नहेम्याह 12 - लिम्बुनिङ्वाॽफुसाम्बाहाॽ नु ले़बिहाॽ 1 सालतिएलरे़ कुस्सा यरुबाबेल हे़क्क्याङ् तुम् निङ्वाॽफुसाम्बा येसुआःन्नु सोरिक् मे़दे़म्सु मे़देॽरुसिबालाम् के़नुःङ्बा के़भे़म्बा ले़बिहाॽ हाबा कन्हाॽरो— निङ्वाॽफुसाम्बाहाॽ— सरायाह, यर्मिया, ए़ज्रा, 2 अमर्याह मल्लुक, हत्तुस, 3 सकन्याह, रेहुम, मरेमोत, 4 इद्दो, गिन्नतोन, अबिया, 5 मियामिन, मदाहा, बिल्गा, 6 समायाह, योयारिब, यदायाह, 7 सल्लु, अमोक, हिल्कियाह हे़क्क्याङ् यदायाह॥ येसुअरे़ कुबाःल्लाओ के़रे़क् निङ्वाॽफुसाम्बाहाॽ के़भाॽबा लाम्लोबा कन्हाॽ मे़वये़॥ 8 ले़बिहाॽ— येसुआ, बिन्नुइ, कादमिएल, सरेबियाह, यहुदा, मत्तन्याह नु खुने़ॽ कुभाॽबाङ्हाॽरे़ नोगे़न् तोःम्मा से़वासाम्लो साम्मे़प्मा लक्पे़न् मे़घोसुआङ् मे़वये़॥ 9 खे़ङ्हाॽ के़भाॽबा बक्बुक्याह, उन्निन् नु वेॽ ले़बिहाॽरे़ पाःल्लोबा से़वासाम्लोन् साम्मे़मे़त्तुरो॥ 10 येसुआन् योयाकिमरे़ कुम्बा, योयाकिमे़न् एल्यासिबरे़ कुम्बा, एल्यासिबे़न् योयादारे़ कुम्बा, 11 योयादान् जोनाथनरे़ कुम्बा हे़क्क्याङ् जोनाथने़न् यद्दुअरे़ कुम्बा वये़रो॥ 12 योयाकिमे़न् तुम् निङ्वाॽफुसाम्बा वये़ल्ले़ कन्हाॽ निङ्वाॽफुसाम्बा हिम्सयङ्बा सुभा मे़वये़रो— निङ्वाॽफुसाम्बा लाम्लोबाहाॽ— थाःक् मरायाह— सरायाह हनन्याह— यर्मिया 13 मसुल्लाम— ए़ज्रा येहोहानान— अमर्याह 14 जोनाथन— मल्लुक योसेफस— कन्याह 15 अदना— हारिम हल्कै— मरेमोत 16 जकरिया— इद्दो मसुल्लाम— गिन्नतोन 17 जिक्रि— अबिया मिन्यामिन नु मोदाहा— पिल्तै 18 सम्मुअ— बिल्गा यहोनातान— समायाह 19 मत्तनै— योयारिब उज्जि— यदाया 20 कल्लै— सल्लु एबेर— अमोक 21 हसब्याह— हिल्कियाह नतनेल— यदायाह 22 एल्यासिब, योयादा, योहानान नु येद्दुअ तुम् निङ्वाॽफुसाम्बाहाॽरे़ खुनिॽ हिङ्मन्नो ले़बि नु निङ्वाॽफुसाम्बा हिम्सयङ्बा सुभाहाॽरे़ खुनिॽ मिङ्स्रा मे़युक्खु मे़बिरुसिआङ् मे़वये़॥ फारस लाजेॽओ पयम् हाङ् दाराःल्ले़ हाङ् चोगुबा ये़म्मोआङ् खे़ङ्हाॽरे़ खुनिॽ मिङ्स्रान् मे़साप्तु मे़सुरुआङ् ने़स्से़॥ 23 ले़बि हिम्सयङ्बा सुभाहाॽरे़ खुनिॽ मिङ्हाॽ एल्यासिबरे़ कुम्मे़न्छाॽ योहानानरे़ कुये़म् थारिक्लक् साप्मुःन्धुम्मो मे़साप्तुआङ् वये़रो॥ 