मर्कुस 6 - लिम्बुनासरतओ ये़सुन् नसान् मे़न्जोगुन् ( मत्ति १३:५३-५८ ; लुका ४:१६-३० ) 1 ये़सुन् खे़प्मोलाम् पेआङ् कुहुॽसाम्बाहाॽनु आबाङे कुबाङ्भेॽओ त्ये़॥ 2 हे़क्क्याङ् नाःम्सिङ् ये़न्नो ये़सुन् यहुदि चुम्लुङ्हिम्मो पेआङ् हुॽमा हेःक्तुसि॥ खे़प्मो यरिक् मनाहाॽरे़ खुने़ॽ कुनिसाम्मिन् मे़घे़प्सुआङ् खुनिॽ निङ्वाॽ मये़आङ् अक्खे मे़बाःत्तु, “कन् मनाःल्ले़ अक्तङ्बा पाःन्निन् आत्तो खोसुबे? आक्खेलॽरिक् सिक्कुम् निङ्वाॽ नु निङ्वाॽ के़माबा याःम्बक्हाॽ चोगुबे! 3 कङ्ग मरियमरे़ कुस्सा सिङ् के़गाम्बे़न् मेःम्बि? कङ्ग याकुब, युसुफ, यहुदा नु सिमोनसिरे़ खुनिॽ फुॽने मेःम्बि? कल्ले़ कुन्साॽ मे़न्छुमाहाॽग आनिॽनुएसे़ मे़वाॽबा॥” हे़क्केःल्ले़ खे़न् मनाहाॽरे़ खुने़ॽ नामे़न्छाॽरुन्लो॥ 4 ये़सुरे़ खे़ङ्हाॽ मे़त्तुसि, “माङ्निङ्वाॽपान् के़बाःप्पे़ङ्ग कुबाङ्भेॽसाबाहाॽ, कुगाॽइसोधोःक्हाॽ नु कुहिम्सयङ्हाॽरे़ इङ्धाङ् मे़म्बिरुन्लो॥ कर वेॽ ते़न्नोरक् खुने़ॽ कुबाःन्निन् मे़घे़प्सुॽरो॥” 5 खे़प्मोबा मनाहाॽरे़ खुनिॽ नसान् होःप्ते़बाल्ले़ चोगुल्ले़ ये़सुरे़ निङ्वाॽ के़माबा याःम्बक् चोःक्मा मे़सुक्तुन्, कर थिक्-ने़त्छि के़दुक्पाहाॽ सम्दाङ्लक् कुहुक् ने़स्सु पिरुसिआङ् वेःन्दुसिरो॥ 6 ये़सुरे़ खे़ङ्हाॽरे़ खुनिॽ नसाःन्निन् होःप्ते़बा निसुआङ् कुनिङ्वाॽ मये़॥ हे़क्क्याङ् ये़सुरे़ पाङ्भेॽहाॽओ हुॽरुसिर पेरो॥ ये़सुरे़ थिक्-ने़त् कुहुॽसाम्बाहाॽ पाङ्घुसिॽ ( मत्ति १०:५-१५ ; लुका ९:१-६ ) 7 थिक्-ने़त् (१२) कुहुॽसाम्बाहाॽ उःत्तुसिआङ् फे़न्साम्हाॽ नाःप्मा लःप्मा युक् पिरुसि, हे़क्क्याङ् ने़त्ने़त्छि पाङ्घुसि॥ 8 हे़क्क्याङ् अक्खेलॽरिक् इङ्जाङ् पिरुसि, “खिनिॽ लाम्दिःक्को के़बेगिल्ले़ तक्काःत्लक् याङ्ङासिम्मे़ॽ, खे़न्नाङ्धो वेॽ चामा चा, सुःक्वा नु याङ् थेआङ् मे़देॽरे़म्मिन्ने़ॽओ॥ 9 लाङ्सुःप्पिन् चाक्खे़म्मे़ॽ, कर वेॽ ले़क्सिङ्मा चाङ् मे़बक्खे़म्मिन्ने़ॽओ॥ 10 खिनिॽ के़बेगिल्ले़ आत्तिन् हिम्मो लाम्दाःक्मा के़म्बिरिॽ, खे़न् पाङ्भेॽओलाम् मे़म्बेःक्के थारिक् बा खे़न् हिम्मोए वये़म्मे़ॽओ॥ 11 हे़क्क्याङ् आत्तिन् लाजेॽओ खिनिॽ लाम् के़मे़न्दाःक्तिन् हे़क्क्याङ् खिनिॽ पाःन्नाङ् मे़ङ्घे़प्सुन्, खे़न् लाजेॽइन् के़ले़रुम्माङ् के़बिगिल्ले़ खिनिॽ लाङ्ङो के़घिप्पा खाम्हिःक्किन् थाप्से़म् थाॽरे़म्सिम्मे़ॽ कङ्ग खुनिॽ तक्ले़ङ्वाओ के़बोङ्बा मिक्सेःन्लो॥” 