नहुम 1 - लिम्बु1 एल्कोसि नहुमरे़ निनबेःल्ले़ कुयाःम्बेओ सुफोओ निसुबा माङ्निङ्वाॽपाःन्निन् हाबा कन्लो॥ निनबेओ यहवे दाङ्बे़ल्ले़ कुसाक्के़न् 2 यहवे दाङ्बे़ङ्ग कुनागे़हे़म्बा चोक्लो हे़क्क्याङ् कुले़क्वा के़नुःक्पा निङ्वाॽफुमाङ्लो, यहवे दाङ्बे़ल्ले़ कुले़क्वा नुःक्तु पिरुसिरो खुने़ॽ कुसाक्के़न् इसेःङ्बा चोक्लो॥ यहवे दाङ्बे़ल्ले़ कुनिङ्मिहाॽओ कुले़क्वा नुःक्तुरो, हे़क्क्याङ् खुने़ॽ के़अप्पाहाॽओ कुसाक्के़न्निन् थासुरो॥ 3 यहवे दाङ्बे़न् कुसिक् पोःक्मा नासि के़धःप्पा चोक्लो हे़क्क्याङ् खुने़ॽ साॽरिक् मुक्साम्साबा चोक्लो, यहवे दाङ्बे़ल्ले़ आप्तिक्साबे़न् खुम्दिङ् मे़म्बिए मे़ले़रुन्लो॥ के़इक्सिङ्बा सुरित् नु केजङ्ङो खुने़ॽ कुलाम् ने़रो, खम्भ्याङ् खाॽमिःप्पाहाॽग कुलाङ्हाॽओबा खाम्हिःक्लो॥ 4 खुने़ॽ वरःङ्ङिन् फे़ःक्तुल्ले़ चप्प्रे़क् चप्लो, खुने़ॽ के़रे़क् वहःङ्हाॽ चप्ल याःन्दुरो॥ बासान नु कार्मेलबा थे़गुहाॽ इरे़म्लो, हे़क्क्याङ् ले़बानानबा फुङ्हाॽ इसुॽआङ् माबेःक्लो॥ 5 खुने़ॽ कुदगि कोःक्मा फाङ्जङ्हाॽ यङ्लो, हे़क्क्याङ् थे़गु माङ्वाहाॽ योःम्बेःक्लो॥ खुने़ॽ ताःल्ले़ इक्सादिङ् खाम्बेःक्मान् थुरुप्लुप्ना यङ्लो, योॽबान् नु खे़प्मो के़वाॽबाहाॽ के़रे़क् चिरिम्लिम्ना मे़यङ्लो॥ 6 खुने़ॽ कुयाःक्ले़ॽइल्ले़ हात् ये़प्मा सुक्काङ्बे? खुने़ॽ किप्मा के़घुबा कुसिक्के़न् हाःत्ले़ थम्मा सुक्तुबे? खुने़ॽ कुसाक्के़न्निन् मिधुङ् मिराःक् हे़क्के थारो, हे़क्क्याङ् खुने़ॽ कुदगि सियाक्पेॽ थे़याक्पेॽहाॽ फयःप्फयःप् यःप्लो॥ 7 यहवे दाङ्बे़न् के़नुॽबा चोक्लो, ये़त्तुक्खे चामा ये़म्मो खुने़ॽए इःम्सिङ्मादे़न्लो, खुने़ॽओ के़घे़ःम्सिङ्बाहाॽ खुने़ॽ कम्ब्राङ् मे़त्तुसिरो॥ 8 कर खुने़ॽ के़गुङ्बा च्वाःत्तिल्ले़ निनबेन् मे़क्खुरो, खुने़ॽ कुनिङ्मिहाॽ खागे़माक्पादे़न्नो नाःत्तुदेसुसिरो॥ 