मिका 2 - लिम्बुमना निङ्सेक् नु माङ् निङ्सेक् 1 फे़न्याःम्बक् चोःक्मा लाम् के़गोःप्पाहाॽग मे़जिःत्ते़ मे़स्ये़रो, खे़ङ्हाॽ इप्नाओ मे़ने़सिङ्ङाङ् ताप्फे़ःम्बा चे़म्भन् चोःक्मा मे़इःत्तुरो! तानाम् खाओःत्नु मेःन्ने खे़ङ्हाॽरे़ खे़न् याःम्बक्किन् मे़जोगु मे़देसुरो, थेआङ्भे़ल्ले़ खे़न् याःम्बक्किन् चोःक्मा खे़ङ्हाॽरे़ मुक्साम् मे़गत्तुरो॥ 2 खे़ङ्हाॽरे़ इक्ताप्हाॽ मिक्मे़गेःत्तुरो हे़क्क्याङ् खे़ङ्हाॽरे़ खे़न् इक्ताप्हाॽ मे़नाप्तुसिरो, खे़ब्याङ् हिम्हाॽओ खुन्छिॽ मिक्लाःत्लो हे़क्क्याङ् खे़ङ्हाॽरे़ खे़न् हिम्हाॽ हुक्काप् मे़जोगुरो॥ खे़ङ्हाॽरे़ मनाहाॽरे़ खुन्छिॽ हिम्हाॽ नु लक्खोमाहाॽ मे़युक्तुआङ् खुन्छिॽ मे़मे़त्छिङ्लो॥ 3 कल्ले़चोगुल्ले़ यहवे दाङ्बे़ल्ले़ खे़ङ्हाॽ अक्खे मे़त्तुसिरो, “आङ्गाॽ कन् मनाहाॽरे़ खुन्छिॽ लागि अक्तङ्बा मे़क्मासिमा निङ्सेक् चोगुङ्ल वाॽआरो, खे़न् लाम्बा खिनिॽ हिङ्मा के़न्छुक्तिन्लो॥ खिनिॽ आङ्दिङ्ङाङ् लाङ्घेःक्मा के़न्याःन्दुम्मिन्लो, थेआङ्भे़ल्ले़ खे़न् लत्छा ये़त्तुक्खेबा ये़म् पोङ्लो॥ 4 खे़न् ये़न्नो मनाहाॽरे़ खिनिॽ के़म्येःत्तिरो, खे़ङ्हाॽरे़ मे़रिङ् साम्लोन् साम्मे़मे़त्तुर लासाक् के़म्मे़त्तिरो— ‘आनिगे़ग साॽरिक्के खाप्पुथ्यःङ् पोःक्खिगे़रो! आनिगे मनाहाॽरे़ खुन्छिॽ याङ्साकुन्धेन् पःक्खे़आङ् ने़रो॥ खुने़ॽ खे़न् याङ्साकुन्धेन् आनिगे नाप्तिगे़रो, खुने़ॽ आनिॽ लाजेॽ सिङ्बुङ्हाॽ आनिॽ इङ्ले़क्को के़धाबाहाॽ फःक्खु पिरुसिरो॥’” 5 कल्ले़चोगुल्ले़ यहवे दाङ्बे़ल्ले़ कुसङ्जुम्भोओ तॽयाःन्सोन् के़गे़बाआङ् लाजेॽसिङ्बुङ् के़भःङ्बा के़बिबा खिनिॽ लुम्मो हाःत्ताङ् के़ङ्गत्तुम्मिन्लो॥ से़क्खाबा नु इङ्ले़क्पा माङ्निङ्वाॽपान् के़बाःप्पाहाॽ 6 खे़ङ्हाॽरे़ खुन्छिॽ माङ्निङ्वाॽपान् के़बाःप्पाहाॽरे़ अक्खेलॽरिक् माङ्निङ्वाॽपान् मे़बाःत्तुरो, “खिनिॽ माङ्निङ्वाॽपान् मे़बारे़म्मिन्ने़ॽओ॥ खे़न् पाःन्निल्ले़ कुयाःम्बेओ माङ्निङ्वाॽपान् मे़बारे़म्मिन्ने़ॽओ, सिरिङ्ममो आनिगे मे़ध्ये़ॽइगे़न्लो॥” 