मर्कुस 16 - लिम्बुये़सुन् सिमे़न्लाम् हिङ्ॽ ( मत्ति २८:१-८ ; लुका २४:१-१२ ; युहु २०:१-१० ) 1 आल्ल नाःम्सिङ्मा ये़न् काःक्तुआङ् मरियम मग्दलिनि, याकुबरे़ कुम्मा मरियम नु सालोमिसिरे़ मुर्रःन् ये़सुरे़ कुधक्को हुःप्मा फाॽआङ् मे़इङु॥ 2 हे़क्क्याङ् ते़ने़बा ये़न्नो खाओःत्ते़र पत्छे़ल्ले़ खे़ङ्हाॽ ये़सुन् मे़ने़स्सुबा इःप्पुङ् ले़प्माङ् मे़धासिङ्॥ 3 हे़क्क्याङ् लाम्मो मे़बेर मे़बत्छे़ल्ले़ खे़ङ्हाॽ अक्खे मे़मे़त्छिङ्, “आनिॽ लागि खे़न् इःप्पुङ्ङिल्ले़ कुमुराओ मे़ये़प्सुबा यम्बा लुङ्ङिन् हाःत्ले़ आइन्आबिबाबे?” 4 हे़क्क्याङ् खे़ङ्हाॽ खे़प्मो मे़गे़रे़आङ् ओमे़मे़त्तुल्ले़ इःप्पुङ्ङिल्ले़ कुमुराओ के़ये़प्पा लुङ्ङिन् थिक्ले़प्माङ् मे़इसुआङ् ने़स्से़बा मे़निसु॥ खे़न् लुङ्ङिन् साॽरिक् यम्बा चोगे़॥ 5 खे़ङ्हाॽ सिगाङ् मे़लाःस्से़ल्ले़ खे़प्मो फदाङ्बा तेत् के़जाङ्बा नालिङ्गे़न् थाङ्बे़न्धिक् चुप्साङ् ले़प्माङ् ये़बे़बा मे़निसुआङ् खुनिॽ निङ्वाॽ मये़रो॥ 6 खे़ल्ले़ खे़ङ्हाॽ मे़त्तुसि, “खिनिॽ निङ्वाॽ मे़मये़म्मिन्ने़ॽओ! खिनिॽ सिलाम्साक्मा सिङ्सम्दाङ् मे़भोःन्दुबा नासरतबा ये़सुन् के़गोःत्तुम्बा मेःम्बि? खुने़ॽग कप्मो होप्लो! खुने़ॽग सिमे़न्लाम् याम्मो हिङे़, मेःन्ने फाॽग्र खुने़ॽ मे़ने़स्सुबादे़न्निन् ओमे़त्ते़म्मे़ॽओ॥ 7 खिनिॽ पेगे़म्मे़ॽआङ् कुहुॽसाम्बाहाॽ नु पत्रुसे़न् कन् इङ्घङ्ङिन् पिरे़म्सिम्मे़ॽ, ‘खुने़ॽ तगि के़मे़त्तिबा हे़क्केए खिनिॽनुःल्ले़ तगि गालिलओ पेःक्लो, हे़क्क्याङ् खे़त्थोए खुने़ॽ के़दुमुम्लो॥’” 8 हे़क्क्याङ् खे़ङ्हाॽ इःप्पुङ्लाम् लाःक्कात् मे़लःन्दे़आङ् मे़लोःक्ते़, थेआङ्भे़ल्ले़ खे़ङ्हाॽ साॽरिक् मे़गिसे़आङ् मे़वये़रो॥ खे़ङ्हाॽरे़ हाःत्ताङ् थेआङ् मे़म्मे़त्तुन्॥ ये़सुन् हुॽसाम्बाहाॽरो ओसेःन्धाक्सिङ् ( मत्ति २८:९-२० ; लुका २४:१३-५३ ; युहु २०:११-२३ ) 9 ((आल्ल ते़ने़बा ये़न्नो खाओःत्ते़र पत्छे़ल्ले़ ये़सुन् सिमे़न्लाम् याम्मो हिङे़आङ् थिक्सिगेःक्पो मरियम मग्दलिनिरो ओसेःन्धाक्सिङ्लो॥ खे़ल्लोलाम् नुसि फे़न्साम्हाॽ ये़सुरे़ नाःत्तु लःत्तुसिआङ् वये़॥ 10 मरियम मग्दलिनिःन् पेआङ् ये़सुन् तुमुबा पाःन्निन् कुहुॽसाम्बाहाॽ मे़त्तुसि॥ खे़ङ्हाॽ मे़रिङ् थक्नु मे़हाबे़र मे़वये़रो॥ 