Biblia Todo Logo
Bib sou entènèt

- Piblisite -

नहेम्‍याह 4 - लिम्‍बु


याःम्‍बक् मे़अत्तु

1 लुङ्‌धाक्‍किन् आनिगे चोःक्‍मा हेःक्‍तुम्‍बे़बा सन्‍बलतरे़ खे़प्‍सुआङ् खुने़ॽ साॽरिक् कुसिक् पोगे़ हे़क्‍क्‍याङ् यहुदिहाॽ कुनामे़न्‍छाॽ मे़प्‍मा हेःक्‍तुसि॥

2 खुने़ॽ कुन्‍देङ् कुन्‍जुम्‍हाॽ नु सामरि थक्‍सुबाहाॽरे़ खुनिॽ तगि पाःत्तु, “कन् कुसक्‍मा मे़न्‌याक्‍मनाबा यहुदिहाॽरे़ थे मे़जोगुबाबे? खे़ङ्‌हाॽरे़ ये़क्‌यक्‍किन् याम्‍मो मे़जोगुबाबि? खे़ङ्‌हाॽरे़ सिदुङ्‌जभा मे़दोन्‍दुआङ् थिक्‌याःन्‍ले़ चोःक्‍मा मे़सुरुबि? खे़न् मिगे़दिक्‍पा नु के़लुम्‍सिङ्‌बा ताम्‍जिॽ खाम्‍हिःक्‍कोलाम्‍बा खे़ङ्‌हाॽरे़ ये़क्‌यक् चोःक्‍मा लुङ्‌ङिन् लःत्तुम्‍बे़ लॽरिक् मे़बाःत्तुबि?”

3 खुने़ॽ कुबेसाङ् के़ये़प्‍पा अम्‍मोनि तोबियाःल्‍ले़ पाःत्तु, “नाॽराङ्‌स्‍याङ्, खे़ङ्‌हाॽरे़ मे़से़त्तुबा लुङ्‌धाक्‍किन् स्‍यालधिक्‍ले़ काःक्‍तुसाङ् थुप्‍लो॥”

4 हे़क्‍केःल्‍ले़ आङ्‌गाॽ निङ्‌वाॽफुमाङ्‌ङिन् पेलि फाक्‍तुङ्, “निङ्‌वाॽफुमाङ्‌ङे, खे़प्‍से़ॽओ, खे़ङ्‌हाॽरे़ आनिगे कुनामे़न्‍छाॽ मे़मे़त्तिगे़॥ खे़ङ्‌हाॽरे़ खुनिॽ नामे़न्‍छाॽ पाःन्‍निन् खे़ङ्‌हाॽरे़ खुनिॽ थे़गेक् सम्‍धाङ्‌ङे चुक्‍ल॥ खे़ङ्‌हाॽरे़ खुनिॽ के़रे़क् याङ्‌साकुन्‍धेन् मे़नाप्‍तुसिआङ् वेॽ लाजेॽओ पुङ्‌लाधाबा पोङ्‌माआङ् पेःक्‍मा पोङ्‌ल॥

5 खे़ङ्‌हाॽरे़ मे़जोगुबा फे़न्‌याःम्‍बक्‍किन् मे़जिक्‍खे़न्‍ने़ॽ इग्र खुन्‍छिॽ लायोन् निङ्‌वाॽ मे़भेःत्‍छे़न्‍ने़ॽओ थेआङ्‌भे़ल्‍ले़ लुङ्‌धाक् के़से़प्‍पाहाॽ खे़ङ्‌हाॽरे़ खुनिॽ चाःत्‍थि मे़देसु मे़बिरुसिआङ् वाॽ॥”

6 हे़क्‍केसाङ् लुङ्‌धाक्‍हाॽ आनिगे चक्‍मे़ल्‍लॽए से़त्तुम्‍बे़ हे़क्‍क्‍याङ् हाराए खे़ल्‍ले़ कुभ्रे़ःङ् थारिक् केःम्‍बा फोःक्‍खुम्‍बे़॥ थेआङ्‌भे़ल्‍ले़ मनाहाॽरे़ याःम्‍बक् चोःक्‍मा साॽरिक् खुनिॽ सिक्‍समे़आङ् वये़॥

7 कर सन्‍बलत, तोबिया, अरब तेःङ्‌गप्‍पोबा मनाहाॽ, अम्‍मोन ते़ङ्‌गप्‍पोबा मनाहाॽ नु अस्‍दोद ते़ङ्‌गप्‍पोबा मनाहाॽरे़ यरुसले़मबा लुङ्‌धाक्‍हाॽ चोःक्‍मा याःम्‍बक्‍किन् तगि पोर पत् हे़क्‍क्‍याङ् हार्गाःङ्‌गाःङ्‌बाहाॽ मे़लुप्‍तुर मे़बत् के़लॽबा पाःन्‍निन् मे़घे़प्‍सुआङ् साॽरिक् खुन्‍छिॽ याःक्‍ले़ॽरे़॥

