नहेम्याह 2 - लिम्बुनहेम्याहन् यरुसले़ःम्मो पेक् 1 अर्तासास्त हाङ्ङिल्ले़ हाङ्युक् चोगुबा निबोङ् तङ्बे के़रे़ल्ले़ निसान लाओ थिक्यान् साभःङ्जाओ युङे़बा ये़म्मो आङ्गाॽ सेजङ्वान् खुने़ॽ कुदगि तोःन्दुङ्॥ खुने़ॽ कुदगि आप्फाल्ले़आङ् आङ्गाॽ आना मे़म्माक्के वये़॥ 2 हे़क्केःल्ले़ खुने़ॽ सेःन्दोसाङ्, “खे़ने़ॽ के़याम् तुक्पाग निमे़दे़त्ने़न् हे़क्केसाङ् थेआङ् के़नामाक्पाबे? खे़ने़ॽ से़क्खासाङ् निङ्वाॽ तुक्खे चामो के़ध्ये़आङ् के़वाॽ॥” आङ्गाॽ साॽरिक् आयङ्मा के़रे़आङ् 3 अक्खेलॽरिक् नुगप् पिरुङ्, “हाङ्ङिल्ले़ कुधाःक् चाॽररो, आङ्गाॽ आधाःक्हाॽ मे़लुप्तुसिबा ये़क्यक्किन् खाप्पुथ्यःङ् पोःक्खे़आङ् ने़ःॽ हे़क्क्याङ् खे़ॽयोबा यम्बयम्बा लाम्धेःत्हाॽ मिःल्ले़ खाप्पुथ्यःङ् चोगुआङ् ने़ःॽ हे़क्केःल्ले़ आङ्गाॽ आक्खेआङ् कुनागे़माक्पा मे़धाःप्पान्बे?” 4 हाङ्ङिल्ले़ सेःन्दोसाङ्, “खे़ने़ॽ थे निङ्वाॽ के़जोगुबे?” हे़क्केःल्ले़ आङ्गाॽ साङ्ग्राम्पेदाङ्बा निङ्वाॽफुमाङ्ङिन् पेलि फाक्तुङ् 5 हे़क्क्याङ् हाङ्ङिन् मे़त्तुङ्, “हाङ्ङिन् आङ्गाॽनु के़निङ्वाॽ त्ये़आङ् के़से़वारोबाल्ले़ कुबेलिन् के़घे़प्सुने़भग्र आङ्गाॽ यहुदा लाजेॽओ पेःक्मा फाःक्ताङ्ङे़ॽओ, खे़प्मो आङ्गाॽ आधाःक्हाॽ मे़लुप्तुसिआङ् के़ने़बा ये़क्यक्किन् याम्मो कुसङ् चोःक्मा खोसुङ्लरो॥” 6 हाङ्ङिल्ले़ आङ्गाॽ आबेलिन् खे़प्सु॥ हाङ्माःन्नाङ् खुने़ॽनु वये़॥ हाङ्ङिल्ले़ सेःन्दोसाङ्, “खे़ने़ॽ आक्खे़न् ये़न्ले़ लागि के़बेःक्पा हे़क्क्याङ् आभे़ल्ले़ थारिक्ले़ के़नुःङ्?” आङ्गाॽ कम्भ थारिक्ले़ नुःङ्ङा फाॽआङ् हाङ्ङिन् के़रे़क् चे़क्तुङ्॥ 7 खे़न् एगाङ् आङ्गाॽ यहुदा लाजेॽ थारिक् पेःक्मा खोसुङ्ल फाॽआङ् युफ्रेतिस वहःङ् नाधाःम्बि नाम्धा पिसाङ्बा ते़ङ्गप्पोबा हाङ्युक्पाहाॽरे़ खुनिॽ मिङ्ङो साप्मनाबा इङ्जाङ् सक्हाॽ हाङ्ङिन् नाःक्तुङ्॥ 