ले़बि 7 - लिम्बुआप्तिक् सिदुङ्जभा थिम्हाॽ 1 “‘आप्तिक् सिदुङ्जभा थिम्हाॽ हाबा कन्हाॽएरो—कन् साॽरिक् सेसेबा चोक्॥ 2 आत्तिन् ते़न्नो मिधिङ्मनादेमनाबा सिदुङ्जभान् से़प्मा पोङ्ॽ, आप्तिक्लाम् ले़प्मि खोमा सिदुङ्जभाःन्नाङ् आम्भा खे़प्मो से़प्मा पोङ्ॽ॥ खे़ल्ले़ कुमाक्खिन् ले़त्ति तोःम्मादे़न्निल्ले़ कुयाम्ले़ङ्बो छ्वाःक् हुङ्मादेमा पोङ्ॽ॥ 3 खे़ल्ले़ के़रे़क् कुसोःत्तिन्, इग्र कुमिःल्ले़ कुबुङ्ङोबा कुसोःत्तिन् नु कुहिदुत् कुधे़ङाङ् कुदे़प्मा कुसोःत्तिन्, 4 ने़प्माङ् कुले़म्हाॽ नु खे़ल्ले़ कुसम्धाङ्बा हे़क्क्याङ् कुगे़ङ्ङोबा कुसोःत्तिन्, खे़ब्याङ् कुले़म्मिन् सोसोरिक् कुलुङ्माॽ के़दे़प्पा सान् वे़ःक्मा लःप्माआङ् तोःम्मा पोङ्ॽ॥ 5 निङ्वाॽफुसाम्बाल्ले़ यहवे दाङ्बाल्ले़ कुलागि मिओलाम्बा तोःम्मनाबा सिदुङ्जभा कुइसिःक्के खे़ङ्हाॽ ले़त्ति तोःम्मादे़न्नो मिधिक्खुर॥ कन् आप्तिक्लाम् ले़प्मि खोमा सिदुङ्जभारो॥ 6 निङ्वाॽफुसाम्बा हिम्सयङ्ङोबा आत्तिन् ये़म्बित्छा साःल्ले़साङ् खे़न् चामा सुक्तुॽ॥ कर कन् सेसेबादे़न्नो चर पोङ्ॽ॥ कन् साॽरिक् सेसेबा चोक्॥ 7 “‘लायोलाम् ले़प्मि खोमा सिदुङ्जभान् आक्तङ्बा चोक्, आप्तिक्लाम् ले़प्मि खोमा सिदुङ्जभाःन्नाङ् हे़क्तङ्बाए चोक्॥ खे़ल्ले़ लागि लत्छा साम्योथिम् वाॽ॥ आत्तिन् निङ्वाॽफुसाम्बाल्ले़ खे़न् तोःन्दुआङ् लायोलाम् ले़प्मि नाःक्तुॽ, खे़न् खे़ल्ले़न्ने पोङ्ल॥ 8 आत्तिन् निङ्वाॽफुसाम्बाल्ले़ मनाःल्ले़ तारुबा मिधिङ्मनादेमनाबा सिदुङ्जभान् तोःन्दुॽ, खे़न् मिधिङ्मनादेमनाबा सिदुङ्जभाःल्ले़ कुहोरिक्पान् हाबा खे़न् निङ्वाॽफुसाम्बाल्ले़न्ने पोङ्ल॥ 9 मिहाॽलुङ्ङो थोःक्मनाबा, हे़क्क्याङ् खरे़ःङ् ले़ःङ्मा खेःक्याओ नु खप्प्याओ थोःक्मनाबा के़रे़क् पोगुगे़न् कुजा सिदुङ्जभान् खे़न् के़दोम्बा निङ्वाॽफुसाम्बाल्ले़न् पोङ्ल॥ 10 हे़क्क्याङ् निःङ्गेॽओ सॽमनाबा नु से़ङ्से़ङ्बा के़रे़क् पोगुगे़न् कुजा सिदुङ्जभान् हारुने़ल्ले़ कुस्सा के़रे़क्ले़ कुदङ्बा मे़घोसुररो॥ तङ्जुम् सिदुङ्जभा थिम्हाॽ 11 “‘यहवे दाङ्बाल्ले़ कुलागि तोःम्मनाबा तङ्जुम् सिदुङ्जभा थिम्हाॽ हाबा कन्हाॽएरो— 12 “‘तङ्जुम् सिदुङ्जभान् कुभारे़ नुगे़न् पिरुर तोःन्दुने़भग्र निःङ्गेॽओ सॽरुआङ् के़भङ्बा सिदाॽ मे़न्याक्केबा चारःप्पा, निःङ्गेॽ हुःप्मनाबा के़भङ्बा सिदाॽ मे़न्याक्केबा खरे़ःङ्, हे़क्क्याङ् निःङ्गेॽओ वरङ्मनाबा चुन्जुम्बा फेॽरुम्लाम् ले़ःङ्मनाबा चारःप्पान् तोःन्दुर॥ 13 खे़ल्ले़ खुने़ॽ नुगे़न् तोःन्दुबा तङ्जुम् सिदुङ्जभाःन्नु के़भङ्बा सिदाॽ याक्मनाबा खरे़ःङ्ङिन्नाङ् तोःन्दुर॥ 14 खे़ङ्हाॽलाम् लत्छा लत्छा लॽरिक् यहवे दाङ्बे़ल्ले़ कुलागि सिदुङ्जभारे़ लागि खे़ल्ले़ तोःन्दुर॥ तङ्जुम् वयागे़न् सिदुङ्जभाःल्ले़ कुमाक्खिन् आत्तिन् निङ्वाॽफुसाम्बाल्ले़ ले़त्ति तोःम्मादे़न्निल्ले़ कुयाम्ले़ङ्बो साक्खुॽ खे़न् खे़ल्ले़न्ने पोङ्ल॥ 15 नुगे़न् तोःम्मा तङ्जुम् सिदुङ्जभा सान् खे़न् तोःम्मनाबा ये़न्नोए चामा पोङ्ॽ, तानाम् थारिक् खे़ल्ले़ थे़माआङ् मे़नन्छुन् मे़युक्खुन्ल॥ 16 “‘कर तोःम्मा के़बोङ्बा तङ्जुम् वयागे़न् सिदुङ्जभान् माङ्हुप्पिन् के़प्मारे़ लागि इग्र आबाङे निङ्वाःल्ले़ तोःम्मनाबा सिदुङ्जभाने़भग्र खे़ल्ले़ सिदुङ्जभा तोःन्दुबा ये़न्नोए खुने़ॽ खे़न् चर, खे़ब्याङ् के़नम्बाआङ् के़युङ्बान् कुदाःन्दिक्मा मे़जर॥ 17 आन्छिन्दान् थारिक् के़नम्बाआङ् के़युङ्बा सिदुङ्जभा सान् चाहे मिओ मिधिङ्मादेमा पोङ्ॽ॥ 18 तङ्जुम् सिदुङ्जभाओबा सान् कुआत्छिन्दाःन् कुभारे़ चने़भग्र खे़न् सान् याम्ले़ मे़न्दाःक्मनाबा पोङ्ॽ, मेःन्ने़भग्र खे़ल्ले़ तोःन्दुबान् निङ्वाॽफुमाङ्ङिल्ले़ मे़दाःन्तुन्ॽ, कर खे़न् आसुत्थो पोङ्ॽ, हे़क्क्याङ् खे़न् के़जाबा मनाःल्ले़ खुम्दिङ् खोसुॽ॥ 19 “‘कुभा आसुत्थो थेःल्ले़साङ् सुसुबा सान् मे़जाम्मिन्ने़ॽ॥ मिओ खे़न् मिधिक्खे़म्मे़ॽ॥ वेॽ सान् चाए, आक्खे़म्म्याक् मना सुत्थो मे़वाॽ खे़ङ्हाॽरे़ खे़न् चामा मे़सुक्तुॽ॥ 