नहेम्याह 5 - लिम्बुनहेम्याहरे़ याङ्गे़साॽबाहाॽ फाॽरुसि 1 कुभा ये़म् एगाङ् ये़म्बित्छा नु खुनिॽ मेःत्हाॽरे़ आबाङे खुनिॽ यहुदि फुॽनुसाॽहाॽ साॽरिक् चे़ॽया इङ्दो मे़प्मा मे़हेःक्तुसि॥ 2 कुभारे़ मे़बाःत्तु, “आनिगे हे़क्क्याङ् आनिगे साहाॽ यरिक् वयिगे़, आनिगे हिङ्मारे़ लागि पोगुगे़न् कुजा चाहाब् चोगिगे़॥” 3 कुभारे़ मे़बाःत्तु, “साक्लाम्बा हिङ्मारे़ लागि पोगुगे़न् कुजा याङ्घोत्छे़ आनिगे आबाङे प्याङ्सिगे़न् इक्ताप्हाॽ, हिम्धाःङ्हाॽ हे़क्क्याङ् चे़ल्ले़क्सेॽ इक्ताप्हाॽ याङ्ङो तेमनाआङ् ने़ःॽ॥” 4 वेॽहाॽरे़ मे़बाःत्तु, “आनिगे प्याङ्सिगे़न् इक्ताप् नु चे़ल्ले़क्सेॽ इक्ताप्हाॽरे़ लागि हाङ्ङिन् हुङ्मा के़बोङ्बा एःङ्याङ्ङिन् हुङ्मा आनिगे सिङ्नात् कोःप्मा के़बोङ्बा पोःक्खे़आङ् वाॽ॥ 5 वेॽ यहुदिहाॽ हे़क्के आनिगे़आङ् यहुदि थाःक्सिगे़॥ आनिगे साहाॽआङ् खे़ङ्हाॽरे़ खुनिॽ साहाॽ कुइसिक् नुबा नु लुङ्माॽ के़दुक्पा मे़जोक् हे़क्केसाङ् आनिगे आबाङे साहाॽ योःक्पा योःक्मा चोःक्मासिआङ् सङ्मासि पोःक्खे़आङ् वाॽ॥ कर कुभा आनिगे मे़न्छुमा साहाॽ तगिए योःग्मा मे़बोःक्खे़आङ् मे़वाॽ॥ आनिगे प्याङ्सिगे़न् इक्ताप् नु चे़ल्ले़क्सेॽ इक्ताप्हाॽ मे़नाप्ति मे़देॽरिगे़आङ् आनिगे थेआङ् चोःक्मा मे़न्छुक्मनाबा पोःक्खिगे़आङ् वयिगे़॥” 6 खे़ङ्हाॽरे़ खुनिॽ अक्तङ्बा लुङ्हाःप्मा पाःन्हाॽ खे़प्सुङ्ङाङ् आङ्गाॽ साॽरिक् आसिक् पोगे़॥ 7 आङ्गाॽ खे़ङ्हाॽ फाॽमासि निङ्वाॽ निःन्धो चोगुङ्॥ हे़क्क्याङ् खे़ङ्हाॽरे़ खुनिॽ लाम्लोबा नु सुहाङ्युक्पाहाॽ फे़ःक्तुङ्सिङ्ङाङ् मे़त्तुङ्सिङ्, “खिनिॽ आबाङे फुॽनुसाॽहाॽ तुक्खे के़जाःत्तुम्सिम्माङ् के़वयि॥ कन् के़साक्पा याःम्बक्किन् तङ्मारे़ लागि आङ्गाॽ चुम्लुङ्ङो के़रे़क् सुप्सुङ्सिङ्॥” 8 हे़क्क्याङ् मे़त्तुङ्सिङ्, “थिम्मे़न्दङ् सुवाङ्हाॽरे़ खुनिॽ हुक्को मे़सङ्घुसिबा आनिॽ यहुदि फुॽनुसाॽहाॽ आनिगे़ग थे़ॽरुम्सिम्बे़आङ् ले़रुम्सिम्बे़र वयिगे़॥ कर आल्ल थे़ॽमनासिबा फुॽनुसाॽहाॽने़ खिनिॽग वेॽ यहुदिहाॽओ के़सङ्घुम्सिम्ले़त्छ॥” लाम्लोबाहाॽरे़ नुगप् पिमा मे़न्छुक्ताङ्ङिन्नाङ् स्वाःत् मे़युङे़॥ 