7 याकुबरे़ कुहिम्सयङ्से, थे अक्खेए पाःप्मा पोङ्बाबि? “थे यहवे दाङ्बे़ल्ले़ कुयाम्साम्मिन् कुयाःक्ले़ॽरे़आङ् वाॽबि? थे खुने़ॽ से़क्खाःल्ले़ अक्तङ्बा चोगुबि?” “थे कुदोःप्मा लाम्मो लाङ्गे़घेःक्पाहाॽ आबाःन्जाःक्किल्ले़ मे़नुॽमे़दार मे़जोगुन्छिन्बि? 8 कर आङ्गाॽ आमनाहाॽ निङ्मिहाॽ हे़क्तङ्बा मे़बोःक्खे़आङ् मे़वाॽरो॥ निङ्वाॽए मे़ल्लोए खिनिॽ पेसाङ्लाम् के़बोङ्बाआङ् के़बेःक्पा मनाहाॽलाम् खिनिॽ थङ्ङोलाम् के़नुःङ्बा मनाहाॽ हे़क्के कुमे़ल्लुङ् के़घिःक्पा सुङ्घेक्वान् के़नाप्तुम् के़देॽरुम्सिम्लो॥ 9 आङ्गाॽ आमनाहाॽरे़ खुन्छिॽ मे़न्छुमाहाॽ खुन्छिॽ सुक्खेवा हिम्हाॽओलाम् के़लःत्तुम् के़देसुम्सिम्लो॥ खे़ङ्हाॽरे़ खुन्छिॽ अङे़ःक्वा साहाॽलाम् आमुॽइसाम्मिन् सदादिङ्ले़ लागि के़नाप्तुम् के़देॽरुम्सिम्लो॥ 10 खिनिॽ पोगे़म्मे़ॽआङ् पेगे़म्घे़रे़म्मे़ॽओ! कन् खिनिॽ नाःम्सिङ्मादे़न् मेःन्लो, थेआङ्भे़ल्ले़ कन् याम्गे़सिङ्बा के़जोगुम्माङ् ने़रो, चोःक्मा सुक्मे़न्दे़त्ते थारिक् खाप्पुथ्यःङ् मे़जोगुआङ् ने़रो॥ 11 “मे़न्वाॽमना के़बाःप्पा नु इङ्ले़क्पा मनाःल्ले़ ‘खे़ने़ॽ के़लागि यरिक् सेजङ्वा नु थि वाॽमारे़ लागि आङ्गाॽ माङ्निङ्वाॽपान् पाःत्तुङ्ॽ’ लॽने़भग्र, खुने़ॽग कन् मनाहाॽरे़ खुन्छिॽ लागि कुदोःप्मा माङ्निङ्वाॽपान् के़बाःप्पा पोङ्लो! याम्मो थोबो पोङ्मा निङ्साङ् 12 याकुबए, आङ्गाॽ से़क्खाए खिनिॽ के़रे़क् सुम्निङ्लो, इस्राइलबा के़वाॽबा के़याःक्पाहाॽ आङ्गाॽ कुजे़क्के सुप्सुङ्सिङ्लो॥ खे़ङ्हाॽ मे़ल्लुक् ये़प्नाओ मे़ल्लुक्हाॽ हे़क्के हे़क्क्याङ् चाराम्मादे़न्नो थक्सालुप् हे़क्के आङ्गाॽ थिक्मे़त्थिक् फुक्खुङ्सिङ्लो, खे़न् ते़न्नो मनाहाॽ चिए़त् चिए़त् मे़ए़त्छिङ्ल मे़जुम्लो॥ 13 लाम् के़हबे़न् खे़ङ्हाॽरे़ खुन्छिॽ तगि पेःक्लो, खे़ङ्हाॽरे़ लाम्धेःत्तिन् मे़यसुआङ् लाःक्कात् मे़लन् मे़बेःक्लो॥ खे़ङ्हाॽरे़ खुन्छिॽ हाङ्ङिन् खुन्छिॽ तगि पेःक्लो, यहवे दाङ्बे़न् खे़ङ्हाॽरे़ खुन्छिॽ तगि तगि पेःक्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.