20 कर खुने़ॽ आसुत्थो पोङ्ङाङ् यहवे दाङ्बाओ तोःम्मनाबा तङ्जुम् वयागे़न् सिदुङ्जभा सान् कुभारे़ चने़भग्र खे़न् खुने़ॽ कुमनाहाॽलाम् मे़लःत्तु मे़देसुर॥ 21 कुभा मनाःल्ले़ कुभा आसुत्थो पाःन्हाॽ सुसुॽ आसुत्थो मनालाम् के़लःम्बा पान् आसुसुबा पान् इग्र आसुत्थो थक्सासाङ् इग्र खाम्बाङ्ङो के़उःङ्सिङ्बा वेॽ सिक्के़ले़ःङ्बा पाःन्हाॽ सुसुआङ् यहवे दाङ्बाओ तोःम्मनाबा तङ्जुम् वयागे़न् सिदुङ्जभा सान् चने़भग्र, खे़न् खुने़ॽ कुमनाहाॽलाम् मे़लःत्तु मे़देसुररो॥’” सासोःत् नु सामाक्खिॽ चामा मे़नुॽने़न् 22 याम्मो यहवे दाङ्बे़ल्ले़ मोसान् मे़त्तु, 23 “इस्राइलिहाॽ मे़त्ते़से़ॽ—‘खिनिॽ से़गम्बा इग्र मे़ल्लुक् किग्र मे़ःन्दाःल्ले़ कुसोत् थे़माआङ् मे़जाम्मिन्ने़ॽ॥ 24 आबाङे के़सिबा नु कुभा ताम्भुङ् थक्साहाॽरे़ मे़भुयुआङ् मे़से़रुबा कुभा थक्साःल्ले़ कुसोःत्तिन् कुभा वेॽ याःम्बक्को ओगप् के़जोगुम्मिल्ले़ पोङ्ॽ, कर आक्खेआङ्साङ् खे़न् मे़जाम्मिन्ने़ॽ॥ 25 यहवे दाङ्बाल्ले़ कुलागि मिओलाम् तोःम्मनाबा सिदुङ्जभाःल्ले़ कुसोःत्तिन् आत्तिन् मनाःल्ले़ चःॽ खे़न् मनान् कुमनाहाॽलाम् मे़लःत्तु मे़देसुर॥ 26 खिनिॽ के़युङिबा आत्तिन् ते़न्नोसाङ् आत्तिन् पुसा इग्र थक्साःल्ले़ कुमाक्खिॽ मे़जाम्मिन्ने़ॽ॥ 27 माक्खिॽ के़जाबा आत्तिन् मनाःन्छाङ् खुने़ॽ कुमनाहाॽलाम्बा खे़न् मे़लःत्तु मे़देसुर॥’” 28 यहवे दाङ्बे़ल्ले़ मोसान् मे़त्तु, 29 “इस्राइलिहाॽ मे़त्ते़से़ॽ—‘यहवे दाङ्बे़ल्ले़ कुलागि तङ्जुम् सिदुङ्सभा के़दोःम्बे़ल्ले़ तङ्जुम् सिदुङ्जभाःल्ले़ लत्छा कुलक् सिदुङ्जभा कुइसिक् यहवे दाङ्बाओ तारुर॥ 30 खे़ल्ले़ यहवे दाङ्बे़ल्ले़ कुलागि मिओलाम् तोःम्मा के़बोङ्बा सिदुङ्जभान् आबाङे खुने़ॽ कुहुक्किल्ले़ तारुर॥ खे़ल्ले़ सासोःत्तिन्, कुसङ्बप्मे़न्नाङ् तारुर, हे़क्क्याङ् कुसङ्बे़ॽमे़न् चाहे यहवे दाङ्बे़ल्ले़ कुदगि थाःङ् पङ्मनाबा सिदुङ्जभारे़ लागि थाःङ् पक्खुर॥ 31 निङ्वाॽफुसाम्बे़ल्ले़ सासोःत्ते़न् ले़त्ति तोःम्मादे़न्नो मिधिक्खुर, कर कुसङ्बप्मे़न् चाए हारुने़न् नु कुस्साहाॽरे़ खुन्छिॽ लक् पोङ्ॽ॥ 