मिका 3 - लिम्बुलाम्लोबाहाॽ पाःन् मे़मे़त्तुसि 1 हे़क्क्याङ् आङ्गाॽ अक्खे मे़त्तुङ्सिङ्लो, “याकुबरे़ कुलाम्लोबासे, इस्राइलि हिम्सयङ्बा युक्साबासे, खिनिॽ सिङ्सिङ् ये़क्ये़क्काङ् खे़प्से़म्मे़ॽओ, थे खासे़न्निन् खिनिॽ ले़मा मे़बोङ्ने़न्नाङ्बि? 2 खिनिॽग नुबा पाःन्निन् के़जिःत्तुम्लो हे़क्क्याङ् ताप्फे़ःम्बा पाःन्निन् खिनिॽ सिराॽथाङ्लो, खिनिॽग आमनाहाॽरे़ खुन्छिॽ होरिक्पान् के़धिक्तुम्लो हे़क्क्याङ् खे़ङ्हाॽरे़ खुन्छिॽ ये़प्पालाम् ने़क्सान् के़धे़ःक्खुम्लो॥ 3 खिनिॽग आमनाहाॽरे़ खुन्छिॽ ने़क्सान् के़जाम्लो, खे़ङ्हाॽरे़ खुन्छिॽ होरिक्पान् के़धिक्तुम्लो, हे़क्क्याङ् खुन्छिॽ ये़प्पान् फल्लाक् फल्लाक् के़ए़क्खुम्लो खम्भ्याङ् खप्प्याओ थे़क्मा नु फसिओ थोःक्मा सान् कुइसिक् खे़ङ्हाॽ कुजक्ता कुले़म्दा के़जोगुम्सिम्लो॥ 4 खे़ब्याङ् खिनिॽ कुभाॽरे़ निङ्वाॽफुमाङ्ङिन् पेलि के़भाक्तुम्लो, कर खुने़ॽ खिनिॽ नुगप् के़म्बिरिन्लो॥ खिनिॽ फे़न्याःम्बक् मे़जोगुबाल्ले़ चोगुल्ले़ खे़न् ये़म्मो खुने़ॽ कुनारान् खिनिॽलाम् चिक्खुरो॥” 5 यहवे दाङ्बे़ल्ले़ अक्खे पाःत्तुरो— “आङ्गाॽ आमनाहाॽ ताप्फे़ःम्बा लाम्मो लाङ्घेःक्मा के़बाङ्बा माङ्निङ्वाॽपान् के़बाःप्पाहाॽ कुभारे़ चामा पिरुसिल्ले़ खे़ङ्हाॽरे़ सनारुङ् नुॽमादामा उवा मे़जोगुरो, खे़ल्ले़ खे़ङ्हाॽ चामा मे़बिरुसिन्ने़भग्र, खे़ल्ले़ कुदक्ले़ङ्वाओ खे़ङ्हाॽ थङ् चोःक्मारे़ लागि यारिप् मे़बोङ्लो॥ 6 कल्ले़चोगुल्ले़ खिनिॽओ सुफो मेःन्नेबा से़न्दिक् तारो, खामाक्मा पोङ्ॽ, कर खिनिॽ थुम्या इमा के़ङ्घोसुम्मिन्लो॥ माङ्निङ्वाॽपाःन के़बाःप्पाहाॽरे़ लागि नाम्धारो, हे़क्क्याङ् खे़ङ्हाॽरे़ लागि ले़न्दिक् खाधाम्लो॥ 7 सुफो के़निबाहाॽ सिरिङ्ममो मे़धारो, हे़क्क्याङ् थुम्या के़इबाहाॽरे़ खुन्छिॽ नासाम्धारो॥ खे़ङ्हाॽ के़रे़क्ले़ खुन्छिॽ मुरान् मे़दे़प्तुरो, थेआङ्भे़ल्ले़ निङ्वाॽफुमाङ्लाम् खे़ङ्हाॽरे़ नुगप् मे़ङ्घोसुन्लो॥” 8 कर आङ्गाॽग याकुबे़न् कुभे़न् याःम्बक्किन् मे़प्मारे़ लागि हे़क्क्याङ् इस्राइले़न् कुलायोन् चे़क्मारे़ लागि यहवे दाङ्बे़ल्ले़ कुयाम्साम्लाम् मुक्साम्, खासे़न् नु मुक्किल्ले़ आङ्गाॽ कुधिम् पोःक्खाङ्ङाङ् वाॽआरो॥ 9 याकुबरे़ कुहिम्सयङ्बा लाम्लोबासे हे़क्क्याङ् इस्राइलरे़ कुहिम्सयङ्बा युक्साबासे, खिनिॽ कन् पाःन्निन् खे़प्से़म्मे़ॽओ, खिनिॽग, खासे़न्निन् पजित् के़जिःत्तुम्लो हे़क्क्याङ् के़रे़क् कुदोःप्मा पाःन्हाॽ पिर्बेःम्बा के़जोगुम्लो, 10 खिनिॽ माक्खिॽ के़से़सुम्माङ् सियोने़न् के़जोगुम्लो, हे़क्क्याङ् फे़न्याःम्बक्लाम् यरुसले़ःम्मिन् के़जोगुम्लो॥ 11 खे़प्मोबा लाम्लोबाहाॽरे़ सुरुत् याङ्ले़ लागि खासे़न् मे़लोःन्दुरो, खे़प्मोबा निङ्वाॽफुसाम्बाहाॽरे़ नाम्याक्ले़ लागि मे़हुॽरुसिरो, हे़क्क्याङ् खे़प्मोबा माङ्निङ्वाॽपान् के़बाःप्पाहाॽरे़ याङ्ले़ लागि माङ्निङ्वाॽपान् मे़बाःत्तुरो॥ हे़क्क्याङ्साङ् खे़ङ्हाॽ यहवे दाङ्बाओ मे़घे़ःम्सिङ्लो खे़ब्याङ् खे़ङ्हाॽरे़ अक्खे मे़बाःत्तुरो, “थे़मा यहवे दाङ्बे़न् आनिॽ लुम्मो मे़वाॽने़न्नाङ्बि? आनिॽओ थे़माआङ् ताप्फे़ःम्बा पान् मे़बोङ्ने़न् मे़दाने़न्लो॥” 12 कल्ले़चोगुल्ले़ खिनिॽ के़जोगुम्बाल्ले़ चोगुल्ले़ए सियोने़न् इक्ताप् थोङ्मनाबा हे़क्के मे़दोःक्खुरो, यरुसले़ःम्मिङ्ग लुङ्हाॽ के़लुम्सिङ्बा पोङ्लो, माङ्हिम् के़युङ्बा कोःक्मान् पोःक्ला के़त्ताङ् उःक्पे़त् ताम्भुङ् पोङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.