9 यहवे दाङ्बे़ल्ले़ कुदक्ले़ङ्वाओ खे़ङ्हाॽरे़ आक्तङ्बा चे़म्भन् मे़जोगुसाङ् खुने़ॽ खे़ङ्हाॽ वरे़ङ्ले़ङ् युम्रे़क् मे़क्खुसिरो, हे़क्क्याङ् निले़ङ् तुक्खे लाक्खे मे़दाने़न्लो॥ 10 खे़ङ्हाॽ तिङ्ग्रेक् लाहाॽओ मे़हम्लो, चे़ल्ले़क्सेॽ थिःल्ले़ मयुसिआङ् मुदङ् मे़लॽरो, खे़ङ्हाॽ के़हेबा यान् हे़क्के थ्यःङ् मे़बोङ्लो॥ 11 निनबेए, यहवे दाङ्बे़ल्ले़ कुदक्ले़ङ्वाओ खे़ने़ॽलाम् चे़म्भन् के़जोःक्पा नु ताप्फे़ःम्बा सुजा के़बिबा लत्छा मना लःन्दे़आङ् वाॽरो॥ 12 यहवे दाङ्बे़ल्ले़ अक्खे पाःत्तुरो, “खे़ङ्हाॽ आत्तातान्ने यरिक् मे़वाॽरो हे़क्क्याङ् खे़ङ्हाॽ मुक्के़गुबा मे़जोक्लो हे़क्केसाङ् खे़ङ्हाॽ मे़मे़क्खुसिआङ् मे़नुप्लो॥ यहुदाए, आङ्गाॽ तुक्खे चाःत्ने़आङ् वाॽरो, कर आङ्गाॽ आल्लआङ्धो याम्मो तुक्खे मे़जाःत्ने़न्लो॥ 13 आल्ल खे़ङ्हाॽरे़ खुन्छिॽ खे़ःप्सिङ्ङिन् खे़ने़ॽ के़भक्ताङ्ङोलाम् आङ्गाॽ ए़क्खुङ् पिने़रो, हे़क्क्याङ् खे़न् इघेःङ्हाॽ स्याक् स्याक् फुॽरुङ्लो॥” 14 निनबेए, यहवे दाङ्बे़ल्ले़ खे़ने़ॽ के़याःम्बेओ अक्तङ्बा लत्छा इङ्जाङ् के़बिरे़आङ् वाॽरो— “आल्लआङ्धो खे़ने़ॽ के़मिङ् तक्मारे़ लागि खे़ने़ॽ आत्तिन्नाङ् के़मुॽइदाङ्सा मे़न्वाॽने़न्लो॥ खे़ने़ॽ के़माङ्हाॽ मे़युङ्बा माङ्हिम्मो खोःम्मनाबा लक्मनाबा नु योःम्मनाआङ् चोःक्मनाबा नावाइत्लाहाॽ आङ्गाॽ थ्यःङ् मे़क्खुङ्सिङ्लो॥ आङ्गाॽ खे़ने़ॽ के़इपुङ्ङिन् यारिप् चोगुङ्लो, थेआङ्भे़ल्ले़ खे़ने़ॽ कुॽइगे़भे़म्बा के़जोःक्लो॥” 15 ओमे़त्ते़म्मे़ॽ, सुनाइङ् के़दाःप्पा नु नुॽमादामा इङ्घङ् उवा के़जोःक्पाहाॽरे़ खुन्छिॽ लाङ्हाॽ कोःक्मा फाङ्जङ् थे़गु माङ्वाहाॽओ फे़न्ल पत्लो॥ यहुदाए, खे़ने़ॽ के़दङ्नाम्हाॽ तोसे़ॽओ खे़ने़ॽ माङ्हे़क् के़जोगुबा पाःन्हाॽ के़त्ते़ॽओ॥ आल्लआङ्धो कुॽइगे़भे़म्बाहाॽरे़ खे़ने़ॽ के़मे़म्भत्ने़न्लो, खे़ङ्हाॽ वरे़ङ्ले़ङ् युम्रे़क् मे़मे़क्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.