नहेम्याह 13 - लिम्बुनहेम्याहरे़ कुनुप्मो तोःन्दुबा 1 मोसारे़ कुसाप्पन्निन् मनाहाॽरे़ खुनिॽ तगि मे़घे़प्सुर मे़निरुल्ले़ खे़ङ्हाॽरे़ अक्तङ्बा पान् साप्ते़आङ् पत्छे़बा मे़घोसु, अम्मोनि नु मोआबिहाॽ निङ्वाॽफुमाङ्ङिल्ले़ कुमनाहाॽनु फुत्छिङ्मा मे़नुॽने़न्॥ 2 मिस्र लाजेॽलाम्बा इस्राइलिहाॽ मे़लःन्दे़आङ् लाम्दिःक्को मे़भे़रे़ल्ले़ अम्मोनि नु मोआबिहाॽरे़ इस्राइलिहाॽ थेआङ् चामा थुङ्मा मे़म्बिरुन्सिन्, खे़ल्ले़ कुले़क्वा खे़ङ्हाॽरे़ इस्राइलिहाॽ माङ्दे साक्मुरा मे़प्मासिरे़ लागि बालाम्मिन् नाम्याक् मे़बिरुआङ् वये़॥ कर आनिॽ निङ्वाॽफुमाङ्ङिल्ले़ खे़न् साक्मुरा माङ्देन् हाङ्वा माङ्वा पोःक्खे़र चोगु आबिरे़आङ् वये़॥ 3 साम्योथिम् इङ्जाङ्ङोबा कन् चोःक्थिम्मिन् मे़घे़प्सुआङ् इस्राइलिहाॽरे़ वेॽ लाजेॽबा थाःक्कोलाम् के़दाबा के़रे़क् के़बःम्बा सुवाङ्हाॽ आबाङे सङ्जुम्भोओनु मे़लःत्तु मे़देसुसिरो॥ नहेम्याहःल्ले़ तोःन्दुबा कुयाःम्बक्हाॽ 4 हे़क्के पोङ्मानुःल्ले़ तगि निङ्वाॽफुसाम्बा एल्यासिबे़न् माङ्हिम्मोबा कुजा युङ्मादे़न्हाॽ ओगे़मे़प्पा मे़जोगुआङ् वये़॥ खुने़ॽ तोबियाःन्नु साॽरिक् नुरिक् तङे़आङ् वये़॥ 5 खुने़ॽ माङ्हिम्मोबा यम्बा कुजा युङ्मादे़न्धिक् ओगाप् चोःक्मारे़ लागि तोबियान् पिरु॥ तगि माङ्हिम्मो ताःप्मनाबा कुजा सिदुङ्जभा, सुक्पा, निङ्वाॽफुसाम्बाहाॽ पिमनासिबा सामाहाॽ, थिबोङ् लक्हाॽ हे़क्क्याङ् ले़बिहाॽ, साम्गे़लोबाहाॽ नु लाम्धेत् के़गोबाहाॽ पिमनासिबा कुजा थिबोङ् लक्हाॽ, चे़ल्ले़क्सेॽ थि, पे़ःङ्वालिःत्छेॽ निःङ्गेॽ नु थेयावयाहाॽ युङ्मारक् खे़न् याक्फाङ्ङिन् ओगाप् पोःक्खे़आङ् वये़॥ 6 हे़क्के पोःक्खे़ल्ले़ आङ्गाॽ यरुसले़ःम्मो होःप्ताङ्, थेआङ्भे़ल्ले़ अर्तासास्त हाङ्ङिल्ले़ हाङ् चोगुबा सुम्बोङ्ङाङ् ने़त्छि तङ्बेओ आङ्गाॽ बेबिलोन पेगाङ्ङाङ् वयाङ्॥ कुभा ये़म् एगाङ् आङ्गाॽ यरुसले़म नुःङ्मा पेलि फाक्तुङ्, 7 हे़क्क्याङ् यरुसले़ःम्मो नुःक्खाङ्॥ हे़क्केःल्ले़ एल्यासिबरे़ तोबियान् माङ्हिम्मोबा याक्फाङ्ङिन् पिरुबा ताप्फे़ःम्बा पाःन्निन् निसुङ्॥ 8 हे़क्क्याङ् आङ्गाॽ साॽरिक् आसिक् पोगे़आङ् कुजा युङ्मादे़न्नोलाम् तोबियाःल्ले़ कुसामाहाॽ के़रे़क् लाप्फुसुङ् पिरुङ्॥ 