32 कुजुप्साङ् ले़प्माङ्बा कुलाङ्भे़ल्ले़क्मान् चाहे खिनिॽ आबाङे तङ्जुम् सिदुङ्जभालाम् हुक्वा कुइसिक् निङ्वाॽफुसाम्बान् पिरे़म्मे़ॽ॥ 33 हारुने़ल्ले़ कुस्साहाॽओलाम् हाःत्ले़ तङ्जुम् सिदुङ्जभाःल्ले़ कुमाक्खिन् नु कुसोःत्तिन् तोःन्दु, कुजुप्साङ् ले़प्माङ्बा कुलाङ्भे़ल्ले़क्मान् खे़ल्ले़ कुलक् पोङ्ॽ॥ 34 थेआङ्भे़ल्ले़ इस्राइलिहाॽरे़ खुन्छिॽ तङ्जुम् सिदुङ्जभालाम्बा थाःङ् पङ्मनाबा कुसङ्बप्मान् नु फोःङ्मनाबा कुलाङ्भे़ल्ले़क्मान् आङ्गाॽ खिनिॽलाम् याङ्सिङ्ङा हे़क्क्याङ् इस्राइलिहाॽरे़ खुन्छिॽ ले़प्माङ्लाम् हारुने़न् नु खुने़ॽ कुस्साहाॽ सदादिङ् पिरुङ्सिङ्ङाङ् वाॽ॥’” 35 हारुने़न् नु खुने़ॽ कुस्साहाॽ आत्तिन् ये़न्नो निङ्वाॽफुसाम्बा ताक्फाओ यहवे दाङ्बाल्ले़ कुलागि माङ्से़वा चोःक्से़ माङ्थोःक्ना मे़बिरुसिआङ् मे़वये़, हाबा खे़ल्ले़ याःन्दिक्के यहवे दाङ्बे़ल्ले़ कुलागि मिओलाम् यहवे दाङ्बाओ तोःम्मनाबा सिदुङ्जभाहाॽलाम् कन् खे़ङ्हाॽरे़ खुन्छिॽ लक् पोःक्खे़आङ् वये़॥ 36 आत्तिन् ये़न्नो खुने़ॽ खे़ङ्हाॽ माङ्थोःक्ना पिरुसिआङ् वये़ आम्भा खे़ल्ले़ याःन्दिक्के इस्राइलिहाॽलाम्बा खे़ङ्हाॽरे़ खुन्छिॽ खोमा के़बोङ्बा कन् लक्किन् यहवे दाङ्बाल्ले़ इङ्जाङ् पिरुसिआङ् वये़॥ खे़ङ्हाॽरे़ खुन्छिॽ थाःक्थाःक्ले़ लागि कन् सदादिङ्बा लक् पोङ्ॽ॥ 37 मिधिङ्मनादेमनाबा सिदुङ्जभा, पोगुगे़न् कुजा सिदुङ्जभा, लायोलाम् ले़प्मि खोमा सिदुङ्जभा, आप्तिक्लाम् ले़प्मि खोमा सिदुङ्जभा, तोःम्मनाबा सिदुङ्जभा नु तङ्जुम् सिदुङ्जभारे़ लागि थिम्हाॽ हाबा कन्हाॽएरो॥ 38 खे़न् साम्योथिम्मिन् सिनै कोःक्माओ यहवे दाङ्बे़ल्ले़ मोसान् पिरुआङ् वये़, हाबा खे़ल्ले़ याःन्दिक् सिनैबा मुरे़क् खारे़क् थेआङ् के़होप्पादे़न्नो यहवे दाङ्बे़ल्ले़ इस्राइलिहाॽ खुन्छिॽ सिदुङ्जभाहाॽ खुने़ॽओ ताःप्मारे़ लागि इङ्जाङ् पिरुसिआङ् वये़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.