8 हे़क्‍क्‍याङ् खे़ङ्‌हाॽ के़रे़क् तामाआङ् यरुसले़मओ थङ् चोःक्‍मा खे़ब्‍याङ् हयङ् किल्‍लिङ् चोःक्‍मा चे़म्‍फन् मे़जोगु॥

9 कर आनिगे निङ्‌वाॽफुमाङ्‌ङिन् पेलि फाक्‍तुम्‍बे़ हे़क्‍क्‍याङ् से़न्‍दिक् ले़न्‍दिक् ये़क्‌यक्‍किन् कम्‍ब्राङ् मे़प्‍पाङ्‌मनासिरो॥

10 यहुदाबा मनाहाॽरे़ मे़बाःत्तुरो, “कक् के़गुबाहाॽ मे़न्‍धुम्‍मनाबा मे़बोङ्‌ल मे़बत्‍लो, हे़क्‍क्‍याङ् साप्‍चेःक्‍हाॽ यरिक् ने़रो, आनिॽ आप्‍फेक् लुङ्‌धाक्‍किन् से़प्‍मा आन्‍छुक्‍तुम्‍मिल्‍लो॥”

11 आनिगे निङ्‌मिहाॽरे़आङ् मे़बाःत्तु, “खे़ङ्‌हाॽरे़ निङ्‌वाॽ खोमानु तगिए इग्र निमानु तगिए आनिगे खे़ङ्‌हाॽ फत्तुम्‍सिबे़आङ् खे़ङ्‌हाॽ से़रुम्‍सिम्‍बे़ हे़क्‍क्‍याङ् कन् याःम्‍बक्‍किन्‍नाङ् चोःक्‍मा मे़भाःक्‍तुम्‍सिम्‍बे़न्॥”

12 कर निङ्‌मिहाॽरे़ खुनिॽ लुम्‍मो के़वाॽबा यहुदिहाॽ मे़द्‌ये़, हे़क्‍क्‍याङ् खे़ङ्‌हाॽरे़ आनिगे ये़त्‍ले़ङ् ये़त्‍ले़ङ् के़रे़क् पिसाङ्‌लाम् फप्‍मासिआङ् थङ् चोःक्‍मा चे़म्‍फन् मे़जोगुर मे़याक् मे़मे़त्तिगे़॥

13 खे़ल्‍ले़चोगुल्‍ले़ आङ्‌गाॽ मनाहाॽ ताभे, लाःक् नु लि तोङ् हेमाआङ् आबाङे थाःक् कुइसिक् लुङ्‌धाक् से़प्‍मा मे़न्‍जुःत्तेबा ते़न्‍हाॽओ इक् के़गोबाहाॽ ये़प्‍सुङ्‌सिङ्॥

14 आङ्‌गाॽ के़रे़क् ओमे़त्तुङ्, हे़क्‍क्‍याङ् ये़म्‍सिङ्‌ङाङ्‌ङाङ् लाम्‍लोबाहाॽ, सुहाङ्‌युक्‍पाहाॽ हे़क्‍क्‍याङ् वेॽ मनाहाॽ मे़त्तुङ्‌सिङ्, “खे़ङ्‌हाॽनु मे़गिसे़म्‍मिन्‍ने़ॽ॥ पयम् यम्‍बा किप्‍मा के़घुबा यहवे दाङ्‌बान् निङ्‌वाॽ इःत्ते़म्‍मे़ॽ॥ हे़क्‍क्‍याङ् आबाङे फुॽनुसाॽ, मेःत् सा नु हिम्‍धाःङ्‌ले़ लागि थङ् थक्‍ते़म्‍मे़ॽ॥”

15 आनिगे के़रे़क् पाःन्‍हाॽ निङ्‌वाॽ खोसुम्‍बे़ के़लॽबा पाःन्‍हाॽ निङ्‌मिहाॽरे़ मे़घे़प्‍सु, हे़क्‍क्‍याङ् निङ्‌मिहाॽरे़ मे़जोगुबा चे़म्‍फन्‍निन् निङ्‌वाॽफुमाङ्‌ङिल्‍ले़ कुसुम् मे़न्‍दम्‍मनाबा चोगु पिरुसि फाॽआङ् निङ्‌वाॽ मे़घोसु॥ खे़ब्‍याङ् याम्‍मो आनिगे के़रे़क् लुङ्‌धाक् से़प्‍मा याःम्‍बक्‍को फन्‍नासिगे़॥