9 आङ्गाॽ माङ्हिम्मोबा याक्फाङ्हाॽ थिम् कुइसिक् सुत्थो चोःक्मा पाङ्घुङ्सिङ् हे़क्क्याङ् माङ्हिम्मोबा हुक्वा युङ्मा पोगुगे़न् कुजा, सुक्पाहाॽ नु सामाहाॽ सिप्पे़त् ने़प्पे़त् युङ्मा पाङ्घुङ्सिङ्लो॥ 10 माङ्हिम्मो साम्गे़लोबाहाॽ नु वेॽ ले़बिहाॽरे़ खोमा के़बोङ्बा हुक्वा कुजाहाॽ मनाहाॽरे़ पिमा मे़ले़रुसिआङ् वये़बान् निसुङ्॥ खे़ल्ले़चोगुल्ले़ माङ्हिम्मोबा खुन्छिॽ याःम्बक्हाॽ मे़ले़रुआङ् आबाङे खुनिॽ प्याङ्सिगे़न् इक्ताप्पो मे़नुःक्खे़ मे़बेआङ् मे़वाॽ के़लॽबाआङ् खे़प्सुङ्॥ 11 माङ्हिम्मो निङ्वाॽ पिमा मे़ले़रुबाल्ले़ चोगुल्ले़ सुहाङ्युक्पाहाॽ अक्खेलॽरिक् फे़ःक्तुङ्सिङ्, “निङ्वाॽफुमाङ्ङिल्ले़ कुहिम्मिन् थेआङ् कुनामे़न्छाॽ पोःक्खे़बाबे?” हे़क्क्याङ् खे़न् मनाहाॽ नुःक्तुङ् तारुङ्सिङ्ङाङ् याम्मो आबाङे खुनिॽ याःम्बक्को फत्छुङ्सिङ्॥ 12 हे़क्क्याङ् याम्मो इस्राइलबा के़रे़क् मनाहाॽरे़ माङ्हिम्मोबा कुजा युङ्मादे़न्नो पोगुगे़न् कुजा, चे़ल्ले़क्सेॽ थि हे़क्क्याङ् पे़ःङ्वालिःत्छेॽ निःङ्गेल्ले़ थिबोङ्लक् ताःप्मा मे़हेःक्तु॥ 13 कुजा युङ्मादे़न्निन् कम्ब्राङ् मे़प्मारे़ लागि निङ्वाॽफुसाम्बा सेलेम्याहन्, साम्योथिम्साम्बा सादोके़न् हे़क्क्याङ् ले़बि पदायाहन् आङ्गाॽ लक्पे़न् पिरुङ्सिङ्॥ जक्कुरे़ल्ले़ कुस्सा हे़क्क्याङ् मत्तन्याहरे़ कुम्मे़न्छाॽ हानाने़न् खे़ङ्हाॽरे़ खुनिॽ फोसाङ् फाॽबाङ् सेःक्युक् चोगुङ्ङाङ् वये़॥ कन् मनाहाॽरे़ नसाःन्साबा मे़बोङ्ङाङ् आबाङे खुनिॽ फाॽबाङ्हाॽ लुम्मो चुम्देङ्हाॽ के़रे़क् पाःन्हाॽ मे़त्तुसि के़लॽबा आङ्गाॽ कुसिङ् निःत्तुङ्ङाङ् वयाङ्॥ 14 आनिङ्वाॽफुमाङ्ङे, माङ्हिम्मिन् नु खे़प्मो चक्मे़ल्लॽए आङ्गाॽ चोगुङ्बा कन् के़रे़क् याःम्बक्हाॽ निङ्वाॽसोओ कत्ते़ॽओ॥ 15 खे़न् ये़म्मो आङ्गाॽ यहुदाबा कुभा मनाहाॽरे़ नाःम्सिङ्मा ये़न्नो चे़ल्ले़क्सेॽ मे़एःप्सुर मे़यागे़बा निसुङ्॥ वेॽ मनाहाॽरे़ पोगुगे़न् कुजा, चे़ल्ले़क्सेॽ थि, चे़ल्ले़क्सेॽ, पःत्छेॽ नु वेॽ पाःन्हाॽरे़ कक्हाॽ अदङ्हाॽ मे़गुःत्तुसिआङ् यरुसले़ःम्मो मे़देॽरुर मे़बत्छे़बा निसुङ्॥ आङ्गाॽ खे़ङ्हाॽ नाःम्सिङ्मा ये़न्नो थेआङ् कुजा सङ्मा मे़नुॽने़न् फाॽआङ् साम्दिङ् पिरुङ्सिङ्॥ 