11 खे़ङ्हाॽरे़ ये़सुन् सिमे़न्लाम् याम्मो हिङे़बा नु खे़ल्ले़ निसुबा पाःन्निन् मे़घे़प्सुसाङ् नसान् मे़न्जोगुन्लो॥ 12 खे़ङ्हाॽओ ने़प्फु हुॽसाम्बाहाॽ पाङ्भेॽओ पेगे़त्छिर पत्छे़त्छिल्ले़ ये़सुन् कुसिङ् निःप्मे़न्दे़प्मना पोःक्खे़आङ् खे़ङ्हाॽओ ओसेःन्धाक्सिङ्लो॥ 13 हे़क्क्याङ् खे़ङ्हाॽ ने़प्माङ् नुःक्खे़त्छिआङ् खुन्छिॽ निसे़त्छुबा पाःन्निन् वेॽहाॽ चे़क्ते़त्छु, कर खे़ङ्हाॽरे़ नसान् मे़न्जोगुन्लो॥ 14 याङ्सि थिक्थिक् (११) हुॽसाम्बाहाॽरे़ मे़जर मे़युङे़ल्ले़ ये़सुन् खे़प्मो ओसेःन्धाक्सिङ्॥ हे़क्क्याङ् ये़सुरे़ खे़ङ्हाॽ फे़ःक्तुसि, थेआङ्भे़ल्ले़ खुनिॽ नसान् सुःम्मान् नु निङ्वाॽ थुङ्माल्ले़ चोगुल्ले़ खे़ङ्हाॽरे़ खुने़ॽ सिमे़न्लाम् याम्मो हिङे़बा के़निबाहाॽरे़ खुनिॽ पाःन्निन् नसान् मे़न्जोगुन्लो॥ 15 ये़सुरे़ खे़ङ्हाॽ मे़त्तुसि, “आल्ल खिनिॽ काक् इक्सादिङ् खाम्बेःक्मो पेगे़म्मे़ॽआङ् के़रे़क् मे़न्छाम्गे़न् याप्मिहाॽ कन् सुनाइङ्ङिन् इङ्भोसे़म्सिम्मे़ॽओ! 16 हे़क्क्याङ् नसान् के़जोःक्पा नु बप्तिस्मा के़बोङ्बाल्ले़ से़न्लप् खोसुॽ, कर नसान् मे़न्जोःक्मनाबाल्ले़ खासे़न्नो थाआङ् खुम्दिङ् खोसुॽरो॥ 17 नसान् के़जोःक्पाहाॽ कन् मिक्सेःन्निल्ले़ काप्तुसिरो—खे़ङ्हाॽरे़ इङ्गाॽ आमिङ्ङो फे़न्साम्हाॽ मे़नाःत्तुसिॽ, हे़क्क्याङ् कुसङ् पाःन्दाङ्हाॽ मे़बाःत्तुॽरो॥ 18 हे़क्क्याङ् खे़ङ्हाॽरे़ असेःक्पाहाॽ मे़दे़म्सुसिॽ, निङ् के़याक्पा च्या मे़धुङुसाङ् थेआङ् हम् मे़म्बोङ्ङिन्लो॥ हे़क्क्याङ् के़दुक्पा के़यॽबाहाॽ सम्दाङ् हुक् मे़ने़स्सु मे़बिरुसिल्ले़ खे़ङ्हाॽ मे़वेःत्लो॥” ये़सुन् साङ्ग्राम्पेदाङ्ङो पेक् ( लुका २४:५०-५३ ; सेःक्युक् १:९-११ ) 19 हे़क्क्याङ् दाङ्बा ये़सुरे़ हे़क्के पाःत्तु सुरुआङ् खुने़ॽ थाःङ्धाःङ् साङ्ग्राम्पेदाङ् ले़प्माङ् थो पक्खे़र पेआङ् निङ्वाॽफुमाङ्ङिल्ले़ कुजुप्साङ् ले़प्माङ् युङ्सिङ्लो॥ 20 हे़क्क्याङ् कुहुॽसाम्बाहाॽरे़ काक् पिसाङ् मे़बेआङ् सुनाइङ् मे़से़सुरो॥ दाङ्बाल्ले़आङ् खुनिॽलाम् याःम्बक् चोगुर यरिक् निङ्वाॽ के़माबा मिक्सेःन्निल्ले़ सुनाइङ्ङिन् से़क्खारो फाॽआङ् ओसेःन्दाङ् चोगुरो॥)) |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.