ले़बि 9 - लिम्बुहारुने़ल्ले़ सिदुङ्जभा तोःन्दुॽ 1 माङ्थोःक्ना पिरुसिबा थिम् ये़त्छिगेक्पा ये़न् के़रे़ल्ले़ मोसाःल्ले़ हारुने़न्, खे़ल्ले़ कुस्साहाॽ नु इस्राइलबा लाम्लोबाहाॽ उःत्तुसि॥ 2 हे़क्क्याङ् खुने़ॽ हारुने़न् मे़त्तु, “खे़ने़ॽ के़लागि लायोलाम् ले़प्मि खोमारे़ लागि मे़ङ्गाःम्मनाबा लत्छा पिसाःत् नु मिधिङ्मनादेमनाबा सिदुङ्जभारे़ लागि मे़ङ्गाःम्मनाबा लत्छा मे़ल्लुक् तारे़ॽआङ् यहवे दाङ्बे़ल्ले़ कुदगि सिदुङ्जभा तोःन्दे़ॽ॥ 3 हे़क्क्याङ् इस्राइलिहाॽ खे़ने़ॽ अक्खे मे़त्ते़से़ॽ, ‘खिनिॽ लायोलाम् ले़प्मि खोमा सिदुङ्जभाःल्ले़ लागि कुम्बाबा मे़ःन्दा थिक् खे़ब्याङ् मिधिङ्मनादेमनाबा सिदुङ्जभाःल्ले़ लागि तङ्बे थिक् के़गे़प्पा लत्छा मे़ङ्गाःम्मनाबा पित्सात् थिक् नु तङ्बे थिक् के़गे़प्पा मे़ङ्गाःम्मनाबा थुःम्बा थिक् तारे़म्मे़ॽ॥ 4 यहवे दाङ्बे़ल्ले़ कुदगि सिदुङ्जभा चोःक्से़ तङ्जुम् वयागे़न् सिदुङ्जभारे़ लागि लत्छा से़गम्बा नु लत्छा मे़ल्लुक्, हे़क्क्याङ् निःङ्गेॽओ सॽमनाबा लत्छा पोगुगे़न् कुजा सिदुङ्जभाआङ् तारे़ॽ॥ थेआङ्भे़ल्ले़ आइन् यहवे दाङ्बे़न् खिनिॽओ ओसेःन्धाक्सिङ्ॽ॥’” 5 मोसाःल्ले़ मे़त्तुसिबा कुइसिक् खे़ङ्हाॽरे़ के़रे़क् पाःन्हाॽ तुम्मादे़न् साःङ्हिम्मिल्ले़ कुदगि मे़दारु, हे़क्क्याङ् के़रे़क् सङ्जुम्भोहाॽ यहवे दाङ्बे़ल्ले़ कुदगि मे़द्ये़आङ् मे़ये़म्सिङ्॥ 6 हे़क्क्याङ् मोसाःल्ले़ मे़त्तुसि, “यहवे दाङ्बे़ल्ले़ इङ्जाङ् चोगुबा खिनिॽ चोःक्मा के़बोङ्बा याःम्बक्किन् हाबा कन्लो, खे़ब्याङ् यहवे दाङ्बाल्ले़ कुमिमिदिङ्ङिन् खिनिॽओ ओसेःन्धाङ् पोङ्ॽ॥” 7 मोसाःल्ले़ हारुने़न् मे़त्तु, “ले़त्ति तोःम्मादे़न्निल्ले़ कुबेसाङ् त्ये़ॽआङ् खे़ने़ॽ लायोलाम् ले़प्मि खोमा सिदुङ्जभान् नु मिधिङ्मनादेमनाबा के़सिदुङ्जभान् तोःन्दे़ॽ, खम्भ्याङ् खे़ने़ॽ आबाङे के़लागि नु मनाहाॽरे़ खुन्छिॽ लागि लायोल्ले़ लागि ले़प्मि नाःक्ते़ॽ॥ यहवे दाङ्बे़ल्ले़ इङ्जाङ् चोगुबा कुइसिक् मनाहाॽरे़ मे़दारुबा सिदुङ्जभान् तोःन्दे़ॽआङ् खे़ङ्हाॽरे़ खुन्छिॽ लागि ले़प्मि नाःक्ते़ॽ॥” 8 खे़ब्याङ् ले़त्ति तोःम्मादे़न्निल्ले़ कुबेसाङ् हारुने़न् त्ये़आङ् खुने़ॽ आबाङे कुलागि लायोलाम् ले़प्मि खोमा सिदुङ्जभा पित्सात्ते़न् से़रु॥ 9 हारुने़ल्ले़ कुस्साहाॽरे़ माक्खिन् खुने़ॽओ मे़दारु॥ खुने़ॽ कुहुक्चोःन् माक्खिॽओ निःब्सुआङ् ले़त्ति तोःम्मादे़न्नोबा ताङ्हाॽओ हुःत्तु, हे़क्क्याङ् के़नम्बा माक्खिन् चाहे ले़त्ति तोःम्मादे़न्निल्ले़ कुबुङ्ङो हुक्खु॥ 10 यहवे दाङ्बे़ल्ले़ मोसान् इङ्जाङ् पिरुबा कुइसिक् खुने़ॽ लायोलाम् ले़प्मि खोमा सिदुङ्जभाःल्ले़ कुसोःत्तिन्, कुले़म्मिन्, हे़क्क्याङ् कुने़रे़त् के़दे़प्पा सान् ले़त्ति तोःम्मादे़न्नो मिधिक्खु॥ 11 कर सान् नु कुहोरिक्पान् चाहे साःङ्गाहिम् लाःक्कात् मिओ मिधिक्खु॥ 