नहेम्याह 1 - लिम्बुनहेम्याहःल्ले़ चोगुबा तुवा 1 कन् हकल्याहरे़ कुस्सा नहेम्याहःल्ले़ चोगु पाःत्तुबा याःम्बक्लो॥ अर्तासास्ते़न् फारस लाजेॽबा हाङ् वये़ल्ले़ खुने़ॽ हाङ् चोगुबा निबोङ् तङ्बेओ किसलेब मे़प्मनाबा लाओ आङ्गाॽ नहेम्याहन् फारस लाजेॽबा हाङ्पाङ्भेॽ सुसनओ वयाङ्॥ 2 हाबा खे़न् ये़म्मो हनानि मिङ् के़वाःप्पा आङ्गाॽ आन्साॽधिक् कुभा मनाहाॽनु यहुदालाम्बा के़रे़भे़रे़॥ आङ्गाॽ खे़ङ्हाॽ यरुसले़म ये़क्यक्किल्ले़ कुयाःम्बेओ नु बेबिलोनबा मे़दे़म्सु मे़देॽरुसिबालाम् के़नुःङ्बा के़बेःक्पा आबाङे यहुदि फुॽनुसाॽहाॽरे़ खुनिॽ याःम्बेओ से़ःन्लाप्तुङ्सिङ्॥ 3 खे़न् पुङ्लाहिम्लाम्बा के़हिङ्बाआङ् यहुदा ते़ङ्गप्पो के़नुःङ्बा के़भे़म्बा यहुदिहाॽ पयम् यम्बा सिरिङ्ममो मे़ध्ये़आङ् मे़याक्॥ यरुसले़ःम्बा लुङ्धाक्हाॽ लुःन्दे़आङ् ने़ःॽ हे़क्क्याङ् मिःल्ले़ खाप्पुथ्यःङ् पोःक्खे़बा ये़न्नाङ्धो आइन् थारिक् खे़ॽयोबा यम्बा लाम्धेःप्पाहाॽ मे़न्जोःक्के ने़रो फाॽआङ् खे़ङ्हाॽरे़ आङ्गाॽ मे़मे़त्ताङ्॥ 4 कन् इङ्घङ्ङिन् खे़प्सुङ्ङाङ् आङ्गाॽ खाम्मो पे़र्जु युङ्सिङ्ङाआङ् हाबाङ्॥ आङ्गाॽ यरिक् ये़न् थारिक् मे़रिङ् थक्ताङ् हे़क्क्याङ् थेआङ् मे़न्जाबा मे़न्धुङ्बा॥ आङ्गाॽ साङ्ग्राम्पेदाङ्बा निङ्वाॽफुमाङ्ङिन् अक्खेलॽरिक् पेलि फाक्तुङ्, 5 “साङ्ग्राम्पेदाङ्बा यहवे दाङ्बा निङ्वाॽफुमाङ्ङे, खे़ने़ॽ पयम् यम्बा नु किप्मागे़घुबा के़जोःक्लो॥ खे़ने़ॽ के़इङ्जाङ्ङिन् के़इःप्पा के़नाःप्पा हे़क्क्याङ् खे़ने़ॽ मिःम् के़मे़प्पाहाॽनु के़जोगुबा के़रे़क् माङ्हुप्हाॽ आबाङे नसाःन्साबा के़बोक्खे़आङ् के़गे़त्तुरो॥ 6 इस्राइलबा के़मना, खे़ने़ॽ के़सेवारोहाॽरे़ खुनिॽ लागि से़न्दिक् ले़न्दिक् चोगुङ्बा आबेलिन् खे़प्से़ॽआङ् ओमे़त्ताङ्ङे़ॽओ॥ आनिगे इस्राइलिहाॽरे़ लायो चोःक्मना फाॽआङ् आङ्गाॽ पाःप्मा ते़न्नारो॥ आङ्गाॽ आधाःक्थे़बाहाॽरे़ लायो मे़जोगु, आङ्गाॽआङ् लायो चोगुङ्लो॥ 7 आनिगे खे़ने़ॽ के़दक्ले़ङ्वाओ साॽरिक् ताप्फे़ःम्बा याःम्बक् चोगुम्बे़आङ् वयिगे़॥ हे़क्क्याङ् खे़ने़ॽ आबाङे के़से़वारोबा मोसालाम्बा आनिगे याप्मि के़बिरे़बा साम्यो साक्थिम्हाॽ आनिगे मे़न्इःत्ते मे़न्नाःत्ते वयिगे़रो॥ 8 “खे़ने़ॽ निङ्वाॽफुमाङ्ङिल्ले़ अक्खेलॽरिक् मोसान् के़बिरुबा के़बाःन्जाःक्किन् निङ्वाॽ इःत्ते़ॽओ, ‘खिनिॽ नसान् के़ले़ङ्बा के़बोक्खिने़भग्र आङ्गाॽ खिनिॽ वेॽ सुवाङ्हाॽरे़ खुनिॽ लुम्मो के़रे़क् पिसाङ् से़निङ्देनिङ्लो॥ 9 कर खिनिॽ आङ्गाॽ ले़प्साङ् के़नुःक्खि के़द्ये़ॽयिआङ् आङ्गाॽ आइङ्जाङ्ङिन् इःप्मा नाःप्मा के़दे़न्दिने़भग्र आङ्गाॽ सेगुङ्बा सेसे माङ्से़वा मे़जोःक्काबादे़न्नो खिनिॽ नुःक्निङ् ताःत्निङ्लो॥ इक्सादिङ् खाम्बेःक्माल्ले़ कुसुक्पो थारिक् खिनिॽ के़से़रिआङ् के़वयिसाङ् आङ्गाॽ खिनिॽ नुःक्निङ् ताःत्निङ्॥’ 10 “कन्हाॽ खे़ने़ॽ के़से़वारोबासिरो, खे़ने़ॽ आबाङे के़मनासिरो॥ खे़ने़ॽ आबाङे पयम् यम्बा के़धुम्मे़न् नु के़मुक्साम्मिल्ले़ कन्हाॽ के़धे़ॽरुसिआङ् के़वाॽ॥ 11 यहवे दाङ्बाए, आङ्गाॽ चोगुङ्बा तुवान् खे़प्से़ॽओ॥ खे़ने़ॽ मिङ्सो इङ्धाङ् पिमा निङ्वाॽ के़जोःक्पा खे़ने़ॽ के़से़वारोबाहाॽरे़ खुनिॽ पेलिओ निङ्वाॽ पिरे़ॽओ॥ आङ्गाॽ आइन् कुलिङ्दो के़त्ताङ्ङे़ॽओ हे़क्क्याङ् हाङ्ङिन् आङ्गाॽ लुङ्माॽ तुक्कार याःन्दे़ॽओ॥” खे़न् ये़न्नो आङ्गाॽ हाङ्ङिल्ले़ कुसेॽजःङ्वा के़दोम्बा लत्थिक् सुहाङ्युक्पा वयाङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.