ले़बि 8 - लिम्बुहारुन नु कुस्साहाॽ माङ्थोःक्ना मे़बिरुसि ( ला २९:१-३७ ) 1 याम्मो यहवे दाङ्बे़ल्ले़ मोसान् मे़त्तु, 2 “खे़ने़ॽ हारुने़न्, खे़ल्ले़ कुस्साहाॽआङ् सोसोरिक्, खे़ङ्हाॽरे़ खुन्छिॽ चाङ्हाॽ, माङ्थोःक्ना पिमासि निःङ्गेन्, लायोलाम् ले़प्मि खोमा सिदुङ्जभा से़गम्बान्, थुःम्बा ने़त्छि नु के़भङ्बा सिदाॽ मे़न्याक्मनाबा खरे़ःङ् के़याक्पा नाॽइमान् याङ्सिङ्ङे़ॽ 3 हे़क्क्याङ् के़रे़क् सङ्जुम्भोहाॽ तुम्मादे़न् साःङ्गाहिम् लाःप्मादे़न्नो फुक्खे़से़ॽ॥” 4 खे़ब्याङ् यहवे दाङ्बे़ल्ले़ इङ्जाङ् पिरुबा हे़क्केए मोसाःल्ले़ चोगु, हे़क्क्याङ् तुम्मादे़न् साःङ्गाहिम् लाःप्मादे़न्नो सङ्जुम्भोहाॽ सुप्सुसि॥ 5 मोसाःल्ले़ सङ्जुम्भोहाॽ मे़त्तुसि, “यहवे दाङ्बे़ल्ले़ चोगे़म्मे़ॽ फाॽआङ् इङ्जाङ् चोगुबा याःम्बक्किन् हाबा कन्लो॥” 6 मोसाःल्ले़ हारुने़न् नु खुने़ॽ कुस्साहाॽ तारुसिआङ् च्वाःत्तिल्ले़ वारुःप्सुसि॥ 7 खुने़ॽ हारुने़न् लगेःप् चाक्तुआङ् कब्रिङ् खेःक्खु पिरु, हे़क्क्याङ् हक्सुःप्पा तेत् चाक्तुआङ् कुसम्धाङ् एपोदे़न् फत्छु पिरु॥ खे़ब्याङ् कुहुक्वा के़नुॽबाल्ले़ फुङ् लक्तुबा फॽइःन् एपोदे़ल्ले़ कुसम्धाङ् फत्छुआङ् कुगेङ्ङो कब्रिङ् युप्तु॥ 8 खे़न् एगाङ् खे़ल्ले़ हारुने़न् खदि फत्छु पिरुआङ् खे़प्मो, “उरिम” नु “तुम्मिम्मे़न्” केःत्तु॥ 9 खे़ब्याङ् यहवे दाङ्बे़ल्ले़ मोसान् इङ्जाङ् पिरुबा कुइसिक् खुने़ॽ हारुने़ल्ले़ कुधे़गेःक्पो खे़ल्ले़ फे़ता खुःक्तु, हे़क्क्याङ् फे़ताःल्ले़ कुसम्धाङ् तगाङ् ले़प्माङ् फे़मनाबा साम्म्याङ्ङिन् फत्छु पिरु, खे़ल्ले़ खुने़ॽ निङ्वाॽफुमाङ्ङो तोःन्छिङ्बा मिक्सेन् पोङ्ॽ॥ 10 खे़न् एगाङ् मोसाःल्ले़ माङ्थोःक्ना पिमासि निःङ्गेन् याङ्सिङ्ङाङ् सेसे साःङ्गाहिम् नु खे़प्मो के़युङ्बा के़रे़क् पाःन्हाॽ माङ्थोःक्ना चोगुआङ् सेसेसाङ्साङ् चोगु॥ 11 खे़प्मोलाम्बा कुभा निःङ्गेॽजि याङ्सिङ्ङाङ् खुने़ॽ ले़त्ति तोःम्मादे़न्नो नुसिले़ङ् साक्खु, हे़क्क्याङ् ले़त्ति तोःम्मादे़न्निन् नु खे़प्मोबा के़रे़क् खप्प्या सामाहाॽ, लाङ्हुक् वाहप्मा छे़ःङ्ग्या खे़ल्ले़ कुदक्मा कुलाङ्हाॽआङ् तोःम्मारे़ लागि माङ्थोःक्ना चोःक्मा याःम्बक् चोगु॥ 