12 खे़ब्याङ् हारुने़ल्ले़ मिधिङ्मनादेमनाबा सिदुङ्जभान् से़रु, खम्ब्याङ् खुने़ॽ कुस्साहाॽरे़ माक्खिन् खुने़ॽओ मे़दारु, हे़क्क्याङ् खुने़ॽ ले़त्ति तोःम्मादे़न् के़रे़क् पिसाङ् खे़न् साक्खु॥ 13 खे़ङ्हाॽरे़ मिधिङ्मनादेमनाबा सिदुङ्जभान् कुजक्ता कुले़म्दा मे़जोगुआङ् कुधे़गेःक्किन्नाङ् खुने़ॽओ मे़दारु, खे़ब्याङ् खुने़ॽ खे़न् ले़त्ति तोःम्मादे़न्नो मिधिक्खु॥ 14 कुहिदुत् कुधे़गाःङ्ङिन् नु कुलाङ्हाॽ वाहप्तुआङ् ले़त्ति तोःम्मादे़न्नोबा मिधिङ्मनादेमनाबा सिदुङ्जभाःल्ले़ कुसम्धाङ् मिधिक्खु॥ 15 खे़न् एगाङ् मनाहाॽरे़ खुन्छिॽ लागि सिदुङ्जभान् तारुआङ् खे़ङ्हाॽरे़ खुन्छिॽ लायोलाम् ले़प्मि खोमा सिदुङ्जभा मे़ःन्दबकान् हारुने़ल्ले़ से़रु, हे़क्क्याङ् तगिबा हे़क्केए लायोलाम् ले़प्मि सिदुङ्जभारे़ लागि खे़न् तोःन्दु॥ 16 खे़न् एगाङ् खुने़ॽ मिधिङ्मनादेमनाबा वयागे़न् सिदुङ्जभान् याङ्सिङ्ङाङ् थिम् कुइसिक् खे़न् तोःन्दु॥ 17 हे़क्क्याङ् पोगुगे़न् कुजा सिदुङ्जभान् याङ्सिङ्ङाङ् सोःल्लाक् थिक् कुले़ःम् ले़त्ति तोःम्मादे़न्नो तानाम् तोःम्मनाबा मिधिङ्मनादेमनाबा सिदुङ्जभाःन्नुःल्ले़ वेॽ खे़न्नाङ् मिधिक्खु॥ 18 मनाहाॽरे़ खुन्छिॽ लागि तङ्जुम् सिदुङ्जभा से़गम्बान् नु मे़ल्लुक्किन्नाङ् हारुने़ल्ले़ से़रु॥ खुने़ॽ कुस्साहाॽरे़ माक्खिन् मे़याङ्सिङ्ङाङ् खुने़ॽ मे़बिरु, खे़ब्याङ् खुने़ॽ खे़न् ले़त्ति तोःम्मादे़न्निल्ले़ कब्रिङ् पिसाङ् साक्खु॥ 19 कर से़गम्बान् नु थुःम्बाःल्ले़ कुसोःत्तिन्, कुमिःल्ले़ कुबुङ्ङोबा कुसोःत्तिन्, कुहिदुत् कुधे़ङाङ् के़दे़प्पा कुसोःत्तिन्, कुले़म्हाॽ नु कुने़रे़त् के़दे़प्पा साःन्— 20 खे़ङ्हाॽरे़ सिदुङ्जभाःल्ले़ कुसङ्बप्माहाॽरे़ कुसम्धाङ् मे़ने़स्सु, हे़क्क्याङ् खुने़ॽ कुसोःत्तिन् चाहे ले़त्ति तोःम्मादे़न्नो मिधिक्खु॥ 21 कुसङ्बप्मान्नु सोरिक् कुजुप्साङ् ले़प्माङ्बा कुलाङ्भे़ल्ले़क्माङ्ग मोसाःल्ले़ मुरामे़त्तुबा कुइसिक् हारुने़ल्ले़ पङ्मनाबा सिदुङ्जभाःल्ले़ लागि यहवे दाङ्बे़ल्ले़ कुदगि थाःङ् फोःक्खु॥ 22 खे़ब्याङ् हारुने़ल्ले़ कुहुक्किन् मनाहाॽ ले़प्माङ् फोःक्खुआङ् खे़ङ्हाॽ मुॽइसाम् पिरुसि॥ कम्भलॽरिक् लायोलाम् ले़प्मि खोमा सिदुङ्जभाःन्, मिधिङ्मनादेमनाबा सिदुङ्जभान् नु तङ्जुम् सिदुङ्जभान् तोःन्दुआङ् यो थासिङ्॥ 23 खे़ब्याङ् मोसान् नु हारुने़न् तुम्मादे़न् साःङ्गाहिम् सिगाङ् लासे़त्छि, हे़क्क्याङ् लःन्दे़सिआङ् मनाहाॽ हाङ्वागे़न् मुॽइसाम् पिरे़त्छुसि॥ खम्भ्याङ् यहवे दाङ्बे़ल्ले़ कुमिमिदिङ्ङिन् के़रे़क् मनाहाॽओ ओसेःन्धाङ् पोःक्खे़॥ 24 यहवे दाङ्बे़ल्ले़ कुदगिलाम्बा मिन् लःन्दे़आङ् ले़त्ति तोःम्मादे़न्नो के़ने़बा मिधिङ्मनादेमनाबा सिदुङ्जभान् नु कुसोःत्तिन् खाप्पुथ्यःङ् चोगु॥ आल्ल खे़न् मनाहाॽरे़ मे़निसु, खे़ब्याङ् खे़ङ्हाॽ खुन्छिॽ निङ्वाॽ त्ये़आङ् मे़अःक्ते़र साम्बोन् मे़भन्छिङ्ङाङ् से़वा मे़जोगे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.