8 माङ्हिम्मिन् कम्ब्राङ् मे़प्मारे़ लागि मे़जोगुबा चङ्हिम्मोबा लाम्धेत् हे़क्क्याङ् यम्बा लाम्धेःत्हाॽ चोःक्मा, ये़क्यक्कोबा लुङ्धाक्हाॽ से़प्मा नु आङ्गाॽ आयुङ्मा हिम्मिन् चोःक्मारे़ लागि चाहाब् के़जोःक्पा सिङ्हाॽ पिआर फाॽआङ् हाङ्ङिल्ले़ के़दाम्भुङ् लक्कोबा सुहाङ्युक्पा आसापे़न् इङ्जाङ्-सक् थिक् साप्ताङ् पिराङ्ङे़ॽ॥ आङ्गाॽ नाःक्तुङ्बा के़रे़क् पाःन्हाॽ हाङ्ङिल्ले़ पिराङ् थेआङ्भे़ल्ले़ निङ्वाॽफुमाङ्ङिन् आङ्गाॽनु वये़॥ 9 हाङ्ङिल्ले़ आङ्गाॽनु सोरिक् पेःक्मारे़ लागि कुभा अन् के़लोङ्बा नु सुहाङ्युक्पाहाॽ आङ्गाॽओ पाङ्घुसि हे़क्क्याङ् आङ्गाॽ युफ्रेतिस नाधाःम्बि नाम्धा पिसाङ्बा ते़ङ्गप्पो के़राङ्॥ हाङ्ङिल्ले़ कुइङ्जाङ् सक्हाॽ आङ्गाॽ खे़न् ते़ङ्गप्पोबा सुहाङ्युक्पाहाॽ पिरुङ्सिङ्॥ 10 कर बेथ-होरोन ये़क्यक्को के़युङ्बा सन्बलत नु अम्मोन ते़ङ्गप्पोबा तोबिया मिङ् के़वाःप्पा सुहाङ्युक्पा ने़त्छि इस्राइलबा मनाहाॽरे़ खुनिॽ नुरिक् मे़त्छे़ कुभा मनाधिक् त्ये़आङ् वाॽ के़लॽबा पान् खे़प्से़सुआङ् खुन्छिॽ साॽरिक् याःक्ले़ॽरे़॥ 11 आङ्गाॽ यरुसले़ःम्मो के़राङ्ङाङ् खे़प्मो सुम्ये़न् थारिक् वयाङ्॥ 12 हे़क्क्याङ् आङ्गाॽ निङ्वाॽफुमाङ्ङिल्ले़ यरुसले़ःम्मो थे चोःक्से़ पाङ्घाङ्बा फाॽआङ् खे़ल्ले़ कुयाःम्बेओ हाःत्ताङ् थेआङ् मे़म्मे़त्छिङ्बा॥ खे़ब्याङ् से़त्लुम्भक्ते़ल्ले़ कुभा मनाहाॽ चुम् तेॽरुङ्सिङ्ङाङ् आङ्गाॽ लाःक्कात् लःन्दाङ्॥ आङ्गाॽ युक्तुङ्बा लत्छा अदङ्धिक्लक् वये़ वेॽ थक्सा आनिगे मे़गत्तुम्बे़न्॥ 13 नाम्धा ले़प्माङ्बा ने़ने़बाओबा यम्बा लाम्धाःप्पोलाम् आङ्गाॽ से़न्दिक् ये़क्यक्लाम्बा लःन्दाङ्॥ योहाङ् ले़प्माङ् आजाजाबा मे़प्मनाबा वाबुन्निन् ले़क्तुङ्ङाङ् आङ्गाॽ ताम् लाप्फेमा यम्बा लाम्धाःत् थारिक् पेगाङ्॥ लाम्मो आङ्गाॽ ये़क्यक्कोबा के़लुःम्बा लुङ्धाक् नु मिःल्ले़ मिधिक्खुबा यम्बा लाम्धेःप्पाहाॽ ओमे़त्तुङ्ङाङ् अक्खे साॽरुङ्॥ 14 हे़क्क्याङ् ये़क्यक्को नाङ्गे़न् पिसाङ् ले़प्माङ्बा वधाःम् लाम्धेत् नु हाङ्-वरक् थारिक् के़राङ्॥ खे़प्मो आङ्गाॽ युक्तुङ्बा अदङ्ङिल्ले़ लाङ्घेःक्मा पेःक्मा लाम् मे़घोसुन्॥ 15 खे़ल्ले़चोगुल्ले़ आङ्गाॽ सङ्माङ् किद्रोनबा ने़ने़बादे़न्नो पेगाङ्ङाङ् लुङ्धाक्हाॽ ओमे़त्तुङ्ल आबाङे तगि पेगाङ्॥ खे़न् एगाङ् हाबा खे़न् लाम् पोःक्खाङ्ङाङ् आङ्गाॽ नुःक्खाङ् हे़क्क्याङ् ने़ने़बादे़न्नोबा ताःक्हन्लाम्बा ये़क्यक्को लासाङ्॥ 16 आङ्गाॽ आत्तान् पेगाङ् हे़क्क्याङ् थे चोगुङ्, ये़क्यक्कोबा आत्तिन् सुहाङ्युक्पाहाॽरे़आङ् निङ्वाॽ मे़ङ्घोसुन्॥ आङ्गाॽ आल्लो थारिक् यहुदि फुॽनुसाॽहाॽ निङ्वाॽफुसाम्बाहाॽ, लाम्लोबाहाॽ, सुहाङ्युक्पाहाॽ हे़क्क्याङ् ताःन्दि कन् याःम्बक् के़जोःक्पा आत्तिन्हाॽआङ् थेआङ् मे़म्मे़त्छिङ्ङे वयाङ्॥ 17 हे़क्केःल्ले़ कुनुप्मो आङ्गाॽ खे़ङ्हाॽ मे़त्तुङ्सिङ्, “ओमे़त्ते़म्मे़ॽ, आनिॽ आक्तङ्बा तुक्खेओ आवाॽ, यरुसले़ःम्मिन् लुःन्दे़आङ् ने़ःॽ, खे़ॽयोबा लाम्धेःप्पाहाॽ मिःल्ले़ खाप्पुथ्यःङ् पोःक्खे़आङ् ने़ःॽ॥ आल्ल, ये़क्यक्कोबा लुङ्धाक्हाॽ याम्मो से़त्तुम्माङ् कुसङ् चोगुम् हे़क्क्याङ् आनिॽ नाधामा मे़बोङ्ने़ल्ल॥” 18 निङ्वाॽफुमाङ्ङिल्ले़ आङ्गाॽ आक्खेलॽरिक् फाॽराङ्, हे़क्क्याङ् हाङ्ङिल्ले़ आङ्गाॽ थे मे़त्ताङ्ङाङ् वये़ के़लॽबा के़रे़क् पाःन्हाॽ खे़ङ्हाॽ मे़त्तुङ्सिङ्॥ खे़ङ्हाॽरे़ नुगप् मे़बिराङ्, “आनिॽ याम्मो ये़क्यक् नु लुङ्धाक्हाॽ से़प्मा चोःक्मा याःम्बक्किन् हेःक्तुम्॥” हे़क्क्याङ् खे़ङ्हाॽरे़ नुबा याःम्बक् चोःक्मा मे़हेःक्तु॥ 19 कर बेथ-होरोनबा सन्बलत, अम्मोनबा तोबिया नु गेसेम मिङ् के़वाःप्पा अरबिधिक्ले़ आनिगे थे चोःक्मा इःत्तुम्बे़आङ् वाॽ के़लॽबान् मे़घे़प्सु, हे़क्क्याङ् खे़ङ्हाॽरे़ आनिगे कुनामे़न्छाॽ मे़मे़त्तिगे़आङ् मे़बाःत्तु, “खिनिॽ थे चोःक्मा के़इःत्तुम्माङ् के़वयि? थे खिनिॽ हाङ्ङिल्ले़ कुदक्ले़ङ्वाओ पिफ्युङ् के़जोगुम्बाबि?” 20 आङ्गाॽ नुगप् पिरुङ्सिङ्, “साङ्ग्राम्पेदाङ्बा निङ्वाॽफुमाङ्ङिल्ले़ आनिगे कुलिङ्दो के़गे़प्पा चोगिगे़॥ आनिगे खुने़ॽ कुसे़वारोबासिगे़ हे़क्क्याङ् ये़क्यक् नु लुङ्धाक्किन् से़प्मा याःम्बक्किन् चोगुम्बे़॥ कर यरुसले़ःम्मोबा साप्मुःन्धुम्मो खिनिॽ लक् नु युक् थेआङ् होप्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.