12 याम्मो खुने़ॽ माङ्थोःक्ना पिमासि निःङ्गेन् याङ्सिङ् हे़क्क्याङ् हारुने़ल्ले़ कुधे़गेःक्पो हुक्खुआङ् खुने़ॽ तोःम्मारे़ लागि माङ्थोःक्ना पिरु॥ 13 खे़न् एगाङ् यहवे दाङ्बे़ल्ले़ मोसान् इङ्जाङ् पिरुबा हे़क्केए खुने़ॽ हारुने़ल्ले़ कुस्साहाॽ तारुसिआङ् लगेःप् चाक्तुसि हे़क्क्याङ् फॽइ युप्तुसिआङ् खे़ङ्हाॽ पागरि खुःक्तुसि॥ 14 खे़न् एगाङ् खुने़ॽ लायोलाम् ले़प्मि खोमा सिदुङ्जभा से़गम्बान् तारु, हे़क्क्याङ् हारुने़न् नु खुने़ॽ कुस्साहाॽरे़ लायोलाम् ले़प्मि खोमा सिदुङ्जभा से़गम्बाल्ले़ कुधे़गेःक्पो खुन्छिॽ हुक्हाॽ मे़ने़स्सु॥ 15 खे़ब्याङ् मोसाःल्ले़ खे़न् से़रु, खम्ब्याङ् खे़ल्ले़ कुभा माक्खिॽजि याङ्सिङ्ङाङ् कुहुक्चोःल्ले़ ले़त्ति तोःम्मादे़न्नोबा ताङ्हाॽओ हुःत्तु हे़क्क्याङ् ले़त्ति तोःम्मादे़न्निन् सेसेसाङ्साङ् चोगु॥ हे़क्क्याङ् के़नम्बा कुमाक्खिन् खे़ल्ले़ ले़त्ति तोःम्मादे़न्निल्ले़ कुबुङ्ङो हुक्खु॥ खे़ल्ले़ लागि लायोलाम् ले़प्मि नाःक्मारे़ लागि खे़ल्ले़ कम्भलॽरिक् ले़त्ति तोःम्मादे़न्निन् सेसेसाङ्साङ् चोगु॥ 16 कुहिदुत् कुधे़ङाःङ्हाॽ के़दे़प्पा के़रे़क् कुसोःत्तिन् नु कुलुङ्माॽ के़दे़प्पा सान् हे़क्क्याङ् कुसोःत्नु सोरिक्पा ने़प्माङ् कुले़म्हाॽ मोसान् याङ्सिङ्, खे़ब्याङ् ले़त्ति तोःम्मादे़न्नो मिधिक्खुदेसु॥ 17 कर यहवे दाङ्बे़ल्ले़ मोसान् इङ्जाङ् पिरुआङ् वये़बा कुइसिक् खुने़ॽ से़गम्बान् चाहे खे़ल्ले़ कुहोरिक्पान् नु सान् हे़क्क्याङ् पिॽहिःन्नु सोरिक् साःङ्गाहिम्हाॽलाम् लाःक्कात् मिओ मिधिक्खुदेसु॥ 18 खे़न् एगाङ् खुने़ॽ मिधिङ्मनादेमनाबा सिदुङ्जभा मे़ल्लुक्किन् तोःन्दु॥ हारुने़न् नु खे़ल्ले़ कुस्साहाॽरे़ खुन्छिॽ हुक्हाॽ थुःम्बाःल्ले़ कुधे़गेःक्पो मे़ने़स्सु॥ 19 खे़ब्याङ् खुने़ॽ खे़न् से़रु॥ हे़क्क्याङ् मोसाःल्ले़ खे़ल्ले़ कुमाक्खिन् ले़त्ति तोःम्मादे़न्निल्ले़ कुयाम्ले़ङ्बो छ्वाःक् हुक्खुदेसु॥ 20 हे़क्क्याङ् खुने़ॽ थुःम्बाःन् कुजक्ता कुले़म्दा से़न्दुआङ् खक्तु, खे़ब्याङ् कुधे़गेःक्किन्, खे़न् सागाक्माहाॽ नु कुसोःत्तिन्नाङ् सोसोरिक् मिधिक्खुदेसु॥ 