ले़बि 5 - लिम्बुलायोलाम् ले़प्मि खोमा सिदुङ्जभाहाॽ 1 “‘कुभा मनाःल्ले़ लायो चोगुबा पाःन्निन् के़निबा मनान् साखि पोङ्ङाङ् मनाहाॽरे़ खुनिॽ तगि पाःप्मा पोङ्ङिल्ले़आङ् खुने़ॽ निसुबा नु ले़सुबा पाःन्निन् मे़बाःत्तुन्ने़भग्र, खे़ल्ले़ लागि खुने़ॽ आप्तिक्साबा पोङ्ॽ॥ 2 “‘कुभा मनाःल्ले़ निङ्वाॽ मे़ङ्घोए कुभा आसुत्थो पान् थेसाङ्, आसुत्थो ताम्भुङ् थक्सा थेसाङ् आसुत्थो हिङ्मनाबा थक्सा, आसुत्थो के़सःन्छिङ्बा के़सिबा थक्सान् सुसु, हे़क्क्याङ् खे़न् पाःन्निन् खुने़ॽ निङ्वाॽ मे़घोसुन्छाङ् खुने़ॽ आसुत्थो पोङ्ॽ, खे़ब्याङ् आप्तिक्साबा पोङ्ॽ॥ 3 “‘कुभा मनाःल्ले़ निङ्वाॽ मे़ङ्घोए मनालाम् के़लःम्बा आसुत्थो आजोःक्चोःक्पा पाःन्निन् सुसुॽ हे़क्क्याङ् खे़न् खुने़ॽ निङ्वाॽ खोसुल्ले़ खे़न् आप्तिक्साबा पोङ्ॽ॥ 4 “‘कुभारे़ निङ्वाॽ मे़न्इःत्छिङ्ङे कुभा नुबा इग्र ताप्फे़ःम्बा पान् चोःक्मारे़ लागि कुम्ब्राःल्ले़ माङ्हे़क् चोगु—हे़क्क्याङ् च्याज्या पाःन्नो मनान् निङ्वाॽ मे़न्इःत्छिङ्ङे माङ्हे़क्सिङ्ॽ—खे़प्मोलाम्बा खे़न् पाःन्निन् निमे़धाःप्ने़न्छाङ् खे़ल्ले़ खे़न् पाःन्निन् निङ्वाॽ खोसुआङ् हे़क्तङ्बा पाःन्नो खे़न् आप्तिक्साबा पोङ्ॽ॥ 5 “‘कुभा मनाःल्ले़ आप्तिक्साबाआ फाॽआङ् खे़न् कुभा पाःन्हाॽओ निङ्वाॽ खोसुने़भग्र खुने़ॽ चोगुबा लायोओ खुने़ॽ ते़न्ल पोङ्ॽ॥ 6 खे़ल्ले़ चोगुबा खे़न् लायोल्ले़ खुम्दिङ्ङिल्ले़ लागि यहवे दाङ्बाओ थक्सा लुप्पोलाम् मे़ल्लुक् इग्र कुम्मामा मे़ःन्दाज्याःक् थिक् लायोलाम् ले़प्मि सिदुङ्जभा कुइसिक् खे़ल्ले़ तारुर पोङ्ॽ॥ निङ्वाॽफुसाम्बाल्ले़ खे़ल्ले़ कुलायोल्ले़ लागि ले़प्मि नाःक्तु पिरुॽ॥ 7 “‘मे़ःन्दाज्याःक् ताःप्मा खे़ल्ले़ मे़सुक्तुन्ने़भग्र, खे़ल्ले़ खुने़ॽ चोगुबा खे़न् लायोल्ले़ खुम्दिङ्ङिल्ले़ लागि ने़त्छि साप्पे़त्त्रुःक्मा इग्र पे़र्वाःल्ले़ कुस्सा ने़त्छि यहवे दाङ्बाओ तारुसिर—लत्छा लायोलाम् ले़प्मि खोमा सिदुङ्जभा नु वेॽइन् मिधिङ्मनादेमनाबा सिदुङ्जभारे़ लागि पोङ्ल॥ 