16 यरुसले़ःम्मो के़युङ्बा तुरोसबा मनाहाॽरे़आङ् नाःम्सिङ्मा ये़न्नो ङा नु वेॽ के़रे़क् परिक्पा चिगक्वाहाॽ यहुदाबा मनाहाॽओ सङ्से़ मे़दारु॥ 17 आङ्गाॽ यहुदाबा सुभाहाॽ फे़ःक्तुङ्सिङ्ङाङ् मे़त्तुङ्सिङ्, “थेआङ् खिनिॽ ताक्के़भे़ॽबा याःम्बक् के़जोगुम्माङ् नाःम्सिङ्मा ये़न्निन् आसुत्थो के़जोगुम्बाबे? 18 आम्भा अक्तङ्बा याःम्बक्हाॽ खिनिॽ सुधे़बा ताक्थे़बाहाॽरे़ मे़जोगुबाल्ले़ चोगुल्ले़ आनिॽ निङ्वाॽफुमाङ्ङिल्ले़ आनिॽओ नु कन् ये़क्यक्को तुक्खे तारुबा मेःम्बि? नाःम्सिङ्मा ये़न्निन् आसुत्थो के़जोगुम्माङ् आरसाङ् यरिक् निङ्वाॽफुमाङ्ङिल्ले़ कुसिक् के़भोःक्खुम्ल के़बत्छिरो॥” 19 नाःम्सिङ्मा ये़न्निन् हेःक्सिङ्बा युःन्छिक् पोङ्नुमे़ःन्ने ये़क्यक्कोबा यम्बा लाम्धेःप्पाहाॽ सुबे़म्मे़ॽ हे़क्क्याङ् नाःम्सिङ्मा ये़न्निन् मे़न्जुःत्ते थारिक् खे़न् मे़हन्दे़म्मिन्ने़ॽ फाॽआङ् आङ्गाॽ मे़त्तुङ्सिङ्॥ नाःम्सिङ्मा ये़न्नो चिगक्वानु ये़क्यक् सिगाङ् हाःत्ताङ् लाःप्मा मे़घोने़ल्ल फाॽआङ् ओमे़प्मारे़ लागि आङ्गाॽ कुभा आयाःम्बक् के़जोःक्पाहाॽ लाम्धेःप् हे़ङ्गात्ति ये़प्मा पाङ्घुङ्सिङ्ङाङ् वये़॥ 20 थिक्ले़ङ् निले़ङ् परिक् परिक्पा चिगक्वा के़सङ्बा ले़ङ्हङ्बाहाॽ ये़क्यक् लुङ्धाक् लाःक्कात् ले़प्माङ्ङे नाःम्सिङ्मा ये़न्निल्ले़ कुआन्छे़म्बा से़न्दिक् मे़इप्से़॥ 21 कर आङ्गाॽ खे़ङ्हाॽ पान् मे़त्तुङ्सिङ्, “खिनिॽ थेआङ् हे़क्केलॽरिक् लाःक्कात् के़ने़स्सिबाबे? याम्मो हे़क्के के़जोगुम्ने़भग्र आङ्गाॽ खिनिॽ के़साक्पा साम्बान् कुःत्निङ्॥” खे़न्नाङ्धो खे़ङ्हाॽ नाःम्सिङ्मा ये़न्नो तामा मे़नाॽरे़॥ 22 आङ्गाॽ ले़बिहाॽ आबाङे सुत्थो पोङ्मा, पेःक्माआङ् यम्बा लाम्धेःप्पान् कोमा नु नाःम्सिङ्मा ये़न्निन् सेसे कप्मा थिम्मिन् नुरिक्काङ् नाःप्मा इङ्जाङ् पिरुङ्सिङ्॥ आनिङ्वाॽफुमाङ्ङे, आङ्गाॽ आलागि कन् निङ्वाॽसोओ कत्ते़ॽओ हे़क्क्याङ् खे़ने़ॽ पयम् यम्बा के़मिःम्जिःल्ले़ आङ्गाॽ लुङ्माॽ तुक्ताङ्ङे़ॽओ॥ 23 खे़न् ये़म्मोआङ् यरिक् यहुदाबा ये़म्बित्छाहाॽरे़ अस्दोद, अम्मोन नु मोआबबा मे़न्छुमाहाॽ ते़न्धाम् मेःक्खिम् मे़मे़त्तुसिआङ् मे़वये़बा आङ्गाॽ निसुङ्॥ 