नहुम 3 - लिम्बुनिनबेन् चिःत्ते़ स्ये़ 1 माक्खिॽ इसेःङ्बा ये़क्यक्किन् चिःत्ते़स्ये़रो! खे़ङ्ग इङ्ले़क् नु मे़नाप्तुसिबा याङ्साकुन्धेहाॽरे़ तिम्से़आङ् ने़रो, खे़प्मो मना तुक्खे चाःप्मा याःम्बक्किन् आभे़ल्ले़आङ् मे़नुप्ने़ल्लो॥ 2 ते़ःम्भुक्हाॽ लाइक्पा इक्लान्, काप्लोःक्हाॽ खङ्सिङ्बा इक्लान्, अन्हाॽ कुदुङ्दुङ् मे़लॽबा इक्लान्, अन्लाधाहाॽ मे़घङ्सिङ् मे़बुःन्छिङ्ल मे़लोःक्पा इक्लान् खे़प्से़म्मे़ॽओ॥ 3 अन्गे़युक्पा थक्सुबाहाॽरे़ मे़भत्तुसिरो, ताभेहाॽ से़ल्ले़ङ् से़ल्ले़ङ् ले़क्लो, हे़क्क्याङ् लाःक्हाॽ तिल्ले़क् तिल्ले़क् लॽरो॥ मे़से़रुसिबा चेहाॽ कुधाःक् कुधाःक् मे़से़त्छिङ्लो, निःप्मे़न्दे़त्ते चेहाॽ मे़ने़रो, चेहाॽ सम्धाङ् मनाहाॽ मे़दोःक्ल मे़जोःन्ल लाङ्मे़घेःक्लो! 4 कन् के़रे़क् पाःन्हाॽ लत्छा के़त्निमा, कित्चाक् याःम्बक् के़जोःक्मा दाङ्मे़ल्ले़ मे़न्नुःम्मना कुयाम्बोःप्मे़ल्ले़ चोगुल्ले़ पोःक्खे़रो, खुने़ॽ कुयाम्बोःप्मे़ल्ले़ मे़न्छाम् सुवाङ्हाॽ, हे़क्क्याङ् कुगित्चाक् चोःक्मा याःम्बक्लाम् खे़ल्ले़ मनाहाॽ योक् चोगुसिआङ् वये़रो॥ 5 मुक्साम्दाङ्बा यहवे दाङ्बे़ल्ले़ उवा चोगुरो, “ओमे़त्ते़ॽ, आङ्गाॽ खे़ने़ॽ के़दक्ले़ङ्वाओ वाॽआरो॥ आङ्गाॽ खे़ने़ॽ के़नाराओ थारिक् के़सिम्मिन् सिन्दुङ्लो, के़ले़क्चाबे़धिःक्किन् मे़न्छाम् सुवाङ्हाॽ याधाक्तुङ्सिङ्लो, हे़क्क्याङ् के़सिरिङ्ममान् हाङ्जुम्हाॽ ओःन्धाक्तुङ्सिङ्लो॥ 6 आङ्गाॽ चिःन्जिःन् के़घुबा पाःन्हाॽरे़ ले़प्ने़रो, आङ्गाॽ खे़ने़ॽ ताप्फे़ःल्लिक् मे़त्ने़रो, हे़क्क्याङ् मनारे़ खुन्छिॽ एःप्मा चाहाक् चोःक्ने़रो॥ 7 खे़ने़ॽ के़निबाहाॽ के़रे़क् खे़ने़ॽलाम्बा मे़घे़त्छिङ्लो, हे़क्क्याङ् खे़ङ्हाॽरे़ अक्खे मे़बाःत्तुरो, ‘निनबेःङ्ग खाप्पुथ्यःङ् पोःक्खे़आङ् ने़रो॥ खे़ल्ले़ कुलागि हात् मे़रिङ् थक्पाबे?’ खे़ने़ॽ सनारुङ् के़बिबा मना आङ्गाॽ आत्ति खोमाबे?” 8 थे खे़ने़ॽ निल वहःङ्ङिल्ले़ कुयाओ के़ने़बा नो ये़क्यक्किन्नुःल्ले़ आल्लसाङ् नुबा के़जोःक्पि? खे़ल्ले़ कुसे़ःप्मा कम्ब्राङ् च्वाःत् ने़स्से़रो, खे़ल्ले़ कुधेःक्मा हाङ्यक् वहःङ् ने़स्से़रो हे़क्क्याङ् लुङ्धाक्किङ्ग च्वाःत् ने़स्से़रो॥ 9 कुस नु मिस्र लाजेन् खे़ल्ले़ यम्बा कुमुक्साम् ने़स्से़रो, हे़क्क्याङ् पुत नु लिब्यान् खे़ल्ले़ कुन्देःङ्बा लाजेॽ ने़स्से़रो॥ 10 हे़क्केसाङ् खे़न् मे़दे़म्सु मे़देॽरुरो हे़क्क्याङ् लाजेॽलाम् लाःक्कात् मे़लःत्तुरो॥ खे़ल्ले़ चुजुक्सा कुस्साहाॽआङ् के़रे़क् माराम्हाॽओ मे़धाप्सु मे़स्ये़रुसिरो॥ मिस्रबा सुहाङ्युक्पाहाॽ से़वारोबा हे़क्के तेॽमासिरे़ लागि थक्सुबाहाॽरे़ तॽयाःन्सोन् मे़गे़सुरो हे़क्क्याङ् खे़ल्ले़ के़रे़क् यम्बा कुमनाहाॽ थक्क्रङ्ङिल्ले़ इमे़घेःक्खुसिरो॥ 