नहुम 2 - लिम्बुनिनबेन् खाप्पुथ्यःङ् पोङ्ॽ 1 निनबेए, खे़ने़ॽ के़निङ्मि थिक् खे़ने़ॽ के़दक्ले़ङ्वाओ तगि फे़न्ल पत्लो॥ खे़ने़ॽ के़जङ्हिम्हाॽ कम्ब्राङ् मे़त्ते़ॽओ, लाम्मिन् नुरिक् ओमे़त्ते़ॽ, फॽइ युप्सिङ्ङे़ॽओ, के़धुम्मिन् लःत्ते़ॽआङ् के़धुम्बा चोःक्सिङ्ङे़ॽओ॥ 2 खाप्पुथ्यःङ् के़जोःक्पाहाॽरे़ याकुब नु इस्राइलरे़ खुन्छिॽ चे़ल्ले़क्सेॽ पोराःक्हाॽ मे़ले़न्दुआङ् ने़साङ्, खाप्पुथ्यःङ् मुरे़क् खारे़क् मे़जोगुआङ् ने़साङ् यहवे दाङ्बे़ल्ले़ याकुबरे़ कुहाङ्वा कुमाङ्वान् नुःक्तुरो, इस्राइलरे़ कुहाङ्वा कुमाङ्वान् तगिबा कुइसिक् पोङ्लो॥ 3 निङ्मि थक्सुबाहाॽरे़ खुन्छिॽ खोहाॽ हे़ःत् लॽरो, थक्लिहाङ्हाॽरे़ हे़ःक्कङ्गङ्बा चाङ् मे़जाक्खुरो॥ खे़ङ्हाॽ यारिप् मे़जोगुसिबा ये़न्नो अन्लाधाहाॽओ के़बप्पा निङ्घङ्ङिन् तिल्ले़क् तिल्ले़क् ले़क्लो आःङ्सिङ् लाःक्हाॽ से़ल्ले़ङ् से़ल्ले़ङ् लॽरो॥ 4 अन्लाधाहाॽ माराम्हाॽओ साॽरिक् चात्ल मे़लोःक्खुरो, हे़क्क्याङ् लक्खुम्हाॽओ खे़ङ्हाॽ एगाङ् तगाङ् नुःङ्ल चाॽरिक् लोःक्लो॥ खे़ङ्हाॽ के़दिःप्पा से़न्धोॽ हे़क्तङ्बा निदे़ल्लो, खे़ङ्हाॽ साःम्भे ले़क्पा कुसिङ् मे़सुःक्ल मे़लोःक्लो॥ 5 खे़ल्ले़ सेगुसिबा थक्सुबाहाॽ उःत्तुसिरो, हे़क्केसाङ् खे़ङ्हाॽ खुन्छिॽ लाम्मो मे़दोःक्लो॥ मे़भत्छिङ्ल मे़ले़ःङ्ल ये़क्यक्कोबा लुङ्धाक् ले़प्माङ् मे़लोःक्लो, खे़प्मो खुन्छिॽ ताङ्से़ःप्सिङ्मा खोःन् यारिप् मे़जोगुरो॥ 6 कर वहःङ्ङोबा वाधेःक्माहाॽ मे़हसुरो, हे़क्क्याङ् हाङ्हिम्मिन् लुःन्नाङ् थुप्लो॥ 7 निनबेन् ते़म्मादेॽमा इङ्जाङ् पोःक्खे़आङ् वाॽरो, खे़ल्ले़ कुयोःग्माहाॽ साप्पे़त्त्रुक्मा हे़क्के खुन्छिॽ सङ्बप्मे़न् मे़हिप्तुर मे़रिङ् मे़धक्लो॥ 8 निनबेबा मनाहाॽग वरक्कोबा च्वाःत्तिन् हबेःक्पा कुइसिक् मे़जोक्लो, “सप्फारो! सप्फारो, मे़घे़त्तासिम्मिन्ने़ॽ!” लॽरिक् खे़ल्ले़ मे़त्तुसिरो, कर आत्तिन्नाङ् एगाङ् मे़हिसिङ्ङिन्लो॥ 9 युप्पा नाप्ताम्सिम्मे़ॽ! साम्म्याङ् नाप्ताम्सिम्मे़ॽओ! खे़ल्ले़ के़रे़क् कुयाङ्भुहाॽओ लाम्बाबा याङ्साकुन्धेहाॽ आभे़ल्ले़आङ् मे़न्नुप्मनाबा चोक्लो॥ 10 निनबे ये़क्यक्किन् मे़नाप्तुआङ् खाप्पुथ्यःङ् मे़जोगुरो, हे़क्क्याङ् मुरे़क् खारे़क् मे़जोगुआङ् ने़रो॥ खे़ङ्हाॽरे़ खुन्छिॽ साःङ्गो सक्मा पुॽरो खे़ङ्हाॽरे़ खुन्छिॽ थुङ्बोहाॽ थे़गक्कक्ना यङ्लो॥ हे़क्क्याङ् के़रे़क् नासिङ्गे़न् थक्लाओ तुक्मा याक्लो, के़रे़क् चित्लि नाराहाॽ सअम्याःप्पा पोङ्लो॥ 11 खुन्छिॽ चुजुक्सा साहाॽ चाजाःप्मासिदे़न् खिरिङ्बाहाॽरे़ खुन्छिॽ खाःन् आत्तान् ने़बे? खे़प्मो खिरिङ्बा, थे़रिङ्मा नु खिरिङ्बा च्याःक्हाॽआङ् किमाए मे़ङ्गिए लाङ्मे़घेगे़आङ् मे़वये़रो॥ 12 थे़रिङ्बे़ल्ले़ कुस्साहाॽरे़ लागि खुन्छिॽ योबा सानाःत्हाॽ कुसुक्सुक् से़रुसिआङ् वये़रो, हे़क्क्याङ् थे़रिङ्बे़ल्ले़ थे़रिङ्मे़ल्ले़ कुलागि थक्साहाॽ फुयुसि से़रुसिआङ् वये़रो, खे़ल्ले़ कुघाहाॽ से़रुसिआङ् तारुसिबा थक्साहाॽरे़ हे़क्क्याङ् लुङ्फुक्कोहाॽ सानाःत्हाॽरे़ थिम्सुआङ् ने़स्से़रो॥ 13 मुक्साम्साबा यहवे दाङ्बे़ल्ले़ उवा चोगुरो, “खे़प्से़ॽओ, आङ्गाॽ खे़ने़ॽ के़निङ्मिआरो॥ के़अन्लाहाॽ मिःक्खोॽ सुःङ्गु सुःङ्गु मिधिक्खुङ् पिने़रो, हे़क्क्याङ् के़वे़म्बा के़स्सा खिरिङ्बाहाॽ ताभेःल्ले़ मे़से़रुसिरो॥ आल्लआङ्धो खे़ने़ॽ लाजेॽओ सा के़न्नाःत्ने़ल्लो, खम्भ्याङ् खे़ने़ॽ के़इङ्घङ्साबाहाॽरे़ खुन्छिॽ इक्लान् आल्लआङ्धो याम्मो खे़म्मे़दे़त्ने़न्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.