24 ले़बिहाॽ कुलुप् कुलुप् मे़हासिङ्ङाङ् मे़वये़॥ खे़न् लुप्पोबा लाम्लोबाहाॽ हसब्याह, सरेबियाह हे़क्क्याङ् कादमिएलरे़ कुस्सा येसुआ मे़वये़॥ निङ्वाॽफुमाङ्ङिल्ले़ कुमना दाउद हाङ्ङिल्ले़ पिरुसिबा इङ्जाङ् कुइसिक् ये़म्धिक्ले़ पाःल्लोबा मे़ज्ये़र ने़प्फु लुप्हाॽरे़ निङ्वाॽफुमाङ्ङिन् कुनारा मे़भोसु हे़क्क्याङ् नुगे़न् मे़बिरु॥ 25 माङ्हिम्मोबा यम्बा लाम्धेःप्पाल्ले़ कुबेसाङ्बा युङ्मादे़न्हाॽओ के़गोबा मत्तन्याह, बक्बुक्याह, ओबदिया, मसुल्लाम, तल्मोन हे़क्क्याङ् अक्कुबरे़ लाम्धेःत्हाॽ कोमा के़बोङ्बा वये़॥ 26 येसुअरे़ कुस्सा नु यहोसादाकरे़ कुम्मे़न्छाॽ योयाकिमरे़ कुये़म्मो कन् मनाहाॽ हे़क्केलॽरिक् याःम्बक् चोःक्मा मे़बाङ्घुसिआङ् वये़॥ खे़न् ये़म्मो तुम् हाङ्युक्पा नहेम्याहन् नु साम्योथिम्साम्बा निङ्वाॽफुसाम्बा ए़ज्रान् वये़सिरो॥ नहेम्याहःल्ले़ लुङ्धाक्किन् तोःन्दु 27 यरुसले़ःम्बा लुङ्धाक्किन् मे़दोन्दुबा ये़म्मो तुःङ्गेहाॽ नु खित्चिङ् खित्चिङ् के़लॽबा मुक्लाहाॽ मे़मुक्खु हे़क्क्याङ् सिक्समे़र नुगे़न् तोःम्मा से़वासाम्लोन् साम्मे़प्मारे़ लागि वेॽ वेॽ ते़न्नो के़युङ्बा ले़बिहाॽ खे़ङ्हाॽ मे़युङे़बादे़न्नोलाम् यरुसले़ःम्मो मे़सुप्सु मे़दारुसि॥ 28 ले़बि साम्गे़लोबा हिम्सयङ्हाॽ, यरुसले़ःम्बा थुम्मो हे़क्क्याङ् खे़ङ्हाॽ मे़युङे़बा नतोपा पाङ्भेॽ के़रे़क् पिसाङ्बा ते़न्नोलाम्, 29 बेथ-गिलगाल हे़क्क्याङ् गेबा अज्मावेतलाम्बा मे़दारुसि॥ थेआङ्भे़ल्ले़ खे़न् साम्गे़लोबाहाॽरे़ यरुसले़म खिरिबादे़न्नो आबाङे लागि पाङ्भेॽहाॽ मे़जोगुआङ् ने़स्से़॥ 30 निङ्वाॽफुसाम्बा नु ले़बिहाॽ आबाङे खुनिॽ थिम् कुइसिक् सुत्थो मे़बोःक्खे़ हे़क्क्याङ् खे़ङ्हाॽरे़ मनाहाॽ, लाम्धेःप्हाॽ नु लुङ्धाक्किन् सुत्थो मे़जोगु॥ 31 हे़क्क्याङ् आङ्गाॽ नहेम्याहःल्ले़ यहुदाबा लाम्लोबाहाॽ ये़क्यक्कोबा लुङ्धाक्किन् लिङ्बाङ्घुङ्सिङ्॥ खे़ब्याङ् निङ्वाॽफुमाङ्ङिन् नुगे़न् के़बिबा साम्गे़लोबा ने़त्छि यम्बयम्बा मनालुप् चोगुङ्सिङ्॥ लत्छा मनालुप् लुङ्धाक्किल्ले़ चुप्साङ् ले़प्माङ्बा ताम् लाप्फुमा लाम्धेःप्पा ले़प्माङ् मे़बे॥ 