9 आङ्गाॽ याम्मो मे़त्तुङ्सिङ्, “कन् खिनिॽ याःम्बक्किन् ताप्फे़ःम्बा पोःक्खे़॥ आल्ल, निङ्वाॽफुमाङ्ङिन् मिङ्सो इङ्धाङ् पिरे़म्मे़ॽआङ् आत्तिन् पाःन्निन् नुबा चोक् खे़न् चोगे़म्मे़ॽ॥ हे़क्क्याङ्ने़ आनिॽ निङ्मि थिम्मे़न्दङ् सुवाङ्हाॽरे़ आनिॽ कुनामे़न्छाॽ मे़प्मा आमे़ङ्घोने़न्॥ 10 आङ्गाॽ नु आन्देङ् आन्जुम् हे़क्क्याङ् से़वारोबाहाॽरे़आङ् कुजा नु याङ्साकुन्धे सिङ्नात् खे़ङ्हाॽ पिमनासिआङ् पत्॥ आल्ल आनिॽ खे़न् सिङ्नात्तिल्ले़ कुस्सा फोङ्मा ले़रुम्॥ 11 खिनिॽ के़देॽरुम्बा खे़ङ्हाॽरे़ खुनिॽ इक्ताप्हाॽ, चे़ल्ले़क्सेॽ नु पे़ःङ्वा लिःत्छे इक्ताप्हाॽ खुनिॽ हिम्हाॽ नुःक्ते़म् पिरे़म्सिम्मे़ॽ, हे़क्क्याङ् खे़ङ्लाम् के़भोक्खुम्बा याङ्साकुन्धे, पोगुगे़न् कुजा, सेजःङ्वा, चैतुन निःङ्गेॽहाॽ के़रे़क् नुःक्ते़म् पिरे़म्सिम्मे़ॽ॥” 12 लाम्लोबाहाॽरे़ मे़बाःत्तु, “खे़ने़ॽ के़बाःत्तुबा हे़क्के आनिगे चोगुम्बे़॥ आनिगे खे़ङ्हाॽरे़ खुनिॽ याङ्साकुन्धेहाॽ नुःक्तुम् पिरुम्सिम्बे़ हे़क्क्याङ् सिङ्नात्हाॽ याङ्ना मे़भोक्खुम्सिबे़न्॥” आङ्गाॽ निङ्वाॽफुसाम्बाहाॽ उःत्तुङ्सिङ् हे़क्क्याङ् लाम्लोबाहाॽरे़ खुन्छिॽ आबाङे मे़जोगुबा माङ्हुप् कुइसिक् निङ्वाॽफुसाम्बाहाॽरे़ खुन्छिॽ तगि माङ्हे़क् चोःक्मा पाङ्घुङ्सिङ्॥ 13 हे़क्क्याङ् आङ्गाॽ आभॽइन् फाःक्खुङ्ङाङ् साक्खुङ्॥ “खिनिॽ आबाङे माङ्गे़हे़क्कासिबान् के़ङ्गे़त्तुम्मिन्ने़भग्र निङ्वाॽफुमाङ्ङिल्ले़ अक्खेलॽरिक्के खिनिॽआङ् के़साक्खिरो,” आङ्गाॽ मे़त्तुङ्सिङ्, “निङ्वाॽफुमाङ्ङिल्ले़ खिनिॽ हिम्धाःङ्, खिनिॽ याङ्साकुन्धेहाॽ के़रे़क् के़नाप्ति हे़क्क्याङ् खिनिॽ हुक्किन् कुघाले़म् के़जोगि के़बिरिरो॥” खे़प्मो के़वाॽबा के़रे़क्ले़ “आमिन्” मे़बाःत्तु हे़क्क्याङ् यहवे दाङ्बे़ल्ले़ कुनारा मे़भोसु॥ हे़क्क्याङ् लाम्लोबाहाॽरे़ आबाङे माङ्मे़हे़क्सिङ्बा कुइसिक् मे़जोगुरो॥ नहेम्याहःल्ले़ थेआङ् खोमा निङ्वाॽ मे़न्जोःक्केबा कुयाःम्बक् 14 अर्तासास्त हाङ्ङिल्ले़ हाङ्युक् चोगुबा निबोङ् तङ्बेआङ्धो सुम्बोङ्ङाङ् ने़त्छि तङ्बे थारिक् आङ्गाॽ यहुदा लाजेॽबा तुम् हाङ्युक्पा वयाङ्॥ कन् थिक्ने़त् तङ्बे थारिक् आङ्गाॽ नु आम्भुॽ आन्साॽसिरे़ तुम् हाङ्युक्पाल्ले़ खोमा के़बोङ्बा कुजान् मे़दाःक्तुम्बे़न्॥ 15 आङ्गाॽनुःल्ले़ तगिबा के़रे़क् तुम् हाङ्युक्पाहाॽ मनाहाॽरे़ लागि साॽरिक् के़लिःप्पा कक् मे़बोःक्खे़आङ् मे़वये़ हे़क्क्याङ् खे़ङ्हाॽरे़ चामा थुङ्मारे़लागि कुजा मे़दाःक्तु खे़न्नुःल्ले़ वेॽ लिबोङ् याङ्इत्छिॽआङ् मे़दाःक्तु॥ खे़ङ्हाॽरे़ खुनिॽ से़वारोबाहाॽरे़आङ् मनाहाॽ मुरा मे़मे़त्तुसिआङ् तुक्खे मे़जाःत्तुसि॥ कर आङ्गाॽ हे़क्के मे़न्जोःक्पान् थेआङ्भे़ल्ले़ आङ्गाॽ निङ्वाॽफुमाङ्ङिन् मिङ्सो इङ्धाङ् पिरुङ्॥ 16 आङ्गाॽ आबाङे के़रे़क् आमुक्साम्मिन् लुङ्धाक् चाःङ्वा मे़प्माओ केःत्तुङ्, आङ्गाॽ आयुक्को याःम्बक् के़जोःक्पा के़रे़क्ले़ लुङ्धाक् से़प्मा याःम्बक् मे़जोगु॥ आनिगे योॽबा सिङ्बुङ् मे़म्मे़त्छिङ्मना॥ 17 कन्नुःल्ले़आङ् यरिक् आङ्गाॽ आदःक् चामादे़न्नो किप्थिक्काङ् ङाबोङ् यहुदिहाॽ नु खे़ङ्हाॽरे़ खुनिॽ लाम्लोबाहाॽ तःक् पिरुङ्सिङ्॥ खे़न्नुःल्ले़ वेॽ आङ्गाॽ आदुम्से़ के़दाबा कुया खिरि के़युङ्बा मना सुवाङ्हाॽरे़आङ् आङ्गाॽनुए थिक्याःन्धक् मे़ज मे़धुङु॥ 18 थिक्याःन्धक् सा चामारे़ लागि लत्छा पित् थिक्, चालुप्मनासिबा वरुप्लुप्पा तुक्सि मे़ल्लुक्हाॽ हे़क्क्याङ् आत्तातान्ने यरिक् वाहाॽ मे़सुप्सुसि॥ थिबोङ् ये़न् थक्मा परिक् परिक्पा कुजागे़नुॽबा सेजङ्वान् वे़त्ते़सरे़ मे़सुप्सु॥ कर तुम् सुहाङ्युक्पाल्ले़ खोमा के़बोङ्बा कुजा आङ्गाॽ मे़न्दाःक्पान्॥ थेआङ्भे़ल्ले़ मनाहाॽरे़ खुनिॽ लागि कन् यरिक् के़लिःप्पा कक् वये़ फाॽआङ् आङ्गाॽ कुसिङ् निःत्तुङ्ङाङ् वयाङ्॥ 19 आनिङ्वाॽफुमाङ्ङे, आङ्गाॽ पेलि फाक्ने़रो आङ्गाॽ कन् मनाहाॽरे़ लागि चोगुङ्बा के़रे़क् पाःन्निन् आङ्गाॽ आनुॽमा आदामारे़ लागि निङ्वाॽसोओ कत्ते़ॽओ! |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.