मिका 6 - लिम्बुयहवे दाङ्बे़ल्ले़ इस्राइले़न् साम्दिङ् पिरु 1 यहवे दाङ्बे़ल्ले़ थे पाःत्तुॽ, खे़न् नुरिक् खे़प्से़म्मे़ॽओ— “खे़ने़ॽ इस्राइले़न् पोगे़ॽआङ् ये़बे़ॽओ, हे़क्क्याङ् कोःक्मा फाङ्जङ् तगि खे़ने़ॽ के़लुङ्हान् पाःन्हाॽ तोःन्दे़ॽओ, हे़क्क्याङ् के़बाःत्तुबान् थे़गु माङ्वाहाॽरे़ खे़प्सुररो॥ 2 “कोःक्मा फाङ्जङ्से, खाम्बेःक्मे़ल्ले़ नुप्मे़न्दिङ् कुबुङ्से, यहवे दाङ्बे़ल्ले़ कुआप्तिःक्किन् नुरिक् खे़प्से़म्मे़ॽओ॥ थेआङ्भे़ल्ले़ खुने़ॽ कुमनाहाॽनु लुङ्हान् पाःन्हाॽ कत्तुरो, खुने़ॽ इस्राइले़न् आप्तिक् पान् थिक्तुर पत्लो॥ 3 “आमनासे, आङ्गाॽ खिनिॽ थे मे़त्निङ्बे? आक्खेलॽरिक् खिनिॽ कक् कुःत्निङ्ङाङ् वाॽबे? आङ्गाॽ याप्मि नुगप् आबिरे़म्मे़ॽओ॥ 4 आङ्गाॽग मिस्र लाजेॽलाम् लःत्निङ् थाक्निङ्लो हे़क्क्याङ् आङ्गाॽ कुमे़ल्लुङ् हुङुङ्ङाङ् योक् लाजेॽलाम् खिनिॽ थे़ॽनिङ्लो॥ खिनिॽ लाम्लोबा पोङ्मारे़ लागि मोसान्, हारुने़न् नु मिरियम्मिन्नाङ् आङ्गाॽ खिनिॽ लुम्मो पाङ्घुङ्सिङ्लो॥ 5 आङ्गाॽ आमनासे, मोआबबा बालाक हाङ्ङिल्ले़ थे़मा सुजापान् पाःत्तुङ्आङ् वये़बे? हे़क्क्याङ् बओररे़ कुस्सा बालामरे़ खुने़ॽ थे नुगप् पिरुबे? खे़न् पाःन्निन् खिनिॽ निङ्वाॽ इःत्ते़म्मे़ॽओ॥ सित्तिमलाम् गिलगाल थारिक् लाम्दिक् के़जोगिबान् खिनिॽ निङ्वाॽसुम् लॽरे़म्मे़ॽओ, हे़क्केलॽरिक् यहवे दाङ्बे़ल्ले़ कुसाम्योबा याःम्बक्हाॽ खिनिॽ कुसिङ् निःप्मा के़सुक्तुम्लरो॥” 6 थे़मान् तेॽरुङ्ङाङ् यहवे दाङ्बे़ल्ले़ कुदगि पेःक्काबे? हे़क्क्याङ् के़रे़क्नुःल्ले़ यम्बा निङ्वाॽफुमाङ्ङिन् आङ्गाॽ आक्खेलॽरिक् साम्बोन्नाङ् से़वा मे़त्तुङ्बे? थे तङ्बे थिक् के़गे़प्पा पित्सात्हाॽ तारुङ्सिङ्ङाङ् मिधिङ्मनादेमनाबा सिदुङ्सभा तोःन्छे़ खुने़ॽ कुदगि ताआबि? 7 थे हे़न्छिङ् हे़न्छिङ् मे़ल्लुक्हाॽ नु थिबोङ् हे़न्छिङ् निःङ्गेॽ वहःङ्हाॽरे़ यहवे दाङ्बे़न् कुनिङ्वाॽ ताआङ्बि? आङ्गाॽ आभे़न् याःम्बक्किल्ले़ लागि आस्सा तुम्बे़न् आयाम्साम्मोबा लायोल्ले़ लागि आधक्कोनु के़लःम्बा सान् सिदुङ्जभा तोःन्दुङ्बि? 8 मे़न्छाम् याप्मिए, आत्तिन् पाःन्निन् नुबा चोक्, खुने़ॽ खे़न् खे़ने़ॽ ओसेःन्गे़धाक्ते़आङ् वाॽरो॥ हे़क्क्याङ् यहवे दाङ्बे़ल्ले़ खे़ने़ॽलाम् थे़मा खोमा निङ्वाॽ चोगु? खे़ने़ॽ कुदोःप्मा याःम्बक् चोगे़ॽ, कम्भ्रक् निङ्वाॽ चोगुॽ हे़क्क्याङ् वेॽहाॽ लुङ्माॽ तुक्ते़से़ॽओ खे़ब्याङ् निङ्वाॽफुमाङ्ङिन्नु नःम्नःम्माङ् वये़ॽओ॥ इस्राइलरे़ कुआप्तिक् नु खुम्दिङ् 9 यहवे दाङ्बे़न्नु किमाग सिक्कुम् निङ्वाॽ पाःन्लो ये़क्यक्कोबा मनाहाॽ खुने़ॽ अक्खे मे़त्तुसिरो— “ये़क्यक्को के़जुम्बा मनासे, खिनिॽ नुरिक्काङ् खे़प्से़म्मे़ॽओ, 10 कुॽइगे़भे़म्बा हिम्सयङ्से, खिनिॽ फे़न्याःम्बक्लाम् के़धगुम्बा याङ्साकुन्धेहाॽ नु मे़ङ्गे़प्मनाबा खिनिॽ के़गत्तुम्बा कुधाङ्माहाॽ कुसिःक्माहाॽ थे आङ्गाॽ निङ्वाॽ फेःत्छुङ्बाबि? 11 मे़ङ्गे़प्मना पासाङ्गा इग्र इङ्ले़क्पा कुधाङ्मा कुसिःक्मा के़गप्पा मनान् थे कुदोःप्मा लेःत्तुङ्बि? 12 खे़ने़ॽ याङ्साकुन्धेसाबा के़मनाहाॽ खार्मे़न्दक् याःम्बक् के़जोःक्पा मे़जोक्लो, खे़ने़ॽ के़मनाहाॽ इङ्ले़क्पा पान् मे़बाःत्लो हे़क्क्याङ् खे़ङ्हाॽरे़ मे़न्वाॽमना पान् मे़बाःत्तुरो॥ 13 “कल्ले़चोगुल्ले़, के़लायोहाॽरे़ चोगुल्ले़ आङ्गाॽ खे़ने़ॽ मे़ङ्मा हेःक्ने़आङ् वाॽरो॥ 14 खे़ने़ॽ चामाग के़जरो, कर के़सिक् मे़एःप्तुन्लो, हे़क्क्याङ् आल्लसाङ् के़साप्पोःक्के़न् मे़घाने़न्लो॥ याङ्साकुन्धेन् याङ्ग के़घोःत्तुॽ कर के़न्दाङ्घुन्लो, थेआङ्भे़ल्ले़ खे़ने़ॽ के़दाङ्घु के़गत्तुबान् आङ्गाॽ ताभेःल्ले़ खाप्पुथ्यःङ् चोगुङ् पिने़रो॥ 15 खे़ने़ॽ पोगुगे़न् कुजा लेःप्माग के़लेःत्तुरो कर खे़ल्ले़ कुजाॽइन् के़न्छुप्सुन्लो, खे़ने़ॽ चैतुन निःङ्गेॽ युमाग के़युसुरो कर के़धक्को हुःत्छिङ्मा के़ङ्घोसुन्लो, खे़ने़ॽ चे़ल्ले़क्सेॽ एःम्माग के़एःप्सुरो कर चे़ल्ले़क्सेॽ थिन् थुङ्मा के़ङ्घोसुन्लो॥ 16 खे़ने़ॽ ओम्रिरे़ कुधिम्हाॽ नु आहाबरे़ के़रे़क् कुयाःम्बक्हाॽ खे़ने़ॽ के़इःत्तु के़नाःत्तुआङ् के़वाॽरो, हे़क्क्याङ् खे़ङ्हाॽरे़ खुन्छिॽ साक्थिम्हाॽ खे़ने़ॽ के़दिम्दु के़नाःत्तुआङ् के़वाॽरो॥ कल्ले़चोगुल्ले़ आङ्गाॽ खे़ने़ॽ मे़ङ्ने़रो, हे़क्क्याङ् आङ्गाॽ खे़ने़ॽ के़मनाहाॽ कुनामे़न्छाॽ मे़प्मा चाहाक् चोगुङ्सिङ्लो, आङ्गाॽ आमनाहाॽरे़ कुनामे़न्छाॽ के़म्मे़प्पान् खे़ने़ॽ नासिथःप्मा के़बोङ्बा पोङ्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.