24 खे़ङ्हाॽरे़ खुनिॽ कुभ्रे़ःङ् ये़म्बित्छा मे़न्छुमा साहाॽ अस्दोदबा इग्र वेॽ पाःन्दाङ् मे़बारे़ कर यहुदि पाःन्दाङ्ङिन् कुसिङ् निःप्मा मे़न्छुक्तुन्॥ 25 खे़ल्ले़चोगुल्ले़ आङ्गाॽ खे़न् मनाहाॽ फे़ःक्तुङ्सिङ्, साक्मुरा माङ्दे मे़त्तुङ्सिङ्, हिप्तुङ्सिङ्ङाङ् खुनिॽ थाःक्फमाहाॽ उःक्खुङ् पिरुङ्सिङ्॥ खे़ब्याङ् आङ्गाॽ खे़ङ्हाॽ आनिगे नु आनिगे साहाॽरे़ आल्लआङ्धो आप्फाल्ले़आङ् थिम्मे़न्दङ् सुवाङ्हाॽनु मेःक्खिम् मे़न्जोगुल्ल फाॽआङ् निङ्वाॽफुमाङ्ङिल्ले़ कुमिङ्ङो माङ्हे़क् चोःक्मा पाङ्घुङ्सिङ्॥ 26 आङ्गाॽ खे़ङ्हाॽ मे़त्तुङ्सिङ्, “वेॽ सुवाङ्समा मे़न्छुमाॽहाॽरे़ सोलोमन हाङ्ङिन् लायो चोःक्मा मे़बाङ्घुआङ् वये़॥ खुने़ॽ वेॽ के़रे़क् लाजेॽबा हाङ्हाॽनुःल्ले़आङ् कुमिङ् के़इङ्बा चोगे़॥ निङ्वाॽफुमाङ्ङिल्ले़ खुने़ॽ लुङ्माॽ तुक्तुआङ् वये़ हे़क्क्याङ् के़रे़क् इस्राइल सम्धाङ् खुने़ॽ हाङ् चोगु॥ करसाङ् वेॽ सुवाङ्समा मे़न्छुमाहाॽरे़ खुने़ॽ लायो चोःक्मा मे़बाङ्घु॥ 27 आल्ल थे आनिॽआङ् वेॽ लाजेॽबा मे़न्छुमाहाॽ ते़न्धाम् मेःक्खिम् मे़प्मासिआङ् आनिॽ आबाङे निङ्वाॽफुमाङ्ङिल्ले़ कुइङ्जाङ्ङिन् फेःम्माबि?” 28 तुम् निङ्वाॽफुसाम्बा एल्यासिबरे़ कुस्सा योयादाःल्ले़ कुस्साधिक्ले़ बेथ-होरोन के़युङ्बा सन्बलतरे़ कुस्सा मे़न्छुमान् ते़न्धाम् मेःक्खिम् मे़त्तुआङ् वये़॥ खे़ल्ले़चोगुल्ले़ आङ्गाॽ योयादान् यरुसले़ःम्मिन् ले़प्मा पाङ्घुङ्॥ 29 आनिङ्वाॽफुमाङ्ङे! निङ्वाॽफुसाम्बा मिङ्सो युक्ना के़जिःम्बाहाॽ हे़क्क्याङ् ले़बि नु निङ्वाॽफुसाम्बा माङ्हे़क् के़भेःम्बा मनाहाॽ निङ्वाॽ इःत्ते़से़ॽओ! 30 अक्खेलॽरिक् आङ्गाॽ निङ्वाॽफुसाम्बा नु ले़बिहाॽ थिम्मे़न्दङ् सुवाङ्बा के़रे़क् पाःन्हाॽलाम् सुत्थो चोगुङ्सिङ्, हे़क्क्याङ् खे़ङ्हाॽ खुनिॽ याःम्बक्को फत्छुङ्सिङ्॥ 31 ताःप्मा के़बोङ्बा ये़म्मो सिदुङ्जभा तोःम्माल्ले़ चाहाब् के़जोःक्पा सिङ्ङिन् ताःप्मा हे़क्क्याङ् के़रे़क्नुःल्ले़ तगि के़दुम्बा पोगुगे़न् कुजा नु सिङ्सेॽहाॽ ताःप्मारे़ लागिआङ् तङ्गाम् चोगुङ् पिरुङ्सिङ्॥ आनिङ्वाॽफुमाङ्ङे, आङ्गाॽ निङ्वाॽ इःत्ताङ्ङे़ॽआङ् आलागि नुबा चोगे़ॽओ! |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.