11 खे़ने़ॽ निनबेःन्नाङ्, थिमसाङ् के़बोङ्लो, खे़ने़ॽ के़बेःक्काङ् के़जिङ्सिङ्ङाङ् के़युङ्लो, हे़क्क्याङ् निङ्मिलाम् खे़त्छिङ्मारे़ लागि इःम्सिङ्मादे़न् के़गोःत्तुरो॥ 12 खे़ने़ॽ के़रे़क् के़हाङ्यक्हाॽ पःत्छेःल्ले़ कुबुङ्ङो तगि के़दुम्बा कुजाॽ कुइसिक् लॽरो, कुबुङ्हाॽ यङ्मे़ल्ले़ के़जाबे़ल्ले़ कुम्ब्राओ पःत्छेल्ले़ कुजाॽहाॽ लुःक्थारो॥ 13 खे़ने़ॽ के़धक्सुबाहाॽ ओमे़त्ते़से़ॽओ, खे़ङ्हाॽ के़रे़क् मे़न्छुमारक् मे़वाॽरो॥ खे़ने़ॽ के़लाजेॽओबा यम्बा लाम्धेःत्हाॽग खे़ने़ॽ के़निङ्मिहाॽरे़ लागि हङ्बे़त् पत्लो, खे़ल्ले़ कुए़प्माहाॽग मिःल्ले़ थ्यःङ् चोगुआङ् पत्लो॥ 14 निङ्मिहाॽरे़ किर्गप् कप्मानुःल्ले़ तगि खे़ने़ॽ च्वाःत्तिन् थिम्से़ युक्खे़ॽओ॥ चङ्हिम्हाॽ थधप् मे़ल्लॽमनाबा चोगे़ॽओ, याःम्बक् चोगे़ॽ, लाङ्ङिल्ले़ खाम्ले़क्वान् सॽरे़ओ, खाम्ले़क् चोःक्मा याःम्बक्किन् चाःङ्वा मे़त्ते़ॽओ! 15 आम्भा खे़प्मो मिःल्ले़ खाप्पुथ्यःङ् के़जोःक्लो, ताभेःल्ले़ खे़ने़ॽ चाक्ले़ चाक्ले़ के़जे़प्लो हे़क्क्याङ् निःङ्घुक्वाहाॽरे़ कुजान् मे़जबा हे़क्के खे़ने़ॽ मुरे़क् खारे़क् खाप्पुथ्यःङ् के़म्जोःक्लो॥ प्याःत्हाॽ हे़क्के खे़ने़ॽ निःत्मे़न्दे़त् यरिक् पोःक्खे़ॽओ, खे़ने़ॽ निःङ्घुक्वाहाॽ हे़क्के यरिक् पोरे़ॽओ॥ 16 ताङ्साङ्बोबा खेःम्सिक्पाहाॽनुःल्ले़ यरिक् के़ले़ङ्हङ् के़जोःक्पाहाॽ के़भोसुसिआङ् के़वाॽरो, कर निःङ्घुक्वाहाॽरे़ हे़क्के खे़ङ्हाॽरे़ लाजेन् मुरे़क् खारे़क् मे़जोगुआङ् खे़ङ्हाॽ मे़बे़ मे़बेःक्लो॥ 17 खे़ने़ॽ के़गम्ब्राङ्बाहाॽ निःङ्घुक्वा यारिक् मे़वाॽरो, के़सुहाङ्युक्पाहाॽग निःङ्घुक्वा पन्ज्याङ्मा कुइसिक् मे़वाॽरो, खे़ङ्हाॽग चुङ्सिःक्मा ये़म्मो लुङ्धाक्हाॽओ मे़बत्लो, कर नाम्से़ःक्किल्ले़ खे़ङ्हाॽ के़रे़क् मे़बे़ मे़बेःक्लो, खे़ङ्हाॽ आत्ति मे़बेःक्, हाःत्ले़आङ् मे़निसुन्लो॥ 18 अस्सुरबा हाङ्ङे, खे़ने़ॽ के़मे़ल्लुक्कम्बाहाॽ मुरुक् खारुक् मे़इप्से़रो हे़क्क्याङ् खे़ने़ॽ के़सुहाङ्युक्पाहाॽ मे़स्ये़रो॥ खे़ने़ॽ के़मनाहाॽग कोःक्माहाॽओ फुत्छिङ्ज्याङ् मे़बोःक्खे़आङ् मे़वाॽरो, हे़क्क्याङ् खे़ङ्हाॽ के़भुङ्बा हाःत्ताङ् होप्लो॥ 19 खे़ने़ॽ के़याङ्घेःक्किन् थेःल्ले़आङ् मे़वेःन्दुन्लो, हे़क्क्याङ् खे़ने़ॽ के़गाःन्दे़बान् आसिसिबा चोक्लो॥ खे़ने़ॽ के़याःम्बेओ के़घे़म्बाहाॽ मे़सःत्लो खे़ने़ॽ के़जोःन्दे़बाओ खे़ङ्हाॽरे़ हिप्ला मे़हिप्तुरो, थेआङ्भे़ल्ले़ आभे़ल्ले़आङ् मे़न्नुप्मनाबा खे़ने़ॽ के़गुॽइभे़म्मे़न् हाःत्ले़ तुमुबा होःप्पाङ्बे? |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.