नहेम्याह 3 - लिम्बुयाम्मो चोःक्मा याःम्बक् 1 तुम् निङ्वाॽफुसाम्बा एल्यासिबे़न् नु निङ्वाॽफुसाम्बा कुन्जुम्हाॽ मे़दङ्सिङ्ङाङ् मे़ल्लुक् लाम्धेःप्पान् मे़जोगु, हे़क्क्याङ् खे़ॽयोबा पयम् लाम्धेःप्पाहाॽ मे़जोगु॥ हे़क्केलॽरिक् खे़ङ्हाॽरे़ लुङ्धाक्किन् किप्थिक् चङ्हिम् मे़प्मनाबा नु हननेलरे़ कुजङ्हिम् थारिक् चाःङ्वा मे़मे़त्तुर मे़देॽरु हे़क्क्याङ् खे़न्निन् मे़जोगुआङ् मे़दोन्दु॥ 2 खे़न्नु सोसोरिक् के़दुम्बा वेॽ लक्किन् यरिहोबा मनाहाॽरे़ मे़जोगु, हे़क्क्याङ् खे़न् एगाङ् वेॽसमा लक्किन् इम्रिरे़ कुस्सा जक्कुरे़ल्ले़ चोगु॥ 3 हस्सेनाःल्ले़ कुस्साहाॽरे़ ङा पयम् लाम्धेःप्पान् मे़जोगु॥ खे़ङ्हाॽरे़ पे़रे़म्सिङ्हाॽ मे़ने़स्सुआङ् लाम्धेःत्हाॽरे़ कुसुप्मा कुए़प्मा नु आग्लोहाॽ मे़याक्तु॥ 4 खे़न् एगाङ्बा लक्किन् हक्कोसरे़ कुम्मे़न्छाॽ, उरियाःल्ले़ कुस्सा मरेमोतरे़ चोगु॥ मेसेजेबेलरे़ कुम्मे़न्छाॽ, बेरेक्याहरे़ कुस्सा मसुल्लामरे़ खे़न् एगाङ्बा लक्किन् चाःङ्वा मे़त्तु॥ खे़न्नाङ्धोबा एगाङ्बा लक्किन् बानारे़ कुस्सा सादोकरे़ चोगु॥ 5 खे़न् एगाङ् तकोबा मनाहाॽरे़ वेॽ लक्किन् मे़जोगु, कर खे़न् ये़क्यक्को हाङ्याःम्बक् के़जोःक्पाहाॽ याःम्बक् चोःक्मा के़बाङ्बा लाम्लोबाहाॽरे़ मुरामे़मे़त्तुसिबा हे़क्के तङ्माआङ् याःम्बक् चोःक्मा मे़न्दे़न्दे़न्॥ 6 पसेहरे़ कुस्सा योयादा नु बसोदयारे़ कुस्सा मसुल्लामरे़ येसना लाम्धेःप्पान् चोगे़त्छु, खे़ङ्हाॽरे़ पे़रे़म्सिङ्हाॽ हे़क्क्याङ् लाम्धेःत्हाॽ युक्खे़सुआङ् लाम्धेःत्हाॽ साक्मा नु आग्लोहाॽ याक्ते़छु॥ 7 खे़ल्ले़ कुबेसाङ् गिबोनबा मलत्या, मेरोनोतबा यादान हे़क्क्याङ् गिबोन नु मिस्पाबा मनाहाॽरे़ युफ्रेतिस नाम्धा पिसाङ् ले़प्माङ्बा ते़ङ्गप्पोबा तुम् सुहाङ्युक्पाल्ले़ कुहिम्मो थारिक् मे़जोगु मे़देॽरु॥ 8 साम्म्याङ् के़धक्पा हरयाहरे़ कुस्सा उज्जिएलरे़ खे़न् एगाङ्बा लक्किन् चोगु॥ फुङ्नाम् के़जोःक्पा हनन्यारे़ वेॽसमा लक्किन् चोगुआङ् फे़भे़बा लुङ्धाक् थारिक् के़त्तु॥ 9 खे़ल्ले़ कुएगाङ्बा लक्किन् हुरले़ कुस्सा रपायाहःल्ले़ चोगु॥ खुने़ॽ यरुसले़म थुम्मिल्ले़ कुभ्रे़ःङ् थुम्मो हाङ् के़जोःक्पा वये़॥ 10 खे़न्नु के़दुम्बा लक्किन् हारुमापरे़ कुस्सा यदायाःल्ले़ चोगु॥ खे़न् खुने़ॽ कुहिम्मिल्ले़ कुएगाङ् ले़प्माङ् ने़स्से़॥ खे़न् एगाङ्बा वेॽसमा लक्किन् हसबन्याहःल्ले़ कुस्सा हत्तुसरे़ चोगु॥ 