ले़बि 6 - लिम्बु1 याम्मो यहवे दाङ्बे़ल्ले़ मोसान् मे़त्तु, 2 “कॽयो के़बप्पा पाःन्हाॽ इसिःक्—कुभारे़ कन् फे़न्याःम्बक्हाॽ चोगुआङ् यहवे दाङ्बे़ल्ले़ कुदक्ले़ङ्वाओ लायो चोगुने़भग्र, कुभारे़ कप्मा मे़बिरुबा पाःन्नो, तिःक्को मे़युक्खुबा चिगक्वान् खुःत्तु इग्र खुःत्तुबा पाःन्नो हिम्बेसाङ्बे़न् इङ्ले़क्तुने़भग्र, 3 इग्र के़माबा चिगक्वान् खोसुसाङ् इङ्ले़क् पाःत्तुने़भग्र, इग्र मनाहाॽरे़ चक्मे़ल्लॽए मे़जोगुआङ् मे़बप्पा इङ्ले़क् चोःक्मा लायोहाॽरे़ कुयाःम्बेओ माङ्हे़क्सिङ्ने़भग्र— 4 आल्ल खे़ल्ले़ कम्भलॽरिक् लायो चोगुआङ् आप्तिक्साबा पोःक्खे़आङ् वाॽ, खे़ब्याङ् खे़ल्ले़ खुःत्तुबा, तेॽरुबा, माॽरु कत्तुबा सामा, के़माबा सामा खोसुबा, 5 इग्र च्याज्या पाःन्निल्ले़ कुयाःम्बेओ खे़ल्ले़ मे़न्वाॽमनाबा पाःन्नो माङ्हे़क्सिङ्ङाङ् वाॽने़भग्र, खे़ल्ले़ कन् के़रे़क् पाःन्हाॽओ कुलक् ङासि योॽरुआङ् के़रे़क् नुःक्तुर पोङ्ॽ॥ खे़ल्ले़ आप्तिक्लाम् ले़प्मि खोमा सिदुङ्जभा तोःन्दुबा ये़न्निल्ले़ याःन्दिक्के खे़न् सामाःन् हाःत्ले़ कुसामा वये़, खुने़ॽए खे़न् नुःक्तुर पिरुर पोङ्ॽ॥ 6 हे़क्क्याङ् खे़ल्ले़ निङ्वाॽफुसाम्बाओ, इग्र यहवे दाङ्बाओ यारुबा कुमे़ल्लुङ् कुइसिक् खुने़ॽ कुआप्तिक्किल्ले़ लागि मे़ङ्गाःम्मनाबा थुःम्बा थिक् वयागे़न् सिदुङ्जभा तारुर पोङ्ॽ॥ 7 कम्भलॽरिक् निङ्वाॽफुसाम्बाल्ले़ खे़ल्ले़ कुलागि यहवे दाङ्बे़ल्ले़ कुदगि लायोलाम् ले़प्मि नाःक्तु पिरुॽ, हे़क्क्याङ् आत्तिन् पाःन्निल्ले़ चोगुल्ले़ खुने़ॽ आप्तिक्साबा पोःक्खे़बा, खे़न् पाःन्नो खुने़ॽ ले़प्मि खोसुरो॥” मिधिङ्मनादेमनाबा सिदुङ्जभा 8 यहवे दाङ्बे़ल्ले़ मोसान् मे़त्तु, 9 “हारुने़न् नु खुने़ॽ कुस्साहाॽ अक्तङ्बा इङ्जाङ् पिरे़से़ॽ—‘मिधिङ्मनादेमनाबा वयागे़न् सिदुङ्जभा साम्योथिम्हाॽ हाबा कन्हाॽरो—मिधिङ्मनादेमनाबा वयागे़न् सिदुङ्जभान् सिङ्सम्धाङ् से़न्दिक् नाम्दाःत्तात् तानाम् थारिक् ले़त्ति तोःम्मादे़न्नो ने़र, हे़क्क्याङ् ले़त्ति तोःम्मादे़न्नोबा मिन् खे़ॽयो तिःत्ताङ् युङ्ल॥ 10 निङ्वाॽफुसाम्बे़ल्ले़ नैनासुत् चिरिक्किल्ले़ कुजाङ्ङिन्, नैनासुत् चिरिक्किल्ले़न् सिगाङ् चाङ्मनाबा कजाङ्ङिन्नाङ् कुधक्को चाक्खुॽ, खे़ब्याङ् मिःल्ले़ खाप्पुथ्यःङ् मिधिक्खुबा मिधिङ्मनादेमनाबा सिदुङ्जभाओबा खाप्पुःन् चाहे खे़ल्ले़ लःत्तुआङ् ले़त्ति तोःम्मादे़न्निल्ले़ कुबेसाङ् हुक्खुर॥ 