16 खे़न् एगाङ् कुभ्रे़ःङ् यारिक् आमनाहाॽरे़ याःम्‍बक् मे़जोगु हे़क्‍क्‍याङ् कुभ्रे़ःङ्‌ले़ग से़ःप्‍चाङ् मे़जाक्‍सिङ्‌ङाङ् लाःक्, खो हे़क्‍क्‍याङ् तोङ् लि मे़याङ्‌सिङ्‌ङाङ् ओमे़मे़त्तुसि॥ आनिगे यहुदाबा याःम्‍बक् के़जोःक्‍पाहाॽ खुन्‍छिॽ एगाङ् सुहाङ्‌युक्‍पाहाॽरे़ कम्‍ब्राङ् मे़मे़त्तुसि॥

17 लुङ्‌धाक् के़से़प्‍पाहाॽरे़आङ् थिक् हुक्‍किल्‍ले़ याःम्‍बक् मे़जोगु हे़क्‍क्‍याङ् वेॽ हुक्‍किल्‍ले़ फे़जुम्‍भे़या मे़याङ्‌सिङ्॥

18 हे़क्‍क्‍याङ् याःम्‍बक् के़जोःक्‍पा के़रे़क् मनाहाॽ ताभे मे़हेॽसिङ्‌ङाङ् याःम्‍बक् मे़जोगे़॥ थुत्तुरिःप्‍पा के़मुःप्‍पा मनाःन्‍नाङ् आङ्‌गाॽनु सोरिक्‍के वये़॥

19 हे़क्‍क्‍याङ् लाम्‍लोबाहाॽ, सुहाङ्‌युक्‍पाहाॽ नु के़रे़क् मनाहाॽ आङ्‌गाॽ मे़त्तुङ्‌सिङ्, “याःम्‍बक्‍किन् यम्‍बा नु माःङ्‌घा थारिक् पोरे़बेआङ् ने़ःॽ हे़क्‍क्‍याङ् लुङ्‌धाक् सम्‍धाङ् आनिॽ माःङ्‌घा माःङ्‌घा आवाॽ॥

20 हे़क्‍केःल्‍ले़ थुत्तुरिःप्‍पा इक्‍लान् खिनिॽ आत्ति मुक्‍पा के़घे़प्‍सुम्, के़रे़क् पिसाङ्‌लाम् आङ्‌गाॽ वाॽआबा ते़न्‍नो चुप्‍से़म्‍मे़ॽ॥ आनिॽ निङ्‌वाॽफुमाङ्‌ङिन् आनिॽ लागि थङ् चोक्॥”

21 अक्‍खेलॽरिक् थिक्‌याःन्‍धक् तानाम् नाम् के़रे़आङ्‌धो से़न्‍दिक् खेसे खेःम्‍सिक् मे़न्‍लिङ्‌ङे थारिक् आनिगे कुभ्रे़ःङ् मनाहाॽरे़ लुङ्‌धाक्‍को याःम्‍बक् मे़जोगु हे़क्‍क्‍याङ् कुभ्रे़ःङ् मनाहाॽ लाःक् मे़याङ्‌सिङ्‌ङाङ् खे़ङ्‌हाॽ मे़गोसुसि॥

22 खे़न् ये़म्‍मो आङ्‌गाॽ मनाहाॽ अक्‍खेआङ् मे़त्तुङ्‌सिङ्, “से़न्‍दिक् आनिगे कम्‍ब्राङ् मे़प्‍मारे़ लागि हे़क्‍क्‍याङ् ले़न्‍दिक् लुङ्‌धाक् से़प्‍मारे़ लागि के़रे़क् मनाहाॽ हे़क्‍क्‍याङ् याःम्‍बक् चोःक्‍मा के़भाॽबाहाॽ यरुसले़ःम्‍मोए इम्‍मा याःक्‍मा पोङ्॥”

23 आङ्‌गाॽ, आन्‍देङ् आन्‍जुम्, आसे़वारोबा नु आङ्‌गाॽनु के़वाॽबा याप्‍मि कम्‍ब्राङ् के़मे़प्‍पाहाॽरे़आङ् चाक्‍खुम्‍बे़बा चाङ्‌देःत्‍हाॽ से़न्‍दिक् मे़भे़न्‍दुम्‍बे़न्॥ च्‍वाःत् थुङ्‌से़ पेःक्‍मनासाङ् के़रे़क्‍ले़ हुक्‍को फे़जाभे़युम्‍हाॽ कत्तुम्‍बे़रो॥

© 2009, 2023, Wycliffe Bible Translators, Inc. All rights reserved.

Wycliffe Bible Translators, Inc.
Swiv nou:



Piblisite