मिका 5 - लिम्बुबेथले़हे़मलाम् के़दाबा युक्साबा 1 थक्सुबा के़गप्पा ये़क्यक्के, के़धक्सुबा तुराहाॽ सुप्से़से़ॽओ, थेआङ्भे़ल्ले़ आनिॽ कब्रिङ् आम्गबे़आङ् आवाॽरो॥ खे़ङ्हाॽरे़ इस्राइलबा युक्साबे़न् कुने़दे़ङ्बो तक्काःत्तिल्ले़ मे़हिप्तुरो॥ 2 “कर बेथले़हे़म एप्राताए, खे़ने़ॽ यहुदा थाःक्हाॽओ चुक्सा के़जोःक्साङ्, खे़ने़ॽलाम् आलागि मनाधिक् लःन्लो, खुने़ॽ इस्राइलबा युक्साबा पोङ्लो, खुने़ॽ कुहेःक्सिङ्माङ्ग उन्छोःन्बा ये़म्माङ्धो, उनाहुरिबा ये़म्माङ्धोए वाॽरो॥” 3 कल्ले़चोगुल्ले़ सागप्मा सावाःन्दुङ्ङिल्ले़ तरुमा मे़न्छुमान् सामे़गत्ने़न्ल थारिक् इस्राइले़न् मे़नाॽरुरो हे़क्क्याङ् कुम्भुॽ कुन्साॽहाॽ इस्राइलिहाॽनु तङ्से़ मे़दारो॥ 4 यहवे दाङ्बे़ल्ले़ कुमुक्साम्मो नु यहवे दाङ्बा कुनिङ्वाॽफुमाङ्ङिल्ले़ कुमिमिदिङ्गे़न् कुमिङ्ङो खुने़ॽ ये़प्लो॥ हे़क्क्याङ् कुमे़ल्लुक्हाॽ कमुसि ओमे़त्तुसिरो, इक्सादिङ् खाम्बेःक्मोबा कुयाओ थारिक्के खुने़ॽ पयम् यम्बा चोःक्पाल्ले़ चोगुल्ले़ खे़ङ्हाॽ ताप्थेक् याम्धेक् मे़वाॽरो॥ 5 हे़क्क्याङ् खुने़ॽ खे़ङ्हाॽरे़ खुन्छिॽ नुॽमादामारे़ कुबुङ् पोङ्लो॥ आल्ल अस्सुरिहाॽरे़ आनिॽ लाजेन् मे़लिसु मे़दारुल्ले़ हे़क्क्याङ् आनिॽ थेःक्सिङ्मा हाङ्यक्हाॽ मे़लुःन्दुल्ले़ खे़ङ्हाॽरे़ खुन्छिॽ तक्ले़ङ्वाओ नुसि मे़ल्लुक्कम्बाहाॽ इग्र ये़त्छि लाम्लोबाहाॽ आनिॽ आभोःक्खुम्सिम्लो॥ से़न्लप् नु खुम्दिङ् 6 खे़न् मे़ल्लुक्कम्बाहाॽरे़ अस्सुर लाजेन् ताभेःल्ले़ युक् मे़जोगुरो निम्रोद लाजेन् फिःङ्मनाबा ताभेःल्ले़ मे़युक्तुरो॥ अस्सुरिहाॽ आनिॽ लाजेॽओ थङ् चोःक्से़ मे़भे़न्निल्ले़ हे़क्क्याङ् आनिॽ इःन्दोहाॽ खे़ङ्हाॽरे़ मे़दोॽरुल्ले़ आनिॽ युक्साबे़ल्ले़ अस्सुरिहाॽरे़ खुन्छिॽ हुक्कोलाम् ताङ्आसे़ःप्लो॥ 7 याकुबरे़ के़वाॽबा के़याःक्पा कुमनाहाॽग यरिक् मे़न्छाम् याप्मिहाॽरे़ खुन्छिॽ लुम्मो यहवे दाङ्बालाम् के़धाबा सेःक्वा नु याःन्हाॽओ के़धाबा वहित् हे़क्के मे़लॽरो, खे़ङ्हाॽरे़ आत्तिन् मनाहाॽआङ् इग्र मे़न्छाम् याप्मिहाॽआङ् मे़न्हाङ्घुसिन्लो॥ 8 याकुबरे़ के़वाॽबा के़याःक्पा कुमनाहाॽग मे़न्छाम् सुवाङ्हाॽ नु यरिक् मनाहाॽरे़ खुन्छिॽ लुम्मो मे़वाॽरो, ताम्भुङ्ङोबा थक्साहाॽ लुम्मो के़वाॽबा खिरिङ्बा नु मे़ल्लुक् मे़ःन्दाहाॽ लुम्मो के़वाॽबा खिरिङ्बा हे़क्तङ्बा मे़बोङ्लो, खे़ल्ले़ उःक्खु थे़मुसिर फुयुसिर लाङ्घेःक्लो, हे़क्क्याङ् आत्तिल्ले़आङ् से़म्मा मे़सुक्तुसिन्लो॥ 9 खिनिॽ निङ्मिहाॽ नाःम्मासिरे़ लागि खिनिॽ हुक्किल्ले़ के़साःप्सुम्सिम्लो, हे़क्क्याङ् खिनिॽ निङ्मिहाॽ के़रे़क् मे़मे़क्लो॥ 10 यहवे दाङ्बे़ल्ले़ अक्खेलॽरिक् उवा चोगुरो, “खे़न् ये़न्नो आङ्गाॽ आइङ्जाङ् मे़न्इःप्मनाबा सुवाङ्हाॽरे़ खिनिॽ अन्हाॽ नु अन्लाधाहाॽ खाप्पुथ्यःङ् चोगुङ्सिङ्ङाङ् युम्रे़क् मे़क्खुङ्सिङ्लो, 11 खिनिॽ लाजेॽओबा ये़क्यक्हाॽ लुःन्दुङ्देसुङ्लो, हे़क्क्याङ् खिनिॽ के़रे़क् हाङ्यक्हाॽ यन्छुङ् पिनिङ्लो॥ 12 खिनिॽ साम्माङ् मुरामे़प्मा मुःन्धुम्हाॽ नुप्सुङ्लो हे़क्क्याङ् खिनिॽ याम्मो आभे़ल्ले़आङ् साम् के़म्मुःत्तुम्मिन्लो॥ 13 खिनिॽ लुम्मोलाम् लक्मनाबा नावाइत्लाहाॽ नु सेसे लुङ्हाॽ आङ्गाॽ खाप्पुथ्यःङ् यःप्सुङ् पिनिङ्लो॥ खिनिॽ आबाङे हुक्किल्ले़ के़जोगुम्बा पाःन्हाॽ तगि याम्मो आप्फाल्ले़आङ् से़वा के़न्जोगिन्लो॥ 14 खिनिॽ लुम्मोलाम् असेरा माङ् नावाइत्लाहाॽ आङ्गाॽ आःक्खुङ्ङाङ् लाप्फुसुङ् पिनिङ्लो, हे़क्क्याङ् खिनिॽ ये़क्यक्हाॽ लुःन्दुङ् पिनिङ्लो॥ 15 आइङ्जाङ् मे़न्इःप्मनाबा सुवाङ्हाॽओ आङ्गाॽ साॽरिक् आसिक् पोःक्माल्ले़ कुले़क्वा नुःक्तुङ्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.