11 खे़ब्याङ् खे़ल्ले़ कन् कुजाङ्हाॽ फे़न्दुआङ् वेॽ चाङ् चाक्सिङ्ल हे़क्क्याङ् साःङ्गाहिम्हाॽलाम् लाःक्कात् लत्छा सेसे साङ्साङ्बादे़न्नो खे़न् खाप्पुःन् पक्खु तेॽरुर॥ 12 ले़त्ति तोःम्मादे़न्नोबा मिन् तिःत्ताङ्ङे युङ्ल हे़क्क्याङ् खे़न् मे़सिने़न्ल॥ तानाम् थक्मा निङ्वाॽफुसाम्बाल्ले़ खे़प्मो सिङ्हाॽ योॽरुर, खम्भ्याङ् मिधिङ्मनादेमनाबा सिदुङ्जभान् मिओ तङ्सुआङ् खे़ल्ले़ कुसम्धाङ् तङ्जुम्बा सिदुङ्जभाःल्ले़ कुसोःत्तिन् मिधिक्खुर॥ 13 ले़त्ति तोःम्मादे़न्नो चक्मे़ल्लॽए मिन् तिःत्ताङ्ङे युङ्ल, खे़न् आभे़ल्ले़आङ् मे़सिने़न्लरो॥ पोगुगे़न् कुजा सिदुङ्जभा 14 “‘पोगुगे़न् कुजा सिदुङ्जभा साम्योथिम्मिन् हाबा कन्हाॽएरो—हारुने़ल्ले़ कुस्साहाॽरे़ यहवे दाङ्बे़ल्ले़ कुदगि ले़त्ति तोःम्मादे़न्निल्ले़ तगाङ् ले़प्माङ् खे़न् मे़दारुर॥ 15 निङ्वाॽफुसाम्बाल्ले़ पोगुगे़न् कुजा सिदुङ्जभाःल्ले़ लागि सोःल्लाक् थिक् चुन्जुम्बा फेॽरुम् नु हुक्पक् थिक् निःङ्गेःन् याङ्सिङ्ङाङ् के़रे़क् सुक्पान् यहवे दाङ्बाल्ले़ कुलागि कुनाम्गे़नुॽबा कुनाम् पोङ्मारे़ लागि हुक्वा हे़क्तङ्बा लक् ले़त्ति तोःम्मादे़न्नो मिधिक्खुर॥ 16 के़नम्बान् हारुने़न् नु खुने़ॽ कुस्साहाॽरे़ मे़जररो॥ कर लत्छा सेसेबादे़न्नो के़भङ्बा सिदाॽ मे़न्याक्के खे़न् मे़जर॥ तुम्मादे़न् साःङ्गाहिम्मोबा लक्खुम्मो खे़ङ्हाॽरे़ खे़न् मे़जर॥ 17 खे़न् खरे़ःङ् के़भङ्बा सिदाॽइन्नु थोःक्मा मे़नुॽने़न्॥ मिलाम् तोःम्मनाबा आङ्गाॽ आसिदुङ्जभाहाॽलाम् खे़ङ्हाॽरे़ खुन्छिॽ खोमा लक् हे़क्तङ्बा आङ्गाॽ खे़ङ्हाॽ पिरुङ्सिङ्ङाङ् वाॽ॥ लायोलाम् ले़प्मि खोमा सिदुङ्जभा नु आप्तिक्लाम् लायो खोमा सिदुङ्जभा हे़क्के खे़न्नाङ् साॽरिक् सेसेबा चोक्॥ 18 हारुने़ल्ले़ कुमुॽइदाङ्साहाॽओ आत्तिन् ये़म्बित्छा साःल्ले़साङ् खे़न् चामा सुक्तुॽ॥ यहवे दाङ्बाल्ले़ कुलागि मिओलाम् तोःम्मनाबा सिदुङ्जभाहाॽओलाम् खे़ङ्हाॽरे़ खुन्छिॽ के़रे़क् थाःक्को थारिक् कन् खे़ङ्हाॽरे़ खुनिॽ खोमा लक् पोङ्ल॥ खे़ल्ले़ सुसुबा के़रे़क् पाःन्हाॽ सेसे पोङ्ॽ॥’” 