मिका 4 - लिम्बुयहवे दाङ्बे़ल्ले़ कुगोःक्मा ( यसै २:२-४ ) 1 यहवे दाङ्बे़ल्ले़ कुहिम् के़युङ्बा कोःक्माङ्ग के़दाबा ये़न्हाॽओ कोःक्मा फाङ्जङ्हाॽनुःल्ले़ केःम्बा पोङ्ङाङ् युङ्सिङ्लो, हे़क्क्याङ् थे़गु माङ्वाहाॽनुःल्ले़ चन्जम्बा पोङ्लो, खम्भ्याङ् मे़न्छाम् सुवाङ्हाॽ खे़प्मो मे़लुम्सिङ् मे़दारो॥ 2 यरिक् मे़न्छाम् सुवाङ्हाॽ मे़दाआङ् अक्खे मे़बाःत्तुरो, “त्ये़म्मे़ॽओ, यहवे दाङ्बे़ल्ले़ कुगोःक्मान् लिङुम्लो, हे़क्क्याङ् याकुबरे़ कुनिङ्वाॽफुमाङ्ङिल्ले़ कुहिम्मो पेगिरो॥ खुने़ॽ कुलाम्मो लाङ्घेःक्मा आनिॽ आहुॽरो, हे़क्केलॽरिक् आनिॽ खुने़ॽ कुलाम्मो लाङ्घेःक्मा आसुक्लरो॥” थेआङ्भे़ल्ले़ साम्योथिम् इङ्जाङ्ङिन् सियोनलाम् तारो, हे़क्क्याङ् यहवे दाङ्बे़ल्ले़ कुबाःन्जाक्किन् यरुसले़मलाम् लःन्लो॥ 3 खुने़ॽ यरिक् मनाहाॽरे़ खुन्छिॽ लुम्मो खासे़न् चोगुरो, हे़क्क्याङ् माःङ्घा माःङ्घा थारिक्पा के़धुम्बा मे़न्छाम् सुवाङ्हाॽओ खे़माॽ पाःन्हाॽ कुनुप्मा खासे़न् निःन्धो चोगु पिरुसिरो॥ खे़ङ्हाॽरे़ खुन्छिॽ ताभेहाॽ मे़धगुआङ् चुगे़ङ् मे़जोगुरो खुन्छिॽ लाःक्हाॽ मे़भे़ःत्छुआङ् कुजा सिप्मा कात्च्या मे़धगुरो॥ मे़न्छाम् सुवाङ्हाॽरे़ खुन्छिॽ तक्ले़ङ्वाओ ताभे मे़न्याङ्सिङ्ङिन्लो, खे़ङ्हाॽरे़ याम्मो आप्फाल्ले़आङ् थङ् चोःक्मा मे़न्हुॽसिङ्ङिन्लो॥ 4 के़रे़क् मनाहाॽ खुन्छिॽ आबाङे चे़ल्ले़क्सेःल्ले़ कुबुङ्ङो हे़क्क्याङ् खुन्छिॽ पःत्छेॽ पुङ् सिगाङ् मे़युङ्लो, हे़क्क्याङ् खे़ङ्हाॽ आत्तिल्ले़आङ् यङ्मा मे़से़रुसिन्लो, थेआङ्भे़ल्ले़ मुक्साम्साबा यहवे दाङ्बे़ल्ले़ए पाःत्तुआङ् वाॽरो॥ 5 के़रे़क् मे़न्छाम् सुवाङ्हाॽरे़ खुन्छिॽ आप्फेक् आप्फेक् माङ्हाॽ मे़नाःत्तु मे़दिम्दुसिसाङ्, आनिगे़ग आभे़ल्ले़साङ् यहवे दाङ्बा आनिगे निङ्वाॽफुमाङ्ङिल्ले़ कुइङ्जाङ्ङिन् आनिगे इःत्तुम्बे़ नाःत्तुम्बे़रो॥ मे़दे़म्सु मे़देॽरुसिबा लाजेॽलाम् इस्राइलिहाॽ मे़नुःङ् 6 यहवे दाङ्बे़ल्ले़ अक्खेलॽरिक् उवा चोगुरो, “खे़ल्ले़ याःन्दिक् आङ्गाॽ कुलाङ् के़सक्पाहाॽ सुप्सुङ्सिङ्लो, हे़क्क्याङ् मे़दे़म्सु मे़देॽरुसिबाहाॽ नु मे़रिङ्ङो थासुङ्सिङ्बा मनाहाॽ आङ्गाॽ याम्मो फुक्खुङ्सिङ्लो॥ 7 के़वाॽबा के़याःक्पा लाङ्सक्पाहाॽ नु माःङ्घा मे़नाःत्तु मे़देसुसिबाहाॽ मुक्के़गुबा सुवाङ् चोगुङ्सिङ्लो॥ खे़न् ये़न्नाङ्धो यहवे दाङ्बे़ल्ले़ खे़ङ्हाॽरे़ खुन्छिॽ लुम्मो सियोन कोःक्माओ सदादिङ् हाङ्युक् चोगुरो॥ 8 सियोनरे़ कुस्सा मे़न्छुमा, यरुसले़ःम्मे, खे़ने़ॽलाम् याम्मो थिक्ले़ङ् निङ्वाॽफुमाङ्ङिल्ले़ कुमनाहाॽ ओमे़त्तुसिरो॥ तगिबा हाङ्जुम्मिन् खे़ने़ॽ याम्मो के़म्नुःक् के़म्बिरो, यरुसले़ःम्मिल्ले़ कुस्सा मे़न्छुमाओ हाङ् ताक्फाःन् याम्मो तारो॥ 9 “आल्ल खे़ने़ॽ थेआङ् के़भिःक्ल के़हाःप्पाबे? थे खे़ने़ॽ हाङ् के़ङ्गत्तुम्बि? थे खे़ने़ॽ के़सुजादाङ्बे़न् मे़गे़बि? खे़ल्ले़चोगुल्ले़ सागप्मा तुङ्ङिल्ले़ तरुमा मे़न्छुमान् हे़क्के खे़ने़ॽ सागप्मा तुङ्ङिल्ले़ के़दे़म्से़आङ् वाॽबि? 10 सियोनरे़ कुस्सा मे़न्छुमाए, सागप्मा तुङ्ङिल्ले़ तरुमा मे़न्छुमान् हे़क्के खे़ने़ॽ खइक् खइक् के़इक्सिङ्ल तुक्मे़ल्ले़ के़भिःक्लो, थेआङ्भे़ल्ले़ खे़ने़ॽ कन् ये़क्यक्किन् ले़प्माए पोङ्लो हे़क्क्याङ् ताप्मे़रादे़न्नो युङ्मा पोङ्लो॥ आल्ल खे़ने़ॽ बेबिलोन पेःक्मा पोङ्लो, कर खे़ने़ॽ खे़प्मो ताङ्के़म्से़ःप्लो॥ खे़ने़ॽ के़निङ्मिहाॽरे़ खुन्छिॽ हुक्कोलाम् यहवे दाङ्बे़ल्ले़ खे़प्मोए खे़ने़ॽ के़धे़ॽरो॥ 11 “कर आल्ल खे़ने़ॽ के़दक्ले़ङ्वाओ यरिक् मे़न्छाम् सुवाङ्हाॽ मे़जुप्से़आङ् मे़वाॽरो॥ खे़ङ्हाॽरे़ मे़बाःत्तुॽ, ‘यरुसले़ःम्मिन् मे़जिःन्दुररो, हे़क्क्याङ् आङ्दिङ् के़लॽबा मिक्किल्ले़ सियोने़न् ओमे़त्तुम्लो॥’ 12 कर खे़ङ्हाॽरे़ यहवे दाङ्बे़ल्ले़ कुनिङ्वान् मे़न्निसुन्लो, खे़ङ्हाॽरे़ खुने़ॽ चोःक्मा इःत्तुबान् कुसिङ् मे़न्निःत्तुन्लो, चाधाम्मादे़न्नो चाधःङ्हाॽ फुङ्मनाबा कुइसिक् खुने़ॽ खे़ङ्हाॽ खुम्दिङ् पिमासि फाॽआङ् सुप्सुसिरो॥ 13 ‘सियोनरे़ कुस्सा मे़न्छुमाए, पोगे़ॽआङ् चाधाप्से़ॽओ, थेआङ्भे़ल्ले़ आङ्गाॽ खे़ने़ॽ फे़न्जेॽ ताङ्हाॽ पिने़रो, आङ्गाॽ खे़ने़ॽ कासा लाङ्तोॽभेत् पिने़रो, हे़क्क्याङ् चाधाम्मनाबा हे़क्के मे़न्छाम् सुवाङ्हाॽ के़धाप्सुसिरो॥ खे़ङ्हाॽरे़ फे़न्याःम्बक् मे़जोगुआङ् मे़सुप्सुबा पोगुगे़न् कुजाहाॽ हे़क्क्याङ् खे़ङ्हाॽरे़ खुन्छिॽ याङ्साकुन्धेहाॽ काक् इक्सादिङ् खाम्बेःक्कोबा यहवे दाङ्बाओ के़दोःन्दुरो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.