21 यहवे दाङ्बे़ल्ले़ मोसान् इङ्जाङ् पिरुबा हे़क्केए खुने़ॽ कुहिदुत् कुधे़ङाङ् नु कुलाङ्हाॽ च्वाःत्तिल्ले़ वरे़क्तु, हे़क्क्याङ् खे़ङ्हाॽ यहवे दाङ्बे़ल्ले़ कुलागि मिओलाम्बा तोःन्दु, कुनाम्गे़नुॽबा मिधिङ्मनादेमनाबा सिदुङ्जभा कुइसिक् खुने़ॽ कुभुल्ला मे़ल्लुक्किन् ले़त्ति तोःम्मादे़न्नो मिधिक्खु॥ 22 खे़ब्याङ् मोसाःल्ले़ निङ्वाॽफुसाम्बाहाॽ तोःम्मासिरे़ लागि निसिगेक्पा थुःम्बाःन् तोःन्दु॥ हे़क्क्याङ् हारुने़न् नु खुने़ॽ कुस्साहाॽरे़ खुन्छिॽ हुक्हाॽ खे़न् थुःम्बाःल्ले़ कुधे़गेःक्पो मे़ने़स्सु॥ 23 खे़ब्याङ् मोसाःल्ले़ खे़न् से़रु, हे़क्क्याङ् खुने़ॽ खे़ल्ले़ कुमाक्खिन् याङ्सिङ्ङाङ् हारुने़ल्ले़ कुजुक्वा ले़प्माङ्बा कुने़क्खोॽ लोःप्माओ, खुने़ॽ कुजुक्वा कुहुक्माओ नु खुने़ॽ कुजुक्वा लाङ्माओ हुःत्तु पिरु॥ 24 खे़न् एगाङ् मोसाःल्ले़ हारुने़ल्ले़ कुस्साहाॽ तारुसि, खम्ब्याङ् खुने़ॽ खे़ङ्हाॽरे़ खुन्छिॽ चुप्साङ् चुप्साङ् ले़प्माङ्बा ने़क्खोॽ लोःप्माओ, चुप्साङ् चुप्साङ् ले़प्माङ्बा हुक्माओ नु चुप्साङ् चुप्साङ् ले़प्माङ्बा लाङ्माओ माक्खिॽ हुःत्तु पिरुसि, हे़क्क्याङ् के़नम्बा माक्खिन् ले़त्ति तोःम्मादे़न् कब्रिङ् साक्खु॥ 25 खे़ब्याङ् खे़ल्ले़ कुसोःत्तिन्, कुमिःल्ले़ कुबुङ्ङोबा कुसोःत्तिन्, कुहिदुत् कुधे़ङाङ् के़दे़प्पा के़रे़क् कुसोःत्तिन्, कुने़रे़त् के़दे़प्पा साःन्, कुसोःत्नु सोरिक्पा ने़प्माङ् कुले़म्हाॽ नु कुजुक्वा ले़प्माङ्बा कुलाङ्भे़ल्ले़क्मान् मे़त्छिङ्॥ 26 हे़क्क्याङ् यहवे दाङ्बे़ल्ले़ कुदगि के़युङ्बा के़भङ्बा सिदाॽ मे़न्याक्मनाबा खरे़ःङ् के़याक्पा नाॽइमालाम् खे़ल्ले़ लत्छा चारःप्पा, निःङ्गेॽओ सॽमनाबा लत्छा खरे़ःङ् नु लत्छा खरे़ःङ् याङ्सिङ्ङाङ् खे़न् सासोःत्तिन् नु चुक्वा ले़प्माङ्बा कुलाङ्भे़ःल्ले़ कुसम्धाङ् ने़स्सु॥ 27 खे़ङ्हाॽ के़रे़क् हारुने़न् नु खे़ल्ले़ कुस्साहाॽरे़ खुन्छिॽ हुक्को ने़स्सु पिरुसि, हे़क्क्याङ् यहवे दाङ्बे़ल्ले़ कुदगि पङ्मनाबा सिदुङ्जभा कुइसिक् खे़ङ्हाॽरे़ थाःङ् मे़बक्खु॥ 28 खे़न् एगाङ् मोसाःल्ले़ खे़ङ्हाॽरे़ खुन्छिॽ हुक्कोलाम् थाःङ् पङ्मनाबा सिदुङ्जभाहाॽ याङ्सिङ्ङाङ् यहवे दाङ्बाओ हारुने़न् नु कुस्साहाॽ तोःम्मासिरे़ लागि मिओलाम् तोःम्मनाबा, कुनाम्गे़नुॽबा कुनाम् तोःम्मनाबा हे़क्के मिधिङ्मनादेमनाबा वयागे़न् सिदुङ्जभा के़ने़बा ले़त्ति तोःम्मादे़न्निल्ले़ कुसम्धाङ् मिधिक्खु॥ 