12 हे़क्क्याङ् खे़ङ्हाॽ मे़बेआङ् मनाहाॽओ खिनिॽ लायोलाम् हिन्दे़म्मे़ॽ फाॽआङ् इङ्भन् से़मा मे़हेःक्तु॥ 13 खे़ङ्हाॽरे़ मनाहाॽलाम् फे़न्साम्हाॽ मे़लःत्तुसि॥ हे़क्क्याङ् यरिक् के़दुक्पाहाॽ निःङ्गेॽ मे़हुःत्तु मे़बिरुसि, हे़क्क्याङ् मे़वेःन्दुसिरो॥ युहुन्नारे़ कुसिमे़न् ( मत्ति १४:१-१२ ; लुका ९:७-९ ) 14 आल्ल ये़सुरे़ कुमिङ्सो-कुधाःङ्सो के़रे़क् पिसाङ् से़रे़, हे़क्क्याङ् ये़सुरे़ कुयाःम्बेओ हे़रोद हाङ्ङिल्ले़आङ् खे़प्सुरो॥ कुभारे़ मे़बाःत्तु, “बप्तिस्मा के़बिबा युहुन्नान् याम्मो हिङे़बाल्ले़ चोगुल्ले़ खुने़ॽ मुक्साम्लाम्बा निङ्वाॽ के़माबा याःम्बक् चोगुर वाॽरो॥” 15 कर वेॽहाॽरे़ मे़बाःत्तु, “कङ्ग माङ्निङ्वाॽपान् के़बाःप्पा एलियान्लो॥” वेॽहाॽरे़ मे़बाःत्तु, “उन्छोःन्बा माङ्निङ्वाॽपान् के़बाःप्पाहाॽओ खुने़ॽआङ् थिक्लो॥” 16 कर हे़रोद हाङ्ङिल्ले़ कन् खे़प्सुआङ् अक्खे पाःत्तु, “कङ्ग बप्तिस्मा के़बिबा युहुन्नाःल्लो॥ इङ्गाॽ खुने़ॽ कुनिःङ्मान् खक् पाङ्घुङ्सिङ्ङाङ् वये़, कर याम्मो कुसिवे़त्लाम् कुहिङ्वे़त् पोःक्खे़रो!” 17-18 हे़रोद हाङ्ङिल्ले़ आबाङे कुन्साॽ फिलिपरे़ कुमेत् हे़रोदियासे़न् मेःत् कत्तुआङ् वये़॥ हे़क्क्याङ् हे़रोदियासरे़ कुनिङ्वाॽ तामा फाॽआङ् बप्तिस्मा के़बिबा युहुन्नान् ते़म्माआङ् पुङ्लाहिम्मो साक्मा इङ्जाङ् पिरुसिआङ् वये़, थेआङ्भे़ल्ले़ युहुन्नारे़ खुने़ॽ ए़त्ले़ङ् “खे़न् आबाङे के़न्साॽरे़ कुमेःत्तिन् मेःत् कप्मा मे़नुॽने़न्” मे़त्तुआङ् वये़रो॥ 19 हे़रोदियासरे़ युहुन्नाःन्नु कुसिक् पोगे़आङ् खे़न् से़प्मा निङ्वाॽ चोगुआङ् वये़साङ् खुने़ॽ से़प्मा मे़न्छुक्के वये़, 20 थेआङ्भे़ल्ले़ हे़रोद हाङ्ङिल्ले़ युहुन्नान् साम्योबा नु सेसेबा मना फाॽआङ् कुसिङ् निःत्तुआङ् वये़, खे़ल्ले़चोगुल्ले़ खुने़ॽ ताङ्से़ःप्तुआङ् वये़रो॥ युहुन्नारे़ कुबाःन्निन् खुने़ॽ खे़प्सुल्ले़ साॽरिक् किसे़आङ् वये़साङ् सते़र खे़प्सुरए वये़रो॥ 21 आल्ल यम्बा सुये़म् त्ये़॥ हे़रोद हाङ्ङिल्ले़ कुसावाःन्छिङ्मा ससःत्सराङ्ङो गालिल थुम्मोबा पयम् यम्बा सुहाङ्युक्पाहाॽ, तिलिङ्गाहाॽरे़ खुनिॽ थक्तुम्बाहाॽ नु मिङ्सोदाङ्बा तुम्म्याहाङ्हाॽ तरे उःत्तुसिआङ् वये़॥ 