8 खे़ल्ले़ निङ्वाॽफुसाम्बाओ खे़ङ्हाॽ तारुसिर॥ खे़ल्ले़ लत्छा चाहे लायोलाम् ले़प्मि खोमा सिदुङ्जभाःल्ले़ लागि तगि तोःन्दुॽ॥ खुने़ॽ खे़ल्ले़ कुसित्लाओ ते़म्सुआङ् खइक् इगुर, कर खे़न् स्याक् मे़भुॽरुन् मे़देसुन्ल॥ 9 हे़क्क्याङ् ले़त्ति तोःम्मादे़न्निल्ले़ कुयाम्ले़ङ्बो लायोलाम् ले़प्मि खोमा सिदुङ्जभाःल्ले़ कुमाक्खिॽओलाम् निङ्वाॽफुसाम्बाल्ले़ कुभा साक्खुर, हे़क्क्याङ् के़नम्बा कुमाक्खिन्ग ले़त्ति तोःम्मादे़न्निल्ले़ कुयाम्ले़ङ्बो छ्वाःक् हुक्खुदेसुर॥ कन् लायोलाम् ले़प्मि खोमा सिदुङ्जभारो॥ 10 खे़न् एगाङ् निङ्वाॽफुसाम्बाल्ले़ वेॽइन् मिधिङ्मनादेमनाबा सिदुङ्जभारे़ लागि साम्योसाक्थिम् कुइसिक् तोःन्दुॽ॥ खे़ल्ले़ चोगुबा लायोल्ले़ लागि कम्भलॽरिक् निङ्वाॽफुसाम्बाल्ले़ लायोलाम् ले़प्मि नाःक्मा याःम्बक् चोगुॽ, खे़ब्याङ् खे़ल्ले़ ले़प्मि खोसुॽ॥ 11 “‘कर ने़त्छि साप्पे़त्त्रुःक्मा इग्र पे़र्वा च्याःक् ने़त्छि ताःप्माआङ् मे़सुक्तुन्ने़भग्र, खे़ल्ले़ थे़मा पाःन्नो लायो चोगु, खे़ल्ले़ लागि खुने़ॽ हुक्वा कुइसिक् लायोलाम् ले़प्मि खोमा सिदुङ्जभारे़ लागि किलोधिक् चुन्जुम्बा फेॽरुम् तारुर॥ खे़ल्ले़ खे़प्मो निःङ्गेॽ नु सुक्पा याक्मा मे़नुॽने़न्, थेआङ्भे़ल्ले़ कन् लायोलाम् ले़प्मि खोमा सिदुङ्जभारो॥ 12 खुने़ॽ खे़न् निङ्वाॽफुसाम्बाओ तारुर॥ हे़क्क्याङ् निङ्वाॽफुसाम्बाल्ले़ खे़प्मोलाम् हुक्वा कुइसिक् सोःल्लाक् थिक् याङ्सिङ्ङाङ् यहवे दाङ्बाल्ले़ कुलागि मिओ मिधिङ्मनादेमनाबा सिदुङ्जभा सम्धाङ् ले़त्ति तोःम्मादे़न्नो मिधुक्खुर॥ कन् लायोलाम् ले़प्मि खोमा सिदुङ्जभारो॥ 13 खे़ल्ले़ खे़न् पाःन्हाॽओबा आत्तिन् पाःन्निल्ले़ कुयाःम्बेओ लायो चोगुआङ् वाॽ, निङ्वाॽफुसाम्बाल्ले़ खे़ल्ले़ कुलागि लायोलाम् ले़प्मि नाःक्तु पिरुॽ, हे़क्क्याङ् खे़ल्ले़ कुलायोन् ले़प्मि पोङ्ॽ॥ के़नम्बा सिदुङ्जभान् चाहे पोगुगे़न् कुजा सिदुङ्जभा हे़क्के निङ्वाॽफुसाम्बाल्ले़ कुलक् पोङ्लो॥’” आप्तिक्लाम् ले़प्मि खोमा सिदुङ्जभा 14 याम्मो यहवे दाङ्बे़ल्ले़ मोसान् अक्खे मे़त्तु, 15 “कुभा मनाःल्ले़ यहवे दाङ्बे़ल्ले़ कुसेसे पाःन्हाॽ पिमा निङ्वाॽ फेःत्छुआङ् मे़न्नि मे़न्धा लायो चोगुल्ले़ खे़ल्ले़ यहवे दाङ्बाओ सेसेदे़न्नोबा सेकेल खानिःत् कुइसिक् थुःम्बाःल्ले़ कुमे़ल्लुङ् कुइसिक् यारुबा थक्सा लुप्पोलाम् मे़ङ्गाःम्मनाबा थुःम्बाःन् खुने़ॽ खोमा के़बोङ्बा खुम्दिङ्ङिल्ले़ कुले़क्वाओ ताःप्मा पोङ्ॽ॥ कङ्ग साम्बान् हुङ्मा वयागे़न् सिदुङ्जभारो॥ 16 खे़ल्ले़ आत्तिन् सेसे पाःन्निन् चोःक्मा मे़गे़त्तुन्नाङ् वाॽ खे़ल्ले़ कुले़क्वा खुने़ॽ हुङ्मा पोङ्ॽ, हे़क्क्याङ् खे़ल्ले़ ङासिगेक्पा कुलक् आल्लसाङ् हुङ्मा पोङ्ॽ, खे़ब्याङ् निङ्वाॽफुसाम्बान् खे़न् के़रे़क् पिमा पोङ्ॽ॥ निङ्वाॽफुसाम्बाल्ले़ आप्तिक्लाम् ले़प्मि खोमा सिदुङ्जभा थुःम्बाःन् लाम्बा खे़ल्ले़ कुलागि लायोलाम् ले़प्मि नाःक्तु पिरुॽ, हे़क्क्याङ् खे़ल्ले़ कुलायोन् ले़प्मि पोङ्ॽ॥ 17 “यहवे दाङ्बे़ल्ले़ चोःक्मा मे़नुॽने़न् फाॽआङ् पाःत्तुबा कुभा पाःन्हाॽ चोगुआङ् कुभा मनाःल्ले़ लायो चोगुॽ, हे़क्क्याङ् खे़न् खुने़ॽ निङ्वाॽ मे़घोसुन्छाङ् खुने़ॽ आप्तिक्साबा पोङ्ॽ हे़क्क्याङ् खे़ल्ले़ खुम्दिङ् खोसुॽ॥ 18 यारुबा कुमे़ल्लुङ् कुइसिक् खुने़ॽ कुधक्सा लुप्पोलाम् कुलाङ् मे़न्छक्मनाबा मे़ङ्गाःम्मनाबा थुःम्बा थिक् खुने़ॽ आप्तिक्लाम् ले़प्मि खोमा सिदुङ्जभारे़ लागि निङ्वाॽफुसाम्बाओ तारुर॥ खे़ल्ले़ निङ्वाॽ मे़ङ्घोए मे़न्नि मे़न्धा चोगुबा फे़न्याःम्बक्किल्ले़ कुले़क्वा कम्भलॽरिक् निङ्वाॽफुसाम्बाल्ले़ ले़प्मि नाःक्तु पिरुॽ, हे़क्क्याङ् खे़ल्ले़ कुलायोन् ले़प्मि पोङ्ॽ॥ 19 कन् खे़ल्ले़ यहवे दाङ्बे़ल्ले़ कुदक्ले़ङ्वाओ चोगुबा आप्तिक्लाम् ले़प्मि खोमा वयागे़न् सिदुङ्जभारो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.