मिका 7 - लिम्बुइस्राइलरे़ कुबिर्बेःम्बा याःम्बक् 1 आङ्गाॽग के़साक्पा तुक्खे तुमुङ्ङाङ् वाॽरो! चे़ल्ले़क्सेॽ इक्ताप्पो कुजाॽ मे़दुबुआङ् एगाङ् आङ्गाॽ सिला के़गोःप्पा हे़क्तङ्बा चोःक्कारो, कुजाॽहाॽ मे़सुप्सु मे़सुरुआङ् एगाङ् चे़ल्ले़क्सेॽइल्ले़ कबजाए मे़बत्ने़न्लो, हे़क्क्याङ् आङ्गाॽ आसिराॽ के़धाङ्बा तगि के़दुम्बा पःत्छेल्ले़ कुलिङ्सम् मे़बत्ने़न्लो॥ 2 कुदोःप्मा मनाहाॽ लाजेॽलाम् मे़मे़गे़आङ् मे़वाॽरो, कुदोःप्मा मना हाःत्ताङ् याःक्ते़आङ् मे़वाॽने़न्लो॥ मना से़प्मासिरे़ लागि के़रे़क्ले़ मे़सुगुसिआङ् मे़युङ्लो, के़रे़क्ले़ चे़न् मे़गे़सुआङ् फुॽनुसाॽहाॽ मे़से़रुसिरो॥ 3 ने़प्माङ् हुक्हाॽ फे़न्याःम्बक् चोःक्मा के़ले़बा चोक्लो, युक्साबाहाॽरे़ मिक्तोःक्हाॽ मे़नाःक्तुरो हे़क्क्याङ् खासे़न्लोःम्बाहाॽरे़ याङ् चामा मे़नाःक्तुरो॥ आयुक्युक्पाहाॽरे़ च्या चोःक्मा निङ्वाॽ मे़जोगुॽ हाबा खे़न्ने चोःक्मारे़ लागि इङ्जाङ् मे़जोगुरो, खे़ङ्हाॽ के़रे़क् मे़दङ्सिङ्ङाङ् चे़म्भन् मे़जोगुरो॥ 4 खे़ङ्हाॽओबा काक्नुःल्ले़ नुबे़न् आलक्लक्पा तिङ्ग्रेक् हे़क्तङ्बा चोक्लो, के़रे़क्नुःल्ले़ कुदोःप्मे़न् तिङ्ग्रेक् पुङ् कुइसिक् के़आःप्पा चोक्लो॥ इक्के़गोबाहाॽरे़ खिनिॽ के़म्मे़त्तिबा खुम्दिङ् ये़न्निन् के़रे़रो आल्ल खिनिॽ हाब् ले़क्मा ये़म् पोःक्खे़रो॥ 5 हिम्बेसाङ्बे़न् नसान् मे़जोगे़म्मिन्ने़ॽओ, तेःङ्बा चुम्मिन्नाङ् नामे़साॽरे़म्मिन्ने़ॽओ॥ खिनिॽ सोरिक् के़हे़प्मासिआङ् के़ने़स्सिबा मेःत्हाॽनुआङ् ये़क्ये़क्काङ् पारे़म्मे़ॽओ॥ 6 थेआङ्भे़ल्ले़ कुस्साःल्ले़ कुम्बा कुनामे़न्छाॽ मे़त्तुरो, मे़न्छुमासान् कुम्मारे़ कुदक्ले़ङ्वाओ पोःक्लो, पाङ्लिमे़न् नुःप्मे़ल्ले़ कुदक्ले़ङ्वाओ पोःक्लो, निङ्मिहाॽग आबाङे हिम्मोबा मनाहाॽ मे़बोङ्लो॥ यहवे दाङ्बालाम् से़न्लप् 7 कर आङ्गाॽग यहवे दाङ्बे़ल्ले़ कुलाम् ओमे़त्तुङ्लो, आङ्गाॽ ताङ्गे़से़ःप्पा निङ्वाॽफुमाङ्ङिन् हाङ्घुङ्लो, आङ्गाॽ आनिङ्वाॽफुमाङ्ङिल्ले़ आबेलिन् खे़प्सुरो॥ 8 आनिङ्मिसे, याप्मि कुनामे़न्छाॽ आम्मे़त्ते़न्ने़ॽओ हे़क्क्याङ् खिनिॽ निङ्वाॽ मे़दासे़म्मिन्ने़ॽओ! आङ्गाॽ चोःन्नासाङ् याम्मो पोःक्कारो॥ आल्लो आङ्गाॽ खामाक्मो वाॽआसाङ् यहवे दाङ्बे़न् आङ्गाॽ आओःत्ति पोङ्लो॥ 9 खुने़ॽ आङ्गाॽ ले़प्माङ् खासे़न् मे़लोःन्दुन्ल थारिक्, हे़क्क्याङ् आघोमा युक्किन् निःन्धो मे़जोगुन्ल थारिक्, आङ्गाॽ खुने़ॽ कुसाक्के़न्निन् थरुङ्लो, थेआङ्भे़ल्ले़ खुने़ॽ कुदक्ले़ङ्वाओ लायो चोगुङ्ङाङ् वाॽरो॥ खुने़ॽ आङ्गाॽ लःत्ताआङ् ओःत्तिओ ताःत्तारो, हे़क्क्याङ् आङ्गाॽ खुने़ॽ कुसाम्योनिमान् निसुङ्लो॥ 10 “यहवे दाङ्बा खे़ने़ॽ के़निङ्वाॽफुमाङ्ङिन् आत्तो वाॽबे?” याप्मि के़मे़प्पा आनिङ्मिहाॽरे़ खे़न् मे़निसुरो खे़ब्याङ् खे़ङ्हाॽ साॽरिक् सिरिङ्ममो मे़धारो॥ खे़न् निङ्मिहाॽरे़ तगि आङ्गाॽ किनाःन्दि मे़बिराङ्लो खे़ङ्हाॽ मे़जोःम्बे़न् आमिक्किल्ले़ए निसुरो, आल्लोसाङ् खे़ङ्हाॽ माराम्मोबा ले़ःक्वा हे़क्के लाङ्ङिल्ले़ चिदोॽ चिदोॽ मे़दोॽरुसिरो॥ 11 खिनिॽ लुङ्धाक्हाॽ से़प्मा ये़न् तारो, खिनिॽ इःन्दोहाॽ माःङ्घा थारिक् फोमा ये़न् तारो॥ 12 खे़न् ये़न्नो अस्सुरलाम् नु मिस्रबा ये़क्यक्हाॽलाम्, हे़क्क्याङ् मिस्रआङ् कत्ना युफ्रेतिस वहःङ् थारिक्पा वरःङ्ङाङ् कत्ना नु वरःङ् थारिक्पा हे़क्क्याङ् कोःक्मा फाङ्जङ्लाम् थे़गु माङ्वा थारिक्पा मनाहाॽ खिनिॽओ मे़नुःङ् मे़दारो॥ 13 मे़न्छाम् सुवाङ्हाॽरे़ लाजेन् मे़युक्तुबाल्ले़ चोगुल्ले़ इक्सादिङ् खाम्बेःक्मान् मुरे़ःक् खे़रे़ःक् पोङ्लो॥ यहवे दाङ्बे़ल्ले़ इस्राइले़न् लुङ्माॽ तुक्तु 14 यहवे दाङ्बाए, खे़ने़ॽ के़लक्खोबा खे़ने़ॽ के़मनाहाॽ तक्काःत्नु कत्ते़से़ॽओ॥ आनिगे कब्रिङ् पिसाङ् चाराम्मादे़न्हाॽ ने़रो, कर ताम्भुङ्ङो आनिगे से़रिगे़आङ् युङिगे़रो॥ खे़ल्ले़चोगुल्ले़ बासान नु गिलादओ आदेॽरे़ॽओ, हे़क्क्याङ् यरिक् तङ्बे तगि हे़क्के आनिगे चाराम्मादे़न्हाॽ खोसुम्बे़ररो॥ 15 “मिस्रलाम् के़लःन्दि के़भे़रिबा ये़न्हाॽ हे़क्के निङ्वाॽ के़माबा याःम्बक्हाॽ ओःन्धाक्निङ्लो॥” 16 मे़न्छाम् सुवाङ्हाॽरे़ कन् पाःन्निन् मे़निसुरो हे़क्क्याङ् खे़ङ्हाॽ सिरिङ्ममो मे़धारो, खे़ङ्हाॽरे़ खुन्छिॽ मुक्साम्हाॽ खक्पे़त् मे़नाप्तुसिरो॥ खे़ङ्हाॽरे़ खुन्छिॽ मुरान् आप्फेक् हुक्किल्ले़ मे़दे़प्तुरो, हे़क्क्याङ् खुन्छिॽ ने़क्खोॽबान् ना मे़ङ्घे़म्मना पोङ्लो॥ 17 खे़ङ्हाॽरे़ असेःक् कुइसिक्, खाम्बाङ्ङो के़उःङ्सिङ्बा थक्सा कुइसिक् खाम्हिःक्किन् मे़लागुरो॥ खे़ङ्हाॽ खुन्छिॽ याक्नादे़न्हाॽओलाम् पगि मे़गिर थे़गक्कक्ना मे़यङ्ल मे़लःन्लो, यहवे दाङ्बा आनिॽ निङ्वाॽफुमाङ्ङो यङ्मा मे़सिरो हे़क्क्याङ् खे़ङ्हाॽरे़ खिनिॽ के़म्गिरिरो॥ 18 खे़ने़ॽ हे़क्तङ्बा निङ्वाॽफुमाङ् हात् वाआङ्बे? खे़ने़ॽग लायो लासोःत्हाॽ ले़प्मि के़जोगुरो, हे़क्क्याङ् के़वाॽबा के़याःक्पा के़मनाहाॽरे़ खुन्छिॽ फे़न्याःम्बक्किन् ले़प्मि के़बिरुसिरो॥ खे़ने़ॽ सदादिङ् थारिक् के़सिक् मे़बोःक्ने़न्लो, कर आनिगे लुङ्माॽ तुक्मारे़ लागि के़निङ्वाॽ तारो॥ 19 खे़ने़ॽ याम्मो आनिगे याप्मि लुङ्माॽ के़दुक्लो, खे़ने़ॽ आनिगे लायोहाॽ के़लाङ्ङिल्ले़ के़दोॽरुरो हे़क्क्याङ् आनिगे के़रे़क् फे़न्याःम्बक्हाॽ कुदिम्बे केःम्बा वरःङ्ङो लाप्के़भुसु के़गेःत्तुरो॥ 20 खे़ने़ॽ याकुबे़न्नु से़क्खाबाए के़जोःक्लो हे़क्क्याङ् उन्छोन् खे़ने़ॽ माङ्हे़क् के़जोगुआङ् आनिगे पाधे़बाहाॽनु माङ्हुप् के़जोगुबा कुइसिक् खे़ने़ॽ अब्राहामे़न् लुङ्माॽ के़दुक्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.