22 हे़रोदियासरे़ आबाङे कुस्सा मे़न्छुमाॽइन् खे़प्मो त्ये़आङ् लाःक्खे़, हे़क्क्याङ् हे़रोद हाङ्ङिन् नु खे़प्मो के़दाबा के़रे़क् तरेबाहाॽरे़ खुनिॽ निङ्वाॽ तासु पिरुसिल्ले़ हाङ्ङिल्ले़ खे़न् मे़त्तु, “खे़ने़ॽ थे के़नाःक्कासाङ् इङ्गाॽ पिने़रो॥” 23 खे़ल्ले़ माङ्हे़क्सिङ्ल मे़त्तु, “खे़ने़ॽ थे के़नाःक्का इङ्गाॽ पिने़॥ आहाङ्जुम्मिन् कुभ्रे़ःङ् के़नाःक्तुसाङ् पिने़रो॥” 24 खे़न् चुक्मे़न् कुम्मारो पेआङ् सेःन्दोसु, “आल्ल थे नाःक्तुङ्बाबे?” हे़क्केःल्ले़ कुम्मारे़ मे़त्तु, “बप्तिस्मा के़बिबा युहुन्नाःल्ले़ कुधे़गेःक्किन् नाःक्ते़ॽ॥” 25 खिमो खे़न् चुक्मे़न्नाङ् पेआङ् मे़त्तु, “बप्तिस्मा के़बिबा युहुन्नाःल्ले़ कुधे़गेःक्किन् आल्लोसा चे़त्थ्याओ पिराङ्ङे़ॽओ॥” 26 हे़क्केःल्ले़ हे़रोद हाङ्ङिन् साॽरिक् कुनिङ्वाॽ तुगे़साङ् खे़प्मो के़वाॽबा तरेबाहाॽरे़ खुनिॽ तगि खुने़ॽ चोगुबा माङ्हे़क्किन् के़प्माए के़लॽबा निङ्वाॽ चोगुआङ् 27 खे़प्मो के़ये़प्पा हाङ्तिलिङ्गाःन् पेगे़ॽआङ् युहुन्नारे़ कुधे़गेःक्किन् फे़त्ते़ॽ फाॽआङ् इङ्जाङ् पिरु॥ खे़न् खिमो पुङ्लाहिम्मो पेआङ् युहुन्नारे़ कुधे़गेःक्किन् खक्तु, 28 हे़क्क्याङ् चे़त्थ्याओ फे़त्तुआङ् खे़न् चुक्मे़न् पिरु॥ चुक्मे़ल्ले़ खे़न् तेॽरुआङ् कुम्मा पिरुरो॥ 29 युहुन्नाःल्ले़ कुहुॽसाम्बाहाॽरे़ कन् मे़घे़प्सुआङ् मे़द्ये़, हे़क्क्याङ् कुधक्किन् मे़देॽरुआङ् इःप्पुङ्ङो मे़लुप्तु॥ ये़सुरे़ हे़न्छिङ् ङासि मनाहाॽ चाजाःत्तुसिॽ ( मत्ति १४:१३-२१ ; लुका ९:१०-१७ ; युहु ६:१-१४ ) 30 तगि ये़सुरे़ इङ्भन् चोःक्से़ पाङ्घुसिबा सेःक्युक्मिबाहाॽरे़ मे़जोगुबा याःम्बक् नु मे़हुॽरुसिबा पाःन्हाॽ मे़नुःक्खे़ मे़द्ये़आङ् ये़सुन् मे़जे़क्तु॥ 31 हे़क्क्याङ् ये़सुरे़ आल्ल एःक्सादे़न्नो पिगिआङ् सप्फासिक् नाःम्मासि फाॽआङ् खे़ङ्हाॽ मे़त्तुसि, थेआङ्भे़ल्ले़ के़दाबा के़बेःक्पा मनाहाॽरे़ मे़जोगुल्ले़ खुनिॽ चामा ये़म्माङ् मे़ङ्घोए मे़वये़रो॥ 32 हे़क्केःल्ले़ ये़सुन् नु कुहुॽसाम्बाहाॽ खःङ्बेओ स्वाःत्ताङ् मे़लासे़आङ् एःक्सादे़न्नो मे़बे॥ 