नहेम्याह 10 - लिम्बु1 माङ्हुप् सक्को युक्छाप् के़युक्पाहाॽ कन्हाॽ मे़वये़—हकल्याहरे़ कुस्सा तुम् सुहाङ्युक्पा नहेम्याह, सिदकियाह, निङ्वाॽफुसाम्बाहाॽ— 2 सराया, अजर्याह, यर्मिया, 3 पसहुर, अमर्या, मल्किया, 4 हत्तुस, सबन्याह, मल्लुक, 5 हारिम, मरेमोत, ओबदिया, 6 दानिए़ल, गिन्नतोन, बारुक, 7 मसुल्लाम, अबिया, मियामिन, 8 माज्या, बिल्गै हे़क्क्याङ् समायाह॥ 9 ले़बिहाॽ— अजन्यारे़ कुस्सा येसुअ, हेनादादरे़ कुधाःक् बिन्नुइ, कादमिएल, 10 हे़क्क्याङ् खुन्छिॽ फुॽनुसाॽहाॽ सबन्याह, होदिया, कलिता, पलया, हानान, 11 मियका, रहोब, हसब्या, 12 जक्कुर, सरेबिया, सबन्याह, 13 होदिया, बानि हे़क्क्याङ् बनिनु॥ 14 लाम्लोबाहाॽ— परोस, पहत-मोआब, एलाम, जत्तु, बानि, 15 बुन्नि, अज्गाद, बेबै, 16 अदोनियाह, बिग्वै, आदिन, 17 आतेर, हिजकिया, अज्जुर, 18 होदियाह, हासुम, बेजै, 19 हारिप, अनातोत, नेबै, 20 मग्पिआस, मसुल्लाम, हेजिर, 21 मसेजेबेल, सादोक, यदुअ, 22 पलत्या, हानान, अनाया, 23 होसिया, हनन्याह, हस्सुब, 24 हल्लोहेस, पिल्हा, सोबक, 25 रेहुम, हसब्ना, मासेया, 26 अहिया, हानान, आनान, 27 मल्लुक, हारिम नु बानाह॥ साप्मनाबा साप्ला 28 साप्मनाबा साप्लाओ अक्तङ्बा पत्छे़, “आनिगे निङ्वाफुसाम्बाहाॽ, ले़बिहाॽ, लाम्धेत् के़गोबाहाॽ, साम्गे़लोबाहाॽ, माङ्हिम्मो याःम्बक् के़जोःक्पाहाॽ नु वेॽ इस्राइलिहाॽ हे़क्क्याङ् आबाङे मेःत्हाॽ खे़ब्याङ् कुसिङ् के़निःप्पा हिन्जाॽबित्छाॽ खक्पे़त्ले़, निङ्वाॽफुमाङ्ङिल्ले़ कुसाम्योथिम् इङ्जाङ्ङिन् इःप्मा नाःप्मारे़ लागि आबाङे लाजेॽओ थिम्मे़न्दङ् सुवाङ्हाॽलाम्बा लाःत्लाःत् पोङ्मा याःम्बक् चोगुम्बे़आङ् वयिगे़॥ 29 आनिगे सुभाहाॽनु थिक्हुप् पोःक्खिगे़आङ् यहवे दाङ्बा आनिगे निङ्वाॽफुमाङ्ङिल्ले़ कुसे़वारोबा मोसालाम् पिरिगे़बा साम्योथिम् इङ्जाङ् कुइसिक् कुसाम्योथिम् इङ्जाङ्हाॽ नु कुइङ्दत्हाॽ इःत्तुम्बे़ नाःत्तुम्बे़ फाॽआङ् माङ्हुप् चोगुम्बे़॥ कन् माङ्हुप्पिन् फेःन्दुम्बे़ने़भग्र आनिगे निङ्वाॽफुमाङ्ङिल्ले़ कुसाङ्ग्रा कुघुम्दिङ्ङिल्ले़ ते़त्तिगे़ररो॥ 30 “आनिगे लाजेॽओ के़वाॽबा वेॽ सुवाङ्समा मनाहाॽनु आनिगे साहाॽ मेःक्खिम् मे़मे़त्तुम्सिम्बे़न्ॽ॥ 31 “खे़न् थिम्मे़न्दङ् सुवाङ्हाॽरे़ नाःम्सिङ्मा ये़न्नो इग्र वेॽ सेसे ये़न्नो सङ्से़ मे़दारुबा पोगुगे़न् कुजाहाॽ इग्र वेॽ चिगक्वाहाॽ आनिगे मे़इङुम्बे़न्॥ “नुसि तङ्बे के़त् थक्मा आनिगे इक्ताप्पो पोगुगे़न् कुजा मे़हेॽरुम्बे़न् हे़क्क्याङ् के़रे़क् सिङ्नात्हाॽ मे़भोक्खुम्सिम्बे़न्ॽ॥ 32 “तङ्बे थप्मे माङ्हिम्मो चोःक्मा के़बोङ्बा याःम्बक्ले़ लागि आनिगे के़रे़क्ले़ ५ ग्राम युप्पा एःङ्याङ् लःत्तुम्बे़रो॥ 33 “आनिगे निङ्वाॽफुमाङ्ङिल्ले़ कुहिम्मो से़वा चोःक्मा याःम्बक्ले़ लागि सेसे खरे़ःङ्, थिक्याःन्धक्पा पोगुगे़न् कुजा सिदुङ्जभा, मिधिङ्मनादेमनाबा सिदुङ्जभारे़ लागि थक्साहाॽ तोःन्दुम्सिम्बे़॥ नाःम्सिङ्मा ये़न्, लादुप् नु वेॽ तङ्नाम्हाॽओ चाहाब् के़जोःक्पा सिदुङ्जभाहाॽआङ् तारुम्बे़॥ हे़क्क्याङ् इस्राइलबा मनाहाॽरे़ लागि लायोलाम् ले़प्मि खोमा सिदुङ्जभा नु माङ्हिम्मो चाहाब् के़जोःक्पा चिगक्वाहाॽ थेसाङ् आनिगे लःत्तुम्बे़रो॥ 34 “निङ्वाॽफुसाम्बा, ले़बि हे़क्क्याङ् मनाहाॽ के़रे़क् तङ्ङासिगे़आङ् तङ्बे थप्मे यहवे दाङ्बा आनिगे निङ्वाॽफुमाङ्ङो सिदुङ्जभा तोःम्माल्ले़ ले़त्ति तोःम्मादे़न्नो चाहाब् के़जोःक्पा सिङ्ङिन् तॽयाःन्सोन् के़सुम्बे़ हे़क्क्याङ् आत्तिन्हाॽरे़ खुन्छिॽ मुॽइदाङ्साहाॽरे़ साम्योथिम् इङ्जाङ्ङो पप्पा कुइसिक् सिङ् लःप्मा के़बोङ्बा पोङ्ॽ खे़न् ये़म्हाॽओ आनिगे लःप्पाङ्घुम्सिम्बे़॥ 35 “तङ्बे थप्मे आबाङे इक्ताप्पो सुम्मनाबा के़रे़क्नुःल्ले़ तगिबा पोगुगे़न् कुजान् नु के़रे़क्नुःल्ले़ तगि के़धोःक्पा सिङ्सेॽहाॽ तङ्बे थक्मा यहवे दाङ्बे़ल्ले़ कुहिम्मो तोःन्दुम्बे़रो॥ 36 “आनिगे हिम्सयङ्ङो सागे़वाःन्छिङ्बा तुम्बा ये़म्बित्छासाहाॽ साम्योथिम् इङ्जाङ्ङिल्ले़ पाःत्तुबा कुइसिक् माङ्हिम्मो निङ्वाॽफुसाम्बाहाॽरो तेॽरुम्सिम्बे़आङ् निङ्वाॽफुमाङ्ङो तोःन्दुम्सिम्बे़॥ हे़क्केलॽरिक्के के़रे़क्नुःल्ले़ तगि के़धाप्पा पित्सात् नु के़रे़क्नुःल्ले़ तगि के़धाप्पा मे़ल्लुक्सात् मे़ःन्दज्याःक्हाॽ आनिगे तोःन्दुम्सिम्बे़रो॥ 37 “खे़न्नाङ्धो तङ्बे थप्मे आनिगे इक्ताप्पो के़रे़क्नुःल्ले़ तगि के़धोःक्पा पोगुगे़न् कुजान् यारिप् चोगुम्बे़आङ् कुजा सिदुङ्जभान् नु आनिगे तोःम्मा के़बोङ्बा पे़ःङ्वालिःत्छेॽ निःङ्गेन्, चे़ल्ले़क्सेॽ थिन् खे़ब्याङ् के़रे़क् परिक्पा सिङ्सेॽहाॽ निङ्वाॽफुसाम्बाल्ले़ कुलागि माङ्हिम्मोबा कुजा युङ्मादे़न्हाॽओ तोःन्दुम्बे़॥ “पाङ्भेॽओ थिबोङ्लक् के़भोङ्बा ले़बिहाॽ आनिगे आबाङे इक्ताप्पोबा पोगुगे़न् कुजा थिबोङ्लक् पिरुम्सिम्बे़रो॥ 38 ले़बिहाॽरे़ थिबोङ्लक् मे़भोक्खुबा ये़म्मो हारुनरे़ कुमुॽइदाङ्सा निङ्वाॽफुसाम्बाधिक् खे़ङ्हाॽनु सोरिक् पेक्॥ हे़क्क्याङ् अक्खेलॽरिक् खे़ङ्हाॽरे़ मे़सुप्सुबा थिबोङ् लक्लाम्बा याम्मो वेॽ थिबोङ्लक् मे़लःत्तुआङ् खे़न् ले़बिहाॽरे़ माङ्हिम्मो ओगाप् चोःक्मारे़ लागि माङ्हिम्मोबा थाःङ्ङो मे़भुक्खु॥ 39 माङ्हिम्मो याःम्बक् के़जोःक्पा निङ्वाॽफुसाम्बाहाॽ, लाम्धेत् के़गोबाहाॽ नु साम्गे़लोबाहाॽरे़ खुन्छिॽ याङ्मा सामाहाॽ युङ्मा याक्फाङ्हाॽरे़ कुबेसाङ्बा याक्फाङ्हाॽओ इस्राइलिहाॽ नु ले़बिहाॽरे़ पोगुगे़न् कुजान् मे़भुक्खु मे़दारुॽ, हे़क्क्याङ् कुबोक् चे़ल्ले़क्सेॽ थिन् नु पे़ःङ्वालिःत्छेॽ निःङ्गेन् मे़युक्खु॥ “आनिगे निङ्वाॽफुमाङ्ङिल्ले़ कुहिम्मिन् मे़ले़रुम्बे़ल्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.