11 खे़न् एगाङ् निसिगेक्पा लक्किन् हे़क्क्याङ् मिहाःत्लुङ् चङ्हिम्मिन् हारिम्ले़ कुस्सा मल्कियाह नु पहत-मोआबरे़ कुस्सा हस्सुबरे़ चोगे़त्छु॥ 12 खे़न् एगाङ्बा वेॽसमा लक्किन् हल्लोहेसरे़ कुस्सा सल्लुमरे़ चोगु॥ खुने़ॽ यरुसले़मरे़ कुभ्रे़ःङ् थुम्मो युक् चोगु (खुने़ॽ कुस्सा मे़न्छुमाहाॽरे़ कुयाःम्बक्को मे़भाॽरु॥) 13 ने़ने़बा पयम् लाम्धेःत्ते़न् हानुन नु जानोह ये़क्यक्को के़युङ्बाहाॽरे़ मे़जोगु॥ खे़ङ्हाॽरे़ लाम्धेःप्पाहाॽ मे़ये़प्सु, खे़न् लाम्धेःप्पाहाॽ साक्मा ए़प्मारे़ लागि आग्लोहाॽ मे़याक्तु हे़क्क्याङ् ४४० मितर लुङ्धाक्किन् चाःङ्वा मे़मे़त्तुआङ् ताम् लाम्फेमा लाम्धेत् थारिक् मे़गे़त्तु॥ 14 ताम् लाम्फेमा पयम् लाम्धेःप्पे़ङ्ग बेथ-हक्केरेम थुम्मोबा हाङ्युक्पा रेकाबरे़ कुस्सा मल्कियाहरे़ चोगु॥ खुने़ॽ लाम्धेःप्पाहाॽ ये़प्सुआङ् खे़न् साक्मा ए़प्मारे़ लागि आग्लोहाॽ केःत्तु॥ 15 मिस्पा थुम्मोबा हाङ्युक्पा कोल-होजेरे़ कुस्सा सल्लुनरे़ वधाःम् लाम्धेःप्पे़न् चोगु॥ खुने़ॽ लाम्धेःप्पो लाःप्मा लाम्धेःप्पाल्ले़ कुसम्धाङ् लिङ्घाम्बुःन् खाप्तु, लाम्धेःप्पाहाॽ ये़प्सुआङ् खे़ङ्हाॽ ए़प्मा नु सुप्मारे़ लागि आग्लोहाॽ केःत्तु॥ सिलोआम वाबाक्किल्ले़ कुबेसाङ् हाङ्ङिल्ले़ कुभुङ्इक् निःत्ताङ्बा लुङ्धाक्किन् से़त्तुआङ् खुने़ॽ दाउद हाङ्ङिल्ले़ कुये़क्यक्को लाःप्मा नाहाङसेःक्हाॽओ थारिक् चाःङ्वा मे़त्तु॥ 16 बेथ-सर थुम् कुभ्रे़ःङ् युक् के़जोःक्पा हाङ्युक्पा अज्बुकरे़ कुस्सा नहेम्याहःल्ले़ दाउदरे़ कुःइप्पुङ्ङिल्ले़ कुदगाङ्बा ते़न्निन्, चोःक्मनाबा वरक् नु थक्सुबा तुराहिम् थारिक् चाःङ्वा मे़त्तुआङ् तेॽरुरो॥ लुङ्धाक्को याःम्बक् के़जोःक्पा ले़बिहाॽ 17 खे़न् एगाङ् लुङ्धाक्कोबा वेॽ लक्हाॽ कन् ले़बिहाॽरे़ चाःङ्वा मे़मे़त्तु—बानिःल्ले़ कुस्सा रेहुमरे़ थिक् लक्किन्, किलाह थुम्मो कुभ्रे़ःङ् हाङ्युक् के़जोःक्पा हसब्याहरे़ वेॽसमा लक्किन् चोगु॥ 18 किलाह थुम्मो कुभ्रे़ःङ् हाङ्युक् के़जोःक्पा हेनादादरे़ कुस्सा बिन्नुइरे़ वेॽसमा लक्किन् चोगु॥ 19 हे़क्क्याङ् निसिगेक्पा लक्किन् मिस्पाबा हाङ्युक्पा येसुअरे़ कुस्सा एसेरे़ल्ले़ खजुम्घया फे़जुम्भे़या युङ्मादे़न् तक्ले़प्माङ्बा लक्किन् चाःङ्वा मे़त्तुआङ् लुङ्धाक्किन् के़इबादे़न्नो थारिक् चोगु तेॽरु॥ 