33 कर यरिक् मनाहाॽरे़ खे़ङ्हाॽ मे़बेर मे़बत्छे़बा मे़निसुसिआङ् कुसिङ् मे़निःत्तुसि, हे़क्क्याङ् के़रे़क् पाङ्जुम्मोलाम् मे़लोःक्ते़र मे़बे, हे़क्क्याङ् खे़ङ्हाॽ मे़बेबा ते़न्नो खे़ङ्हाॽनुःल्ले़ तगि खे़प्मो मे़गे़रे़॥ 34 हे़क्क्याङ् ये़सुन् खःङ्बेओलाम् लःन्दे़ल्ले़ यरिक् मनाहाॽ निसुसिआङ् कुलुङ्माॽ मे़दुगे़, थेआङ्भे़ल्ले़ खे़ङ्हाॽ मे़ल्लुक्कम्बा मेःन्नेबा मे़ल्लुक्हाॽ हे़क्के मे़लॽरे़॥ हे़क्केःल्ले़ ये़सुरे़ खे़ङ्हाॽ यरिक् निसाम् हुॽरुसि॥ 35-36 नाम्ध्ये़र पत्छे़ल्ले़ कुहुॽसाम्बाहाॽ खे़प्मो मे़द्ये़आङ् ये़सुन् मे़मे़त्तु, “आदाङ्बे, कङ्हाॽ पाङ्घे़देसे़से़ॽओ, थेआङ्भे़ल्ले़ कन् एःक्सादे़न्नो थेआङ् इङ्मा चामा खोमे़दे़त्ने़न्लो, याम्मो नाम्माङ् थ्ये़बेरो॥ हाराॽ खिरिबा हिम्हाॽ नु पाङ्भेॽहाॽओ मे़बेःक्काङ् चामा थुङ्मा मे़इङु मे़जररो॥” 37 कर ये़सुरे़ खे़ङ्हाॽ मे़त्तुसि, “खिनिॽए कङ्हाॽ कुजा पिरे़म्सिम्मे़ॽओ॥” खे़ङ्हाॽरे़ ये़सुन् याम्मो मे़मे़त्तु, “आदाङ्बे, किप् ने़त्छि (२००) याङ्ङिल्ले़ इङ्मनाबा खरे़ःङ्ङिल्ले़आङ् कङ्हाॽ मे़योरुन्छिन्लो॥ आक्खेलॽरिक् पिमा सुक्मे़दे़प्पे?” 38 ये़सुरे़ खे़ङ्हाॽ मे़त्तुसि, “खिनिॽ आक्खे़म्म्याक् खरे़ःङ् के़गत्तुम्, पेगे़म्मे़ॽआङ् ओमे़त्ते़म्मे़ॽ!” हे़क्क्याङ् खे़ङ्हाॽरे़ ओमे़मे़त्तु, हे़क्क्याङ् मे़भे़रे़आङ् मे़मे़त्तु, “आदाङ्बे, आनिगे़ग ङासि (५) खरे़ःङ् नु ने़त्छि (२) ङारक् कत्तुम्बे़॥” 39 खे़न् मनाहाॽ यान् के़युङ्बा खाम्मो थे़ःक्पे़त्ताङ् युङ्मा पाङ्घे़म्सिम्मे़ॽ फाॽआङ् ये़सुरे़ इङ्जाङ् पिरुसि, 40 हे़क्केःल्ले़ खे़ङ्हाॽ किप् थिक् (१००) नु ङाबोङ् (५०) लॽरिक् मे़हासिङ्ङाङ् थे़ःक्पे़त् मे़बे़न्छिङ्ङाङ् मे़युङ्सिङ्॥ 41 ये़सुरे़ खे़न् ङासि (५) खरे़ःङ् नु ने़त्छि (२) ङाहाॽ याङ्सिङ्ङाङ् साङ्ग्राम्पेदाङ् ले़प्माङ् ओमे़त्तुर निङ्वाॽफुमाङ्ङिन् नोगे़न् पिरुर खरे़ःङ्हाॽ खे़ःक्खु॥ हे़क्क्याङ् खे़न् मनाहाॽ मे़हाःत्तुसिर फाॽआङ् कुहुॽसाम्बाहाॽ पिरुसि॥ खे़न् ने़त्छि ङाहाॽआङ् खे़ःक्खुआङ् मनाहाॽ मे़हाःत्तुसिर फाॽआङ् कुहुॽसाम्बाहाॽ पिरुसिरो॥ 42 खे़ङ्हाॽरे़ खाघा मे़जरो॥ 43 हे़क्क्याङ् कुहुॽसाम्बाहाॽरे़ खे़न् खरे़ःङ् नु ङाहाॽरे़ कुजि के़नम्बाहाॽ मे़सुप्सुल्ले़ थिक्-ने़त् (१२) नइमा योरे़रो॥ 44 खे़न् खरे़ःङ् के़जाबाहाॽ हे़न्छिङ् ङासि (५,०००) ये़म्बित्छाॽहाॽरक् मे़वये़॥ ये़सुन् च्वाःत् सम्धाङ् लाङ्घेक् ( मत्ति १४:२२-३६ ; युहु ६:१५-२१ ) 45 ये़सुरे़ कुहुॽसाम्बाहाॽ खःङ्बेओ लासे़म्मे़ॽआङ् वरक्किल्ले़ नाहाङ्दाङ् बे़थसेदाओ इङ्गाॽनुःल्ले़ तगि पेगे़म्मे़ॽ फाॽआङ् मुरा मे़त्तुसि हे़क्क्याङ् खे़म्भ्यारिक् थारिक्ले़ मनासुम्हाॽ पाङ्सुदेसुसि॥ 46 हे़क्क्याङ् खे़ङ्हाॽनु से़न्दे़आङ् खुने़ॽ तुवा चोःक्से़ थो कोःक्माओ पेरो॥ 47 आल्ल खादामे़ल्ले़ खःङ्बेन् वरक्किल्ले़ कुलुम्मो वये़, हे़क्क्याङ् वरक्किल्ले़ कुयाओ ये़सुःन्ग एःक् वये़रो॥ 48 कुहुॽसाम्बाहाॽरे़ सुरित् केजङ्ङिन् खुनिॽ तक्ले़प्माङ्नु हुःरे़बाल्ले़ खःङ्बेन् वरक्को तगि तेॽमा के़साक्पा मे़दुमुआङ् मे़यागे़बा ये़सुरे़ निसुसि॥ हे़क्केःल्ले़ इङ्वा कामानुःल्ले़ तगि ये़सुन् वरक्को लाङ्घेगे़र पेरो॥ हे़क्क्याङ् कुहुॽसाम्बाहाॽ मे़यागे़बा खःङ्बेन् लाम्बाक्मा इःत्तुल्ले़ 49-50 खे़ङ्हाॽरे़ खुने़ॽ लाङ्घेगे़बा मे़निसुआङ् कङ्ग सिसाम्ने फाॽआङ् साॽरिक् मे़गिसे़र मे़अःक्ते़॥ खिमो ये़सुरे़ खे़ङ्हाॽ मे़त्तुसि, “मे़गिसे़म्मिन्ने़ॽ! इङ्गाॽ येसुआ॥ हाङ्हाङ् लॽरे़म्मे़ॽओ!” 51 हे़क्क्याङ् ये़सुन् खःङ्बेओ लासे़आङ् सुरित् केजङ्ङिन् हुमा चक् लॽरे़॥ कुहुॽसाम्बाहाॽरे़ साॽरिक् खुनिॽ निङ्वाॽ मये़॥ 52 खे़ङ्हाॽरे़ खरे़ःङ्ङिल्ले़ यरिक् मनाहाॽ ते़क्तुसिबा निङ्वाॽ के़माबा याःम्बक्किन् कुसिङ् मे़न्निःत्ते मे़वये़, थेआङ्भे़ल्ले़ खुनिॽ निङ्वाॽ के़धुङ्बा चोगे़रो॥ 53-54 हे़क्क्याङ् खे़ङ्हाॽरे़ वरक्किल्ले़ नाधाःम्बि मे़गाःक्तुआङ् गने़सरे़त्तो मे़गे़रे़आङ् खःङ्बेन् इमे़घेःक्खु॥ ये़सुन् खःङ्बेलाम् लःन्दे़नुमे़ःन्ने खे़प्मोबा मनाहाॽ के़रे़क्ले़ खुने़ॽ कुसिङ् मे़निःत्तु॥ 55 हे़क्क्याङ् खे़ङ्हाॽ खिरिबा ते़न्नो मे़लोःक्ते़र मे़बेआङ् के़दुक्पा के़यॽबाहाॽ ये़सुन् वये़बा ते़न्नोए खुनिॽ ने़त्नाःन्नुए मे़दारुसिरो॥ 56 पाङ्भेॽ पाङ्जुम् ये़क्यक्को खुने़ॽ आत्तान् पेसाङ् के़दुक्पा के़यॽबाहाॽ कुलाम्मो मे़ने़स्सुसिरो॥ हे़क्क्याङ् ये़सुरे़ कुदेःत्तिल्ले़ कुसुक्पे़न्लक्साङ् सुमा फाॽआङ् के़दुक्पाहाॽरे़ पेलि मे़भाक्तु, हे़क्क्याङ् खुने़ॽ के़सुबाहाॽ के़रे़क् मे़वेःत्ते़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.