मिका 1 - लिम्बु1 यहुदाबा, योताम, आहाज नु हिजकिया हाङ्हाॽरे़ युक् मे़जोगुबा ये़म्मो मोरेसेत ये़क्यक्को के़युङ्बा मिकाओ यहवे दाङ्बाल्ले़ कुइङ्घङ्ङिन् के़रे़—खुने़ॽ कन् पाःन्हाॽ सामरिया नु यरुसले़ःम्मिल्ले़ कुयाःम्बेओ निसुआङ् वये़रो॥ सामरिया नु यरुसले़ःम्मो मे़रिङ् 2 “इक्सादिङ् खाम्बेःक्मोबा मे़न्छाम् सुवाङ्से, खिनिॽ के़रे़क्ले़ खे़प्से़म्मे़ॽओ॥ इक्सादिङ् खाम्बेःक्मो नु खे़प्मो के़युङ्बासे, खिनिॽ के़रे़क्ले़ सिङ्सिङ् ये़क्ये़क्काङ् खे़प्से़म्मे़ॽओ॥ हे़क्केलॽरिक् यहवे दाङ्बे़न् कुसेसे हिम्मोलाम्, यहवे दाङ्बा निङ्वाॽफुमाङ्ङिन्ने खिनिॽ तक्ले़ङ्वाओ तोःन्दि पोङ्लरो॥ 3 ओमे़त्ते़म्मे़ॽओ! यहवे दाङ्बे़न् खुने़ॽ कुयुङ्मादे़न्नोलाम् युर पत्लो॥ खुने़ॽ यो थासिङ् युरो हे़क्क्याङ् इक्सादिङ् खाम्बेःक्कोबा चन्जम्बादे़न्हाॽ तोॽरुरो॥ 4 मिओ थुम्बुॽइन् योःम्बा कुइसिक् हे़क्क्याङ् याक्केःक्कोलाम् च्वाःत् कुङ्बा कुइसिक् खे़न् कोःक्मा फाङ्जङ् थे़गु माङ्वाहाॽ खुने़ॽ कुलाङ्भो सिगाङ् योःम्बेःक्लो, हे़क्क्याङ् ने़ने़बादे़न्हाॽ पक्क्रे़ॽ पक्क्रे़ॽ पःङ्लो॥ 5 याकुबरे़ कुभे़न् याःम्बक्हाॽरे़ चोगुल्ले़ हे़क्क्याङ् इस्राइलरे़ कुहिम्सयङ्ङिल्ले़ कुलायोहाॽरे़ चोगुल्ले़ कन् के़रे़क् पाःन्हाॽ पोःक्खे़बारो॥ याकुबरे़ कुमुॽइदाङ्साहाॽरे़ आत्ति फे़न्याःम्बक् मे़जोगुबे? थे खे़न् सामरियाओ मेःम्बि? यहुदाबा मनाहाॽरे़ आत्तान् माङ्धाःन्हाॽ मे़युक्खुबे? थे खे़न् यरुसले़ःम्मो मेःन्बि? 6 “खे़ल्ले़चोगुल्ले़ आङ्गाॽ यहवे दाङ्बे़ल्ले़, सामरियान् लुङ्जेगेःक् नु लुङ्हाॽ के़लुम्सिङ्बा हे़क्क्याङ् चे़ल्ले़क्सेॽ इक्ताप् लेःप्मादे़न् चोगुङ्लो॥ आङ्गाॽ खे़प्मोबा लुङ्हाॽ ने़ने़बादे़न्नो लाप्फुसुङ्लो, खम्भ्याङ् खे़ल्ले़ कुयुक्नाहाॽ मुरे़क् खारे़क् चोगुङ्लो॥ 7 खे़ल्ले़ कुनावाइत्लाहाॽ के़रे़क् फयःप्फयःप् मे़यःप्सुरो, खे़ल्ले़ कुमाङ्हिम्मो मे़दोन्दुबा के़रे़क् मिक्तोःक्हाॽ मिःल्ले़ खाप्पुथ्यःङ् चोगुदेसुरो॥ खे़ल्ले़ के़रे़क् कुनावाइत्लाहाॽ आङ्गाॽ खाप्पुथ्यःङ् चोगुङ्लो, खे़न् मिक्तोःक्हाॽ कुगे़त्निमे़ल्ले़ कुनाम्याक्को लुप्सुबाल्ले़ चोगुल्ले़, के़त्निमे़ल्ले़ कुनाम्याक् हे़क्केए वेॽहाॽ नाम्याक् मे़बिरुसिरो॥” हाःप्मा चिःङ्मा नु मे़रिङ् 8 खे़ल्ले़चोगुल्ले़ आङ्गाॽ हाःप्पार मे़रिङ् थक्कारो, आङ्गाॽ लाङ्सुःप् मेःन्ने नु ले़क्चाबुधुःक् आम्भा लाङ्घेःक्कारो॥ आङ्गाॽ स्याल हे़क्के अःक्कारो हे़क्क्याङ् फक्थिःम्बा कुइसिक् मे़रिङ् थक्कारो॥ 9 थेआङ्भे़ल्ले़ सामरियाःल्ले़ कुयाङ्घेःक्किन् मे़वेःत्ने़न्लो, यहुदा थारिक् खे़न् के़रे़आङ् वाॽरो॥ आङ्गाॽ आमनाहाॽरे़ खुन्छिॽ लाम्धेत् यरुसले़म थारिक् के़रे़आङ् वाॽरो॥ 10 गातओ कन् मे़जे़क्ते़म्सिम्मिन्ने़ॽओ, खिनिॽ हाःप्माए मे़हाबे़म्मिन्ने़ॽओ॥ बे़थ-ओप्राबा मनासे खाम्हिःक्को खिनिॽ थाम्मासिम्मे़ॽ होःत्तासिम्मे़ॽओ॥ 11 साफिर के़युङ्बासे, खिनिॽ ले़क्चाबे़धिक् हे़क्क्याङ् नारा सिरेःप् लॽरिक् लःन्दे़म्पेगे़म्मे़ॽओ, सानान के़युङ्बाहाॽ लाःक्कात् मे़ल्लःन्ने़ल्लो॥ बेथ-एजेलबा मनाहाॽ मे़रिङ् मे़धक्ल मे़याक्लो, खे़न् कम्ब्राङ् मे़प्मादे़न्निन् खिनिॽलाम् मे़देॽरुआङ् ने़रो॥ 12 मारोत के़युङ्बाहाॽ तुक्मे़ल्ले़ चोगुल्ले़ मे़होःत्छिङ्लो, खे़ङ्हाॽरे़ वेःप्मा लाम् ओमे़मे़त्तुर मे़वाॽरो, थेआङ्भे़ल्ले़ यरुसले़ःम्बा यम्बा लाम्धेःप्पो थारिक्के यहवे दाङ्बालाम् ये़त्तुक्खेन् के़रे़आङ् वाॽरो॥ 13 लाकिस के़युङ्बासे, अन्हाॽ, अन्लाधाहाॽओ फत्छे़म्सिम्मे़ॽओ॥ सियोनरे़ कुस्सा मे़न्छुमाःल्ले़ लागि लायोल्ले़ कुहेःक्सिङ्मा खिनिॽए के़वयिरो, थेआङ्भे़ल्ले़ इस्राइलरे़ कुभे़न्याःम्बक्हाॽ खिनिॽओ खोदे़त्ते़रो॥ 14 कल्ले़चोगुल्ले़ मोरेसेत-गाते़न् से़म्मुॽइ मिक्तोःक्हाॽ खिनिॽए के़बिरुम्ल पोङ्लो॥ इस्राइलबा हाङ्हाॽ इङ्ले़क्को के़धाबा अक्जिबबा ये़क्यक्किन् पोङ्लो॥ 15 मारेसा के़युङ्बा मनासे, खिनिॽ तक्ले़ङ्वाओ आङ्गाॽ खिनिॽ के़नाःम्बा मनाधिक् तारुङ्लो॥ इस्राइलबा कुहाङ्वा कुमाङ्वा के़याक्पा, लाम्लोबाहाॽ अदुल्लामओ मे़घे़त्छिङ् मे़बेःक्लो॥ 16 खिनिॽ लुङ्माॽ के़दुक्तुम्सिम्बा साहाॽरे़ लागि मे़रिङ् थक्ते़म्मे़ॽर खिनिॽ थे़गेःक्किन् नःक्खे़म्मे़ॽओ॥ खिनिॽ के़रे़क् थे़गेःक्मुरिक्हाॽ नःक्से़म्मे़ॽओ हे़क्क्याङ् किःत्थे़न् हे़क्के ताङ्ले़ःक्क्या चोःक्कासिम्मे़ॽओ, थेआङ्भे़ल्ले़ खिनिॽ साएहाॽ मे़दे़म्सु मे़देॽरुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.