29 यहवे दाङ्बे़ल्ले़ मोसान् इङ्जाङ् पिरुआङ् वये़बा हे़क्केए खुने़ॽ सिदुङ्जभाःल्ले़ कुसङ्बे़ॽमे़न्नाङ् याङ्सिङ्ङाङ् पङ्मनाबा सिदुङ्जभा कुइसिक् यहवे दाङ्बे़ल्ले़ कुदगि थाःङ् पक्खु॥ खे़न् चाहे तोःम्मनाबा मे़ल्लुक्लाम् मोसाःल्ले़ कुघोमा लक् वये़॥ 30 खे़ब्याङ् मोसोःल्ले़ माङ्थोःक्ना पिमासि कुभा निःङ्गेॽजि नु ले़त्ति तोःम्मादे़न्निल्ले़ कुसम्धाङ् के़युङ्बा माक्खिॽलाम्बा कुभा याङ्सिङ्ङाङ् हारुने़न् नु खे़ल्ले़ कुजाङ्हाॽओ हे़क्क्याङ् खे़ल्ले़ कुस्साहाॽ नु खे़ङ्हाॽरे़ खुन्छिॽ चाङ्हाॽओआङ् साक्खु॥ अक्खेलॽरिक् खे़ल्ले़ हारुने़न् खुने़ॽ कुजाङ्हाॽनु सोरिक् हे़क्क्याङ् खे़ल्ले़ कुस्साहाॽ खुन्छिॽ चाङ्हाॽआङ् तोःन्दु॥ 31 खे़ब्याङ् मोसाःल्ले़ हारुने़न् नु खे़ल्ले़ कुस्साहाॽ मे़त्तुसि, “तुम्मादे़न् साःङ्गाहिम्मोबा लाम्धेःप्पो सान् थोःक्ते़म्मे़ॽआङ् च्ये़म्मे़ॽ खे़ब्याङ् हारुने़न् नु कुस्साहाॽ तोःम्नासिल्ले़बा सिदुङ्जभाओबा नाॽइमो के़याक्पा तोःम्मनाबा खरे़ःङ्ङिन्नाङ् आङ्गाॽ मे़त्निङ्बा हे़क्केए हाबा खे़प्मोए चे़म्मे़ॽ॥ 32 के़नम्बा सान् नु खरे़ःङ्ङिन् मिधिक्खे़म्देसे़म्मे़ॽ॥ 33 खिनिॽ के़दोःन्दुम्बा ये़न्निन् के़रे़क् मे़ङ्गे़त्ते थारिक् नुसि ये़न् थे़म्बा सेसे साःङ्गाहिम्मोलाम् लाःक्कात् खिनिॽ मे़बेगे़म्मिन्ने़ॽ, थेआङ्भे़ल्ले़ खिनिॽ के़दोःम्दुम्बान् नुसि ये़न् थारिक् पत्॥ 34 आइन् थेधे पोःक्खे़आङ् वाॽ यहवे दाङ्बे़ल्ले़ खिनिॽ लायोन् ले़प्मि नाःक्मारे़ लागि हाबा हे़क्तङ्बाए इङ्जाङ् चोगुआङ् वये़॥ 35 खिनिॽ नुसि ये़न् थारिक् से़न्दिक् ले़न्दिक् तुम्मादे़न् साःङ्गाहिम् लाःप्मादे़न्नो वये़म्मे़ॽआङ् यहवे दाङ्बे़ल्ले़ चोःक्मा के़बिरिबा याःम्बक्किन् के़त्ते़म्मे़ॽ, मेःन्ने़भग्र खिनिॽ के़स्ये़ॽइरो, थेआङ्भे़ल्ले़ यहवे दाङ्बे़ल्ले़ आङ्गाॽ हाबा कन् इङ्जाङ्ङिन् पिराङ्ङाङ् वाॽ॥” 36 हे़क्क्याङ् यहवे दाङ्बे़ल्ले़ मोसान् पिरुबा के़रे़क् इङ्जाङ्हाॽ हारुने़न् नु खे़ल्ले़ कुस्साहाॽरे़ मे़इःत्तु मे़नाःत्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.