19 याम्मो यहवे दाङ्बे़ल्ले़ मोसान् मे़त्तु, 20 “हारुने़न् नु खुने़ॽ कुस्साहाॽ निःङ्गेल्ले़ मे़ले़ःक्तुसिआङ् मे़सेःन्दुसिबा ये़न्नो निङ्वाॽफुमाङ्ङो तोःम्मा के़बोङ्बा सिदुङ्जभान् आम्भा कन्लो, इग्र किलो थिक् चुन्जुम्बा फेॽरुम्, तानाम् कुभ्रे़ःक्, युःन्छिक् कुभ्रे़ःक् तोःन्दे़ॽ॥ आल्लआङ्धो आभे़ल्ले़साङ् पोगुगे़न् कुजा सिदुङ्जभा तोःन्दे़ॽ॥ 21 निःङ्गेन्नु कन् नुरिक् फःन्दे़ॽआङ् खरे़ःङ् ले़ःङ्मा खेःक्याओ ले़ःक्खे़ॽ, हे़क्क्याङ् यहवे दाङ्बे़ल्ले़ कुलागि कुनाम्गे़नुॽबा कुनाम् हे़क्के पोङ्ल कुघे़ःङ् कुघे़ःङ् चोगे़ॽआङ् पोगुगे़न् सिदुङ्जभा तोःन्दे़ॽ॥ 22 खे़ल्ले़ कुस्साहाॽओ आत्तिन् खुने़ॽ कुदाक्फाओ निङ्वाॽफुसाम्बा माङ्थोःक्ना मे़बिरुॽ, आम्भा खे़ल्ले़ कन् तोःन्दुर॥ कङ्ग यहवे दाङ्बे़ल्ले़ आभे़ल्ले़साङ् कुघोमा लक्लो, हे़क्क्याङ् कन् खक्पे़त् मिधिङ्मा पोङ्ॽ॥ 23 निङ्वाॽफुसाम्बाल्ले़ तोःन्दुबा के़रे़क् पोगुगे़न् कुजा सिदुङ्जभान् खप्पे़त् मिधिङ्मादेमा पोङ्ॽ॥ कन् चामा मे़नाॽने़न्लो॥” लायोलाम् ले़प्मि खोमा सिदुङ्जभा थिम्हाॽ 24 यहवे दाङ्बे़ल्ले़ मोसान् याम्मो मे़त्तु, 25 “हारुने़न् नु खे़ल्ले़ कुस्साहाॽ अक्खे मे़त्ते़से़ॽ ‘लायोलाम् ले़प्मि खोमा सिदुङ्जभा साम्यो थिम्मिन् हाबा कन्लो—आत्तिन् ते़न्नो मिधिङ्मनादेमनाबा सिदुङ्जभान् से़प्मा पोङ्ॽ, हाबा खे़न् ते़न्नो यहवे दाङ्बे़ल्ले़ कुदगि लायोलाम् ले़प्मि खोमा सिदुङ्जभान् से़प्मा पोङ्ॽ॥ कन् साॽरिक् सेसेबा सिदुङ्जभारो॥ 26 कन् के़दोम्बा निङ्वाॽफुसाम्बे़ल्ले़ कन् चर॥ सेसेबादे़न्नो, तुम्मादे़न् साःङ्गाहिम्मोबा लक्खुम्मो मे़जर॥ 27 थेःल्ले़ खे़न् सान् सुसुॽ, खे़न् सेसे पोङ्ॽ॥ खे़ल्ले़ कुमाक्खिल्ले़ कुभा चाङ्ङिन् पित्तुने़भग्र खे़ङ्हाॽरे़ खे़न् माक्खिल्ले़ पित्तुबा चाङ्ङिन् कुभा सेसेबादे़न्नो वाहप्मा पोङ्ॽ॥ 28 आत्तिन् फुजिक्को खे़न् सान् थे़म्मा पोङ्ॽ, खे़न् फुजिक्किन् हे़प्मा पोङ्ॽ॥ कन् सान् कासा खप्प्याओ थे़म्मा पोङ्ने़भग्र, खे़न् इःङ्माआङ् च्वाःत्तिल्ले़ वरे़क्मा पोङ्ॽ॥ 29 निङ्वाॽफुसाम्बा हिम्सयङ्ङोबा आत्तिन् ये़म्बित्छा साःल्ले़साङ् खे़न् चामा सुक्तुॽ॥ कन् साॽरिक् सेसेबा चोक्॥ 30 कर लायोलाम् ले़प्मि खोमा आत्तिन् सिदुङ्जभाःल्ले़ कुमाक्खिन् सेसेबादे़न् साःङ्गाहिम्मो लायोलाम् ले़प्मि नाःक्मारे़ लागि मे़दारुॽ, खे़न् सिदुङ्जभान् चामा मे़नुॽने़न्॥ कन् मिओ मिधिङ्मादेमाए पोङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.