल्ले़चोगुल्ले़ आन्छिॽ ने़प्माङ् तुम्सिआङ् हारा कन् पाःन्हाॽ चे़ङ्सु पाःत्छु॥” 8 आङ्गाॽ खुने़ॽ नुगप् पिरुङ्, “खे़ने़ॽ के़बाःत्तुबा पाःन्निन् से़क्खा मेःन्, कन् खे़ने़ॽ के़जोगुआङ् के़बाःत्तुबा पाःन्लो॥” 9 आनिगे याःम्बक् चोःक्मा सुःप्मानुःल्ले़ तगि ले़रुम्बे़र फाॽआङ् खे़ङ्हाॽरे़ याप्मि यङ्मासे़प्मा मे़गोत्तिगे़र मे़वये़॥ कर आङ्गाॽ पेलिगे़न् तुवा चोगुङ्, “निङ्वाॽफुमाङ्ङे, आङ्गाॽ मुक्साम् पिराङ्ङे़ॽओ॥” 10 खे़न् ये़म्मो आङ्गाॽ महेतबेलरे़ कुम्मे़न्छाॽ दलायाहरे़ कुस्सा समायाहरे़ कुदुम्से़ कुहिम्मो पेगाङ्॥ हिम्मोलाम् खे़न् लःम्मा मे़न्छुक्मनाबा चोगे़॥ खे़ल्ले़ आङ्गाॽ मे़त्ताङ्, “आन्छिॽ ने़प्माङ् माङ्हिम्मो पित्छि हे़क्क्याङ् लाम्धेःत्हाॽ सुप्सुआङ् चिङ्ने़त्छिॽ, थेआङ्भे़ल्ले़ खे़ने़ॽ के़से़त्छे़ खे़ङ्हाॽ मे़दार मे़बत्॥ से़न्दिक् खे़ङ्हाॽ खे़ने़ॽ के़से़त्छे़ मे़गे़त् मे़दारो॥” 11 कर आङ्गाॽ मे़त्तुङ्, “आङ्गाॽ के़घे़त्छिङ्बा नु के़जिङ्सिङ्बा मनाआ मेःन्॥ थे आङ्गाॽ माङ्हिम्मो चिङ्सिङ्ङाआङ् आबाङे आहिङ्मन्निन् से़ःप्तुङ् फाॽआङ् खे़ने़ॽ के़इःत्तुबि? आङ्गाॽ हे़क्के मे़जोक्कान्॥” 12 हे़क्केःल्ले़ निङ्वाॽफुमाङ्ङिन् समायाहःन्नु पारे़बा मे़ःन्लत्छ कर तोबियान् नु सन्बलतरे़ स्वाःत् याङ् पिरे़त्छुआङ् खुने़ॽ हे़क्के पाःप्मा पाङ्घे़त्छुआङ् वये़ के़लॽबान् आङ्गाॽ कुसिङ् निःत्तुङ्॥ 13 खे़ङ्हाॽरे़ आङ्गाॽ आजाःत्थि तेमाआङ् कुनामे़न्छाॽ मे़प्मा निङ्वाॽ चोगे़त्छु॥ हे़क्क्याङ् आङ्गाॽ यङ्मा से़प्माआङ् लायो चोःक्पाङ्मा फाॽआङ् समायाहःल्ले़ स्वाःत् याङ् ताःक्तुआङ् वये़॥ 14 आनिङ्वाॽफुमाङ्ङे, तोबिया नु सन्बलतरे़ चोगे़त्छुबा याःम्बक्किन् निङ्वाॽ इःत्ते़ॽओ॥ आङ्गाॽ यङ्मा से़प्माआङ् याप्मि खुम्मा निङ्वाॽ के़जोःक्मा नोअदिया मिङ् के़वाःप्मा माङ्निङ्वाॽपान् के़बाःप्मान् नु वेॽ के़रे़क् माङ्निङ्वाॽपान् के़बाःप्पाहाॽ निङ्वाॽ इःत्ते़से़ॽओ॥ याःम्बक्किन् चुःत् 15 ङाबोङ्ङाङ् ने़त्छि ये़न् थारिक् याःम्बक् चोःक्मना हे़क्क्याङ् एलुल मे़प्मनाबा लाःल्ले़ निबोङ्ङाङ् ङासिगेक्पा ये़न्नो लुङ्धाक् से़प्मा याःम्बक्किन् के़रे़क् चुरे़॥ 16 कन् पाःन्निन् आनिगे निङ्मिहाॽरे़ मे़घे़प्सु, हे़क्केःल्ले़ खिरिबा लाजेॽओ के़युङ्बा के़रे़क् मे़न्छाम् सुवाङ्हाॽ मे़गिसे़आङ् खुनिॽ साॽइयगे़, थेआङ्भे़ल्ले़ कन् याःम्बक्किन् आनिगे निङ्वाॽफुमाङ्ङिल्ले़ फाॽरिगे़आङ् चोःक्मा सुरुम्बे़बा के़लॽबान् खे़ङ्हाॽरे़ कुसिङ् मे़निःत्तु॥ 17 खे़न् ये़म्मो यहुदि लाम्लोबाहाॽरे़ तोबियान् यरिक् सक्इङ्घङ्हाॽ मे़हाक्तुर मे़वये़॥ खे़ङ्हाॽरे़ खुने़ॽलाम्बा नुगप्पाङ् मे़घोसुर मे़वये़॥ 18 यहुदाबा यरिक् मनाहाॽ माङ्मे़हे़क्सिङ्ङाङ् तोबिया ले़प्माङ् मे़बत्छे़॥ थेआङ्भे़ल्ले़ तोबियान् आराःल्ले़ कुस्सा सकन्याहःल्ले़ कुम्बाङ्लुमिॽ वये़॥ तोबियाःल्ले़ कुस्सा येहोहानानरे़ ग बेरेक्याहःल्ले़ कुस्सा ये़म्बित्छा मसुल्लामरे़ कुस्सा मे़न्छुमाधिक् मेःक्खिम् मे़त्तुआङ् वये़॥ 19 खे़ङ्हाॽ आङ्गाॽ आदगि मे़द्ये़आङ् तोबियारे़ चोगुबा नुबा याःम्बक्हाॽ मे़जे़क्ताङ्, हे़क्क्याङ् आङ्गाॽ पाःत्तुङ्बा के़रे़क् पाःन्हाॽआङ् मे़बक्खुआङ् खुने़ॽओ सरक् मे़गे़त्तु॥ हे़क्क्याङ् खुने़ॽ आङ्गाॽ यङ्मा से़राङ्ल सक्इङ्घङ्हाॽ हाक्ताङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.