20 के़इबा लुङ्धाक्लाम्बा तुम् निङ्वाॽफुसाम्बा एल्यासिबरे़ कुहिम्मो लाःप्मा लाम्धेत् थारिक् निसिगेक्पा लक्किन् जब्बैरे़ कुस्सा बारुके़ल्ले़ कुसिक् पसम्समे़र चोगु॥ 21 हे़क्क्याङ् निसिगेक्पा लक्किन् एल्यासिबरे़ कुहिम्मो लाःप्मा लाम्धेःत्लाम् खे़न् हिम्मिल्ले़ कुबेसाङ् थारिक् हक्कोसरे़ कुम्मे़न्छाॽ, उरियाहःल्ले़ कुस्सा मरेमोतरे़ चोगुरो॥ 22 खे़न्नाङ्धोबा लुङ्धाक् लक्हाॽ यरुसले़म कुया पेसाङ् के़युङ्बा निङ्वाॽफुसाम्बाहाॽरे़ मे़जोगु— 23 बेन्यामिन नु हस्सुबरे़ आबाङे खुन्छिॽ हिम् तगिबा लक्किन् चोगे़त्छु॥ हननियाःल्ले़ कुम्मे़न्छाॽ, मासेयाहःल्ले़ कुस्सा अजर्याहःल्ले़ आप्फेक् कुहिम् तगिबा लक्किन् चोगु॥ 24 अजर्याहःल्ले़ कुहिम्मोनु के़इबा निसिगेक्पा लुङ्धाक्किल्ले़ कुसुक्पो थारिक् हेनादादरे़ कुस्सा बिन्नुइरे़ चोगु॥ 25 खे़ल्ले़ कुसुक्पोलाम् कम्ब्राङ्हाॽरे़ खुनिॽ लक्खुम् पेसाङ् हाङ्हिम्मोबा थोसमा चङ्हिम् थारिक् उज्जैरे कुस्सा पालालरे़ चोगु॥ खे़ल्ले़ कुयाओ परोसरे़ कुस्सा पदायाहःन् 26 नु ओफेल थे़गुओ के़युङ्बा माङ्हिम् से़वारोबाहाॽरे़ नाङ्गे़न् ले़प्माङ्बा च्वाःत् लाम्धेःपान् नु माङ्हिम्मिन् से़ःप्मारे़ लागि चोःक्मनाबा चङ्हिम् थारिक् मे़जोगुरो॥ 27 तकोओबा मनाहाॽरे़ माङ्हिम्मिन् से़ःप्मारे़ लागि चोःक्मनाबा यम्बा चङ्हिम्मिल्ले़ कुदक्कोलाम् ओफेलरे़ कुबेसाङ्बा लुङ्धाक्किल्ले़ निसिगेक्पा लक् थारिक् मे़जोगु॥ 28 कुलुप्थिक् निङ्वाॽफुसाम्बाहाॽरे़ आबाङे खुनिॽ हिम् तगिबा अन् लाम्धेःप्पोलाम् थोहाङ् ले़प्माङ्बा लक्किन् मे़जोगु॥ 29 इम्मेररे़ कुस्सा सादोके़ल्ले़ आप्फेक् कुहिम् तगिबा लक्किन् चोगु॥ नाङ्गे़न् पिसाङ् लाम्धेत् के़गोबा सकन्याहःल्ले़ कुस्सा सेमायाहःल्ले़ खे़ल्ले़ कुबेसाङ्बा लक्किन् चोगु॥ 30 सेलेम्याहःल्ले़ कुस्सा हनन्याह नु सालापरे़ कुस्सा जन्तर्या हानुनरे़ निसिगेक्पा लक्किन् चोगे़त्छु॥ बेरेक्याहःल्ले़ कुस्सा मसुल्लामरे़ कुयुङ्मादे़न्नोबा निसिगेक्पा लक्किन् चोगु॥ 31 मल्कियाह मे़प्मनाबा साम्म्याङ् के़धक्पाल्ले़ माङ्हिम्मो याःम्बक् के़जोःक्पाहाॽ हे़क्क्याङ् ले़ङ्हङ् के़जोःक्पाबाहाॽरे़ खुन्छिॽ हिम्, चुम्लुङ् चोःक्मा लाम्धेत् नु थोसमा याक्फाङ् थारिक् चोगु॥ 32 हे़क्क्याङ् खे़न् याक्फाङ्लाम् मे़ल्लुक् लाम्धेःप्पो थारिक्पा कुनुप्मा लक्किङ्ग साम्म्याङ् के़धक्पा नु ले़ङ्हङ् के़जोःक्पाहाॽरे़ मे़जोगुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.