32 साम्गे़लोबाहाॽरे़ खुनिॽ एगाङ् होसयाहन् नु कुभ्रे़ःङ् यारिक् यहुदाबा लाम्लोबाहाॽ मे़वये़॥ 33-35 खे़न् एगाङ् थुत्तुरिःप्पा मे़मुक्खुर अजर्याह, ए़ज्रा, मसुल्लाम, यहुदा, बेन्यामिन, समायाह नु यर्मिया निङ्वाॽफुसाम्बाहाॽ मे़धासिङ्॥ खे़ङ्हाॽरे़ खुनिॽ एगाङ् जोनाथने़ल्ले़ कुस्सा नु समायाहरे़ कुम्मे़न्छाॽ जकरियान् थासिङ्॥ (खुने़ॽ कुधाःक्हाॽओ आसाप सुवाङ्बा मत्तन्याह, मिकाया नु जक्कुर मे़वये़)॥ 36 खुने़ॽ कुएगाङ् कुएगाङ् कुधाःक्कोबा वेॽहाॽ—समायाह, अज्रेल, मिललै, गिललै, माऐ, नतनेल, यहुदा, हनानिन् नु कुन्जुम्हाॽ मे़धासिङ्॥ निङ्वाॽफुमाङ्ङिल्ले़ कुमना दाउद हाङ्ङिल्ले़ मे़त्तुसिबा हे़क्के खे़ङ्हाॽरे़ खुन्छिॽ हुक्को मुक्लाहाॽ मे़याङ्सिङ्ङाङ् मे़वये़॥ साम्योथिम्साम्बा ए़ज्रान् खे़ङ्हाॽरे़ खुनिॽ लाम्लोबा वये़॥ 37 वधाःम् लाम्धेःप्पो मे़गे़रे़आङ् दाउद हाङ्ङिल्ले़ कुये़क्यक् पेःक्मा थाम्माङ् लुङ्धाक्किन् नाहाङ्सेःक्कोलाम् मे़लिङु हे़क्क्याङ् खे़ङ्हाॽ दाउद हाङ्ङिल्ले़ कुहाङ्हिम्मिन् मे़गाःक्तुआङ् मे़बे॥ खे़प्मोलाम् मे़नुःक्खे़आङ् ये़क्यक्किल्ले़ नाङ्गे़न् ले़प्माङ् खे़ङ्हाॽ च्वाःत् लाम्धेःप्पो थारिक् मे़बे॥ 38 वेॽसमा मनालुप्हाॽ नुगे़न्साबा से़वासाम्लोन् साम्मे़मे़त्तुर लुङ्धाक्किल्ले़ कुसम्धाङ् फे़न्छाङ् ले़प्माङ् मे़धासिङ्॥ आङ्गाॽ कुभ्रे़ःङ् मनाहाॽ तेॽरुङ्सिङ्ङाङ् खे़ङ्हाॽरे़ खुनिॽ एगाङ् एगाङ् थासिङ्ङाङ्॥ मिहाःत्लुङ् मिःक्खोॽ लःम्मादे़न्निन् काःक्मनाआङ् आनिगे कुभे़रे़ यम्बा के़बप्पा लुङ्धाक्को के़प्मना॥ 39 खे़प्मोलाम् एफ्राइमि लाम्धेत्, येसना लाम्धेत्, ङा लाम्धेत् हे़क्क्याङ् हननेलरे़ कुजङ्हिम् नु किप्थिक् चङ्हिम् पोङ्मनार मे़ल्लुक् लाम्धेःप्पो के़प्मना हे़क्क्याङ् गारदबा लाम्धेःप्पो थारिक् पेःक्मनाआङ् आनिगे नाःम्सिङ्मना॥ 40 नुगे़न् के़बिबा खे़न् ने़प्माङ् मनालुप्हाॽ निङ्वाॽफुमाङ्ङिल्ले़ कुहिम्मिल्ले़ कुबेसाङ् युङ्मादे़न्नो मे़युङ्सिङ्॥ आङ्गाॽआङ् कुभ्रे़ःङ् सुहाङ्युक्पाहाॽनु युङ्सिङ्ङाङ्॥ 41 हे़क्केलॽरिक्के निङ्वाॽफुसाम्बा एल्याकिम, मासेयाह, मिन्यामिन, मिकाया, एल्योएनै, जकरिया नु हनन्याहहाॽ मे़वये़॥ खे़ङ्हाॽ थुत्तुरिःप्पा मुःत्नु लाङ्मे़घेगे़आङ् मे़वये़॥ 42 हे़क्क्याङ् मासेयाह, समायाह, एलाजार, उज्जि, येहोहानान, मल्कियाह, एलाम खे़ब्याङ् एसेरे़न् वये़॥ यिज्रहियाहरे़ कुलाम्लोमो साम्गे़लोबाहाॽ यम्बा इक्लाओ साम्मे़लोरे़रो॥ 43 खे़न् ये़न्नो खे़ङ्हाॽरे़ यरिक् सिदुङ्जभा मे़दोन्दु॥ मनाहाॽ साॽरिक् मे़सःत्ते़, थेआङ्भे़ल्ले़ निङ्वाॽफुमाङ्ङिल्ले़ खे़ङ्हाॽ चाॽरिक् खुनिॽ निङ्वाॽ त्ये़र चोगुसिआङ् वये़॥ मे़न्छुमाहाॽ नु हिन्जाॽ पित्छाॽहाॽरे़आङ् सःप्मा ससाङ्स्रोत् मे़जोगु॥ खे़ङ्हाॽ मे़सःत्ते़बा इक्लान् यरिक् माःङ्घा थारिक् खे़म्दे़त्ते़रो॥ माङ्हिम्मो माङ्से़वा चोःक्मारे़ लागि हिमा तङ्मा 44 खे़न् ये़म्मो माङ्हिम्मो तोःम्मनाबा युङ्मादे़न्हाॽओ ओमे़प्मा हे़क्क्याङ् ये़क्यक् खिरिबा पाङ्भेॽहाॽलाम् साम्योथिम् इङ्जाङ्ङिल्ले़ पाःत्तुबा हे़क्के निङ्वाॽफुसाम्बा नु ले़बिहाॽरे़ खोमा के़बोङ्बा कुजा नु थिबोङ्लक् फुङ्मा याःम्बक्ले़ लागि मनाहाॽ मुरा मे़मे़त्तुसिआङ् वये़॥ थेआङ्भे़ल्ले़ यहुदाबा के़रे़क् मनाहाॽ निङ्वाॽफुसाम्बा हे़क्क्याङ् ले़बिहाॽनु खुनिॽ निङ्वाॽ त्ये़आङ् वये़॥ 45 दाउद हाङ्ङिन् नु खुने़ॽ कुस्सा सोलोमनरे़ युक्खे़छुबा थिम्बे हे़क्के खे़ङ्हाॽरे़ खुनिॽ निङ्वाॽफुमाङ्ङिल्ले़ कुसे़वा नु सुत्थो चोःक्सिङ्मा साक्थिम्हाॽ मे़जोगु॥ हे़क्केलॽरिक्के साम्गे़लोबाहाॽ नु लाम्धेत् के़गोबाहाॽरे़आङ् याःम्बक् मे़जोगु॥ 46 थेआङ्भे़ल्ले़ उन्छेःन्छा दाउद हाङ्ङिल्ले़ कुये़म्माङ्धो हे़क्क्याङ् खे़न्नुःल्ले़ तगि आसापरे़ कुये़म्मो निङ्वाॽफुमाङ्ङिन् कुनारा फोमा नु नुगे़न् पिमारे़ लागि से़वासाम्लो साम्गे़मे़प्पा लाम्लोबाहाॽ मे़वये़॥ 47 खे़ल्ले़चोगुल्ले़ यरुबाबेल नु नहेम्याहःल्ले़ खुन्छिॽ ये़म्मो के़रे़क् इस्राइलिहाॽरे़ साम्गे़लोबाहाॽ नु लाम्गे़गोबाहाॽरे खुनिॽ चामारे़ लागि थिक्याःन्धक् चाहा के़जोःक्पा कुजाहाॽ मे़बिरुसि॥ खे़ङ्हाॽरे़ ले़बिहाॽआङ् चाहा के़जोःक्पा लक् मे़बिरुसि हे़क्क्याङ् खे़न्लाम्बा ले़बिहाॽरे़ हारुनरे़ कुमुॽइदाङ्सा निङ्वाॽफुसाम्बाहाॽ चाहा के़जोःक्पा लक् मे़बिरुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.